Jɔŋ 12
12
Mɛli yóʼ Jiso Bɛtani
(Matia 26:6-13; Mak 14:3-9)
1Chîbə nɔ kə bíe ntʉʼʉ Yíɛʼsii buŋ chʉ́ʉhə, Jiso gwè dàa Bɛtani, kəyəŋ ndə Lasalɔ kə́ chí chɔ ndə Jiso nɔʼ kə bʉ̀nə kóʼhə ɔŋ vɛʼ ndə ɔ kə kwú. 2Bə chìi fɔyu-ndʉʉbuumbi-bə tʉ ɔŋ chɔ. Mata kə́ gyʉ̀ə mbʉ bəfɔ, Lasalɔ kə́ bɛ ibɛʼ-yə mbyu wo ndə ghɔŋbə Jiso kə́ yú mɔʼɔ. 3Mɛli ndʉʉghɔfii lʉ̀ butʉtə ŋkɛŋ məŋgwobɛʼ ndə yɔ̂ʼkə-i lùŋ bʉ̀ʉ daa, chuɔŋ-ɛŋ bɔŋleʼ chyʉ́ʉ, bə chìi nə tyʉbɛʼkə ndə bə kə́ tíi nə naa, yóʼ wu-Jiso-kə nə yɔŋ bɔŋleʼ yʉ̀əʼtə mbʉ kəwu nə nyu-kətʉ-hə-i. Yɔʼ-mbʉ-məŋgwo-kə lùŋ wɔ̀ʼhə mbʉ mu njaa inchəŋ.
4Bɔŋ Juda Iskalo mbyu vaafɔ̀ʼ-ɛ ndə ɔ kə bɛ ndə məfɛ̀ŋ ɔŋ, ghɔ̀ŋ mbɔ, 5“Chìi ka təmə bə lʉ̀ ŋgwomə-ɔ̄ŋ, fɛ̀ŋ ndə kyʉə fɔʼɔ bəchi njuɔ mɔʼ nə wuŋ, gyʉ̀ətə tʉ bʉə-mbʉʼ?” 6Ɔ kə gìe yɔ̄ŋ-yə bə bʉʼka mbɔ ɔ kie bʉə-kəbyuu mu fyii-ɔ fɛ, bɔŋ bʉʼka mbɔ ɔ kə bɛ lʉʼ, kə́ bɛ̀ʼ ɔ, bɛ̀ʼ kwo-kyʉə, kə́ kwáa ŋwɔŋ-ɛŋ nə fɔkə ndə bə tʉʼ kə́ŋhə muŋgɔ.
7Jiso bə̀ŋhə mbɔ, “Mɛ̀ʼtə ɔŋ chɔ, ɔ nɔ kə́ chìi yɔ̄ŋ-yə ndə məshʉ̀tə mɔ tʉ́ʼ ndəŋ chîkə ndə bə bu yi tyúu mɔ chɔ. 8Biibə bʉə-mbʉʼ bu kə́ bɛ mɔʼɔ təvɛʼtəvɛʼ, təmə bʉʼʉ bɔŋ kə́ bɛ mɔʼɔ təvɛʼtəvɛʼ fɛ.”
9Ndʉʉ ndə nuɔ bʉə-Juu buŋmbi kə yʉ́ mbɔ Jiso bɛ chɔ, bɔ̂ŋ gwètə chɔ, bɔ̂ŋ kə́ gwè bə haʼ bʉʼka mbəŋ-ɛŋ fɛ, bɔ̂ŋ nɔ kə́ gwè ghɔ ndə mənyíɛ Lasalɔ ndə ɔ nɔʼ kə kwú, bə bʉ̀nə kóʼhə ɔŋ.
10Ndʉʉmɛ, bətiefɛ̀ʼndɛŋNyii shʉ̀tə ndə məyí Lasalɔ ghɔ, 11bʉʼka mbɔ bʉə-Juu buŋmbi nɔ kə́ mɛ̀ʼtə bɔŋ, gɛ̀ bɛ́ŋ Jiso bʉʼka ɔ.
Jiso ŋíi mu Jɛlosalɛŋ ndə məsɛ́ʼ ŋgʉʼʉ
(Matia 21:1-11; Mak 11:1-11; Luk 19:28-40)
12Mbi kʉ̂ʉ sɛŋ fíi, nuɔ-bʉə-buŋmbi ndə bɔ̂ŋ kə gwè mbʉ kəyəŋ nchəŋtə, yʉ́ mbɔ Jiso la kə́ gwè Jɛlosalɛŋ. 13Bɔ̂ŋ gwìatə yuu-tɛ́ŋ-bə fyú gɛ̀ ndə məbìatə ɔŋ, kə́ tíitə ghɔ̀ŋ mbɔ, “Osana!#12:13 “Osana” nɔ bɛ ŋgie-Hibulu-kə ndə i bɛ mbɔ “N̈yii kwáa baʼa nduɔ,” bɔŋ ndə mbi kə́ kwɛ̀ʼtə gɛ̀ i bɛ mbɔ “Tə bʉʼʉ lə̀ʼtə Nyii.” Tə Nyii bìʼ wo ndə ɔ gwè yie-Tiekətʉ, buŋ mbʉ Fɔŋ-bʉə-Isilɛ!” 14Jiso nyíɛ vaaŋgwɔŋ-jakashi dùʼ ndəŋ ghɔ haʼ ndə bə nyɔ̀ʼ mu ŋwɔʼnə-Nyii mbɔ,
15“Kə bii mə leʼ fàa fɛ bʉə-Sayɔŋ#12:15 Sayɔŋ nɔ bɛ ibɛʼ-yə yie Jɛlosalɛŋ..
B̈ii nyíɛ, Fɔŋ-yii tʉʼ nə gwè,
kə́ dùʼ ndəŋ vaaŋgwɔŋ-jakashi!”#12:15 Sakalia 9:9.
16Vâafɔʼɔ-bi kə kínə nubə-ɔ̄ŋ ndʉʉ ndə i kə́ fəŋ fyú fɛ, bɔŋ ndʉʉ ndə Jiso kə kie məgʉ́ə, bɔ̂ŋ kwɛ́nə mbɔ bə nɔʼ kə nyɔ̀ʼ nubə-ɔ̄ŋ mu ŋwɔʼnə-Nyii te ɔ, bɔŋ-nɔʼ-kə-leʼ fɔ̀ʼ tʉ ɔŋ. 17Nuɔ bʉə ndə ghɔŋ bɔŋ kə bɛ mɔʼɔ ndʉʉ ndə ɔ kə tíi Lasalɔ mu sě, bʉ̀nə kóʼhə ɔŋ ndə ɔ nɔʼ kə kwú le, kə́ bìʼ gɛ̀ nə shʉbə kə́ fʉ̀ʼtə nubə ndə bɔ̂ŋ kə nyíɛ ndə ɔ kə́ fɔ̀ʼ. 18Luu-i ndə mbʉ nuɔ-bʉə kə bìatə ɔŋ nɔ kə bɛ ndə bɔŋ kə yʉ́ mbɔ ɔ nɔʼ chìi cheʼkə-ɔ̄ŋ. 19Ndʉʉmɛ, mbʉ bʉə-Falasi ghɔ̀ŋ tʉ ŋwɔŋtə-ʉə mbɔ, “Bii le nyíɛ mbɔ i tʉʼ kwáa bʉʼʉ fɛ. B̈ii nyíɛ ndə wʉʉnəmbikə tʉʼ gɛ̀ hə bɔ̌ŋ ɔŋ.”
Bʉə-Gilibɛʼbə kə́ kʉ́ʉ Jiso
20Bʉə-Gilibɛʼbə nɔ nə bɛ nuɔ-bʉə ndə bɔ̂ŋ kə́ kóʼ gɛ̀ ndə mbʉ nchəŋtə ndə mələ̀ʼtə Nyii. 21Ndʉʉmɛ, bʉə-bɔ̄ŋ gwè tʉ Fili ndə ɔ lɔ̀ hə Bɛsieda mu Galili kə́ gìe tʉ ɔŋ mbɔ, “Tie-yaʼ, baʼa nɔ tʉʼ kʉ́ʉ nyíɛ Jiso.” 22Fili gɛ̀ shyíi Andolo ghɔŋ ɔŋ gɛ̀ shyíi Jiso. 23Jiso bə̀ŋhə tʉ bɔŋ, ghɔ̀ŋ mbɔ, “Ŋgwɔʼmbi nɔʼ kʉ̀ʼnə ndə Vaa-Woməsʉʉ bu kie məgʉ́ə chɔ. 24M̈ɔ kɛŋ shyíi bii nə shʉəŋ, kaʼ mbyu lɛshi gòʼ təmə gwù sê kwú fɛ, i káa haʼ mbyu imɔʼ, bɔŋ kaʼ i kwú, i kʉ́ʉnə ntɔŋmə yɔ́ŋyɔ́ŋ. 25Wo ndə ɔ kʉ̀ʉ ŋkwiitʉ-e bu bɛ́, bɔŋ wo ndə ɔ bàa ŋkwiitʉ-e kəwʉʉnəmbi-fɛ̄ŋ, bu kie məchímbi təmə liʼ-i ghɔ fɛ. 26Kaʼ wo kʉ̀ʉ ndə məfɔ̀ʼ tʉ mɔ, ɔ̈ gwè hə bɔ̌ŋ mɔ, yəŋkə ndə mɔ bu bɛ chɔ, vaafɔ̀ʼ-ɔ nɔ kie ndə məbɛ chɔ ghɔ. Kaʼ wo kə́ fɔ̀ʼ tʉ mɔ, mbʉ Tie bu kɔ́ kuŋhə tʉ ɔŋ.
27 “Nduɔ fyii-ɔ nɔ tʉʼ kɔ́ ŋgʉəʼ tʉ mɔ. Mɔ bu ghɔ̀ŋ mbuka? Mbɔ, ‘Tie-ɔ, kwáa ndə ŋgwɔʼmbi-ɔ̄’ mɛ? Bɔŋ bɛ luu nɔ ndə mɔ kə gwè, mbɔ mɔ tíŋ hə mu ŋgwɔʼmbi-ŋgʉəʼ-ɔ̄. 28Tie-ɔ, kɔ́ məgʉ́ə tʉ ŋwɔŋ-aŋ.” Ndʉʉmɛ, gyʉʉ gwè hə yuo mbɔ, “Mɔ nɔʼ kɔ́ məgʉ́ə tʉ ŋwɔŋ-ɔŋ, bɔŋ-bu-leʼ bìʼ kɔ́.” 29Mbʉ nuɔ-bʉə ndə bɔ̂ŋ kə tə́nə chɔ yʉ́, ghɔ̀ŋ mbɔ fuu-yuo nɔʼ bɔ̀ʼtə. Bəbɛʼbə ghɔ̀ŋ mbɔ, “WontəŋNyii nɔʼ kwə́ʼ tʉ ɔŋ.” 30Jiso bə̀ŋhə mbɔ, “Gyʉʉ-ɔ̄ nɔ gwè bʉʼka bii, kaa bʉʼka mɔ fɛ.
31 “Nduɔ, ndʉʉ nɔʼ kʉ̀ʼnə ndə məkwɛ̀ sɔ́ʼ kəwʉʉnəmbi. Wo ndə ɔ tʉʼ sɔ́ʼ wʉʉnəmbikə-ɔ̄ŋ bə bu tyʉ́əŋhə ɔŋ mɛ̀ʼ. 32Bɔŋ mbəŋ-ɔŋ, ndʉʉ ndə bə bu chɔ̀ʼhə mɔ ghɔʼ kəchisê nɔ, mɔ dùu bʉə bənchəŋ kɔ́ mbʉə mɔ.” 33Ɔ nɔ nə gìe yɔ̄ŋ-yə ndə mədʉ̀ʼ ntɛ kwú ndə ɔ bu yi kwú.
34Ndʉʉmɛ, mbʉ nuɔ-bʉə bə̀ŋhə tʉ ɔŋ mbɔ, “Baʼa nɔʼ kə yʉ́ mu ŋwɔʼnə-nuʼ-Nyii mbɔ Mbʉ Wo ndə Nyii Kùŋ Tə́ŋ kʉʉnə kwú fɛ. Bəkɔ a bʉ̀nə kə́ ghɔ̀ŋ ndʉʉmɛ təka mbɔ bə bu yaʼ chɔ̀ʼhə Vaa-Woməsʉʉ kɔ́ ghɔʼ? Mbʉ Vaa-Woməsʉʉ-ghɔ̄ bɛ nda?”
35Ndʉʉmɛ, Jiso ghɔ̀ŋ tʉ bɔŋ mbɔ, “Mbʉ kɛʼɛ bu bɛ mu bii dɔ̀ŋnə tə kɔ́ kʉʉkə. B̈ii kə́ tòʼ ndʉʉ ndə bii kie kɛʼɛ, bʉʼka njəŋkə mə ghɔ́ʼ bii. Wo ndə ɔ tʉʼ tòʼ mu kənjəŋ kínə yəŋkə ndə ɔ tʉʼ gɛ̀ chɔ fɛ. 36Ndʉʉ ndə bii kie kɛʼɛ, b̈ii bɛ́ŋ wo ndə ɔ tʉʼ kɔ́ mbʉ kɛʼɛ mbɔ bii chʉʼ bɛ vâa-mbʉ-wo ndə ɔ̃ kɔ́ kɛʼɛ.”
Ndʉʉ ndə Jiso kə gìe nubə-ɔ̄ŋ, ɔ lɔ̀ gɛ̀ nə wi lə̀ŋ ŋwɔŋ-ɛŋ hə kəghɔ-bɔŋ.
Mbʉ bʉə shʉ́əhə fyiihə-ʉə
37Buŋ nə buŋmbi bəcheʼ ndə ɔ nɔʼ kə chìi shʉ-bɔŋ təmə bɔ̂ŋ bɔŋ bɛ́ŋ ɔŋ fɛ. 38I nɔ nə bɛ nɔ mbɔ ŋgiekə ndə Adaya yʉkəŋgieNyii kə ghɔŋ, chʉʼ fyú shʉəŋ mbɔ,
“Tiekətʉ, bɛ nda ndə ɔ nɔʼ bɛ́ŋ nukə ndə ɔ kə yʉ́ hə kəghɔ-baʼa,
bɔŋ ndə Tiekətʉ nɔʼ leʼ dʉ̀ʼ ghʉəʼkə-i tʉ ɔŋ?”#12:38 Adaya 53:1.
39Ndʉʉghɔfii, bɔ̂ŋ kə mə bɛ́ŋ fɛ, bʉʼka Adaya nɔ nə bìʼ ghɔ̀ŋ mbɔ,
40“Nyii nɔʼ fʉ̀əŋtə shʉtə-ʉə bɔŋleʼ shʉ́əhə fyiihə-ʉə,
bʉʼka bɔ̂ŋ mə yi nyíɛ nə shʉtə-ʉə byuunɔ bɔ̂ŋ mə yi kínə nə fyiihə-ʉə,
byuunɔ bɔ̂ŋ mə yi kíahə ŋwɔŋ-yʉə tʉ mɔ, mɔ chʉʼ yi chʉ́ʼ bɔŋ.”#12:40 Adaya 6:10.
41Adaya nɔ nə gìe nubə-ɔ̄ŋ bʉʼka ɔ nɔ nə nyíɛ məgʉə-Jiso bɔŋleʼ kwə́ʼ te ɔ. 42Buŋ ndə nɔ, buŋmbi bəntəŋbəshʉ-bʉə-Juu nɔ nə bɛ́ŋ Jiso bɔŋ bʉʼka bɔ̂ŋ kə́ fàa bʉə-Falasi, təmə bɔ̂ŋ kɛ̀ʼ fɛ, bʉʼka bə məjə̀ŋ bɔŋ mu njaagháaNyii, 43bʉʼka bɔ̂ŋ nɔ nə kʉ̀ʉ məgʉ́ə ndə i gwè hə kəghɔ-woməsʉʉ, tə chàa məgʉ́ə ndə i gwè hə kəghɔ-Nyii.
Jiso nɔ gwè ndə məkwáa wʉʉnəmbikə
44Jiso tíi ghɔ̀ŋ mbɔ, “Wo ndə ɔ bɛ́ŋ mɔ, bɛ́ŋ haʼ mɔ fɛ, ɔ nɔ leʼ bɛ́ŋ wo ndə ɔ tə́ŋ mɔ ghɔ. 45Bɔŋ wo ndə ɔ leʼ nyíɛ mɔ, nɔʼ leʼ nyíɛ wo ndə ɔ tə́ŋ mɔ. 46Mɔ nɔ gwè kəwʉʉnəmbi ndə məbɛ kɛʼɛ mbɔ wo ndə ɔ bɛ́ŋ mɔ mə leʼ káa mu kənjəŋ fɛ. 47Kaʼ wo yʉ́ ŋgiekə-ɔŋ təmə kə́ fɔ̀ʼ fɛ, mɔ kʉʉ chʉ̀ə ŋkwɛ-ɛ fɛ bʉʼka mɔ gwè ndə məchʉ̀ə ŋkwɛ kəwʉʉnəmbi fɛ, bɔŋ ndə məkwáa ɔ. 48Wo ndə ɔ tɛ́ŋ mɔ təmə bɛ́ŋ ŋgiekə-ɔŋ fɛ, nɔ kie wo ndə ɔ bu chʉ̀ə ŋkwɛ-ɛ, ŋgiekə-ɔŋ bu chʉ̀ə ŋkwɛ-ɛ ndəŋ ndyiʼtə-kəchî-kə. 49Bʉʼka mɔ tʉʼ kwə́ʼ nə yɔŋ-yə ghʉəʼkə fɛ, mbʉ Tie ndə ɔ tə́ŋ mɔ, nɔʼ kàhə mɔ nə mbəŋ-ɛŋ ndə nukə ndə mɔ kie ndə məghɔ̀ŋ ghɔŋbə ntɛ ndə mɔ kie ndə məkwə́ʼ. 50Mɔ bɔŋleʼ kínə mbɔ ŋkahə-i nɔ bɛ məchímbi təmə liʼ-i ghɔ fɛ. Nukə ndə mɔ tʉʼ ghɔ̀ŋ ndʉʉmɛ, mɔ nɔ tʉʼ gìe haʼ ndə mbʉ Tie gìe tʉ mɔ.”
ទើបបានជ្រើសរើសហើយ៖
Jɔŋ 12: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
