Fɔʼɔ 14
14
Bɔɔ ghɔŋ Banaba mu Ikoniɔŋ
1Bɔɔ ghɔŋ Banaba gɛ̀ Ikoniɔŋ gɛ̀ kwə́ʼ ŋgieNyiikə mu njaagháaNyii haʼ nə ntɛ kəghʉəʼ ndə bɔ̂ŋ kə́ kwə́ʼ nə yɔŋ Antiɔk, bʉə-Juu ghɔŋbə bʉə ndə bɔ̂ŋ gòʼ təmə bɛ bʉə-Juu fɛ bɛ́ŋ Nyii buŋmbi. 2Bɔŋ bʉə-Juu ndə bɔ̂ŋ gòʼ təmə bɛ́ŋ ŋgieNyiikə fɛ, kɔ́ buŋ bəbɛʼbʉə ndə bɔ̂ŋ gòʼ təmə bɛ bʉə-Juu fɛ, bɔ̂ŋ ŋɛ̀nə ntɔŋntɔŋ tʉ bʉə ndə bɔ̂ŋ nɔʼ bɛ́ŋ Nyii, kə́ gìe ntɛ-bənu-bʉəbʉə-hə kətʉ-bɔŋ inchəŋ.
3Mbʉ bəlɔntəŋNyii chí chɔ dɔ̀ŋnə, kə́ lɔ̀ʼ ŋgieNyiikə nə fyii shʉ́əshʉ́ə te buuŋjyu Tiekətʉ. Nyii chìi mbɔ b̈ə kínə mbɔ ntəŋ ndə bɔ̂ŋ tʉʼ téʼ bɛ shʉəŋ, ɔ kɔ́ ghʉəʼkə tʉ bɔŋ ndə məchìi nubəcheʼbə ghɔŋbə nuchíechubə. 4Bɔŋ təmə mbʉ bʉə mu kəyəŋkwɛʼtəŋ kie ŋgiekə imɔʼ fɛ. Bəbɛʼbʉə tə́nə kəvia-bʉə-Juu, bəbɛʼbʉə tə́nə ghɔŋbə bəlɔntəŋNyii.
5Bʉəbɛʼbə ndə bɔ̂ŋ gòʼ təmə bɛ bʉə-Juu fɛ leʼnə bʉə-Juu ghɔŋbə bəntəŋbəshʉ-bʉə shyʉ̀ʉ gyʉʉ ndə məlɔ̀ hə sê bɔ̌ŋ bɔŋ nə ntɔŋntɔŋ, túŋtə bɔŋ. 6Mbʉ bəlɔntəŋNyii kʉ̂ʉ yʉ́, nyʉ́ʉ nə tʉkə-ʉə. Bɔ̂ŋ nyʉ́ʉ gɛ̀ kwii Likonia, mu kəyəŋkwɛʼtəŋ Lista ghɔŋ Debi leʼnə yəŋbɛʼbə mbʉə ghɔ. 7Bɔ̂ŋ gɛ̀ lɔ̀ʼ ntəŋjyujyu chɔ.
Bɔɔ ghɔŋ Banaba mu Lista leʼnə Debi
8Ndʉʉ ndə Bɔɔ ghɔŋ Banaba kə bɛ mu Lista leʼnə Debi, bɔ̂ŋ gɛ̀ fyú ndəŋ wobɛʼ ndə ɔ nɔʼ lɛ́ŋ hə ndəŋ fʉəŋtə-i. Bə nɔ kə bí ɔ haʼ nɔ təmə ɔ nɔʼ nə tòʼ fɛ. 9Mbʉ wo-ghɔ̄ dùʼ sê kə́ yʉ́ ndə Bɔɔ tʉʼ kwə́ʼ ŋgieNyiikə. Bɔɔ lɛ́nə ɔŋ ndə mu shʉhə-i, chèʼnə mbɔ ɔ nɔʼ mɔ̀ʼfyii ndəŋ Jiso ndə bəkɔ ɔ kie nchʉʼ, 10gìe tʉ ɔŋ nə ghʉəʼkə mbɔ, “Lɔ̀ hə sê tə́nə!” Haʼ ndʉʉghɔfii, ɔ sɛ́ʼ tə́nə ndəŋ fʉəŋtə-i, chʉ́ʉhə kə́ tòʼ.
11Ndʉʉ ndə bʉə ndə bɔ̂ŋ kə́ yʉ́ kwə́ʼ Bɔɔ, kə nyíɛ nukə ndə ɔ kə chìi, bɔ̂ŋ tíitə kəŋgie Likonia mbɔ, “Nɔ bənyii nɔ ndə bɔ̂ŋ nɔʼ shíʼ gwè tʉ bʉʼʉ nə bʉəməsʉʉ!” 12Bɔ̂ŋ lìʼ ndʉʉghɔfii mbɔ, Banaba la bɛ Fɔŋ Sus, Bɔɔ ndə bɛ mbəŋ-ɛŋ bɛ wo ndə ɔ kə́ kwə́ʼ, la bɛ mbʉ Fɔŋ Hɛmɛ. 13Njaafɛ̀ʼndɛŋ-Fɔŋ Sus nɔ nə bɛ haʼ chu-mbi mbʉ mu kəyəŋkwɛʼtəŋ. Wo ndə ɔ̃ fɛ̀ʼ Fɔŋ Sus ghɔŋbə mbʉ nuɔ-bʉə gwè nə bənaʼa-ləŋ ghɔŋbə kɔʼ-bəyii-ŋkɔ-bə, kə́ shʉ̀tə ndə məgɛ̀ fɛ̀ʼ mbʉ bəlɔntəŋNyii nə yɔŋ chulɔŋ ndə i ŋíi mu mbʉ kəyəŋkwɛʼtəŋ.
14Ndʉʉ ndə Banaba ghɔŋ Bɔɔ, ndə bɔ̂ŋ bɛ bəlɔntəŋNyii, kə yʉ́ nukə ndə i tʉʼ tíŋ, i chɔ́ŋhə bɔŋ, bɔ̂ŋ jɔ̀ʼtə ndyihə-ʉə,#14:14 Bɔ̂ŋ kə́ búubúu fɛ, nɔ nə bɛ nuʼ-yʉə mbɔ ñukə nɔ chɔ́ŋhə wo daa nɔ, ɔ jɔ̀ʼtə ndyihə-i. nyʉ́ʉ fyú gɛ̀ mu bɔŋ, kə́ bíʼtə mbɔ, 15“Bətieŋkɔŋ-baʼa, bii tʉʼ chìi yɔ̄ŋ-yə bʉʼka? Baʼa nɔ bɛ haʼ bʉəməsʉʉ ndə bii! Baʼa nɔ gwè bə nə ntəŋjyujyu tʉ bii, mbɔ bii shìe liɛŋtə-ii hə ndəŋ nu-bənɔ̌ʼɔ-bə-ɔ̄ŋ, gwè tʉ Nyii ndə ɔ bɛ ghɔ, ndə chìi ɔ chìi yuo ghɔŋbə chisêkə, chìi muu ghɔŋbə fɔbə ndə i bɛ chɔ inchəŋ. 16Ndə vɛʼ bəshʉ, Nyii nɔ kə mɛ̀ʼtə lɔʼ-bətə̂ŋ-tə inchəŋ ndə məgɛ̀ hə ndəŋ yʉə-yə fiatə, 17bɔŋ təmə ɔ mɛ̀ʼtə ŋwɔŋ-ɛŋ ndə məkɔ́ fɔ-jyujyu-bə ndə i bu chìi, bə kə́ kwɛ́nə mbɔ ɔ bɛ Nyii fɛ. Ɔ kɔ́ wyuu, leʼnə ntɔŋmə ghɔŋbə fɔyubə ndə məchìi tʉʉ-yii bʉ̀ʉ.” 18Buŋ nə ŋgiebə-ɔ̄ŋ, bɔ̂ŋ nɔ nə kɔ̀ɔtə tə kwú ndə məbyùutə bɔŋ mbɔ bɔ̂ŋ mə fɛ̀ʼ bɔŋ fɛ.
19Bɔŋ bʉə-Juu-bɛʼbə lɔ̀ hə Antiɔk ghɔŋbə Ikoniɔŋ, gwè kɔ́ buuŋ mbʉ bʉə, bɔ̂ŋ túŋtə Bɔɔ tə kwɔ̀ʼtə mbɔ ɔ nɔʼ kwú, dùu ɔ, fyúhə ɔŋ hə mu mbʉ kəyəŋkwɛʼtəŋ. 20Bɔŋ ndʉʉ ndə vâafɔʼɔ-Jiso kə tə́ŋtə yə̀ŋ ɔŋ fúu, ɔ lɔ̀ hə sê bʉ̀nə gɛ̀ mu kəyəŋkwɛʼtəŋ. Mbi kʉ̂ʉ sɛŋ fíi, ghɔŋ Banaba gɛ̀ Debi.
Bɔɔ ghɔŋ Banaba bʉ̀nə gɛ̀ Antiɔk mu Silia
21Ndʉʉ ndə bɔ̂ŋ nɔʼ kə lɔ̀ʼ ntəŋjyujyu mu kəyəŋkwɛʼtəŋ-ghɔ̄ bɔŋleʼ chìi bʉə buŋmbi ndə məbɛ vâafɔʼɔ-Jiso, Bɔɔ ghɔŋ Banaba bʉ̀nə gɛ̀ Lista, Ikoniɔŋ, leʼnə Antiɔk mu Bisidia, 22kə́ kɔ́ ghʉəʼkə tʉ vâafɔʼɔ-Jiso bɔŋleʼ kə́ kwèʼhə bɔ̂ŋ mbɔ b̈ɔ̂ŋ la lyʉ̀ʉtə́nə ndəŋ ntəŋjyujyu ndə bɔ̂ŋ nɔʼ bɛ́ŋ, kə́ kwɛ́nə tʉ bɔŋ mbɔ bɔ̂ŋ la kie ndə mənyíɛ ntɛ-ŋgʉəʼ-hə Nyii buŋ sɔ́ʼ bɔŋ. 23Bɔɔ ghɔŋ Banaba séʼ bəntəŋbəshʉ mu-bəchɔshi-hə inchəŋ mu bəyəŋ-ghɔ̄-hə, bɔ̂ŋ jì muu kə́ gháaNyii, chɔ̀ʼhə bɔŋ kɔ́ kəghɔ-Tiekətʉ ndə bɔ̂ŋ nɔʼ kə mɔ̀ʼfyiihə-ʉə ndəŋ ɔŋ. 24Ndʉʉmɛ, bɔ̂ŋ tòʼ tíŋ hə Bisidia gɛ̀ Baŋfilia. 25Ndʉʉ ndə bɔ̂ŋ kə lɔ̀ʼ ŋgieNyiikə mu Bɛga, bɔ̂ŋ shíʼ gɛ̀ Atalia, 26lʉ̀ buukwɛʼtəŋkə hə chʉʉ kəbuukwɛʼtəŋ, gɛ̀ Antiɔk kə́ bɛ yəŋkə ndə bəntəŋbəshʉ kə mɔ̀ʼ ghɔbə-ʉə ndəŋ bɔŋ gháaNyii mbɔ ɔ̈ dʉ̀ʼ buuŋjyu-i tʉ bɔŋ, tə́ŋ bɔŋ kɔ́ mbi ndə fɔʼɔ ndə bɔ̂ŋ gòʼ təmə nɔʼ mìʼtə nduɔ fɛ. 27Ndə bɔ̂ŋ dàa Antiɔk le, bɔ̂ŋ chə̀ŋ bʉə-Nyii kəyəŋ kəmɔʼ, fʉ̀ʼtə tʉ bɔŋ nubə ndə Nyii nɔʼ fɔ̀ʼ tʉ bɔŋ bɔŋleʼ fʉ̀ʼtə ntɛ ndə Nyii nɔʼ chóʼ chulɔŋ-ntoʼ-e ghɔ tʉ bʉə ndə bɔ̂ŋ gòʼ təmə bɛ bʉə-Juu fɛ mbɔ bɔ̂ŋ kɔ́ fyiihə-ʉə tʉ ɔŋ. 28Bɔ̂ŋ chí chɔ ghɔŋbə vâafɔʼɔ-Jiso tə dɔ̀ŋnə.
ទើបបានជ្រើសរើសហើយ៖
Fɔʼɔ 14: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
