Luka 2
2
Macu Ye̱so
(Mat 1:18-25)
1A̱n hweca̱n lo, Kaisar Agustus ba̱sk az na oga̱m an copun Roma kwe̱. 2(I oga̱mda̱ m'e̱t hna. Na emk da̱ daava̱n Kiriniyus latina̱n go̱mca̱n copun Siriya.) 3Neta̱n giila̱lt bo̱ kwe̱ a̱n le̱e̱m na̱ rema̱n na oga̱mt na̱.
4Isuhu lagta bo̱ la ba̱ru le̱in Nazarat a̱n copun Galili. U havk Batalami, le̱i Dauda go̱m a̱nmin copun Judiya, rema̱n Isuhu i waava̱n buuk Dauda go̱mo̱. 5U havk na oga̱mt na̱ na̱nna Me̱e̱ri kan u maakine. Me̱e̱ri ciki d'ub da̱ gubk a̱n daav ne. 6Aa latin a̱n a̱n'a, daav cek va̱n Me̱e̱ri tu matte. 7U matk hwa̱tka̱v ru waa'a̱rma̱. U pa̱a̱kt bo̱ o a̱n c'kusu. U la̱ta̱ska̱ ta̱m o a̱nmin bumbda̱n ne̱e̱m kyo̱o̱ma̱n c'ryaako, rema̱n a ta kum k'kur baan cil da.
A c'go̱te a k'comt ne
8A̱n gyopun lo, a c'bate lak a̱n k'ke̱nge̱ a̱n go̱teca̱n bugda̱n kyo̱o̱ma̱n na̱. 9K'Comta̱v Na'Sil ceka baa na̱ coso. Gwink Na'Sil za̱na̱ska̱ ta̱m na̱. Gela̱v ryaat bo̱ na̱ hwe̱di d'kala. 10K'Comta̱v Na'Sil zeta bo̱ na̱, “An hong la v'gel da! Hong na, a̱m haka m ve̱ce̱te̱ no lalk u kasi, u c'za̱ngkta̱ hwe̱di d'kal rem neta̱n kwe̱. 11Te̱nte̱ a̱nmin le̱i Dauda, na me̱te̱ke̱ no Ka D'Gwa̱a̱ma̱. I unwa a̱n rein Ka̱risti Kan Go̱mca̱n Kooye̱. 12Go̱t ha̱n na ho̱da̱na̱n ta̱n napt o. Ta̱n gata waa na pa̱a̱kk a̱n c'kusu, u el ta̱m a'la̱ta̱sa̱ a̱nmin bumbda̱n ne̱e̱m rihin c'ryaako.”
13A̱ndaabe damran bugka̱n comta̱nc Na'Sil ceka cunksi lanm na'con d'kut a k'comta̱v Na'Sil unlo ne, a̱n bo̱mc Na'Sila̱. A zeka:
14“K'Gwin baa Na'Sil
a̱nmi na'con zo.
A̱n copun yanda̱ha̱n ta̱ma̱,
la̱ta̱m c'de̱b a u'pusun
baa an Sila ta to̱no̱.”
15A̱n daava̱n lo, an bugda̱n comta̱nc Na'Sil lagtin na̱ a vaakk a'cona, a c'bate zeta bo̱ hyannana̱, “Na hav na le̱in Batalami a̱nta̱ma̱ na he̱ne̱ rihica̱ ha̱n ca̱n Sila ve̱ce̱in na.”
16A ta naas la v'daa da a to̱o̱k a nokka. A gatka Me̱e̱ri na Isuhu a waa'gyoza̱n a'la̱ta̱sa̱ a̱nmin bumbda̱n ne̱e̱m rihin c'ryaako. 17Aa he̱ntin waa'gyozune, a vatt bo̱ rina̱n k'comta̱v Na'Sil ve̱ce̱in na̱ in tanin waaune. 18An hongin na̱ ta̱m kwe̱, a sipk a'nwa̱a̱ rema̱n rina̱n a vatine. 19Me̱e̱ri ryaak hwic a̱n kekma̱n rihica̱ ha̱n kwe̱ a̱n c'de̱be̱. 20A c'go̱te to̱o̱k a gyiik a̱n bo̱mc Na'Sil rema̱n rihica̱n a hongine a ca he̱nin ta̱ma̱. Ca̱n emin ta̱m kwe̱ ho̱da̱na̱n na ve̱ce̱te̱in na̱.
Na cetk Ye̱so d'dina̱
21An Ye̱so la̱vtin c'hwen c'ya̱a̱r nu'maco, na emaka o s'geda. Na cetk ta̱m o d'din Ye̱so. Dinda̱n k'comta̱v Na'Sil cetin o a̱n na hwesa em u'ba̱d ru.
Ye̱so a̱n buuk Na'Sila̱
22Aa taastin emma̱n rihica̱n giira Mosa kaine, Isuhu na Me̱e̱rin saka Ye̱so a̱n le̱in Urisalima rema̱n a savt o baa Kan Go̱mca̱n Kooye̱. 23I ho̱da̱n lo bo̱ i retin a'ge̱n a̱n giiras Na'Sila̱. Sa̱ zeka, “Waa va̱ m'e̱t waa'a̱rma̱, iu Na'Sila̱.”#2:23 Go̱t ta̱m: U'Rwa̱ 13:2-12. 24I rem a ema ta̱m A'Sil sak ho̱da̱na̱n giiras Na'Sil vattine, “Sakun gorba̱n i'ila̱ alla yaa'tantabaran i'ila̱.”
25A̱n daava̱n lo, a̱ra̱m lak a̱n le̱in Urisalima un nan po̱g Simo̱n. I kan gela̱v Na'Sil a za̱ksa̱n yomka na̱-na̱. U lak a̱n saka̱m nu'con u he̱nt daava̱n an Isra'ila ta kumt d'gwa̱a̱ma̱. Hora̱mda̱n zattin ri d'reb da lak ta̱m baa ru. 26Hora̱mda̱n zattin ri d'reb da kwesaka ta̱m o, az a tu wa̱a̱ da a za u he̱nk Ka̱risti u'na̱n Sila zein az ta coma da. 27Hora̱md Na'Sil de̱lt bo̱ o u uv a̱n gwen un buuk Na'Sila̱. An an matin Ye̱so uvtta̱in Ye̱so rem na emata o ho̱da̱na̱n giiras vattine, 28Simo̱n kabk o a̱n komc ru, u emaka ta̱m A'Sil c'bo̱mo̱. U zeka,
29“Kan Go̱mca̱n Kooye̱
u so̱dk kwe̱,
de̱bc la̱tk bo̱ kaa me.
Ai to̱n bo̱ kaa coka̱v rov to̱o̱
ho̱da̱na̱n v vattine.
30Rema̱n is ri he̱nk
gwa̱a̱ma̱d rovo.
31Gwa̱a̱ma̱da̱ v walgin da̱n
neta̱n kwe̱ ta he̱ne̱.
32I d'za̱n ta̱m rem da̱ za̱na̱sa̱
an zain Yahude̱n da.
I k'gwin ta̱m baa neta̱n
rov an Isra'ila.”
33An matin Ye̱so sipk a'nwa̱a̱ rema̱n rihica̱n na vatin ca̱n tanin o. 34Simo̱n zeka Sila ema an matin Ye̱so. U zeka ta̱m Me̱e̱ri in Ye̱so, “Honga, Sila emka waa uha̱n u de̱lt ahyan baa netnan copun Isra'ila hwe̱di a ha̱l A'Sila̱. Ahyan ta̱m hwe̱di ta noka baa Na'Sila̱. Tu soot rina̱n neta̱n ta tana a̱n c'ha̱la̱. 35Tu de̱l neta̱n hwe̱di a ruta̱ keka̱bsa̱n rein a̱n de̱bc na̱. Vo ta̱ma̱, nan duv a̱v samk ho̱da̱na̱n nan do̱o̱t noc a̱n k'vana.”
36K'Barav Na'Sil neta, un nan po̱g Hanna waav Fanuwe̱l, lak a̱n a̱n'a. I unwa waava̱n buu Asha. U ulk ta̱m hwe̱di. U emk s'we̱e̱ s'tan'il c'taa a̱n c'ga̱i, wa̱ru wa̱uz u lag o. 37U el kaa boms u cek s'we̱e̱ kwe̱zc c'naas a̱n s'naase. U ta tak a̱n lag buuk Na'Sil da. U maaske a̱n emam Na'Sil c'hwiipsa̱ a i'so̱o̱tin a s'cepk no, gyopo a i'hwen ne. 38U uvta̱ bo̱ a̱n daava̱n lo. Unwa ta̱m u bo̱mk A'Sila̱. U ryaak ta̱m hwic a̱n tanam waaune baa netnan le̱in Urisalima kwe̱ an sakin u'con a̱n gwa̱a̱ma̱d Na'Sila̱.
A vaakk a Ye̱son Nazare̱t
39An Isuhu na Me̱e̱ri taastin emma̱n rina̱n giiras zein kwe̱, a vaakk a̱n copun Galili, a cek le̱i na̱ Nazarat. 40Waa ryaak hwic a̱n c'gub u cek m'we̱se̱. U emk ta̱m s'vere, pusuu Na'Sil el ta̱m baa ru.
Ye̱so a̱n buuk Na'Sil a̱n c'waa
41Matka̱n Ye̱so vetaska ta hav le̱in Urisalima baan he̱tda̱n Paska, kooye̱ we̱e̱wa.#2:41 Go̱t ta̱m: U'Rwa̱ 12:1-27. 42An Ye̱so cetin s'we̱e̱ oopa a̱n s'il nu'maco, a havk a̱n le̱in Urisalima ho̱da̱na̱n a vetastaine. 43An na taastin d'he̱te̱, a sakk k'le̱v ta gya̱a̱-gya̱a̱, Ye̱so esta bo̱ la a̱n le̱in Urisalima a ta nap da. 44Na̱nna la, a de̱lk c'de̱b az Ye̱so el a̱nmi d'bugu. A emt bo̱ ha̱gca d'hwe d'da̱n. I bakaz kaa na̱ az Ye̱so za baa na̱ da. A hobgt bo̱ o baa an ba̱na̱ a baa aa napin ne.
45Aa ta he̱ntin o da, a vaakk a̱n le̱in Urisalima a̱n hob ru. 46Ai la̱vtin c'ta̱a̱cu, a he̱nuz o a̱n gwen un buuk Na'Sil a'soot a̱n te̱ka damran la̱a̱gni, a̱n ge̱ne̱m na̱ u'con, tu ipkuz na̱. 47An hongin o kwe̱, a sipk a'nwa̱a̱ rema̱n naps ru a se̱su ru nu. 48An matka̱n ru he̱ntin o, a sipk a'nwa̱a̱. Inu ipkt bo̱ o, “Waav ri, i rema̱n ye̱ v ematain co taaha̱nna? Go̱t ho̱da̱na̱n c ryaatin d'kob fanka-fanka a̱n hob rov cwan c cet vo, c'de̱b c'naake.”
49U se̱st bo̱ na̱, “I rema̱n ye̱ a̱n latina̱n hob ri? A̱n ta nap az i ge̱be̱ske̱ a̱m el a̱nmin buuk Cet me da?” 50A ta ke̱e̱se̱ la rina̱n u zein na̱ da.
51Ye̱so gabk na̱ a gyiik a ceka Nazarat. U gabk ta̱m rina̱n a zein o kwe̱. Inu kink ta̱m rihica̱ ha̱n kwe̱ a̱nmin de̱bc ru. 52Ye̱so ryaak hwic a̱n c'gub a s'ver ne. A'Sil a neta̱nriman he̱nk ta̱m ke̱md ru.
ទើបបានជ្រើសរើសហើយ៖
Luka 2: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
