Luka 13
13
Ko̱tca̱n san a'wa̱a̱
1Neta̱n lak a̱n daava̱n lo an ve̱ce̱in Ye̱so az Bilatu hok netnan Galili, hiba̱m na̱ we̱e̱kk a hibma̱n rina̱n a latina̱n emam Na'Sil sak no. 2Ye̱so se̱st bo̱ na̱, “A̱n la bo̱ kaa na̱m'ze az an le̱in Galili nanlo hatk hyannana̱n an Galili a̱n c'ko̱t rihica̱n lo kumt na̱? 3Lag a̱m ve̱ce̱te̱ no, a̱'a̱. Nwaa ta̱ma̱, a za a̱n bita̱lk c'hwin a̱n lagk c'ko̱t da, ta̱n wa̱a̱ ho̱d na̱.
4“Bakasa na netnan Silo̱m oopa ni'ya̱a̱rnan lo, an maa'a zuta̱in a̱n na̱n a hwaa ta̱m na̱. A̱n laa nu'he̱n az i na̱nna a̱n hatin netnan le̱in Urisalima kwe̱ a̱n c'ko̱te? 5Lag a̱m ve̱ce̱te̱ no, a̱'a̱. Nwaa ta̱ma̱, a za a̱n bita̱lk c'hwin a̱n lagk c'ko̱t da, ta̱n wa̱a̱ ho̱d na̱.”
Remba u'na̱n ta matin da
6Ye̱so emk ta̱m c'hwennsa, “I noc a̱n kain ceun remba a̱n belu s'ce. Wa han az u kaat be̱ c'yaana, u za a̱n gita̱ rihi da. 7U zeta bo̱ kan go̱tec nu'bela, ‘Go̱to̱, we̱e̱sa̱ ha̱n s'ta̱a̱cu, a̱m haka a̱n hoba̱n yaanca̱n ceun remba uhna, a̱m ta kum la rihi da. Gedanna o. I rema̱n ye̱ a̱n tu naast d'baa?’ 8Ka c'go̱te se̱st bo̱, ‘Kanubu, lag o u sud a̱n rig we̱e̱. Ta̱'m ka̱ba̱l o a̱m de̱le̱ o u'dumtu. 9Au mata, i emk i kasi. Au ta mat la da, a̱n daava̱n lo kaa, na hwaa o.’ ”
Taasma̱n gaag hwed d'hwera
10An Ye̱so latina̱n la̱a̱sa̱m neta̱n a̱nmin ka̱bda̱n kargad Yahude̱n da̱ hyan a̱n hweda̱ d'hwera, 11neta lak a̱n a̱n'a kan rinnas'ce le̱me̱se̱in s'we̱e̱ oopa a̱n s'ya̱a̱ru. Netaune, u kulku, a tu la̱a̱ ta̱m a̱n una̱sa̱ ba̱ya ru da. 12Daava̱n Ye̱so he̱ntin netaune, u po̱gk o u noka baa ru. U zeka o, “Neta, na taask a̱v gaag uhna.” 13U se̱ke̱te̱ bo̱ o a'koma. A̱ndaabe neta unuku rococo. U to̱uz a̱n bo̱mc Na'Sila̱.
14K'Go̱mgo̱m va̱n ka̱bda̱n kargad Yahude̱n emt bo̱ s'lalk a̱n d'hwins rema̱n Ye̱so taask na gaag a̱n hweda̱n hwerad Yahude̱ne̱. U taat bo̱ neta̱n a̱n c'gaag u zeka, “Na ci c'hwen c'cihin ca̱n neta̱n ta emt a'yomko. Noka na a̱n hweca̱n lo na taast no s'malse, za a̱n hweda̱ d'hwera da.”
15Ye̱so se̱st bo̱ o, “Vo oba̱l va̱ d'kika̱! Kooye̱ da̱nv no wa, u za ho tu but naama̱n alla janka̱n ru, u sav na̱ na̱m'ho̱o̱ a̱n hweda̱ d'hwera da? 16Neta uha̱n i goov Ibrahi. A̱krimu gagk la o s'we̱e̱ oopa a̱n s'ya̱a̱ru. I ta ge̱be̱se̱ az na but o cokma̱ ha̱n a̱n hweda̱ d'hwera da?” 17Au taastin vatma̱n rihica̱ hna, an ha̱lc ru kwe̱ a hongk m'e̱n. Neta̱n la kwe̱, a emk c'za̱ngkta̱ hwe̱di rema̱n rihica̱n sipa̱m na'nwa̱a̱ ca̱n Ye̱so emka̱lline.
Gubca̱n go̱mc Na'Sila̱
(Mat 13:31-32; Mar 4:30-32)
18A̱n daava̱n lo, Ye̱so ipkka̱, “I ho̱da̱npe̱ a̱n go̱mc Na'Sil retine? I a̱n ye̱ a̱n ta̱'m hwenna̱sta ca̱? 19Ca̱ el ho̱da̱n yaanva̱n bobaka̱n mo̱stad, va̱n noc o̱min u gwaak a̱n belu s'ce. Yaanva̱ ne, gubk damra k'boba, i cek nema̱n ta hyaa a̱n za̱ts ru.”
20Ye̱so sudk ta̱m a̱n ipk na̱, “I a̱n ye̱ ta̱m a̱n ta̱'m hwenna̱sta go̱mc Na'Sila̱? 21Ca̱ el ho̱da̱n yist un neta o̱min u de̱l a̱nmin honma̱ m'hyun m'ta̱a̱cu. Yist sa̱ma̱nna̱ m'hyun kwe̱.”
Huta̱d mo̱dke
(Mat 7:13-14)
22Ye̱so paak ta̱m m'le̱e̱ a c'bel na a̱n la̱a̱sa̱m netna, tu hodgo-hodgo ta̱m caama̱n le̱in Urisalima. 23A̱n daava̱n lo, noc hyan ipkk o, “Kanubu, i neta̱n i'hona a̱n nan gwa̱a̱?”
Ye̱so se̱st bo̱ na̱, 24“Kaa na d'hi a̱n uv a̱n huta̱d mo̱dke. A̱m ve̱ce̱ke̱ no taanlo, rema̱n neta̱n hwe̱di ta hob az a uvu, a ta la̱a̱ la a̱n uv da. 25A̱n daava̱n kanubu tu unutu u gweda ta̱m d'hutu, ta̱n esa na'is a̱n kulta̱m d'hut ta̱n ze, ‘Kanubu, Kanubu, gwedasa co.’ Tu se̱s la u ze no, ‘A̱m ta nap no, daat va̱na̱n a̱n rwa̱in da.’
26“A̱n daava̱n lo, ta̱n taka a̱n ze, ‘C ryaakk na d'kutu. A̱v la̱a̱ska̱ ta̱m na a̱n le̱e̱m co.’ 27Tu ze la no, ‘A̱m ve̱ce̱ke̱ no, a̱m ta nap no, daat va̱na̱n a̱n rwa̱in da. To̱o̱ na, an emma̱n rihic naake.’ 28Ta̱n kanng s'kan a ta̱uda̱n nina̱n daava̱n ta̱n he̱nt Ibrahi a Isaaku nu a Yakubu nu a baranc Na'Sil a̱n kwe̱ a̱nmin go̱mc Na'Sila̱. Nwaa kaa, na vogk no na'isa̱. 29Neta̱n ta rwa̱n lanma̱n koope̱ a̱n copun yanda̱hna, a soot baan he̱ta̱d c'ryaak a̱nmin go̱mc Na'Sila̱. 30An rein na̱m'he̱n az i na̱nna a̱n nan hwenga, ta vaak an na zain nan hwenga da. An rein ta̱m na̱m'he̱n az a nan hwenga la na̱ da, ta vaak an nan hwenga a̱n d'be̱se̱.”#13:30 Go̱t ta̱m: Mat 19:30; 20:16; Mar 10:31.
Ye̱so to̱nk le̱in Urisalima
(Mat 23:37-39)
31A̱n hweda̱n lo ge̱ ta̱ma̱, Farisin hyan haka a zeka Ye̱so, “Rwa̱a̱ ha a̱v lag baada̱ hna, rema̱n He̱ro̱d to̱nk u hwaa vo.”
32Ye̱so zeta bo̱ na̱, “Nok na a̱n ve̱ce̱ gora̱b gyo̱zun lo, ‘Go̱to̱, a̱m rutk rinnas'ce, ta̱'m taas ta̱m neta̱n s'mals te̱nte̱ a buk nu. A̱n hweda̱ v'ta̱ccu, ta̱'m taas yomka ri kwe̱. 33Puti a tan na, i ke̱ng a̱m nokso te̱nte̱, a buk nu, a zanma̱n ne. A ti ema na hwaa k'barav Na'Sil a za a̱nmin le̱in Urisalima da.’
34“Nwaa netnan le̱in Urisalima, i nwaa a̱n rein ta̱n hwaa baranc Na'Sila̱, a̱n bonga̱l ta̱m an Sila comain baa no. I a'nai a̱m to̱nin be̱ az a̱m kargsa aka̱n no d'baa d'da̱n, ho̱da̱n ka̱c retin tu kargsa aka̱n ru a̱nmin kapc ru, a̱n ta se̱s la m da? 35Go̱t bo̱ na le̱gske̱ no buu no a'banbana. Lag na a̱m ve̱ce̱te̱ no m'ga̱u. A ta̱n he̱n a̱m ta̱m da a za daava̱n lo ceka, daava̱n ta̱n zeta, ‘Sila emaka o, un tu han a̱n dind Na'Sil da.’ ”#13:35 Go̱t ta̱m: Zab 118:26; Je̱r 22:5.
ទើបបានជ្រើសរើសហើយ៖
Luka 13: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
