An Roma 4
4
Rina̱n de̱lin Sila le̱gt Ibrahi
1Iye̱ bo̱ kaa a̱n nan ze az Ibrahi, un rein cetok Yahude̱n ka̱ swaaka̱n, pamaska baan bata̱m d'ba̱t baa Na'Sili? 2Awaz i rema̱n rina̱n u emin a̱n Sila le̱gtin o, u ci rin daka̱m d'gen. Za la baa Na'Sil da. 3Ge̱nsa̱n lalks Na'Sil zeka, “Ibrahi batk d'ba̱t baa Na'Sila̱. Rema̱n taanlo, Sila o̱mk batma̱n ba̱ta̱d ru, gela̱v Na'Sila̱.”#4:3 Go̱t ta̱m: D'Tak 15:6; AGal 3:6. 4Kan emin la a'yomko, copa̱nc ru a ca̱n soot m'ho̱s da. I ho̱d d'mo̱go̱. 5Nocuna̱n zain a̱n c'ka̱ndi a̱n yomka ru da, ka̱ndic ru la kwe̱, i baa Sila nan rein ta le̱g a v'dum aa getta d'hi, Sila ta o̱m batma̱n ba̱ta̱d ru, gela̱v Na'Sila̱. 6I ho̱da̱n lo a̱n Dauda tantain pusuu nocuna̱n Sila o̱min kan gela̱v na̱, za rema̱n gabma̱n giira da.
7U zeka, “Sila emaka an Sila kwisiin c'ko̱t
a biti ta̱m ko̱tc na̱.
8Sila emaka nocuna̱n
Kan Go̱mca̱n Kooye̱
go̱tin da̱n ko̱tc ru u'ka̱ka̱la̱.”
9I an ciin bo̱ kaa s'ged c'taa a̱n Sila emaine alla an zattain da? Rema̱n na zeka, na o̱meske batma̱n ba̱ta̱d Ibrahi, gela̱v Na'Sila̱. 10Iye̱ daava a̱n Sila o̱mtin batma̱n ba̱ta̱d Ibrahi gela̱v Na'Sila̱? I daava̱n vu citin s'gede alla daava̱n vu zattin s'ged da? I daava̱n u ta citin s'ged da.
11An Ibrahi se̱stin na emaka o s'geda, i kwesaka az na oga̱mske batma̱n ba̱ta̱d ru baa Na'Sil gela̱v Na'Sil hyanma̱n daava̱n u ta citin s'ged da. Rema̱n taanlo, u sootk cet an batin d'ba̱t baa Na'Sil kwe̱. Bat na̱nna ta̱ma̱, nan oga̱mse na̱ an gela̱v Na'Sila̱, go̱t la a̱n na ema na̱ s'ged da. 12I unwa ta̱m cet an na emain s'geda. An rein za rema̱n geds na̱ c'taa da, i an batin d'ba̱t baa Na'Sil ho̱da̱na̱n ceta cinna Ibrahi battin d'ba̱t baa Na'Sil daava̱n u ta citin s'ged da.
Yobu an batin d'ba̱ta̱
13Za rema̱n gabma̱ s'giira a̱n Sila gigtin lalk az ta de̱l Ibrahi a goov run kum rihica̱n copun yanda̱ha̱n da. I rema̱n gela̱v Na'Sil va̱n noc tu kum rema̱n u batk d'ba̱t baa Na'Sila̱. 14Awaz i an gabma̱ s'giira c'taa a̱n ta kum rihica̱n Sila zein az ta ne̱e̱ an batin d'ba̱ta̱, bata̱m d'ba̱t a lalkuna̱n Sila gigin vaakk bo̱ ka̱ka̱la̱. 15Giiras el sa̱n nokta hwinsa̱d Na'Sila̱. Rema̱n va̱na̱n giiras zain da, ko̱ta̱d za da.
16Rema̱n taanlo, i a̱n bata̱m d'ba̱t baa Na'Sil a̱n lalkuna̱n Sila gigin estine. I bat ti soot ho̱sa̱m Na'Sila̱. Ti kwesa ta̱m lalkuna̱n Sila gigiin goov Ibrahi, za an gabma̱n giiras Mosa c'taa u gigiin da. I a an batin d'ba̱t baa Na'Sil ho̱d Ibrahi, un rein ceta cinna kwe̱. 17I ho̱da̱na̱n i retin a'ge̱n a̱n lalks Na'Sila̱. Sa̱ zeka, “A̱m vaaksa v ceta netnan copca̱n copun yanda̱ha̱n hwe̱di.” Ibrahi i ceta cinna baa Sila nan u battin d'ba̱ta̱. Sila nan rein ta po̱to̱so̱ an wa̱ini. An ciin ta̱m we̱sma̱n emma̱n rihica̱n ta lain da.#4:17 Go̱t ta̱m: D'Tak 17:5.
18Ibrahi batk d'ba̱t baa Na'Sila̱. U savk ta̱m c'de̱b baan lalkuna̱n Sila gigin o, go̱t la waa he̱n rin sava̱m c'de̱b da. I taanl u soottin cet netnan copca̱n copun yanda̱ha̱n hwe̱di. Ho̱da̱na̱n na ve̱ce̱te̱in o, “I ho̱da̱n lo bo̱ a̱n goov rov ti soott hwe̱di.”#4:18 Go̱t ta̱m: D'Tak 15:5. 19Batma̱n ba̱ta̱d ru baa Na'Sil ta ka̱la̱nna̱ la da. U ta wass ta̱m a ulc run da. Rema̱n daava̱n lo, we̱e̱s ru i v'za̱ngu. U ta wass ta̱m az Seera toosko u'mac da. 20U ta em ta̱m u'hevkehevke baan lalkuna̱n Sila gigin o da. U esk la s'naa s'il u batk d'ba̱t baa Na'Sila̱. U ne̱e̱k ta̱m A'Sil k'gwin.
21U o̱mk ta̱m a̱n de̱bc ru, az Sila ci we̱sma̱n emma̱n rina̱n a gigin lalk az ta ema. 22I rema̱n taanlo a̱n Sila oga̱mstein batma̱n ba̱ta̱d ru baa Na'Sila̱, gela̱v Na'Sila̱. 23Lalk uha̱n la, “Sila oga̱mske o.” Za rem Ibrahi c'taa a̱n na ge̱ntin o da. 24I a cinna na. Cinnananan Sila ta oga̱mse batma̱n ba̱ta̱d cinna baa Na'Sil, gela̱v Na'Sila̱. Cinnananan batin d'ba̱t baa Sila nan po̱to̱so̱in Ye̱so, Kan buu cinna. 25Ye̱so u'na̱n na babin na hwaa rema̱n ko̱tc cinna. Un Sila po̱to̱so̱in ta̱m rema̱n na kumt d'le̱g baa Na'Sil cinna kwe̱.
ទើបបានជ្រើសរើសហើយ៖
An Roma 4: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
