Markus 16
16
Ye̱so po̱tko̱
(Mat 28:1-8; Luk 24:1-12; Yoh 20:1-10)
1An hweda̱n hwerad Yahude̱n to̱o̱tine, Me̱e̱ri (kan Magdala), a̱n Salomi, a̱n Me̱e̱ri (in Yakub), a waaka m'nev a̱m kasi, ma̱n kos d'ha̱ng hwe̱di d'kala. I a swikiti wa̱a̱d Ye̱so. 2Na̱m'zan-na̱m'zan d'hwen da̱n rwa̱n-rwa̱n, hweda̱n Lahadi, a haka baa nu'sago. 3A lak na̱m'ze a̱n a̱n'na̱n a̱n'na̱, “Iwe̱ a̱n tu he̱lkse̱ cinna u'taar baa nu'sago?”
4Aa bontoin isa̱, a he̱no-he̱no na baask na he̱lkske̱ taarune. I damra nu'taar la. 5Aa uvtin a̱nmi nu'sago, a he̱n-he̱n waa'kempa a kusi pusin i zisi a'to̱po̱. U el ta̱m a'soot a̱n kabva̱n koma s'to̱o̱. Gela̱v ryaat bo̱ na̱ hwe̱di d'kala.
6Waa'kempaune zeta bo̱ na̱, “An hong la v'gel da. I Ye̱so kan Nazarat un na edgin a̱n k'kan a̱n reina̱n hobo. U za taha̱n da. Sila po̱to̱sko̱ o. Go̱t ha̱n va̱na̱n na lain na la̱ta̱ska̱ o. 7Vaak na a̱n ve̱ce̱ an la̱a̱s baa ru a Bitrus ne, az u baak na̱ caama̱n le̱in Galili. I a̱n a̱n'a a̱n ta̱n he̱n o, ho̱da̱na̱n u baastin u ve̱ce̱ke̱ no.”#16:7 Go̱t ta̱m: Mat 26:32; Mar 14:28.
8A ruk la. A somk a̱n s'kwe̱e̱v lanm nu'sago. A lak a̱n s'zap rem v'gela. A sipk ta̱m a'nwa̱a̱. A ta ze la noc rihi da rema̱n a lak na̱v'gela.
Me̱e̱ri Magdala he̱nk Ye̱so
(Mat 28:9-10; Yoh 20:11-18)
9 # 16:9 Ge̱nke̱-ge̱nke̱c Markus c hyan hwe̱di ca̱n de̱ha̱n zatta za̱tsa̱n 9-20.An Ye̱so po̱ttine, nu'pun hweda̱n Lahadi, u he̱nske̱ Me̱e̱ri kan Magdala u'we̱de̱. I Me̱e̱ri u'na̱n Ye̱so rwitiin rinnas'ce i'tan'il baa ru na̱m'e̱te̱. 10Me̱e̱ri havk la u ve̱ce̱ke̱ an lain d'kut a Ye̱so no. A lak a̱n nau c'de̱b a̱n s'o̱n. 11Na̱nna la, go̱t ge̱ a hongk az Ye̱so po̱tko̱, az Me̱e̱ri he̱nk ta̱m o, a ta kab la da.
An la̱a̱s baa Ye̱so he̱nk o
(Luk 24:13-35)
12A̱n hwic ta̱ma̱, Ye̱so he̱nske̱ an la̱a̱s baa ru i'il u'we̱d a̱n hyo̱o̱m hyan aa retin na'ha̱gc ta rya̱a̱-rya̱a̱ a̱n herge. 13A havk ta̱m a ve̱ce̱ke̱ an kusa̱ine. Puti a tan na, a ta kab la lalk na̱ da.
Ye̱so ceka coso
(Mat 28:16-20; Luk 24:36-49; Yoh 20:19-23; YCCo 1:3-8)
14An ho̱ra̱v hotine, Ye̱so ceka coso baa an la̱a̱s baa ru oopa na̱v'da̱n aa retina̱n c'ryaako. U de̱me̱ke̱ na̱ rema̱n a ta bat d'ba̱t a kabk lalks an he̱nin o au po̱ttin da.
15U zeka ta̱m na̱, “Uv na a̱n copca̱n copun yanda̱ha̱n kwe̱, a̱n bisi koowe̱ kasi lalks Na'Sila̱. 16Koowe̱ a̱n batin d'ba̱t baa Na'Sila̱, ema na o baptisma. Tu kum d'gwa̱a̱ma̱. Koowe̱ la a̱n ha̱lin bata̱m d'ba̱t baa Na'Sila̱, nan geda o lalk na hwaa o. A tu kum ta̱m d'gwa̱a̱m da. 17Go̱t rihica̱n nan he̱n baa an batin d'ba̱t baa ri: Ta rwita̱l rinnas'ce a̱n we̱sma̱n dind ri. Ta em s'lalk a̱n remca̱n a ta takin a la̱a̱k da. 18Ta sip oba̱lna. A na ne̱e̱ na̱ ta̱m reno, a tu em na̱ rihi da. Ta do̱v an gaag a̱n komc na̱, gaag tu taa la na̱.”
Na o̱mk Ye̱so caam na'cona
(Luk 24:50-53; YCCo 1:9-11)
19An Kanubu Ye̱so taastin ve̱ce̱m na̱ s'lalko, Sila o̱mk o a eltk o a'cona. U sootk a̱n kabva̱n koma s'to̱o̱ a Na'Sila̱.#16:19 Go̱t ta̱m: YCCo 1:9-11. 20An la̱a̱s baa Ye̱so nokt bo̱ a emk ba̱sda̱n kasi lalk Na'Sil koope̱. Kanubu Ye̱so el ta̱m d'kut a na̱nnan a̱n d'hormo. Rihica̱ c'he̱t ta̱m ca emka̱lline, ca̱ kwesaka az rina̱n a vatin kwe̱, i m'ga̱u.
ទើបបានជ្រើសរើសហើយ៖
Markus 16: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019