Fɔʼɔ 18
18
Bɔɔ bìatə Bilisika ghɔŋ Akwela
1Ndʉʉmɛ, Bɔɔ lɔ̀ hə Atɛŋ gɛ̀ Kɔlɛŋ. 2Ndə ɔ kə bɛ chɔ, ɔ nyíɛ wo-Juubɛʼ ndə bə kə́ tíi ɔ nə Akwela ndə kə bɛ wo-Bɔŋtu, ɔ bíe gwègwè hə Itali, ghɔŋ vi-i yie-e kə́ bɛ Bilisika. Bɔ̂ŋ nɔ kə gwè hə Itali bʉʼka Fɔŋ-Kladio nɔʼ kə kàhə bʉə-Juu bənchəŋ ndə məfyú hə mu Luŋ. Bɔɔ gɛ̀ ndə mənyíɛ bɔŋ. 3Bʉʼka ghɔŋ bɔŋ kə kie ntɛ kəghɔ fɔʼɔ imɔʼ, ghɔŋ bɔŋ chí mɔʼɔ kə́ fʉ̀ə lɛʼbə nə gwo-nyaa-hə.
4Kə bɛ ndəŋ Chîlɔʼkə təmiyɔŋ nɔ, Bɔɔ kə́ túŋ bəŋʉʉ mu njaagháaNyii, bɔŋleʼ kɔ̀ɔtə ndə məlóʼtə bʉə-Juu ghɔŋbə bʉə-Gili. 5Ndʉʉ ndə Sila ghɔŋ Timɔti kə shíʼ gwè hə Masɛdonia, tʉ Bɔɔ nɔʼ kɔ́ ŋwɔŋ-ɛŋ ndə məlɔ̀ʼ ŋgieNyiikə, bɔŋleʼ dʉ̀ʼ tʉ bʉə-Juu mbɔ Jiso la mbʉ Wo ndə Nyii Kùŋ Tə́ŋ. 6Ndʉʉ ndə bɔ̂ŋ tɛ́ŋ ɔŋ bɔŋleʼ bʉ́əhə yie-e, Bɔɔ kwètə liɛŋ-ɛŋ ghɔ̀ŋ tʉ bɔŋ mbɔ, “Ŋgʉəʼ-yii nɔ nduɔ kətʉ-bii, kaʼ bii kwú bɛ́, ghɔkə-ɔŋ nɔ bɛ ighʉ́ʉnə. Lʉ̀ hə nduɔ gɛ̀ nə shʉbə, mɔ bu gɛ̀ tʉ bʉə ndə bɔ̂ŋ gòʼ təmə bɛ bʉə-Juu fɛ.”
7Ɔ lɔ̀ hə chɔ gɛ̀ ŋíi mu njaa-wobɛʼ bə kə́ tíi ɔ nə Tatu Jusutu, kə́ bɛ wo ndə ɔ kə́ lə̀ʼtə Nyii. Njaa-ɛ kə́ŋhə mbʉə njaagháaNyii. 8Kilisɛbu, wokwɛʼtəŋ njaagháaNyii ghɔŋbə nchinjaa-ɛ bənchəŋ, bɛ́ŋ Tiekətʉ. Bʉə buŋmbi Kɔlɛŋ, kʉ̂ʉ yʉ́ ŋgieNyiikə nə Bɔɔ lɔ̀ʼ, bɔ̂ŋ bɛ́ŋ Nyii ghɔ bɔŋleʼ fí muu.
9Tiekətʉ kwə́ʼ tʉ Bɔɔ ndʉʉbətyuʼ mu njəŋ təmə ɔ kə bɛ́ŋbɛ́ŋ fɛ, ghɔ̀ŋ mbɔ, “Kə a mə fàa fɛ, kə́ kwə́ʼ, təmə bɔ́nə chu-a fɛ! 10Bʉʼka baʼa nɔ bɛ mɔʼɔ, wo mə ŋíi aŋ tə lə́ŋhə aŋ fɛ, bʉʼka mɔ nɔ kie bʉə buŋmbi mu kəyəŋkwɛʼtəŋ-fɛ̄ŋ ndə bɛ yɔŋ-yə.” 11Ɔ káa ghɔŋ bɔŋ ndə ŋgʉʼʉmbi nə bəchi ntʉʼʉ, kə́ dàhə ŋgieNyiikə mu bɔŋ.
12Bɔŋ ndʉʉ ndə Galio kə́ bɛ gɔməna-Akia, bʉə-Juu nə gyʉʉ imɔʼ fúu nuɔ yá Bɔɔ, gɛ̀ nə nɔŋ mu njaafɛ̀ʼ, 13kə́ ghɔ̀ŋ mbɔ, “Wo-ɔ̄ tʉʼ lóʼtə bʉə ndə mə-kə́-gháaNyii ntɛ ŋkʉ̂ʉ təmə bɛ ndə nuʼ-Mushi gìe fɛ.” 14Ndʉʉ ndə Bɔɔ kə bɛ ndə məŋɔ́ʼhə chu-i, Galio lɔ̀ hə sê, kwə́ʼ tʉ bʉə-Juu ghɔ̀ŋ mbɔ, “Kaʼ bii kʉ̌ʉ kə́ ghɔ̀ŋ mbɔ ɔ chìi nu-bʉəbʉə-kə, byuunɔ ntɛ ntɔŋntɔŋbɛʼ, Oo bʉə-Juu, təmə mɔ nɔ bɛ́ŋ bii. 15Bɔŋ ndə bɛ bə nu-bəŋgie-bə ghɔŋbə yietə leʼnə nuʼ-yii nɔ, b̈ii kwɛ̀ nə mbəŋ-yii bʉʼka mɔ mə kə́ kwɛ̀ yɔŋ-yə ntɛ-bənu-hə fɛ.” 16Ndʉʉmɛ, ɔ jə̀ŋ bɔŋ hə mu njaafɛ̀ʼ. 17Ndʉʉmɛ, bɔ̂ŋ yá Sɔtɛni, ndə ɔ kə bɛ wokwɛʼtəŋ-mu-njaagháaNyii, gwúu ɔ bəshʉ njaafɛ̀ʼ. Təmə Galio kɛŋ bə̀ŋhə nukə chɔ fɛ.
Bɔɔ bʉ̀nə gɛ̀ Antiɔk ndə i bɛ mu Silia
18Yɔ̄ŋ-yə kʉ̂ʉ tíŋ, Bɔɔ bìʼ chí ghɔŋbə bʉə ndə bɔ̂ŋ nɔʼ bɛ́ŋ Nyii tə kwìhə, ndʉʉmɛ, ɔ fyú hə mu bɔŋ, kóʼ buukwɛʼtəŋkə gɛ̀ Silia ghɔŋbə Bilisika leʼnə Akwela. Ndə ɔ dàa Sɛŋkala, ɔ chètə tʉkə-i, bʉʼka ɔ nɔʼ kə kàa nukə. 19Ɔ kʉ̂ʉ gɛ̀ dàa Ɛfɛso, mɛ̀ʼtə bɔŋ chɔ, bɔŋ ɔ sʉ́ʉ mu njaagháaNyii túŋ bəŋʉʉ chɔ ghɔŋbə bʉə-Juu. 20Bɔ̂ŋ téʼ tʉ ɔŋ mbɔ ghɔŋbə bɔŋ bìʼ chí kwìhə, ɔ tɛ́ŋ. 21Ɔ kʉ̂ʉ tíŋhə bɔŋ, ghɔ̀ŋ tʉ bɔŋ mbɔ, “Kaʼ Nyii bɛ́ŋ, mɔ yi bʉ̀nə gwè mətòʼ tʉ bii.” Ndʉʉmɛ, ɔ kóʼ buukwɛʼtəŋkə lɔ̀ hə Ɛfɛso gɛ̀. 22Ndʉʉ ndə ɔ dàa Kasalia, ɔ kóʼ gɛ̀ Jɛlosalɛŋ chàʼtə bʉə-chɔshi, shíʼ gɛ̀ Antiɔk.
23Ɔ kʉ̂ʉ bɛ ghɔŋ bɔŋ ndə kʉʉkə, lɔ̀ kə́ tòʼ gɛ̀ bəyəŋbəyəŋ mu bie-Galatia-ghɔŋ-Filigia-hə ndə məkwèʼhə vâafɔʼɔ-Jiso bənchəŋ.
Abolo mu Ɛfɛso ghɔŋbə Kɔlɛŋ
24Wo Juubɛʼ ndə bə kə́ tíi ɔ nə Abolo, bə bí ɔ Alɛsaŋndia, gwè Ɛfɛso. Tʉ ɔ kínə kwə́ʼ daa bɔŋleʼ shʉ́ə ndəŋ ŋgieNyiikə. 25Bə nɔʼ kə dàhə wo-ɔ̄ nə fia-Tiekətʉ, bʉʼka fyii-i tʉʼ ŋɔ̀ʼtə, ɔ kwə́ʼ bɔŋleʼ dàhə nubə jyujyu təmə mɔ̀ʼmbɛ fɛ, te Jiso, buŋ ndə nɔ, ɔ nɔ nə kínə bə haʼ nubə te məkɔ́ muu ndə Jɔŋ nə kə́ kɔ́. 26Ɔ chʉ́ʉhə kə́ kwə́ʼ nə fyii tə̀ŋnə mu njaagháaNyii. Ndʉʉ ndə Bilisika ghɔŋ Akwela kə yʉ́ ɔ, bɔ̂ŋ lʉ̀ ɔ, shʉ̀tə fʉ̀ʼtə fia-Nyii tʉ ɔŋ jyujyu.
27Ndʉʉ ndə ɔ kə́ kʉ́ʉ ndə mədàa gɛ̀ njəŋ Akia, bʉə ndə bɔ̂ŋ nɔʼ kə bɛ́ŋ Nyii kwèʼhə ɔŋ, nyɔ̀ʼ ŋwɔʼnə kɔ́ tʉ vâafɔʼɔ-Jiso ndə bɔ̂ŋ kə bɛ chɔ mbɔ b̈ɔ̂ŋ fí ɔ mu bɔŋ. Ɔ kʉ̂ʉ dàa, kwáa bʉə shʉ́əshʉ́ə ndə bɔ̂ŋ nɔʼ kə bɛ́ŋ Nyii tíŋ hə ndəŋ buuŋjyu-Nyii. 28Bʉʼka ɔ kə́ túŋ bəŋʉʉ daa, ɔ ghɔ́ʼ bʉə-Juu mu bʉə ndə mədʉ̀ʼ tʉ bɔŋ mu ŋwɔʼnə-Nyii mbɔ Jiso la bɛ mbʉ Wo ndə Nyii Kùŋ Tə́ŋ.
ទើបបានជ្រើសរើសហើយ៖
Fɔʼɔ 18: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
