Prerit 16

16
Pol tei Silni logeyo Timothiyo
1Ulo Pol sakang Dorbi aulio thangka jerw Lustra aulio thangka, odayw Timothiyo mwngwi kaisa Khristoni sagri tongw. Timothiyoni boma ongkha Khristo paitoai kaisa Jihudi birok, matwr bini bopha ongkha Grik. 2Lustra tei Ikoniyo aulini paitoai takhukrok Timothiyonw rak borom khalaiyw tei bini kothoyw mwng gam sao. 3Pol naikha kothoma pirni bagwi Timothiyo bwbai baksa thangnaitwi. Aithani bw omwtwijar jegao Jihudiroknw khachangrwni Timothiyonw sunnot khalairwkha, twmwi himba bini bopha je Grik i kok jotho siyw. 4Bok kwrwngsa auli daini arw kwrwngsa aulio thangphini, Jirusalemni pirisairok tei mothani okara chakararok je ikim thi khalaijak omoroknw borogroknw paledi hinkha. 5Arai khalaywi motharok paitokmao karak ongni nangkha tei salbiti remthaio bangni nangkha.
Pol Mesidoniyanw lagwi nung nungkha
6Pol tei bini aphakrok Phorugiya tei Galatiyao thangka, twmwi himba Asiao kothoma pirnai kothoyw Kathar phala boknw ongmiti rwniya. 7Ulo Musiyani ariyw phaiywi bok Bithuniya amchoyo thangni chaitokha, matwr Jisuni phala boknw thangrwniya. 8Aithani bok Musiyani bisingtwi Troyagw thangwi kasokkha. 9Horw Pol kwrwngsa nung nungkha, Mesidoniya amchoini kaisa borog bachagwi bwnw kabogwi sadok, "Mesidoniyao phaiywi chwnw chubadi." 10Pol i nung nungnai jerw chwng Mesidoniyagw thani bagwi aiphuo jugalkha, twmwi himba chwng bijikha Mesidoniyani borogrokni dayw Khristoni kothoyw kothoma pirni bagwi Kaitor chwnw ringkhojak.
Ludiya paitoai ongkha
11Ulo chwng Troya auli daini rungtorw kagwi uju khalaywi Samthraki twibong aita thangkha, tei jerwni salw Niyapoli aulio kasuikha. 12Obwni jerw chwng Philipi aulio thangkha, imw ongkha Mesidoniya amchoini kwrwngsa auli. Philipi ongkha kwrwngsa baithak auli jebwnw Rom koloni hinwi ring arw obwni bagwi odaini jotho borog Rom auarni kamikai. Chwng o aulio salnwi saltham tongkha. 13Lengkhonai salw chwng aulini haplamni phatarw twibuk korio thangka, chwng bakha kaha odayw Jihudirokni surinai jega tongo. Odayw je birokrok thumjalaijak chwng bokni koriyw achugwi kok sani nagkha. 14Odayw Ludiya mwngwi birokma kaisa tongw, bini kochua palini rini bebar tongw. Thuatira aulini phainai o bwrwima kwbwi Kaitorni lobai. Bw chini koknw khanagwi tongjak, arw Kaitor bini khanw phiyogwi rwkha tei bw paitokkha. 15Bw arw bini nukhungni jothobw baptismo lanai jerw, bw chwnw naroai ringkha, "Nokh jwtini anw Subraini kwbwi paitoai bakha kagwi tongw, iswkhlai ani nuo phaywi tongdi." Arw bini nuo tongni bagwi chwnw goserwkha.
Pol arw Sil alongw
16Salcha jephini chwng o surimungni jegao thanglaidok aiphuo kaisa selengjwk bai chwng malaikha. Bwnw kwrwngsa chaya phala manjak aithani bw baiskangni kok samanw. Omwbai bini nophangrokni amrai ongw. 17O bwrwima Pol arw chini ukhumw ukhumw thangwi chirigwi sagw, "I borogrok manchuk Kaitorni seleng. Ta khalaywi sumsok daini tekhokma man bok omonwse nokhni dayw sadok." 18Bw kabangma sal jora imwtwijar khalaikha. Jerw Pol iswkjora khamche kha je bw ukhum phirogwi o chaya phalanw saka, "Jisu Khristoni mwngbai ang nwnw i tholma rwdok, i bwrwimani daini akhogwi thang." Arw aiphuo o phala akhogwi thangkha. 19O paijak selenjwkni nophangrok obwnw nungkha, arw o paijak selenjwkni bisingtwi bok je rang amrai khalai omo taboklai ongalak omonw bijiywi bok Pol arw Silnw rumkha tei hatio aulini ojarokni dayw tilangkha. 20Bok nalchirairokni dayw boknw tilangwi thangwi sakha, "I borogrok chini aulio hurumuru khalaijak. Imorok Jihudi, 21arw bok imwtwijar akwl yakwlni kothoyw phwrwngma rwdok jebw Romiyo hinwi chini bagwi yachaknai eba palenai kerongni baithe samung." 22Kothe borogrokbw Pol tei Silni baithe bokbai baksa jora rwkha. Aiphuo nalchirairok sengkrakroknw thwlkha bokni ri chum sichigwi bunaitwi. 23Boknw athamara bugwi paikhlai boknw alongw tonkha, arw gam khalaywi mwrwkdi bagwi alongni along rwkhuknainw tholkha. 24Along rwkhuk o tholma manwi Pol tei Silnw along bisingni nogw tilangkha arw bokni yathwi sigwlbai khagwi tonkha. 25Hor kacharw Pol arw Sil suridok arw Kaitorni bachungw lobmung rachaplaidok. Kothe alongirok obwnw khanadok. 26Atakkiya khalaywi bangla kotor kwrwngsa ongkha arw omobai alongni bindarok kwlwywi kasaka. Aiphuo alongni jotho duar tei alongirokni sigwl khengjakha. 27Along rwkhuk cheter mankha tei alongni jotho duarrok khengjak nungwi seng kariywi binibai bw thwini naikha. Bw bakha kakha jotho alongirok khalwi thangka. 28Aiphuo Pol chirigwi sakha, "Bathakdi, sakni guna ta khalaidi, chwng jotho irw tongw." 29Aiphuo o along sotaing kaisanw chati twdi hinwi bw khalwi bisingw thangkha arw kiriywi kwlwitwi kwlwitwi Pol tei Silni sakangw yesu mokoromwi bini yathwi kaphangw kalaikha. 30Omoni jerw bw Pol tei Silnw phatarw twgwi swngkha, "Ang ta makhalainw jebwni bagwi nini Kaitor anw rwkkhiya khalainw?" 31Bok sakha, "Nwng tei nini nokni borogrok jwtini Subrai Jisunw paitogw, iswkhlai nokh sumsokni tekhokma mannw." 32Pol bai Sil aiphuo along rwkhuk arw bini nokni jothoni dayw Subraini kok sakha. 33Along rwkhuk o horo Pol arw Silnw lagwi bokni basakni je kasa chajak jeganw sugwi rwkha arw bw tei bini nokni kothe jotho baptismo lakha. 34Obwni jerw bw Pol tei Silnw bini nogw tilangwi charwkha. Kaitornw paitogwi bw tei bini nokni borogrok tongthokmabai kwplwng ongkha. 35Jerwni salni phurungw nalchirairok bokni sengkrak roknw rwgwi sagwi hoka, "O borogroknw yakarwi rwdi." 36Aiphuo along rwkhuk Polnw sakha, "Nwnw arw Silnw yakarwi rwni bagwi nalchirairok sagwi hojak. Nokh tabok akhogwi phaidi arw khakchangwi thangdi." 37Aiphuo Pol o sengkrak roknw sakha, "Chwng Rom kamikai, chwnw nalchir khalaiya karwi jothoni sakangw bukhrujak arw alongw rwjak. Tabok ta nalchirairok chwnw phwrwk phwrwk yakarwi rwni naiyw? Omo ongalak! Bok sakrok phaywi chwnw phatarw tilangthwk." 38O sengkrakrok aiphuo i koknw nalchirai roknw sakha Pol arw Sil ongkha Rom kamikai aiphuo bok kirilaikha. 39Bok Pol arw Silni dayw thangwi nakarma sankha tei boknw alongni phatarw twgwi auli yakarwi thangdi hinwi kabokkha. 40Pol arw Sil alongni phatarw phaywi Ludiyani nogw thangka. Odayw bok paitoai rokbai malaikha. Paitoairoknw khabaja rwgwi phaikhalai bok odaini thangka.

ទើបបានជ្រើសរើសហើយ៖

Prerit 16: TPE

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល