Yomka C'Comtne 22
22
1“Cet me ne a ha̱n min ni, ge̱ne̱ na m u'con a̱m vatt ho̱da̱na̱n i retine. A̱m rutt ta̱m hid ri.” 2Aa hongtin u emk s'lalk a̱n remd Yahude̱ ne, a rest bo̱ te̱kk. U zeta bo̱ na̱:
3“I mi k'Yahude̱. Na matk m a̱n le̱in Tarsus, a̱nmin copun Silisiya. A̱m gubk ta̱m a̱nmin le̱in Urisalima. Gamaliye̱l la̱a̱ska̱ ta̱m me ho̱da̱na̱n nan gabt giiras ceta cinnan kwe̱, u ta kus rihi da. A̱m emk ta̱m za̱ksa̱n yomka Na'Sil ho̱da̱na̱n retin nu'em te̱nte̱. 4A̱m ryeeska an gabma̱n le̱vka̱ ha̱n d'koba. A̱m hweelk ahyan. A̱m sipa̱lk a̱rma̱n a netan na na ge̱ga̱lk a̱n buu s'ko̱mo̱. 5Go̱m va̱ d'ka̱b u Na'Sil u so̱dk a kargad so̱dka̱n napk da̱n rihica̱ hna. A̱m kabka ta̱m c'vaa ca ge̱ne̱in hyannana̱n Yahude̱n an le̱in Damaskus. Az a̱m hav a̱m sipa̱ an rein a̱n a̱n'a, a̱m gaga na̱, a̱m san na̱ le̱in Urisalima rem na vent na̱.
Ho̱da̱n So̱o̱l uvtin a̱n s'gaba
(YCCo 9:1-19; 26:12-18)
6“Am bo̱ptina̱n caa le̱in Damaskus, le̱v d'hwe na'te̱ke̱, v'daa v'da̱n, damra d'za̱n ruka̱ lanm na'con a̱d za̱na̱ska̱ va̱na̱n m rein kwe̱. 7A̱m hek nu'copo. A̱m hong-hong na po̱gk me, ‘So̱o̱l! So̱o̱l! I rema̱n ye̱ v retina̱n ryeesam ri d'koba?’
8“A̱m ipkt bo̱, ‘I vo we̱, Kan Go̱mca̱n Kooye̱?’
“U zeta bo̱ me, ‘I mi Ye̱so kan Nazarat u'na̱n v reina̱n ryeesam d'koba.’
9“Ac lain d'kutu, ke̱ng a he̱nk za̱nd ne, a ta hong la kaa iga̱m da.
10“A̱m zeta bo̱, ‘Iye̱ a̱n ma ema, Kan Go̱mca̱n Kooye̱?’
“Kan Go̱mca̱n Kooye̱ zeta bo̱ me, ‘Unu v uv a̱n le̱in Damaskus, nan ve̱ce̱ v rina̱n va em a̱n a̱n'a.’ 11Ai retin damran za̱nda̱n lo hok a̱m isa̱, ac lain d'kut nak-nak a̱m a cett a̱m le̱in Damaskus.
12“Noc lak a̱n le̱in lo un nan po̱g Hananiya. U el tu gab s'giira a d'ke̱mne̱nne̱. Yahude̱n el ta̱m ta ne̱e̱ o k'gwin hwe̱di. 13U haka u esk baa ri. U zeka me, ‘So̱o̱l hyaare, lag pomm taa vo.’ A̱n ho̱rva̱n lo, is ri a̱pa̱ska̱, a̱m he̱noz kaa o.
14“U zeta bo̱ me, ‘Sila ceta cinna dagk va̱ v nap rina̱n a to̱nine. A̱v he̱n ta̱m noc kan gela̱v Na'Sil unlo. A̱v hong ta̱m lalk a̱n nwa̱a̱'a ru. 15Rema̱n ta̱'v soot kan ve̱ce̱m neta̱n rina̱n v he̱nin a iv hongin baa ru. 16Iye̱ v rein nu'valo? Noka na ema v baptisma, a̱v cepk ta̱m a̱n dind Kan Go̱mca̱n Kooye̱ rema̱n na guzt ko̱tc rovo.’ ”
Yomkanan Sila nesin Bulus
17“A̱n d'hwen am vaaktain a̱n le̱in Urisalima a̱m el a̱n s'cepk a̱nmin buuk Na'Sila̱, ya̱a̱taya̱a̱k emk me. 18A̱m he̱nk Kan Go̱mca̱n Kooye̱. U zeka me, ‘Za̱gisi v lag le̱in Urisalima, rema̱n a ta kab ba̱sda̱ v retin da̱n tanin m da.’
19“A̱m se̱st bo̱ a̱m ze, ‘Kan Go̱mca̱n Kooye̱, neta̱n napk az a̱m paak ka̱bca̱n kargad Yahude̱ne̱, a̱m sipka̱ netnanan batin d'ba̱t baa rovo. A̱m buuk na̱, a̱m be̱se̱ a̱m sav na̱ a̱n buu s'ko̱mo̱. 20An na hotin Istifanus kan ba̱sda̱n lalks rovo, a̱m esk a̱m kangska na̱. A̱m rega̱dk ta̱m kusa̱m an hwain o.’#22:20 Go̱t ta̱m: YCCo 7:58.
21“U zeta bo̱ me, ‘To̱o̱ ba̱rvu. Ta̱'m com a̱v m'nak baa an zain Yahude̱n da.’ ”
22A ge̱ne̱ke̱ la Bulus u'con u vatt lalk uhna. A ze̱lt bo̱ kaa s'god a zeka, “Hwaa na o! I ta ge̱be̱se̱ na lag o da.”
23Neta̱n ryaak hwic an kaam s'ubu. A ho̱rma̱lk kusa̱m na̱. A bulka̱l ta̱m c'hwin na̱m'e̱n. 24So̱dka̱v koola̱n zeta bo̱ az na sav Bulus baan yomka na̱. U de̱lt bo̱ na buu o nan ipkuz o, bat tu vat rina̱n de̱lin neta̱n una̱sta̱ d'gudg rem ru. 25Aa gagtin Bulus a na̱ka̱nska̱ o rema̱n a swepa̱lt o, u iga̱msk so̱dka̱v koola̱n un lain a'esa. U zeka o, “Giira se̱sk az na buu kan copun Roma a za na baak a napk rina̱n u emin da?”
26An so̱dka̱v koola̱n hongtin taanlo, u havk u ve̱ce̱ke̱ so̱dka̱v na̱ kwe̱. U zeka o, “Nap bo̱ ho̱da̱na̱n ta̱'v emte, rema̱n a̱rm uha̱n bo̱ i kan Roma.”
27So̱dka̱v koola̱n hata bo̱ u ipk Bulus, “Ve̱ce̱ ma̱ m'ga̱u, i vo kan Roma?” Bulus se̱st bo̱ o, “Ha̱.”
28So̱dka̱v koola̱n zeta bo̱ o, “A̱m copk kind hwe̱di a̱m soott kan copun Roma.”
Bulus se̱st bo̱ o, “I mi kan copun Roma un me̱.” 29An lain be̱ az ta ipk o s'ipku, a busk a̱ndaabe. Gelk ryauz so̱dka̱v koola̱n au naptin az Bulus i kan copun Roma. U uvtk la kaa u gagk o.
Bulus baa an gedma̱n lalko
30Ai zantaine, so̱dka̱v koola̱n to̱nk u nap ga̱uma̱n rina̱n de̱lin Yahude̱n uvtta̱ lalks Bulus. U de̱lt bo̱ na buta̱ o. U karga̱vska ta̱m c'hwengnan ka̱bd Na'Sil, a ka̱nk an gedma̱n lalk no. U de̱lk ta̱m na nokta Bulus, na esasa a̱n hwic na̱.
ទើបបានជ្រើសរើសហើយ៖
Yomka C'Comtne 22: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
