An Roma 1
1
D'Po̱o̱sso̱
1I mi Bulus coka̱v Ye̱so Ka̱risti. Sila dagk me, a ke̱e̱k a ze̱e̱gse̱ m ta̱m a̱m soot k'comt va̱n kasi lalk na̱.
2I kasi lalkuna̱n Sila baasin a vatk de̱ha̱nzo az ta comta. Ho̱da̱na̱n baranc na̱ vattin a̱nmin ge̱nsa̱n lalks Na'Sil sa̱n zattin ri d'reb da. 3Lalksa̱n lo, i sa̱n Ye̱so Ka̱risti Kan buu cinna, un na matin a̱n guti Dauda a̱n remsa̱ c'nocurimu. 4I we̱sma̱n Hora̱mda̱n zattin ri d'reb da a̱n kwesain az i unwa Waav Na'Sila̱. Po̱tun u po̱tin ta̱m au utini, i kwesaka az i unwa Ye̱so Ka̱risti, Kan buu cinna.
5I rem na ne̱e̱t Ye̱so k'gwin a̱n Sila ematain co u'pusu c soot ta̱m c'comtne. C ve̱ce̱te̱ netnan copun yanda̱ha̱n kwe̱ az a bat d'ba̱t a gab A'Sila̱. 6Nwaa ta̱ma̱, a̱n el baa an Ye̱so Ka̱risti po̱gin a̱n soot a ru.
7Taka̱llaka̱ ha̱n, i an rein a̱n le̱in Roma kwe̱ a̱m ge̱ne̱in ka̱n. An Sila rein na̱m'to̱no̱. Aa po̱gin a soot neta̱n na̱, a an zattin ta̱m ri d'reba̱n da.
U'Pusu a la̱ta̱m c'de̱ba̱n lanma̱n baa Na'Sil ceta cinna, a Kanubu Ye̱so Ka̱ristin, boro baa no.
Cepksa̱n bo̱mc Na'Sila̱
8Na̱m'e̱te̱, a̱m bo̱mk Sila ri rem Ye̱so Ka̱risti. Rema̱n ho̱da̱na̱n na retina̱n vatma̱n batma̱n ba̱ta̱d no baa Na'Sil koope̱ a̱nmin copun yanda̱hna. 9Sila na m reina̱n emam m'cok a̱n de̱bc ri kwe̱, baan yomkan ba̱sda̱n kasi lalk waav na̱, napk az a̱m el ta̱'m bakasa no kooye̱ daava a̱n cepks ri. 10Cepks ri ta̱m kooye̱ daava, i Sila pe̱e̱ m k'le̱v a̱m hau baa no.
11A̱m to̱nk a̱m he̱n no hwe̱di d'kal bat ta̱n kum ho̱sma̱n emka̱lla̱m c'rihi ma̱n Hora̱md Na'Sil da̱n ne̱e̱. A̱m swiditi ta̱m no m'we̱se̱. 12Bat cinna kwe̱, ca̱n setasa hid cinna c'de̱be̱. Batma̱n ba̱ta̱d ri setasa no c'de̱be̱. Nwaa ta̱m batma̱n ba̱ta̱d no setasa m c'de̱be̱.
13Hyaarene, a̱m to̱nk az a̱n nap az a̱m pook a̱n saa hwe̱di ai ta̱'m hau baa no. I bat ta̱'m kum neta̱n baa no an ta gab Ye̱so, ho̱da̱na̱n m kumtin baa an zain Yahude̱n da, a̱n baac hyan. V'Daa la, i ta ema da.
14I sootk a̱m ho̱d d'mo̱g a̱m bisi netna ni'le̱e̱ a a c'bel na, a s'vere a an zattin s'vera̱n da, kasi lalko. 15I rina̱n de̱lin bo̱ m to̱nt hwe̱di az a̱m ema no la bano, nwaa an le̱in Roma, ba̱sda̱n kasi lalk Ye̱so.
We̱sma̱n kasi lalko
16A̱m za ta̱'m hong e̱nma̱n ba̱sda̱n kasi lalk Ka̱risti da. Rema̱n i we̱sa̱m Na'Sil ma̱n ta̱m gwa̱a̱ koowe̱ un batin d'ba̱t baa Na'Sila̱. Nan taka a̱n Yahude̱ne̱. Na gabto a̱n an zain Yahude̱n da. 17I baan kasi lalkun lo, a̱n na kwesain na le̱vka̱n nocurimuca̱n zattin ri d'reb da, ca̱n rwa̱in baa Na'Sila̱. Nan kum ta̱m ca̱ baan bata̱m d'ba̱t baa Na'Sil lanma̱ d'takbo caam d'be̱se̱. I ho̱da̱na̱n i retin a'ge̱n a̱n lalks Na'Sila̱. Sa̱ zeka, “Kan zattin ri d'reb da, tu po̱t rema̱n bata̱m d'ba̱t baa Na'Sila̱.”
Sila ha̱lk a c'ko̱to
18Sila kwesaka hwinsa̱d na̱ lanm na'con rema̱n ha̱lc Na'Sil a dumv neta̱n na. An rein ta le̱p m'ga̱u rema̱n dumv na̱. 19Neta̱n napk rihica̱n neta̱n ta la̱a̱ a̱n nap kwe̱ ca̱n tanin A'Sila̱. Ai retin Sila kwesaka na̱ ca̱nca. 20Rihic Na'Sil a we̱sa̱m na̱n ma̱n zattin ged da, za rina̱n noc tu he̱n a̱n is da. Ai retin la Sila ba̱tkska̱ rihica̱ ha̱n lanma̱n daav a emtin copun yanda̱hna, nan la̱a̱ a̱n ke̱e̱se̱ ca̱ baan rin a balin a̱n copun yanda̱hna. Rema̱n taanlo, neta̱n zatta nwa̱a̱'an lalk da.
21Go̱t ge̱ a napk A'Sila̱, a ta ne̱e̱ la na̱ k'gwin ho̱da̱na̱n nan ne̱e̱t A'Sil k'gwin alla ta̱m a bo̱m A'Sil da. Keka̱bs na̱ i sa̱n ka̱ka̱la̱. De̱bc na̱ ta̱m ic rimca̱ cipp. 22A el a̱n c'ka̱ndi az i na̱nna a s'vere, go̱t la i na̱nna kipni. 23A vaakska gwink Sila nan zain ta wa̱a̱ da, ho̱da̱n hyo̱o̱m netnanan ta wa̱a̱, a nema̱n na, a rinna s'naa s'naas ne, a an ta huk a̱n k'ba̱t na̱.#1:23 Go̱t ta̱m: Ggdk 4:16-18.
24Rema̱n taanlo, Sila lagk na̱ a ryaa hwic a̱n emma̱n rihic naak ca to̱nin a̱n de̱bc na̱. 25A vaakska ga̱um Na'Sil c'ko̱lo̱. A emaka ta̱m rihica̱n Sila balin c'hwiipsa̱ a m'coka̱n, hatka̱n Sila nan emin ca̱. Sila nan ge̱be̱se̱in na bo̱m d'kal-d'kala. A̱nha̱a̱n.
26I rema̱n taanl a̱n Sila lagtin na̱ a̱n to̱nca̱n emma̱n rihica̱ m'e̱n. Netan na̱ ta la̱v a hyannana̱ netan na, ho̱da̱na̱n a̱ra̱m tu la̱vt a netana. A em ta̱m rihica̱n ta hwennain ho̱da̱na̱n Sila emtin ca̱ da. 27I ho̱da̱n lo bo̱ ta̱m a̱n a̱rma̱n emtine. A lagk m'la̱v a netan na̱-na̱. A hatk na̱m'to̱n a la̱v a hyannana̱n ho̱da̱na̱n a̱ra̱m tu la̱vt a netana. Rihica̱ ha̱n za ho̱da̱na̱n Sila emtin bo̱ ca̱ da̱. A kabk la venuna̱n hwennain ko̱tc na̱.
28Ai retin neta̱n ha̱lk a̱n kin naps Na'Sil a̱n de̱bc na̱, i rina̱n de̱lin bo̱ Sila lagtin de̱bc naak hat we̱sa̱m na̱, a̱n emka̱lma̱n rihica̱n ta hwennain da. 29A za a̱n gabma̱n rina̱n Sila zein da cakk. A to̱o̱k a̱n emma̱n rihic naake: c'zo̱rmo̱'isa̱, hweeda̱n dinc netna, d'hyubu, hweec netna, hob ni'dama, a c'palka, an de̱bc naake a a m'zo̱m no̱.
30I na̱nna ta̱m a c'hitksa̱. An ha̱lc Na'Sila̱. A c'rebo. A m'lo̱go̱. An rein ta to̱n ne̱e̱m hid na̱ k'gwin, an zain ta̱m ta ke̱be̱ an matin na̱ da. 31A zatta d'hi da. A ta bat d'ba̱t baa Na'Sil da. A za ta to̱n neta̱n da. A zatta ta̱m m'za̱i da. 32Go̱t ge̱ a napk az Sila ta ven an rein ta em rihica̱ ha̱n kwe̱, a el la ta em ca̱. Za u'em c'taa da, a el ta̱m a̱n he̱nma̱n ke̱md an ta em ca̱.
ទើបបានជ្រើសរើសហើយ៖
An Roma 1: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
