Jɔŋ 14
14
Jiso nɔ bɛ fia ndə məgɛ̀ tʉ mbʉ Tie
1 “Kə bii mə mɛ̀ʼtə fyiihə-ii kə́ chɔ́ŋhə bii fɛ. B̈ii mɔ̀ʼfyiihə-ii ndəŋ Nyii, bɔŋleʼ mɔ̀ʼfyiihə-ii ndəŋ mɔ ghɔ. 2Njəŋ-njaa-hə nɔ bɛ mu njaa-Tie-ɔ yɔ́ŋyɔ́ŋ. Kaʼ i kʉ̌ʉ gòʼ təmə bɛ nɔ fɛ, təmə mɔ mə ghɔ̀ŋ tʉ bii mbɔ mɔ gɛ̀ shʉ̀tə yəŋkə tʉ bii fɛ. 3Kaʼ mɔ gɛ̀ shʉ̀tə yəŋkə tʉ bii, mɔ bʉ̀nə gwè lʉ̀ bii tʉ mbəŋ-ɔŋ, mbɔ yəŋkə ndə mɔ bɛ chɔ, bii chʉʼ leʼ bɛ ghɔ chɔ. 4Bii bɔŋleʼ kínə fia kəyəŋ ndə mɔ tʉʼ gɛ̀ chɔ.”
5Tɔmɔ ghɔ̀ŋ tʉ ɔŋ mbɔ, “Tiekətʉ, baʼa kínə yəŋkə ndə a tʉʼ gɛ̀ chɔ fɛ. Bəkɔ baʼa kínə mbʉ fia təka?”
6Jiso ghɔ̀ŋ tʉ ɔŋ mbɔ, “Mɔ nɔ bɛ mbʉ fia, kə́ bɛ mbʉ shʉəŋ bɔŋ-kə́-leʼ bɛ mbʉ məchímbi. Wo mə nə gwè tʉ mbʉ Tie fɛ, yaʼkɛŋ mbɔ ɔ tíŋ hə bɔ̌ŋ mɔ. 7Bii kʉ̌ʉ nɔʼ kə kínə mɔ təmə bii nɔʼ kə kínə Tie-ɔ ghɔ. Lʉ̀ hə nduɔ gɛ̀ nə shʉbə bii nɔʼ kínə ɔŋ bɔŋ-nɔʼ-leʼ nyíɛ ɔŋ.”
8Fili ghɔ̀ŋ tʉ ɔŋ mbɔ, “Tiekətʉ, dʉ̀ʼ mbʉ Tie tʉ baʼa, f̈yiihə-aʼ shíʼ.”
9Jiso ghɔ̀ŋ tʉ ɔŋ mbɔ, “Bʉʼʉ nɔʼ chí dɔ̀ŋnə mənɔ, təmə a kínə mɔ fɛ la, Fili? Wo ndə ɔ nɔʼ nyíɛ mɔ, nɔʼ nyíɛ mbʉ Tie. Bəkɔ a bʉ̀nə ghɔŋ təka mbɔ, ‘Dʉ̀ʼ mbʉ Tie tʉ baʼa’? 10A bɛ́ŋ mbɔ mɔ bɛ mu mbʉ Tie, mbʉ Tie kə́ bɛ mu mɔ fe? Ŋgiebə ndə mɔ tʉʼ kwə́ʼ tʉ bii, mɔ tʉʼ kwə́ʼ nə yɔŋ-yə ghʉəʼkə fɛ, bɔŋ kə́ fɔ̀ʼ mbʉ Tie ndə ɔ tʉʼ chí mu mɔ, nɔ tʉʼ fɔ̀ʼ ɔ, fɔ̀ʼ fɔʼtə-i. 11B̈ii bɛ́ŋ mbɔ mɔ bɛ mu mbʉ Tie, mbʉ Tie kə́ bɛ mu mɔ, kaʼ byuunɔ, b̈ii bɛ́ŋ bʉʼka mbʉ təfɔʼ nə mbəŋtə-ʉə.
12 “M̈ɔ kɛŋ shyíi bii nə shʉəŋ, wo ndə ɔ bɛ́ŋ mɔ bu fɔ̀ʼ fɔʼtə ghɔ ndə mɔ tʉʼ fɔ̀ʼ, bɔ̂ŋ bu buŋ fɔ̀ʼ nukwɛʼtəŋbə tə chàa bɔ̄ŋbə ndə mɔ tʉʼ fɔ̀ʼ nɔ bʉʼka mɔ nɔ tʉʼ gɛ̀ tʉ mbʉ Tie. 13Fɔkə təmiyɔŋ ndə bii bíʼtə nə yie-ɔ, nɔ nukə ndə mɔ bu fɔ̀ʼ mbɔ mbʉ Tie chʉʼ kie məgʉ́ə mu mbʉ Vaa. 14Kaʼ bii bíʼtə fɔkə təmiyɔŋ tʉ mɔ nə yie-ɔ, mɔ kɔ́.#14:14 Bəkɔ bə kíahə yəŋkə-ɔ̄ŋ ghɔ mbɔ, Kaʼ bii bíʼtə nukə təmiyɔŋ tʉ mɔ nə yie-ɔ mɔ fɔ̀ʼ.
Jiso kɔ̀ʼnə mbɔ ɔ la bu tə́ŋ mbʉ kəLyʉʉhəNyii
15 “Kaʼ bii kʉ̀ʉ mɔ, bii kə́ fɔ̀ʼ nubə ndə mɔ kàhə tʉ bii. 16Mɔ bu bíʼtə tʉ mbʉ Tie, ɔ tə́ŋ ibɛʼ-yə Wo Ghʉ́əhə Fyii tʉ bii, ndə ɔ bu káa bii bɔŋ təmə liʼ-i ghɔ fɛ. 17Ɔ nɔ bɛ LyʉʉhəNyiikə ndə ɔ bu kɛ̀ʼ shʉəŋ tʉ bii te Nyii. Bʉə-kəwʉʉnəmbi mə bɛ́ŋ ɔŋ fɛ, bʉʼka bɔ̂ŋ tʉʼ nyíɛ ɔŋ fɛ, təmə bɔŋleʼ kínə ɔŋ fɛ. Bii bɔŋ kínə ɔŋ bʉʼka ɔ tʉʼ chí bii bɔŋ mɔʼɔ, bɔŋ-bu-leʼ bɛ mu mbʉə-bii.
18 “Mɔ kʉʉ mɛ̀ʼtə bii nə vâabəti fɛ, mɔ bu gwè tʉ bii. 19Kʉʉkə məniʼ, təmə wʉʉnəmbikə leʼ nyíɛ mɔ fɛ, bii bɔŋ bu nyíɛ mɔ. Bʉʼka mɔ tʉʼ chí mbi, mbəŋ-yii bu kə́ chí mbi ghɔ. 20Kʉ̂ʉ yi bɛ yɔ̂ŋ-ghɔ̄ nɔ, bii kínə mbɔ mɔ nɔ bɛ mu mbʉə Tie-ɔ, bii kə́ bɛ mu mbʉə-mɔ, mɔ bɔŋ-kə́-leʼ bɛ mu mbʉə bii. 21Wo ndə ɔ kie bəŋkahə-bɔŋ bɔŋleʼ kə́ fɔ̀ʼ, nɔ bɛ wo ndə ɔ kʉ̀ʉ mɔ. Wo ndə ɔ kʉ̀ʉ mɔ, Tie-ɔ bu kʉ̀ʉ ɔ, mɔ bɔŋleʼ kʉ̀ʉ ɔ ghɔ leʼ kɛ̀ʼ ŋwɔŋ-ɔŋ tʉ ɔŋ.” 22Juda, kaa bə Iskalo fɛ, ghɔ̀ŋ tʉ ɔŋ mbɔ, “Tiekətʉ, bəkɔ a kɛ̀ʼ ŋwɔŋ-aŋ tʉ baʼa təka təmə kɛ̀ʼ tʉ wʉʉnəmbikə fɛ?”
23Jiso bə̀ŋhə tʉ ɔŋ mbɔ, “Kaʼ wo kʉ̀ʉ mɔ, ɔ̈ yʉ́ ŋgiekə-ɔŋ bɔŋleʼ tʉ́ʼ, Tie-ɔ bɔŋleʼ kʉ̀ʉ ɔ, baʼa Tie-ɔ bu gwè tʉ ɔŋ gwè chí baʼa bɔŋ. 24Wo ndə ɔ gòʼ təmə kʉ̀ʉ mɔ fɛ, mə yʉ́ ŋgiekə-ɔŋ tʉ́ʼ fɛ. Ŋgiekə ndə bii yʉ́ hə kəghɔ-mɔ, kaa yɔŋ-yə fɛ, nɔ bɛ yi-mbʉ-Tie-yə ndə ɔ tə́ŋ mɔ. 25Mɔ nɔʼ kwə́ʼ nubə-ɔ̄ŋ tʉ bii ndʉʉ ndə bʉʼʉ bíe mɔʼɔ. 26Bɔŋ mbʉ Wo Ghʉ́əhə Fyii, LyʉʉhəNyiikə, ndə mbʉ Tie bu tə́ŋ yie-mɔ, bu dàhə bii nə nubə inchəŋ, chìi b̈ii kwɛ́nə nubə inchəŋ ndə mɔ nɔʼ kə shyíi bii nə yɔŋ.
27 “Mɔ nɔ tʉʼ mɛ̀ʼtə bii nə fyiighʉ́ənə, fyiighʉ́ənə-ɔŋ mɔ kɔ́ tʉ bii. Ntɛ ndə mɔ tʉʼ kɔ́ tʉ bii, kaa ntɛ ndə w̃ʉʉnəmbikə kɔ́ fɛ. Kə bii mə mɛ̀ʼtə fyiihə-ii kə́ chɔ́ŋhə bii fɛ, byuunɔ kə́ fàa fɛ. 28Bii nɔʼ yʉ́ ndə mɔ gìe tʉ bii mbɔ, ‘Mɔ nɔ tʉʼ gɛ̀, mɔ bɔŋ-bu-leʼ gwè tʉ bii.’ Kaʼ bii kʉ̀ʉ mɔ, təmə tʉʉ-yii nɔ kə́ bʉ̀ʉ bʉʼka mbɔ mɔ tʉʼ gɛ̀ nyíɛ mbʉ Tie, bʉʼka mbʉ Tie nɔ gʉ́ə chàa mɔ. 29Bɔŋ nduɔ mɔ nɔʼ shyíi bii i buŋ yi fyú sê, mbɔ i kʉ̂ʉ yi fyú nɔ bii chʉʼ bɛ́ŋ mɔ. 30Mɔ bieleʼ kwə́ʼ tʉ bii kwìhə fɛ, bʉʼka wo ndə ɔ tʉʼ sɔ́ʼ wʉʉnəmbikə tʉʼ gwè. Təmə ɔ bɔŋ kie ghʉəʼkə ndə məgìe hə kətʉ-mɔ fɛ, 31mɔ bɔŋ tʉʼ fɔ̀ʼ haʼ ndə mbʉ Tie tʉʼ kàhə mɔ, mbɔ wʉʉnəmbikə chʉʼ kínə mbɔ mɔ la kʉ̀ʉ mbʉ Tie. B̈ii lɔ̀ hə sê b̈ʉʼʉ kwɛ̀ʼtə fɛ̄ŋ.
ទើបបានជ្រើសរើសហើយ៖
Jɔŋ 14: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
