ရှင်လုကာ 18

ခန်း (၁၈)

ရားသူဂီးနမုဆိုးမ ပုံဥပမာ

1အဲနော့ ကိုယ်တော်ယေရှုဟ သူရဲ့ဗြိတော်ဒွေဝို မြဲဒမ်းဆုတောသင့်ပီး စိဓါတ်မကလသင့်ကြော ပုံဥပမာတစ်ခုန မိတော်မူလေရယ်။ 2ဗြို့တစ်ဗြို့မှာ ဘုရားရှင်ဝို မ‌ကြော့၊ လူဒွေဝိုလဲ လေးစားမှုမှေ့ဘဲဝို ရားသူဂီးတယော့ရှေ့ရယ်။ 3အဲမိုဗြို့မှာရှေ့ဝို မုဆိုးမတစ်ယော့ဟ ရားသူဂီးဆီ ခဏခဏသွားပီး “ကျမ လူတယော့န မှုရင်ဆိုင်နေရပါရယ်၊ ကျမတွက် မှန်တရားဝို စီရင်ပေးပါ” ဆိုပီး အသနားခံရယ်။

4ရားသူဂီးဟ ခီကြာထိ ကူညီပေးဘဲန နေရယ်၊ ကြာလာန သူ့စိထဲမှာ “ငါဟ ဘုရားရှင်ဝို မကြော့၊ လူဒွေဝိုလည်း ဂရုစိုက်ဘဲနနေဝိုလူဖြစ်ရယ်။ 5အယ်ဘေမဲ့ အယ်မုဆိုးမဟ လာလာပီး ဒုက္ခပေးနေဆိုလောဝါ၊ သူ့တွက် မှန်တရား စီရင်ပေးမှ ဖြစ်ရော့မယ်၊ အဲမျိုးမုဝဆိုဟာ ငါခံနိုင်ဘဲဝိုထိ ခီလုံးလာပီး တောဆိုနေလိမယ်” ဆိုပီး ပြောရယ်။

6အဲနော့ ကိုယ်တော်ယေရှုဟ “အဲမိုဆိုးညစ်ဝို ရားသူဂီးရဲ့ တွီးတောကြံစည်ပုံဝို စဥ်းစားကေ့ကေ့ပါ။ 7အယ်မိုမျိုး ဆိုးညစ်ဝို ရားသူဂီးဂိုမှ သူ့ဝို ခနခနတောရှော့ဝိုသူဝို သက်ညှာပေးရယ်ဆိုဝါ ဘုရားရှင်ဟ သူ့ဆီမှာ နေ့ညစ်မပြတ် ဆုတောဝိုသူဒွေဝို ဖလဲ့ဆည်းပေးဘဲန ခီကြာရီး ဆိုင်းငံ့ထားတော်မူမယ် ထံလော။ 8နန်းနို့ဝို ငါပြောမယ်၊ ဘုရားရှင်ဟ ရားမျှတမှုဝို ဗြန်ဆုံး ပေးတော်မူလိမယ်။ အယ်ဘေမဲ့ ဘာပေါ်ဝို လူ့သားတော်ပလန်ကြွရော့လာဝိုခါမှာ ယုံကြည်ခြင်းရှေ့ဝို သူဒွေဝို တွီ့ရပါ့မလော” ဆိုပီး မိတော်မူလေရယ်။

ဖာရိရှဲ န ခွန်ကော့သူ ပုံဥပမာ

9အဲနော့ ကိုယ့်ကိုယ်ကိုယ် မြင့်မြတ်ရယ်ဆိုပီး ထံပီး ခြားသူဒွေဝို နှိခလတတ်သူဒွေဝို ကိုယ်တော်ယေရှုဟ အယ်မို ပုံဥပမာတခုန ပြောပြလေရယ်။ 10“ဖာရိရှဲတယော့န ခွန်ကော့ခံသူတယော့ ဗိမာန်တော်ဝို တက်ရားပီး ဆုတောလေရယ်။ 11ဖာရိရှဲဟ မတ်တပ်ရပ်ပီး ဆုတောဇာဟ ‘ဘုရားရှင်၊ ကျနော်ဟ သူများဝိုမျိုး လုယစ်သူ၊ ဖြော့မတ်ဘဲဝိုသူ၊ အီထော်ရေးဖော့ပလန်သူ မုဘဲပြင် ဟို့နားမှာရှေ့ဝို ခွန်ကော့သူမျိုး မုဘဲတွက်ဂျော့ ဘုရားရှင်ဝို ကျေးဇူးတန်ပါရယ်။ 12ကျနော်ဟ ဘတ်မှာ နှေ့ခါ #18.12 ဘတ်မှာ နှေ့ခါ ဓမ္မဟောင်းကျမ်းမှာ ဂျူးတယော့ဟ ပြစ်ဖြေရာနေ့မှာ နှစ်မှာ ရစ်ရားဘဲ့ စာရှော်ဝို့ လိုအပ်ရယ်။စားရှော်ပါရယ်၊ ရသမျှဝိုလဲ ဗိမာန်တော်ဝို ဆယ်ဘုံတစ်ဘုံ #18.12 ဆယ်ဘုံတစ်ဘုံ ဓမ္မဟောင်းကျမ်းမှာ ဂျူးတယော့ဟ စိုက်ပျိုးမလေဟနေ ရရှေ့ဝို ဆယ်ဘုံတစ်ဘုံဝိုဘဲ့ ဘုရားရှင်ဝို ပေးဝို့လိုအပ်ရယ်။ ပေးလှူပါရယ်’ ဆိုပီး ဆုတောလေရယ်။

13အယ်ဘေမဲ့ ခွန်ကော့ခံသူဟလော ခပ်လှမ်းလှမ်းမှာရပ်ပီး ကောကံဝို မော်ကေ့ရဲဘဲန ‘ဘုရားရှင်၊ ပြစ်သားဖြစ်ဝို ကျနော့်ဝို ငဲ့ညှာသနားတော်မူပါ’ ဆိုပီး ရင်ဖတ်ဝိုထုပီး ဆုတောလေရယ်။

14အဲနော့ အဲမိုလူနှေ့ယော့ အီပလန်သွားဝိုခါမှာ ဘုရားရှင်ရဲ့ ခွမ့်လွှတ်မှုဝို ရဝိုလူဟ ဖာရိရှဲမုဘဲန ခွန်ကော့သူဘဲ့ဖြစ်ရယ်။ ကိုယ့်ကိုကိုယ် ထံကီး ဘဝင်မြင့်သူဒွေဟ နှိခလဇာဝို ခံရမှာဖြစ်ပီး ကိုယ့်ကိုကိုယ် နှိခလတတ်သူဒွေဟ ချီးမြှော့မှုဝို ခံရမှာဖြစ်ရယ်” ဆိုပီး မိတော်မူလေရယ်။

သားဂန်းရားဒွေဝို ကောချီးပေးခြင်း

15လူဒွေဟ သူ့နို့ရဲ့ သားဂန်းရားဒွေပေါ်ဝို လက်တံစေရှင်ရိတွက် ကိုယ်တော်ယေရှုဆီဝို ခေါ်လာဂေ့ရယ်၊ အဲမိုဝို ဗြင်န ကိုယ်တော်ဝို နှော့ရှစ်မဖြစ်စေဝို့ ဗြိတော်ဒွေဟ တားဂေ့လေရယ်။ 16အယ်ဘေမဲ့ ကိုယ်တော်ယေရှုဟ သားဂန်းရားဒွေဝို သူ့ဆီ ခေါ်လာခိုင်းပီး “သားဂန်းရားဒွေ လာပါစေ၊ တားပါန၊ ဘုရားရှင်သာသနာတော်ဟ အယ်မိုသားဂန်းရားဒွေနတူဝို လူဒွေတွက်ဖြစ်ရယ်။ 17နန်းနို့ဝို ငါမှန်ဇာဝိုပြောရမယ်ဆိုဝါ၊ သားဂန်းရားဒွေမျိုး ပြုမူဘဲနေရယ်ဆိုဝါ နန်းနို့ဟ ဘုရားရှင်သာသနာတော်ဝို ဟယ်ခါမှ ဝမ်ခွမ့်ရမှာမုဝ” ဆိုပီး မိတော်မူလေရယ် ။

ချမ်းသာကြွယ်ဝဝို ကြီးကဲတယော့ ထာဝရသက်ကြော မေးခွန်းထုခြင်း

18ခါဟ ဂျူးလူမျိုးကြီးကဲတယော့ဟ ကိုယ်တော်ဝို “ကောမြတ်ဒဲ့ဆရာ၊ ထာဝရသက်ဝို ရဝို့တွက် ကျနော် ဟဲရာလုပ်ရမယ်နူး” ဆိုပီး မေးခါမှာ။

19ကိုယ်တော်ယေရှုဟ “ငါ့ဝို ကောမြတ်ဒဲ့ဆရာဆိုပီး ဟဲဖြစ်ရိခေါ်နူး။ ဘုရားရှင်ဟနေလွဲပီး ကောမြတ်ဝိုသူ ဟယ်သူမှမှေ့ရ။ 20အီထော်ရေးဖော့ပလန်န၊ လူ့သက်မသတ်န၊ ခိုးန၊ သူများကြော မုဘဲန လီပြောန၊ မိဖဝို ရိုသေပါ ဆိုဝို ပဉာတ်ဒွေဝို နန်သိရယ်မုဝလော” ဆိုပီး ပြောလေရယ်။

21အဲလူဟ “အဲမိုပညတ်တော်ဂူလုံးဝို ကျနော် ငယ်ငယ်ဒဲဟ လိုက်နာခဲ့ပါရယ်” ဆိုပီး ပြောလေရယ်။

22အဲနော့ ကိုယ်တော်ယေရှုဟ “အဲဆိုဝါ နန့်မှာ လုပ်ဇာခုဘဲ့ ရှေ့ရယ်။ နန့်ရဲ့ ပစ္စည်းဒွေဝို သွားရောပီး ဆင်းရဲသားဒွေဝို ပေးလိုက်ပါ။ အဲမျိုးဆိုဝါ ရွှေဗြို့တော်မှာ စည်းဇိမ်ဥစ္စာဒွေဝို ရလိမယ်၊ ပီးမှ ငါ့နော့ဝို လိုက်လာပါ” ဆိုပီး ပြောရယ်။

23ဂျူးလူမျိုးကြီးကဲဟ ရားဒိုင်းချမ်းသာရိတွက် အဲမိုဂါးဝို ကြားခီမှာ စိပျစ်ဝမ်းနည်းပီး ထွက်ရားလေရယ်။

24ကိုယ်တော်ယေရှုဟ သူ့ဝိုကေ့ပီး “ချမ်းသာဝိုသူဒွေ ဘုရားရှင်သာသနာတော်ဝို ဝမ်ဝို့ ရားဒိုင်းခက်ခဲရယ်။ 25ဘုရားရှင်သာသနာတော်ဝို ချမ်းသာဝိုသူဒွေ ဝမ်ဇာထက် အပ်ပေါ့ထဲ ကုလားအုတ် ဝမ်ဇာဟမှ လွယ်ဦးမယ်” ဆိုပီး ပြောလေရယ်။ 26အဲမိုဂါးဝို ကြားဝိုသူဒွေဟ “အဲဆိုဟာ ကယ်တံခံရဝို့လူ ရှေ့နိုင်ပါဦးမလော” ဆိုပီး မေးခီမှာ။ 27ကိုယ်တော်ယေရှုဟ “လူဒွေတွက် ဖြစ်နိုင်ဘဲဝိုဇာဒွေဟ ဘုရားရှင်တွက်လောဝါ ဖြစ်နိုင်ရယ်” ဆိုပီး ပြောလေရယ်။ 28ပေတရုဟ “ကျနော်ဒို့ ပိုင်ဆိုင်ဇာဒွေဝို စွန့်ပီး အရှင့်နော့ဝို လိုက်လာပါပီ” ဆိုပီး ပြောခါမှာ။ 29ကိုယ်တော်ယေရှုဟ “ငါမှန်ဇာဝိုပြောမယ်၊ ဘုရားရှင်ရဲ့ သာသနာတော်ဂျော့ မိဖ၊ ဇနီး၊ ညီကို၊ သားမီး၊ အီ ခုခုဝို စွန့်လွှတ်သူတိုင်း။ 30အဲခီမှာ ဆတိုးပလန်ရမယ့်ပြင် နော်လာမယ့် လောကစနစ်မှာလည်း ထာဝရသက်ဝို ရဦးမယ်” ဆိုပီး ပြောလေရယ်။

သေရဝို့ကြောဝို တတိယကြီ ကြိုတံဟောပြောခြင်း

31အဲနော့ ကိုယ်တော်ယေရှုဟ သာဝကဆယ့်နှေ့ယော့ဝို နားဝိုခေါ်ပီး “နားထော်ဂေ့ပါ၊ ခု နို့ဟ ဂျေရုဆလင်ဗြို့ဝို သွားနေဇာဖြစ်ရယ်၊ လူ့သားတော်နပတ်သက်ပီး ပရောဖက်ဒွေ ရေးရားဇာမှန်သမျှ ပလဲ့ဇုံလာမှာဖြစ်ရယ်။ 32လူ့သားတော်ဝို လူမျိုးခြားဒွေလက်ထဲ အပ်ဂေ့လိမယ်၊ လှော်ပြော်ပီး ရှစ်ခွဲဂေ့လိမယ်၊ ထွီးရယ်နထွီးဂေ့လိမယ်။ 33ကျာပွတ်န ရိုက်ဂေ့လိမယ်၊ အယ်ဘေမဲ့ သုံးရစ်ကြာရယ်ဆိုဝါ သက်ပလန်ရှင်လာလိမယ်” ဆိုပီး ပြောပြရယ်။

34ဗြိဒွေဟ ဟဲမျိုးဆိုလိုနူးဆိုဇာဝို နားမလည်ဂေ့ရ၊ အဲမိုဂါးရဲ့ ဓိပ္ပာယ်ဝို သူ့နို့ ဘောမပေါ့အော် ဖုံးကွယ်ထားရိတွက် ကိုယ်တော်ယေရှုပြောဇာဝို နားမလည်ဂေ့ရ။

မျစ်မမြင်ဝိုလန်းရစေခြင်း

35ကိုယ်တော်ယေရှု န သူ့ဗြိတော်ဒွေဟ ဂျေရိခေါဗြို့ နားဝို ရော့လာခီမှာ မျစ်မမြင်တစ်ယော့ လမ်းဘေးမှာထိုင်ပီး တောစားနေရယ်။ 36အဲခါ လူဒွေ အုပ်လိုက်ဂီး ဖြတ်သွားဇာဝို သူကြားဝိုခါမှာ ဟဲရာဒွေဖြစ်နေနူး ဆိုပီး သူ့နားမှာရှေ့ဝိုလူဒွေဝို မေးလေရယ်။ 37လူချို့ဟ နာဇရက်ဗြို့သား ကိုယ်တော်ယေရှုဖြတ်ရားဇာ ဆိုပီး ပြောဂေ့ဝိုခါမှာ။

38သူဟ “ဒါဝိဒ်ရဲ့သား ယေရှု၊ ကျနော့်ဝို နားပါဦး” ဆိုပီး အော်လေရယ်။

39ရှေ့ဟနေဖြတ်ရားဝို လူဒွေဟ သူ့ဝို တိတိရားနေဝို့ တားဂေ့ပေမဲ့၊ “ဒါဝိဒ်ရဲ့သား၊ ကျနော့်ဝို နားပါဦး” ဆိုပီး ပိုပီးဂိုမှ အော်လိုက်လေရယ်။

40အဲဂျော့ ကိုယ်တော်ယေရှုဟ ရပ်တန့်တော်မူလိုက်ပီး အဲမိုမျစ်မမြင်ဝို ခေါ်လာခိုင်းရယ်။ သူရော့လာဝိုခါမှာ၊ ကိုယ်တော်ယေရှုဟ 41“နန့်တွက် ဟဲမျိုးလုပ်ပေးရမယ်နူး” ဆိုပီး မေးခီမှာ

သူဟ “အရှင်၊ ကျနော့်ဝို မျစ်စိဗြင်အော် လုပ်ပေးပါ” ဆိုပီး အသနားခံလေရယ်။

42ကိုယ်တော်ယေရှုဟ “ဗြင်ရစေ၊ နန့်ရဲ့ ငါ့ပေါ်ယုံကြည်ခြင်းဟ နန့်ဝို မျစ်စိပလန်ဗြင်စေပီ” ဆိုပီး ပြောလိုက်ရယ်။ 43အဲမိုခီမှာဘဲ့ ချင့်ချင်း သူမျစ်စိပလန်ဗြင်လာရယ်၊ ဘုရားရှင်ဝို ချီးမွမ်းပီး ကိုယ်တော်ယေရှုနော့ဝို လိုက်ရားလေရယ်။ အဲမိုဖြစ်ပျစ်ဝို ဗြင်လိုက်ဝို လူဂူလုံးဟ ဘုရားရှင်ဝို ချီးမွမ်းဂေ့လေရယ်။

ទើបបានជ្រើសរើសហើយ៖

ရှင်လုကာ 18: TVN

គំនូសចំណាំ

ចែករំលែក

ចម្លង