Markus 9
9
1Ye̱so zeka ta̱m na̱, “Lag a̱m ve̱ce̱te̱ no m'ga̱u. Ahyan el a'es taha̱n an zain na̱m'wa̱a̱ da a za a he̱nk go̱mc Na'Sil ceka a we̱sa̱m ca̱n da.”
Vodma̱n hyo̱o̱m Ye̱so
(Mat 17:1-13; Luk 9:28-36)
2An na la̱vtin ho̱d c'hwe c'cihin, Ye̱so o̱mk Bitrus na Yakub a̱n Yohana. A elk a̱n se̱mk ho̱pke, a̱n'a c'taa. Hyo̱o̱m Ye̱so vodt bo̱ ta go̱tte. 3Kusa̱m ru emk d'za̱n, a̱m pusuku padpada. Rihi za in nan emt c'guzk a̱n inya a̱n copun yanda̱ha̱n in ti la̱a̱ a̱n pusa̱sa̱ ma̱ taanl da. 4A̱n daava̱n lo, Iliya na Mosa ceka coso. A takaz s'lalk na̱nna a Ye̱so no.
5Bitrus emt bo̱ s'lalk u zeka, “Kan la̱a̱sa̱m na, i emk d'ke̱m an na retin tahna. Lag c em m'saace m'ta̱a̱cu. I'Da̱n rem rovo. I'Da̱n rem Mosa. I'Da̱n ta̱m rem Iliya.” 6(U vat-vat la taanl rema̱n u ta nap rina̱n tu vat da. Damran gelk ryaak ta̱m na̱ kwe̱.)
7Weck hata bo̱ k bitiki na̱. A hong-hong ta̱m s'lalk a̱nmi k'wece, “Go̱t ha̱n na Waav ri. Am el ta̱'m to̱n o hwe̱di d'kala. Ge̱ne̱ na o u'con.”#9:7 Go̱t ta̱m: Mat 3:17; Mar 1:11; Luk 3:22.
8A̱ndaabe, a ta he̱n ta̱m noc da a za Ye̱so a na̱nnan c'taa da.
9Aa latain na̱m'cizga̱ a̱n se̱me̱, Ye̱so saak na̱ d'rin az aa ve̱ce̱ la noc hyan rina̱n a he̱ne̱in da. Az a val canma̱n daava̱n Waav Noc tu ut u vaak ta̱m u po̱to̱.
10A kink ta̱m lalk uha̱n a̱nmin de̱bc na̱. A ipka̱nki ta̱m a̱n a̱n'na̱n a̱n'na̱ az, “Iye̱ ta̱m a̱n rein u uku, u po̱tko̱?” 11A ipkt bo̱ o, “I rema̱n ye̱ a̱n an la̱a̱sa̱m na s'giira zetin az i ke̱ng Iliya tu baa han na̱m'e̱t ai Ka̱risti hata?”#9:11 Go̱t ta̱m: Mal 4:5; Mat 11:14.
12Ye̱so se̱sk ta̱ma̱, “M'Ga̱u, i Iliya a̱n tu han na̱m'e̱te̱. I unwa ta̱m a̱n tu mamgsa c'rihi kwe̱ c vaak ho̱da̱na̱n c ge̱be̱ste̱ine. Lalks Na'Sil ta ze ho az i ke̱ng nan ryeesa Waav Noc d'kob hwe̱di, na ha̱l o ta̱m da? 13Mi la m zeka no, az ke̱ng Iliya haka. A emaka la o c'rihi kwe̱ ho̱da̱na̱n a to̱ntine. Ho̱da̱na̱n lalks Na'Sil vattin da̱n un.”
Ye̱so vogk a̱ra̱m rinnas'ce
(Mat 17:14-21)
14An Ye̱so a an la̱a̱snan lo i'ta̱a̱c vaaktain baa an la̱a̱s baa ru ahyan, a gatka na̱ a damran bugda̱n neta̱n na. An la̱a̱sa̱m na s'giira el ta̱m a̱n s'lan a na̱nna na. 15A̱ndaabe, an bugda̱n neta̱n he̱nte̱in Ye̱so, a sipk a'nwa̱a̱. A swema̱rka a ceka baa ru, a po̱o̱sko̱ o. 16Ye̱so ipkt bo̱ an la̱a̱s baa ru, “I lansa̱n ye̱ a̱n retin a na̱nna na?”
17A̱rma̱ v'da̱n baa d'bug zeta bo̱ o, “Kan la̱a̱sa̱m na, a̱m savaka v waav ri un rinnas'ce sipine. A de̱lk o a tu la̱a̱ s'lalk da. 18Kooye̱ daava a siptin o, ta rwo̱p o nu'copo. Tu ruta̱ c'pekta na'nwa̱a̱, u maase a̱n ta̱uda̱n nin u ho̱o̱se ta̱m kau. A̱m emaka an la̱a̱s baa rov s'lalk az a vog na̱ a rwa̱a̱, a ta hweks la da.”
19Ye̱so zeta bo̱ na̱, “Nwaa netnan ta̱ma̱, a̱n zatta bata̱m d'ba̱t baa Na'Sil da. Go̱t na gosma̱n a̱m gosin baa no! Go̱t na ho̱da̱na̱n m gagtin c'de̱b a nwaa na! Nokta na waaune baa ri.”
20A noktta bo̱ o.
An rinnas'ce he̱ntin Ye̱so, a̱ndaabe a de̱lk waa a̱n s'zapa. A hetk o nu'cop birbiri. Go̱to̱ c'pekta a̱n k'nwa̱a̱ pukapuka.
21Ye̱so ipkt bo̱ cet waaune, “I nama i takain o?”
U se̱st bo̱ o, “I lanma̱ c'waa. 22Na̱v'daa-na̱v'daa a el ta kobto o a̱n hwela alla na̱m'ho̱o̱ az a hot be̱ o. Awaz ti ema, hong za̱im co, a̱v se̱e̱te̱ co.”
23Ye̱so hya̱a̱ksta̱ bo̱ o, “Awaz ti ema? Kooye̱ ti ema baa kan batin d'ba̱t baa ri.”
24A̱ndaabe, ceta̱n waa zet bo̱ na̱m'we̱se̱, “A̱m batk d'ba̱ta̱. Se̱e̱te̱ m ho̱da̱na̱n ta̱'m sudt bata̱m d'ba̱ta̱.”
25An Ye̱so he̱ntin neta̱n nu'swemra ta karga, u haagska rinnas'ce. U zeka na̱, “Nwaa rinnas'ce a c'remta a m'kyura̱m nu, a̱m zeka no, rwa̱a̱ na a̱n lag waa a̱n c ru. An sud la ta̱m a̱n uv baa ru da cakk.”
26Rinnas'ce de̱lt bo̱ kan. A hett bo̱ waa c'vilu. A ruk a lagk o. Waa na̱ka̱nta̱ bo̱ ho̱d d'wa̱a̱. I de̱lk neta̱n hwe̱di zeka, “U uku.” 27Ye̱so tapt bo̱ koma ru, u una̱sa̱ waa u esasa ta̱m o. Waa esuz la jo̱tt.
28An Ye̱so uvta̱in a̱nmi nu'bu, an la̱a̱s baa ru ipkk o m'ze̱se̱. A zeka, “I rema̱n ye̱ a̱c ta hwekstina̱n vog na̱ da?”
29Ye̱so se̱st bo̱ na̱, “Goon o̱pnan lo a ta rwa̱a̱ taanl bapp a za a s'cepka̱n na̱m'we̱s da.”
Ye̱so zek ta̱m az tu wa̱a̱
(Mat 17:22-23)
30A una̱vka̱ a̱n a̱n'a. A gedanka a̱nmin copun Galili rema̱n Ye̱so ta to̱n be̱ az noc nap va̱na̱n a rein da. 31Ye̱so zek ta̱m an la̱a̱s baa ru, “Nan badasa Waav Noc a̱n komc neta̱nrima, ta hwaa o. Aa hwaa la o, tu po̱t a̱n hweda̱ v'ta̱ccu.”
32A ta ke̱e̱se̱ la lalksa̱ ha̱n da, gela̱v emk la ta̱m na̱ ipka̱m ru.
Iwe̱ a̱n rein u so̱dk kwe̱
(Mat 18:1-5; Luk 9:46-48)
33Ye̱so ceka ta̱m le̱in Kafarnahum. Au retin a̱nmi nu'bu, u ipkk na̱, “I lansa̱n ye̱ sa̱n latin a̱n k'le̱ve̱?” 34A resk te̱kk, rema̱n a lak a̱n s'lan a̱n k'le̱v az iwe̱ baa na̱ a̱n tu kab c'damra.#9:34 Go̱t ta̱m: Luk 22:24. 35U soott bo̱ u po̱gko̱ oopa ni'il inlo. U zeka na̱, “Koowe̱ a̱n to̱nin u soot damra, iu kalasa hid ru, u soot ta̱m ho̱d coka̱v koowe̱.”#9:35 Go̱t ta̱m: Mat 20:26-27; 23:11; Mar 10:43-44; Luk 22:26.
36U po̱gto̱ bo̱ waa u reko u esasa o a̱n te̱ka na̱. Au kabtin o, u zeka na̱, 37“Koowe̱ a̱n tu kab da̱nv goon akna ha̱n rem ri, i mi u kabine. Koowe̱ ta̱m a̱n kabin me, za mi u kabin da, i kan comain me u kabine.”#9:37 Go̱t ta̱m: Mat 10:40; Luk 10:16; Yoh 13:20.
Un ta ha̱lin na da iu cinna
(Luk 9:49-50)
38Yohana se̱st bo̱ Ye̱so, “Kan la̱a̱sa̱m na, c he̱nke̱ noc a̱n vegla̱m rinnas'ce a̱n we̱sma̱n dind rovo. U za la tu gab na da. C holta bo̱ la o rema̱n u za tu gab na da.”
39Ye̱so zeka, “A̱n ta la be̱ a̱n hol o da. Rema̱n noc za un tu em c'he̱t a̱n we̱sma̱n dind ri, u vaak u naas ta̱m da̱ da. 40Kan ta ha̱lin na da, iu cinna.#9:40 Go̱t ta̱m: Mat 12:30; Luk 11:23. 41Rema̱n koowe̱ a̱n tu ne̱e̱ no ho̱o̱m nu'so̱u rem ri, rema̱n az i nwaa ge̱ a ri, lag a̱m ve̱ce̱te̱ no m'ga̱u, nocun lo a tu rob copa̱nc ru da.”#9:41 Go̱t ta̱m: Mat 10:42.
Kwaa rina̱n ti de̱l a̱v ko̱to̱
(Mat 18:6-9; Luk 17:1-2)
42Koowe̱ a̱n tu de̱l da̱nv a rekan aha̱n an batin d'ba̱t baa ri u ko̱to̱, ti piti be̱ o na ge̱ge̱ o d'naa a̱n to̱r na bono o a̱nmi m'saa. 43Awaz koma rov ta de̱l a̱v ko̱to̱, gedanna na̱. Ti piti v a̱v po̱t d'kal a a'koma̱n a da̱n, a̱nda v ci c'kom c'il na de̱l va̱n wa̱a̱ka̱n hwelananan zain ta rimsi da cakk. [44Va̱na̱n
zo̱ma̱n an rein a̱n a̱n'a
za ta wa̱a̱ da,
hwelananan rein ta̱m a̱n a̱n'a
a ta rimsi da d'kala.]#9:44 Ge̱nke̱-ge̱nke̱ c hyan zatta za̱tva̱n 44 da.
45Awaz nau rov tu de̱l a̱v ko̱to̱, gedanna o. Ti piti v a̱v po̱t a u'naa uda̱n, a̱nda v ci s'naas s'il na bono v a̱nmin wa̱a̱ka̱n hwela. [46Va̱na̱n
zo̱ma̱n an rein a̱n a̱n'a
za ta wa̱a̱ da,
hwelananan rein ta̱m a̱n a̱n'a
a ta rimsi da d'kala.]#9:46 Ge̱nke̱-ge̱nke̱ c hyan zatta za̱tva̱n 46 da.
47Awaz isa̱d rov ta̱d de̱l a̱v ko̱to̱, ho̱l da̱. Ti piti v a̱v uv a̱n go̱mc Na'Sil a d'is d'da̱n, a̱nda v ci isi i'il na bono v a̱nmin wa̱a̱ka̱n hwela.#9:47 Go̱t ta̱m: Mat 5:29. 48Va̱na̱n
zo̱ma̱n an rein a̱n a̱n'a
za ta wa̱a̱ da,
hwelananan rein ta̱m a̱n a̱n'a
a ta rimsi da d'kala.#9:48 Go̱t ta̱m: Isa 66:24.
49Nan maak koowe̱ a̱n hwelana.
50“I'Gum i rihi kasi. A gumi rob la ryaam e, i a̱n ye̱ a̱n nan mamgsta e? Soot na ho̱d ni'gumu. A̱n soot ta̱m i kasi a hyannano no.”
ទើបបានជ្រើសរើសហើយ៖
Markus 9: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019