Ittẹwọr 26
26
Isaak ọmaana Abimẹlẹk
1M'ogbe nwa, wa okwo f'ideden owobh m'irek nna akhiri okwo f'ideden f'iwa ochi eden owobha k'ogbe kw'Abraham. Wa Isaak obina ochina ka Gẹra ọtza okhebha Abimẹlẹk kw'ode ọvaarnọng kw'ẹkhọma cha Philistiya. 2Mẹ wọ, Ọvaar Ibinọkpaabyi oyin Isaak abẹ, oben-ẹ bi, “Kọ k'Ijip kahakha o. Kọ ruk m'irek nna sa mben ọ bi, aruk. 3Kọ ruk m'irek nna k'igbegbaa bi kọbh, kaam Ibinọkpaabyi ńwobha ttar-ọ, ḿbiri ndọ-ọ. Kaam ńdọkha irerek nna biphyir ńnang kọ, ọmaana va pa va pọ. Ḿbiri nsi idik s'iwa nchekhi nnang atte kwọ, Abraham. 4Kaam Ibinọkpaabyi ńsi va pa va pọ ahaabh macha ndodori s'ọrọngkpakpa, ḿbiri nnang bẹ irerek nna biphyir. Orenga ka nnam sa va pa va pọ, idibhon biphyir íkhaama ẹdaa, 5okhuri da, Abraham ọhak eho ọnang-m, osi odik kpenamkpen mach ndọhn ẹ. Obiro ohok asana paam, ọmaana akpebhi paam, ndọhna saam ttara aphaangi paam.” 6Mẹ wọ, Isaak owobha ka Gẹra.
7Mada ajinọng p'obhon nwuma an-abọbh-ẹ odik okhuri kwanọng kwẹ, okhuri ojora, ọn-ọgbaak bẹ bi, “Kẹ ode ọgbaanọkka kwaam.” Ochibhi k'ettem bi, “Ajinọng p'obhon nwa afha afhu-m, okhuri ajibhada pa Rẹbẹka.”
8Mada Isaak okk'orukha mẹ k'ogbe-bhirada, Abimẹlẹk kw'ode ọvaarnọng kw'ẹkhọma cha Philistiya orenga k'ọphapha-mma, ore da Isaak om-osi idadaakha ttara kwanọng kwẹ, Rẹbẹka. 9Mando kw'Abimẹlẹk oyeri Isaak oben-ẹ bi, “K'odik-ọkka, kwanọng kwọ wọ manya e. Kọ areng mbọng afẹ agbaakh-m bi, kẹ ode ọgbaanọkka kwọ o?”
Isaak obhin-ẹ bi, “Nchibhi bi, bẹ afha afhu-m ofhu, okhuri kẹ.”
10Iwa Abimẹlẹk ọbọbh-ẹ bi, “Osi yan kw'asi odik-dema nwa? Idikha ira ọnọng wani k'ottem kw'ajinọng p'obhon nwa, okk'kwanọng kwọ abẹ oyima, ira akk'man oponga-pyibha anana k'eho.”
11Mando kw'Abimẹlẹk ọnangi ọsana makhọra obhon bi, “Ọnọng manda wani kw'osi ojinọng nwa ttara kwanọng kwẹ ọttọhk m'obhon nwa, bẹ akhaambi, afhẹ-ẹ.”
12Ma cho nwuma wani, Isaak ọyaabha owoni m'irerek nna, ọpha ekpo p'ọyaabh k'ọhaabh, okhuri da Ọvaar Ibinọkpaabyi ọdẹ-ẹ. 13Wa okwu ọkhaama ẹkhakhaama. Ojibhada kwẹ ochina ororo ọbar maa, ọn-ọkhaama ikkọ k'ọhaabh. 14Wa ọkhaam etzirakpo k'ọhaabh, ọmaana atzọhmnọng k'ọhaabh maa, ettem ẹmma anọng pa Philistiya etzima etzor-ẹ. 15Mẹ wọ, nsipe s'iwa atzọhmnọng p'otte akk'atzuma, k'ogbe kw'otte Abraham owobh k'akpen, anọng pa Philistiya akpa sẹ biphyir ttara idọdọhbh.
16Iwa Abimẹlẹk oben Isaak bi, “Bina, aji obhon kwaman, akk'ẹfa an-akhaama kpọng-kpọng ayọhnga man.” 17Mẹ wọ, Isaak obina mẹ, ọtza oruk k'Ẹttẹri cha Gẹra. 18Obiro otzum nsipe nnuma s'anọng pa Philistiya akk'akpa, k'ogbe kw'Abraham ọkk'ọpa. Okpe sẹ che p'iwa otte Abraham okk'sẹ ọtzam ọnanga.
19Yina, mada atzọhmnọng p'Isaak, abira atzum esipe ọdọdọk k'ẹttẹri maa, bẹ ayin k'esipe ch'asi akkakka p'abhobh-obhobh, 20akkeri-etzirakpo p'obhon kwa Gẹra, attẹwọr asi ẹtta ọmaana akkeri-nden p'Isaak, bẹ aben bi, “Asi mba ade paman!” Ofona mẹ, okpe ẹsipe nda Ẹsẹk#26.20 K'eHiburu, Ẹsẹk oyini ẹkhọhr., okhuri da bẹ akkaan esipe nda ttara kẹ. 21Bẹ abira atzum ẹsipe ẹdọdọk, yina, bẹ abira asi ẹkhọhr okhuri esipe nda. Isaak okpe chẹ Sitina#26.21 K'eHiburu, Sitina oyini ikhakhaanga.. 22Obina mẹ, ọtza otzum esipe ẹdọdọk, ọnọng kw'osi ẹkhọhr kode. On-okpe chẹ Rehobot#26.22 K'eHiburu Rehobot oyini ọphaangi., oben bi, “Ọvaar Ibinọkpaabyi okk'man ọphaangi ọnanga. M'irerek nna rọ sa mówobha mosi ikkọ.”
23Isaak on-obina mẹ ochina k'obhon kwa Bẹrshẹba. 24M'erungiwu nduma, Ọvaar Ibinọkpaabyi oyin-ẹ abẹ, oben-ẹ bi, “Kaam wọ nde Ibinọkpaabyi kw'atte Abraham. Oning-ọ ojor, kaam nwobh ma ttar-ọ, kaam ndọ-ọ, mbiri nsi va pa va pọ ahaabh, okhuri echekhi cha ngaam ttara ọtzọhmnọng kwaam, Abraham.”
25Iwa Isaak osi ijafọhnibe mẹ, owobha mẹ okpobha Ọvaar Ibinọkpaabyi obiro ottima ikhira sẹ mẹ, atzọhmnọng pẹ abira atzum esipe mẹ.
26M'ogbe nwa, Abimẹlẹk okk'Ahuzat kw'ọm-ọtzọhn-ẹ atzim ọmaana Phikol kw'ode odenho kw'agbong-nọng, otzima obina ka Gẹra okwu. 27Isaak ọbọbh bẹ bi, “Ode yan kwa bọng am-aror-m, kw'iwa bọng attaang-m maa bọng akhubh-m k'obhon kwabọng o?”
28Bẹ abhina bi, “Mọkk'ọra k'odik-ọkka bi, Ọvaar Ibinọkpaabyi owobh ttar-ọ. Ofona mẹ, moben bi, ọbaan bi, echekhi ewobha k'ottem kwa kọ ọmaana maman. Tte mosi echekhi ttar-ọ 29bi, kọ man itzama kási, mach'iwa maman ọnọ-ọ itzama osi, yina, mojibh akpen ttar-ọ maa, mottọ-ọ ọbọhk abina k'odidiri. Manya, Ọvaar Ibinọkpaabyi ọkk'ọ ọda.”
30Mẹ wọ, Isaak ohok bẹ ewobha ch'ọdadaami, bẹ achi, abira agwo. 31K'ekpekpebha ch'ewu ekhobh mẹ, bẹ atzọkha ọngwọhngi ttara ayok. Mẹ wọ, Isaak ọtza orik bẹ k'eden, bẹ akpa nnam abhana k'odidiri.
32M'ewu nduma, atzọhmnọng p'Isaak akwu agbaakh-ẹ odik kw'okhuri esipe cha bẹ akk'atzuma. Bẹ aben bi, “Mokk'asi ọra e” 33Mẹ wọ, Isaak oyeri esipe nda Shiba#26.33 K'eHiburu, Shiba oyini ọnwọhngi, azenamfa., ttẹwọr mẹ ewu nduma obhon nwuma on-okpena Beershẹba#26.33 K'eHiburu, Bẹrshẹba ofha oyin esipe ch'ọnwọhngi, ayongi mẹ, esipe ch'azenamfa..
34Mada Ẹsau on-ode cho arọbh afa, ọtzọk kwanọng kw'okpen Judit kw'ode ominanwa kwa Beeri kw'ode ojinọng kw'ofon Het, ọmaana Basemat kw'ode ominanwa kw'Ẹlọn kw'obiro ofona Het. 35Panọng mba afa, asi akpen akhọhn Isaak ọmaana Rẹbẹka.
ទើបបានជ្រើសរើសហើយ៖
Ittẹwọr 26: mfo-latn
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Luke Initiative for Scripture Translation