Fɔʼɔ 6
6
Bə séʼ bʉə təkwiitia ndə mə-kə́-fɔ̀ʼ fɔʼɔ-Nyii
1Nduɔ mu bəchî-ghɔ̄, ntyʉʉ vâafɔʼɔ-Jiso kə bìʼ yɔ́ŋ gɛ̀ nə shʉbə, bʉə chʉ́ʉhə kə́ luŋtə ndə nubə ndə i tʉʼ tòʼ təmə kə́ kʉ̀ʼnə fɛ. Bʉə-Juu ndə bɔ̂ŋ nɔʼ bɛ́ŋ Nyii kə́ leʼ kwə́ʼ ŋgie-Gili-kə kə́ luŋtə te bʉə-Juu ndə bɔ̂ŋ nɔʼ bɛ́ŋ Nyii kə́ kwə́ʼ ŋgie-Hibulu-kə. Bɔ̂ŋ kə́ kwə́ʼ te bɔŋ mbɔ bɔ̂ŋ la tʉʼ túhə shʉ tʉ bəkwuʼ bəke-bʉə ndʉʉ ndə bɔ̂ŋ tʉʼ gyʉ̀ə fɔbə bəchibəchi. 2Ndʉʉmɛ, mbʉ bəlɔntəŋNyii njuɔ bûu nə wuŋ chə̀ŋtə vâafɔʼɔ-Jiso bənchəŋ ghɔ̀ŋ tʉ bɔŋ mbɔ,
“I bʉ̀ʉ mbɔ baʼa mɛ̀ʼtə ndə mə-kə́-lɔ̀ʼ ŋgieNyiikə ghɔŋbə mə-kə́-dàhə, kə́ gyʉ̀ə bə fɔbə fɛ. 3Nɔ bəliŋ-bɔŋ, b̈ii chóʼ ŋkɛŋ-bʉə-hə təkwiitia mu bii ndə bɔ̂ŋ nɔʼ jyʉ́ʉ hə kəghɔ-LyʉʉhəNyiikə, bɔŋleʼ kie ndaa. Baʼa dùʼhə bɔŋ ndəŋ fɔʼɔ-ɔ̄. 4Ndʉʉmɛ, baʼa bu kɔ́ ŋwɔŋ-yaʼ ndə mə-kə́-gháaNyii, ndə mə-kə́-lɔ̀ʼ ŋgieNyiikə bɔŋleʼ ndə mə-kə́-dàhə.”
5Nuɔ bʉə bənchəŋ bɛ́ŋ mbʉ kəŋgie, ndʉʉmɛ, chóʼ Shitifɛ̄ŋ, ndə ɔ nɔʼ kɛŋ kɔ́ ŋwɔŋ-ɛŋ, mɔ̀ʼfyii-i ndəŋ Nyii jyujyu, LyʉʉhəNyiikə bɔŋ-nɔʼ-leʼ jyʉ́ʉhə ɔŋ, leʼnə Fili, Blukolo, Nikanu, Timɔ, Bamɛna leʼnə Nikola ndə ɔ lɔ̀ hə Antiɔk ndə ɔ nɔʼ kə bɛ́ŋ nuʼ-bʉə-Juu buŋ bɛ́ŋ Jiso. 6Bə gwè nə bʉə-bɔ̄ŋ təkwiitia kɔ́ tʉ mbʉ bəlɔntəŋNyii, bɔ̂ŋ mɔ̀ʼ ghɔkə-ʉə kətʉ-bɔŋ,#6:6 Məmɔ̀ʼ ghɔkə kətʉ wo fɛ̀ŋ nɔ kə bɛ ncheʼ mbɔ Nyii nɔʼ chóʼ wo tə́ŋ mbɔ ɔ gɛ̀ fɔ̀ʼ fɔʼɔ-ɛ. gháaNyii tʉ bɔŋ.
7Bə kə́ bìʼ lɔ̀ʼ ŋgieNyiikə gɛ̀ nə shʉbə. Ntyʉʉ vâafɔʼɔ-Jiso bìʼ kə́ yɔ́ŋ mu Jɛlosalɛŋ gɛ̀ nə shʉbə, buŋmbi bʉəfɛ̀ʼndɛŋNyii-bʉə-Juu kə́ bɛ́ŋ ntəŋjyujyu ghɔ.
Bə yá Shitifɛ̄ŋ
8Shitifɛ̄ŋ, ndə Nyii kə́ dʉ̀ʼ buuŋjyu yɔ́ŋyɔ́ŋ tʉ ɔŋ bɔŋleʼ kə́ fɔ̀ʼ mu ɔŋ shʉ́əshʉ́ə, kə́ chìi nuchíechukwɛʼtəŋbə ghɔŋ fɔŋ-bəcheʼ mu mbʉ bʉə. 9Bɔŋ kʉ̂ʉ bɛ yɔŋbɛʼ, bʉəbɛʼbə ndə bɔ̂ŋ lɔ̀ hə mu njaagháaNyii, ndə bə kə́ tíi nə NjaagháaNyii-Fʉəhə ndə Bə nɔʼ Yɔ̀ʼ Ghɔkə ndəŋ Bɔŋ, chʉ́ʉhə mətúŋ bəŋʉʉ ghɔŋbə Shitifɛ̄ŋ. Nɔ kə bɛ bʉə-Juu ndə bɔ̂ŋ lɔ̀ hə Silɛŋ, Alɛsaŋndia, Silisia bɔŋleʼ lɔ̀ hə mu Esia. 10Bɔŋ təmə wofuu mə bə̀ŋhə ndə ntɛ-mukətʉ-súunə ndə LyʉʉhəNyiikə kə kɔ́ tʉ Shitifɛ̄ŋ, ɔ kə́ kwə́ʼ nə yɔŋ fɛ.
11Ndʉʉmɛ, bɔ̂ŋ nyáʼtə kɔ́ buŋ bəbɛʼbʉə mbɔ bɔ̂ŋ chʉ̀ə lɛɛŋkə kətʉ Shitifɛ̄ŋ mbɔ, “Baʼa nɔ yʉ́ wo-ɔ̄, kə́ bʉ́əhə yie Mushi leʼnə yie Nyii.” 12Nɔ nukə nɔ ndə i chɔ̀ʼhə mbʉ nuɔ-bʉə, bəntəŋbəshʉ, leʼnə bʉə dàhə nuʼ-Mushi. Bɔ̂ŋ yá Shitifɛ̄ŋ gwè nə nɔŋ mu mbʉ kaŋsotəkwɛʼtəŋ. 13Mbʉ bʉə chʉ̀ə kəlɛɛŋhə ghɔ̀ŋ mbɔ, “Baʼa nɔ yʉ́ wo-ɔ̄, kə́ dʉ̀ʉhə yəŋ-kəchɔŋ-kə-ɔ̄ŋ gɛ̀gɛ̀ ghɔŋbə nuʼ-Mushi. 14Baʼa nɔ yʉ́ wo-ɔ̄, kə́ ghɔ̀ŋ mbɔ, Jiso ndə ɔ lɔ̀ hə Nasalɛ la bu kùu njaafɛ̀ʼndɛŋNyii, bɔŋleʼ kwɛ́nə nuʼ ndə Mushi kə kɔ́ tʉ bʉʼʉ.” 15I kʉ̂ʉ dàa kəyəŋ-fɛ̄ŋ, bʉə bənchəŋ ndə bɔ̂ŋ kə bɛ mu mbʉ kaŋsotəkwɛʼtəŋ tʉ́ʼ shʉtə-ʉə ndəŋ Shitifɛ̄ŋ, mbe-shʉ-i nɔ nə kə́ báa nə yi-wontəŋNyii-yə.
ទើបបានជ្រើសរើសហើយ៖
Fɔʼɔ 6: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
