Fɔʼɔ 24
24
Bɔɔ bəshʉ Gɔməna Fɛli
1Chîbə kʉ̂ʉ tíŋ itaa, tiefɛ̀ʼndɛŋkwɛʼtəŋNyii shíʼ gwè Kasalia, yie kə́ bɛ Anania. Ɔ gwè ghɔŋbə bəbɛʼbə bəntəŋbəshʉ-bʉə-Juu leʼnə wobɛʼ ndə ɔ bu kwə́ʼ yie-bɔŋ, yie-e kə́ bɛ Tɛtulu. Bɔ̂ŋ fʉ̀ʼtə tʉ gɔməna nubə ndə bɔ̂ŋ kie te Bɔɔ. 2Ndʉʉ ndə bə gwè nə Bɔɔ, Tɛtulu chʉ́ʉhə məfʉ̀ʼtə nubə te ɔ, kə́ ghɔ̀ŋ mbɔ,
“Lʉ̀ hə ndə a dùʼ kəkʉə-baʼa, tie-ɔ Fɛli, baʼa nɔ kie fyiighʉ́ənə yɔ́ŋyɔ́ŋ daa, a bɔŋ-nɔʼ-leʼ kwɛ́nə nubə lɔʼɔ-fɛ̄ŋ yɔ́ŋyɔ́ŋ bʉʼka a nɔ tʉʼ nyíɛ hə bəshʉ. 3Ndə yəŋbə inchəŋ ghɔŋbə fiatə inchəŋ, baʼa nɔ bɛ́ŋ yɔ̄ŋ-yə, tie-ɔ Fɛli, nə tʉʉjyu yɔ́ŋyɔ́ŋ. 4Bɔŋ bʉʼka mbɔ baʼa kie ndə məyá a tʉ́ʼ fɛ̄ŋ i kə́ dɔ̀ŋnə fɛ, mɔ nɔ tʉʼ fʉ̀ʉtə a ndəŋ nuʼ-jyujyu-a ndə məyá fyii-a məniʼ, yʉ́ vaadyʉʼʉ kəŋgie hə chu-baʼa. 5Bʉʼka baʼa nɔʼ nyíɛ mbɔ wo-ɔ̄ nɔ bɛ tʉ-bʉ́ʼ-kə, kə́ ŋɛ̀hə bʉə-Juu nə ntɔŋntɔŋ mu kəwʉʉnəmbi inchəŋ bɔŋ-kə́-leʼ bɛ ntəŋbəshʉkwɛʼtəŋ-nuɔ-bʉəbɛʼbə ndə bə kə́ tíi bɔŋ nə bəNasalɛ ndə bɔ̂ŋ nɔʼ fɔ̀ʼ ŋwɔŋ-yʉə fyúhə ndəŋ nuʼ bʉə-Juu. 6Buŋ ndə məbìʼ chɔ, ɔ kə́ kɔ̀ɔtə ndə məbʉ́əhə njaafɛ̀ʼndɛŋNyii, baʼa buŋ yá ɔ. [Baʼa bɔŋ nɔ kə́ leʼ kʉ̀ʉ sɔ́ʼ ɔ nə nuʼ-yaʼ, 7bɔŋ Lisia, ndə ɔ bɛ wokwɛʼtəŋ-njaa-chaŋ, gwè fí ɔ hə kəghɔ-baʼa nə ghʉəʼkə. 8Ndʉʉmɛ, Lisia kàhə mbɔ b̈ʉə ndə bɔ̂ŋ nɔʼ mɔ̀ʼ nukə kətʉ-ɔ la gwè nyíɛ aŋ.] A bu tyúutə ɔŋ nə yá mbəŋ, yʉ́ hə kəghɔ-ɔ te nubə ndə baʼa gìe kətʉ-ɔ inchəŋ.” 9Mbʉ bʉə-Juu bìa chu-yʉə chɔ ndə mədʉ̀ʼ mbɔ nchəŋnchəŋ bənu-ɔ̄ŋ nɔ kə bɛ shʉəŋ. 10Ndʉʉ ndə mbʉ gɔməna kə ŋwìɛ Bɔɔ ndə məkwə́ʼ, Bɔɔ bə̀ŋhə mbɔ,
“Mɔ nɔ kínə mbɔ a nɔʼ sɔ́ʼ lɔʼɔ-ɔ̄ ndə ŋgʉʼhə buŋmbi, mɔ bu túu chʉʼ-ɔ tʉ a nə tʉʉjyu. 11Bəkɔ a tyúutə nyíɛ mbɔ i chʉʼ tíŋ chîbə njuɔ bûu nə wuŋ lʉ̀ hə ndə mɔ kóʼ gɛ̀ Jɛlosalɛŋ ndə mələ̀ʼtə Nyii fɛ. 12Təmə bɔ̂ŋ nyíɛ mɔ kə́ yá bəŋʉʉ baʼa wo fɛ, byuunɔ kə́ mɔ̀ʼ mbyuutəmbyuutə mu njaafɛ̀ʼndɛŋNyii fɛ byuunɔ mu-njaagháaNyii-hə fɛ byuunɔ mu kəyəŋkwɛʼtəŋ fɛ. 13Bʉə-bɔ̄ŋ mə dʉ̀ʼ tʉ a mbɔ nukə ndə bɔ̂ŋ tʉʼ gìe yie-mɔ bɛ shʉəŋ fɛ.
14“Mɔ nɔ bɛ́ŋ bəshʉ a mbɔ mɔ nɔ tʉʼ gɛ̀ hə ndəŋ mbʉ Fia, ndə bɔ̂ŋ tʉʼ tíi nə nuɔ-bʉə ndə bɔ̂ŋ nɔʼ fɔ̀ʼ ŋwɔŋ-yʉə fyúhə ndəŋ nuʼ bʉə-Juu. Mɔ nɔ tʉʼ lə̀ʼtə Nyii bətietie-bʉʼʉ, bɔŋ-kə́-leʼ tʉ́ʼ nubə inchəŋ haʼ ndə bə kə nyɔ̀ʼ mu ŋwɔʼnə-nuʼ-Mushi ghɔŋbə bʉəyʉkəŋgieNyii. 15Mɔ bɔŋ-kə́-leʼ yʉ́əʼnə ndəŋ Nyii, haʼ ndə bʉə-bɔ̄ŋ nə mbəŋ-yʉə bɛ́ŋ ghɔ mbɔ bʉə ndə bɔ̂ŋ bɛ ndyʉndyʉ ghɔŋbə bʉə ndə bɔ̂ŋ gòʼ təmə bɛ ndyʉndyʉ fɛ, bu nə bʉ̀nə kóʼ. 16Nɔ, m̃ɔ nɔ kɔ̀ɔtə shʉ́əshʉ́ə ndə mənyíɛ mbɔ ŋkwɔʼtə-ɔŋ chʉʼ bɛ itʉ́ʉnə bəshʉ-Nyii ghɔŋbə bʉəməsʉʉ.
17“Ndʉʉ ndə mɔ kə lɔ̀ hə Jɛlosalɛŋ, gɛ̀ chí ŋgʉʼhə buŋmbi, mɔ bʉ̀nə gwè nə kɔkə tʉ bʉə-mbʉʼ mu lɔʼɔ-baʼa bɔŋleʼ kɔ́ kɔ-fɛ̀ʼndɛŋ-kə tʉ Nyii. 18Ndə mɔ kə́ chìi yɔ̄ŋ-yə, bɔ̂ŋ nyíɛ mɔ, tʉ mɔ nɔʼ búu ŋwɔŋ-ɔŋ mu chunjaafɛ̀ʼndɛŋNyii təmə kə́ bɛ chɔ baʼa wo fɛ, təmə kə́ byùutə yəŋbə fɛ. Bɔŋ bʉə-Juubɛʼbə nɔ kə bɛ ghɔ ndə bɔ̂ŋ lɔ̀ hə Esia, ndə bɔ̂ŋ kə bɛ chɔ, 19kaʼ bɔ̂ŋ bɛ fɛ̄ŋ, kie nukə te mɔ, təmə bɔ̂ŋ nɔ fʉ̀ʼtə tʉ a nə mbəŋ-yʉə. 20Byuunɔ, b̈ʉə-bɔ̄ŋ ndə bɔ̂ŋ bɛ fɛ̄ŋ nɔ gìe nu-bʉəbʉə-kə ndə mɔ kə chìi ndʉʉ ndə mɔ kə tə́nə bəshʉ kaŋsotəkwɛʼtəŋ, 21tə tíŋ yɔ̄ŋ-yə mbyu kənu ndə mɔ kə́ tíi nə ghʉəʼkə mbɔ, ‘Mɔ nɔ tə́nə fɛ̄ŋ mu njaafɛ̀ʼ nɔ bʉʼka mɔ nɔ bɛ́ŋ mbɔ bʉə ndə bɔ̂ŋ nɔʼ kwú bu yi bʉ̀nə kóʼ.’ ”
22Bɔŋ Fɛli ndə ɔ kə kínə nubə jyujyu te mbʉ Fia-Nyii, tʉ́ʼ mbʉ fɛʼɛ, ghɔ̀ŋ mbɔ, “Lisia ntəŋbəshʉ-bʉəkwɛʼtəŋ-bəsɔge kʉ̂ʉ gwè nɔ, mɔ chʉ̀ə fɛʼɛ-a.” 23Ndʉʉmɛ, ɔ téʼ tʉ mbʉ wokwɛʼtəŋ-bəsɔge ndə məfʉ̀əŋ ɔŋ bɔŋ kɔ́ saa tʉ ɔŋ ndə mə-kə́-chìi nubə-i, kə a məbyùutə bətieŋkɔŋ-bi ndə mə-kə́-kɔ́ fɔbə tʉ ɔŋ fɛ.
24Chîbə kʉ̂ʉ tíŋ, Fɛli gwè ghɔŋ vi-i Dolosila kə́ bɛ woke-Juu, ɔ tə́ŋ tíi Bɔɔ mbɔ ɔ gwè, ɔ̈ yʉ́ hə kəghɔ-ɔ te nə məmɔ̀ʼfyii ndəŋ Klai Jiso. 25Ndə Bɔɔ tʉʼ kwə́ʼ tʉ ɔŋ te nə mə bɛ ndyʉndyʉ, məyá-ŋwɔŋ leʼnə chîkə ndə Nyii bu sɔ́ʼ wʉʉnəmbikə chɔ, Fɛli gwònə ghɔ̀ŋ mbɔ, “Gɛ̀ nə aŋ nduɔ, mɔ bu yi fʉ̀ʼ ŋgwɔʼmbi nɔ, tíi a.” 26Haʼ ndʉʉmɛ, ɔ kə́ yʉ́əʼnə ndəŋ Bɔɔ mbɔ ɔ bu kɔ́ kyʉə tʉ ɔŋ. Ɔ kə́ chʉʼ tíi ɔ ghɔ́ŋ ɔŋ kə́ kwə́ʼ. 27Ŋgʉʼhə ibûu kʉ̂ʉ tíŋ, Bosiu Fɛsto yú yəŋ-Fɛli-kə. Bɔŋ bʉʼka ɔ kə́ kʉ́ʉ ndə mədʉ̀ʼ buuŋjyu tʉ bəntəŋbəshʉ-bʉə-Juu, Fɛli mɛ̀ʼtə Bɔɔ mu njaa-chaŋ.
ទើបបានជ្រើសរើសហើយ៖
Fɔʼɔ 24: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
