Markus 14
14
C'Hwenga̱n se̱e̱pk a sip Ye̱so
(Mat 26:1-5; Luk 22:1-2; Yoh 11:45-53)
1Ai kustin c'hwe c'il i ceta hweda̱n he̱tda̱n Paska a̱d Yahude̱n a he̱tda̱n be̱re̱e̱dica̱n zattin yist da, c'hwengnan ka̱bd Na'Sil a an la̱a̱sa̱m na s'giiran ryaak hwic a̱n kwe̱e̱m Ye̱so a sipt o m'ze̱s a hote.#14:1 Go̱t ta̱m: U'Rwa̱ 12:1-27. 2A zeka la, “A na em la taanl a̱n hweda̱ d'he̱t da. Rema̱n neta̱n ta una̱sa̱ d'gudgu.”
Na bo̱ntsko̱ Ye̱so neva̱m d'ha̱ngu
(Mat 26:6-13; Yoh 12:1-8)
3An Ye̱so latin a̱n le̱in Betani, a̱nmin buu Simo̱n kan gaag c'daka, a sootk a̱n ryaam c'ryaako. A el taanlo, go̱to̱ neta uvka̱ a neva̱m d'ha̱ng ma̱n nard a̱nmin battada̱n alabasta, ma̱n kind hwe̱di d'kala. U pa̱ga̱ska̱ d'ubgcu u e̱se̱ke̱ Ye̱so ma̱n a̱n d'hi.#14:3 Go̱t ta̱m: Luk 7:37-38.
4I so̱nk ahyan. A zeta bo̱, “I rema̱n ye̱ u retina̱n naasa̱m m'nev ho̱d uhna? 5Nevma̱n nan bab be̱ ma̱ na kum rina̱n pa̱tin copa̱nc noc hyan un we̱e̱ u'biri, na we̱nke̱ kobnetna. I ma̱mma a̱n na naasine.” A hulka̱lk netaune.
6Ye̱so zeta bo̱ na̱, “Lag na neta a̱n c ru. I rema̱n ye̱ a̱n retina̱n hulka̱lla̱m ru? I rihi i kasi u emain me. 7Kobneta̱n el baa no kooye̱ daava. Kooye̱ daava ta̱m a̱n to̱ntine, ta̱n la̱a̱ a̱n ema na̱ c'rihi c'kasi. Mi la, a̱m za baa no male da.#14:7 Go̱t ta̱m: Rsgi 15:11. 8Neta uha̱n baas-baas u han u em rina̱n tu la̱a̱ u'emo. U bo̱ntsko̱ m m'nev rema̱n walgca̱n saga̱m ri. 9Lag na a̱m ve̱ce̱te̱ no m'ga̱u. Koope̱ a̱n na emin ba̱sda̱n kasi lalksa̱ ha̱n a̱nmin copun yanda̱ha̱n kwe̱, nan tana rina̱n neta uha̱n emine.”
Yahuda se̱sk u bab Ye̱so
(Mat 26:14-16; Luk 22:3-6)
10Yahuda Iskariyo̱ti, da̱nv oopa ni'il nanlo, havt bo̱ baa c'hwengnan ka̱bd Na'Sil rema̱n u be̱be̱te̱ na̱ Ye̱so. 11A hongk ke̱mda̱n lalkun lo hwe̱di d'kala. A gigt bo̱ lalk az ta cop o kindi. U takta bo̱ hoba̱n le̱vka̱n tu gab u badasta na̱ Ye̱so.
He̱tda̱n Paska
(Mat 26:17-25; Luk 22:7-14; Yoh 13:1-2)
12A̱n hweda̱ m'e̱t da̱n be̱re̱e̱dica̱n zattin yist da, hweda̱n ta hot kyo̱o̱mnanan ta sak rema̱n he̱tda̱n Paska, an la̱a̱s baa Ye̱so ipkk o. A zeka, “Ipe̱ v to̱nin c hav c walg rema̱n a̱v ryaat ryaakca̱n he̱tda̱n Paska?”
13Ye̱so comt bo̱ i'il baa an la̱a̱s baa ru. U zeka na̱, “Nok na a̱n le̱in Urisalima. Ta̱n gwaanta a̱ra̱m a cidka̱ m'ho̱o̱n a'to̱o̱se. Gab na o. 14Koope̱ u uvine, ze na kan buun lo, ‘Kan la̱a̱sa̱m na lalks Na'Sil zeka: Pe̱ha̱n kurk ri ka̱ d'hamce, va̱na̱n ta̱'m ryaa ryaakca̱n Paska a an la̱a̱s baa ri ni.’ 15Tu kwesa no damra k'kur a̱n kwe̱te̱e̱si ka̱n na baasin na mamgska. We̱lge̱ na cinna c'rihi a̱n a̱n'a.”
16An la̱a̱s baa ru to̱o̱t bo̱ a uv a̱n le̱ine. A gitka̱ la c'rihi honhon ho̱da̱na̱n Ye̱so ve̱ce̱te̱in na̱. A walgt bo̱ emma̱n Paska a̱n a̱n'a.
17An rima tudtine, Ye̱so ceka a an la̱a̱s baa run oopa ni'ila̱. 18Aa soottin a̱n k'ryaa, Ye̱so zeka na̱, “Lag na a̱m ve̱ce̱te̱ no m'ga̱u. Da̱nv no un reina̱n c'ryaak a mi ni, tu bab me.”#14:18 Go̱t ta̱m: Zab 41:9.
19A takta bo̱ naam c'de̱b hwe̱di d'kala. I cek koowe̱ ipkk o, “I mi? I mi?”
20Ye̱so se̱st bo̱ na̱, “I da̱nv no oopa ni'il uc reina̱n hwa̱a̱m s'to̱o̱ i'se̱nd i'da̱nka̱. 21I ke̱ng la Waav Noc wa̱a̱ ho̱da̱na̱n lalks Na'Sil vattine. I naak la nocun lo un tu bab o. I pitiki be̱ o az a̱n na mat o da.”
Ye̱so ryaak ryaakca̱ d'be̱se̱
(Mat 26:26-30; Luk 22:14-20)
22Aa latina̱n c'ryaako, Ye̱so o̱mk d'be̱re̱e̱di u emk c'bo̱m baa Na'Sila̱. U nesk ta̱m an la̱a̱s baa ru. U zek na̱ “Onk na a̱n ryaa. I we̱du ri hna.”
23U o̱mk ta̱m i'koklo. Au emtin c'bo̱m baa Na'Sila̱, u nesk ta̱m na̱. Na̱nna kwe̱ a so̱o̱ko̱. 24U zeka ta̱m na̱, “I hiba̱m ri hna. Hibma̱n Lalk Gigk Poune, ma̱n nan ask rema̱n neta̱nrima hwe̱di.#14:24 Go̱t ta̱m: U'Rwa̱ 24:8; Je̱r 31:31-34. 25Lag na a̱m ve̱ce̱te̱ no m'ga̱u. A ta̱'m sud a̱n so̱o̱ ta̱m ho̱o̱ma̱n yaanin ceun anab da, a za a̱n hweda̱n lo da. Hweda̱nda̱n ta̱'m so̱o̱t ma̱ m'pooma̱n a̱nmin go̱mc Na'Sil da.”
26Aa septin u'sepa, a ruk a elk a̱n Se̱mka̱n Cesa̱n O̱lif.
Bitrus tu hyaa naps Ye̱so
(Mat 26:31-35; Luk 22:31-34; Yoh 13:36-38)
27Ye̱so zeka ta̱m na̱, “A̱n gyop uhna, nwaa kwe̱ ta̱n ha̱l me. Rema̱n i el a'ge̱n a̱nmin lalks Na'Sila̱, ‘Ta̱'m hwaa kac'go̱te, kyo̱o̱ma̱n ba̱rga̱lla̱.’#14:27 Go̱t ta̱m: Zak 13:7. 28Daava̱n ta̱'m po̱tt la, ta̱'m baa no caama̱n copun Galili.”#14:28 Go̱t ta̱m: Mat 28:16.
29Bitrus zeta bo̱ o, “Ai to̱n neta̱n ha̱l a̱v kwe̱, mi a ta̱'m ha̱l a̱v da.”
30Ye̱so zeta bo̱ o, “Lag a̱m ve̱ce̱te̱ va̱ m'ga̱u. Te̱nte̱, a̱n gyop uhna, az ka̱c kant a'ila̱, ta̱'v hyaa naps ri s'lam a'ta̱a̱cu.”
31Bitrus sudk la a̱n vat na̱m'we̱se̱, “Ai to̱n na hwaa m rem rovo, a ta̱'m hyaa naps rov da cakk.”
Taanl ta̱m a vattin na̱nna kwe̱.
S'Cepk a̱n belun Ge̱tse̱me̱ni
(Mat 26:36-46; Luk 22:39-46)
32A ceka ta̱m baada̱n nan po̱g Ge̱tse̱me̱ni. Ye̱so zeta bo̱ an la̱a̱s baa ru, “Soot na tahna, mi ta̱'m hav a̱m cepka.” 33U o̱mk Bitrus na Yakub a̱n Yohana. Hora̱md takaz buga̱m ru. De̱bc naak o ta̱m hwe̱di d'kala. 34U zeta bo̱ na̱, “De̱bc ri naak hwe̱di d'kal zai ma wa̱a̱. Soot na taha̱n a̱n em s'regdo.”
35Ye̱so nok ta̱m a̱n hwic ca̱nmi. U kugtk u cepkka az awaz ti ema be̱, Sila he̱lkse̱ o daava̱n ryaaka̱ d'kob da̱hna. 36U ryaak hwic ta̱m u zeka, “Abba, K'Ceto, kooye̱ ti ema baa rovo. O̱m kokli ha̱n baa ri. Puti a tan na, rina̱n v to̱nine, i inya a̱n nan ema, za rina̱n m to̱nin da.”
37U vaakta bo̱ baa an la̱a̱s baa ru. U gita̱-gita̱ na̱ na̱m'la̱va̱. U zeta bo̱ Bitrus “Simo̱n, a̱v la na̱m'la̱vi? A ta̱'v la̱a̱ a̱n soot m'hwengce v cepk v'ho̱r v'da̱n da? 38Soot na a c'walg no, a̱n em ta̱m s'cepk bat ta̱n gag c'de̱b daav c'ke̱ta̱mse̱. De̱bc el a̱n to̱na̱m nu'emo, we̱du kalk la kaa m'we̱se̱.”
39U sudk ta̱m a̱n nok u cepkka honhon ho̱da̱na̱n u baatin a cepka. 40Au vaaktain ta̱ma̱, u gita̱-gita̱ na̱ na̱m'la̱va̱, rema̱n la̱va̱m otk na̱ hwe̱di d'kala. A ta hweks ta̱m a̱n ze o rihi da.
41Au vaaktain baa na̱ vaak u v'ta̱ccu, u zeka ta̱m na̱, “La̱v na kaa a̱n hwera. I gubk tan. Ho̱ra̱v ceka. Go̱t bo̱ na na baask na be̱be̱ke̱ a c'ko̱t Waav Noco. 42Unu na c nok na. Go̱to̱ bo̱ un babin m baask u ceka.”
Na sipk Ye̱so
(Mat 26:47-56; Luk 22:47-53; Yoh 18:3-12)
43An Ye̱so latin ge̱ a̱n s'lalko, a̱ndaabe Yahuda, da̱nv oopa ni'il inlo ceka a damran bugda̱n neta̱n na. Koowe̱ a k'van na a k'kyur nu. I c'hwengnan ka̱bd Na'Sila̱, an la̱a̱sa̱m na s'giira a hwenga̱nc Yahude̱n a̱n cuka̱in na̱ az a sipa̱ Ye̱so. 44Kan babin o baask u ve̱ce̱ke̱ na̱ rina̱n tu ema u kwesata na̱ Ye̱so. U zeka na̱, “Nocuna̱n he̱nin bo̱ m hamtka, i unwa bo̱, sip na o a̱n to̱o̱t o, a̱n rega̱d ta̱m o.”
45Au cetain la, a̱ndaabe u cek baa Ye̱so. U zeka o, “Kan la̱a̱sa̱m na!” U hamtta bo̱ Ye̱so. 46A sipt bo̱ la Ye̱so a bo̱p o ke̱kk. 47Da̱nv an la̱a̱s baa Ye̱so un lain a'esa, u pe̱ndke̱ k'van u se̱pe̱nke̱ cou coka̱v go̱m va̱ d'ka̱b u Na'Sil u so̱dke. 48Ye̱so zeta bo̱ na̱, “A̱n rwa̱n-rwa̱n bo̱ kaa a̱n hob ri ho̱d ka c'rumu, a c'van na a c'kyura̱n, rema̱n a̱n sipt me? 49I rema̱n ye̱ a̱n ta siptin m daava̱n m latin a̱n gwen un buuk Na'Sil da? A̱m lak a̱nl kooye̱ hweda̱ a̱n la̱a̱sa̱m no. Na em-em rihica̱ ha̱n la bat ge̱nsa̱n lalks Na'Sil sa̱n esa.”#14:49 Go̱t ta̱m: Luk 19:47; 21:37.
50An la̱a̱s baa ru lagk la o, a somk kwe̱.
51Waa'kempa lak ta̱m un gabain na̱ dim a la̱a̱pa̱k puska̱n, ka̱n-ka̱n a̱n we̱du ru. A sipt bo̱ o. 52U be̱te̱te̱ bo̱ la na̱ k'la̱a̱pa̱, u somk murmuru.
Ye̱so baa an gedma̱n lalko
(Mat 26:57-68; Luk 22:54-55,63-71; Yoh 18:13-14)
53A to̱o̱tk Ye̱so a cetk o baa go̱m va̱ d'ka̱b u Na'Sil u so̱dke. Va̱na̱n c'hwengnan ka̱bd Na'Sil kwe̱, a hwenga̱nc Yahude̱ne̱, a an la̱a̱sa̱m na s'giiran, kargaine. 54Bitrus gabt bo̱ na̱ dim s'yuu-s'yuu caama̱n gwen go̱m va̱ d'ka̱b u Na'Sil u so̱dke. U sootk baa a s'regd a̱n hobtma̱n hwela.
55C'Hwengnan ka̱bd Na'Sil a ka̱nk an gedma̱n lalka̱n kwe̱ takaz hob d'gom bat ta hwaa Ye̱so. A ta kum la da. 56Neta̱n hwe̱di a haka a ke̱mk Ye̱so a̱n c'ko̱lo̱. Rina̱n a vatin la kwe̱, i ta rwa̱n k'nwa̱a̱ k'da̱n da.
57Ahyan gudgta̱ bo̱ ta̱m a̱n ke̱mc ru a̱n c'ko̱lo̱. A zeka, 58“C hongk o na̱m'ze, ‘Ta̱'m he̱e̱k buuk Na'Sil ka̱ha̱n ka̱n na main a̱n c'koma, a̱m vaak a̱m maa k hyan za a̱n c'kom da a̱n c'hwe c'ta̱a̱cu.’ ”#14:58 Go̱t ta̱m: Yoh 2:19. 59Puti a tan na, lalksa̱n a vatin ta rwa̱n k'le̱v k'da̱n da.
60Go̱m va̱ d'ka̱b u Na'Sil u so̱dk unutu bo̱ u esk na'te̱k u ipkk Ye̱so. U zeka, “A̱v hongk rina̱n a vatin az a̱v emke? A̱v ci-ci lalke?”
61Ye̱so resk la te̱kk u ta se̱s na̱ rihi da. Go̱m va̱ d'ka̱b u Na'Sil u so̱dk sudk a̱n ipk o, “I vo Ka̱risti unlo, Waav Na'Sili?”
62Ye̱so se̱sk o, “I mi. Ta̱ma̱ ta̱n he̱n Waav Noc a'soot a̱n koma s'to̱o̱ a Na'Sil kac'go̱m na̱ m'ciza̱ lanma̱ c'wece.”#14:62Go̱t ta̱m: Dan 7:13.
63Go̱m va̱ d'ka̱b u Na'Sil u so̱dk sa̱tma̱lt bo̱ kusa̱m ru rema̱n naam c'de̱be̱. U ipkt bo̱ na̱, “Iye̱ ta̱m a̱n na retina̱n hob ahyan an ta vat rina̱n u emine? 64Nwaa kwe̱ a̱n hongk ho̱da̱na̱n u ela̱vstoin A'Sila̱. I'Le̱e̱le̱ a̱n he̱ntine?”#14:64 Go̱t ta̱m: Ggdk 24:16.
Na̱nna kwe̱ a zek az i hwennka na hwaa o.
65Ahyan takaz piskim ru c'te̱i. A bitiki cu'a ru. A rakma̱lk ta̱m o. A zeka ta̱m o, “A̱v zek az a̱v napk kooye̱. To̱, ve̱ce̱ co kan vosin vo.” A s'rega̱d sipt bo̱ o, a to̱uz a unwan na̱m'gonma̱lla.
Bitrus hyaak naps Ye̱so
(Mat 26:69-75; Luk 22:56-62; Yoh 18:15-18,25-27)
66Bitrus lak a̱nmin gwen. Waa'wanta coka̱v go̱m va̱ d'ka̱b u Na'Sil u so̱dk geda̱nvta bo̱. 67Au he̱ntin Bitrus a̱n hobtma̱n hwela, waa'wantaune kekska o. U zeka, “I nwaa a̱n lain baa Ye̱so kan Nazarat.”
68Bitrus hyaak u zeka, “A̱m ta nap alla m ke̱e̱se̱ rina̱n v rein nu'vat da.” U ruk u gabk le̱v d'hutu. Ka̱c kank a̱n daava̱n lo.
69An waa'wanta cok sudtin ta̱m a̱n he̱n o, u ve̱ce̱z an lain a'es a̱n a̱n'a. U zeka, “O̱p uha̱n i da̱nv na̱.” 70Bitrus hyaak ta̱ma̱.
Ai ho̱kstoin ta̱m ca̱nmi, an lain a'es zeka ta̱m Bitrus, “Ke̱ng, i vo da̱nv na̱. Rema̱n i vo kan Galili.”
71Bitrus takaz s'conko tu pata̱rsa. U zeka, “A̱m ta tak a̱m napk noc uha̱n un rein na̱m'tana da.”
72A̱ndaabe ka̱c kanuz ta̱m kan u v'illa̱. Bitrus bakasaz lalkuna̱n Ye̱so ve̱ce̱in o, “Az ka̱c kant a'ila̱, ta̱'v hyaa naps ri s'lam a'ta̱a̱cu.” U purtuz a̱n s'kan.
ទើបបានជ្រើសរើសហើយ៖
Markus 14: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019