ကမ္ဘာႏစ 24
24
ဣသဲစ်တာႏမာ
1ယိုခါ အဗြာဟံနဝ်ꩻ ဖြားလဲဉ်းတဲင် ဝွေꩻထာꩻမာꩻ စွုမ်ႏစွိုးနဝ်ꩻ ထာဝရဘုရာꩻ ဖေႏမင်္ဂလာႏသွူ။ 2ဝွေꩻဒေါ့ꩻဖေႏ ဝွေꩻအသွဉ်း သက်တန်တဖြာꩻ ကထိန်ꩻထွား ဖေႏဒါႏ ဝွေꩻထာꩻခြိုꩻဥစ္စာႏ ကားကအဝ်ႏ “ခွေပိုတာႏနဝ်ꩻ နာꩻထုမ်ႏဖေႏဗာႏတဝ်း ဝွေꩻမာ ခါနန်ခမ်းကိုယိုနဝ်ꩻ ခွေမဉ်အွဉ်ႏနာꩻ မာꩻကေꩻဇူꩻ အွဉ်ႏသော့ꩻနာꩻစူ ခွေကီႏဆꩻလယိုတဲင် ခံႏသွော့သစ္စာႏဟုဲင်း၊ 3တွိုင်ႏတယ်ႏအီနေးတွမ်ႏ မို့ꩻတွမ်ႏဟံႏ ထာဝရဘုရာꩻ အဗွေႏဘုရာꩻ အမဉ်ꩻနာႏမသွူ။ 4နာꩻနဝ်ꩻ သဲင်ꩻချာ ခွေကလွူးဒါႏ ဇာႏတိခမ်းတဲင် ခွေပိုခို ဣသဲစ်တာႏနဝ်ꩻ နာꩻထုမ်ႏဖေႏဗာႏ ဝွေꩻမာတဖြာꩻ အွိုးခွေဖူးဝေး စွိုးခွိုꩻကို” နုဲင်းနဝ်ꩻသွူ။
5ကွဲတွော့ꩻ အသွဉ်းရီ၊ “ပါꩻမူႏပေႏ မဉ်ႏအွဉ်ႏကုဲင်တဝ်း အလမ်း မဉ်ႏတသဲင်ꩻလွဉ်ꩻတဝ်း ခွေသွဉ်းခမ်းယိုနဝ်ꩻ အီႏမာꩻနုဲင်းမုဲင်ꩻဟောင်း၊ ခွေသွဉ်း အီႏအွဉ်ႏစွꩻသဲင်ꩻဗာႏ နီဗွေႏပို အွိုး နီဗွေႏဇာႏတိ ခမ်းသူꩻဟောင်း” နုဲင်းနဝ်ꩻသွူ။ 6အဗြာဟံလဝ်းချာ “ခွေပိုခိုနဝ်ꩻ နာꩻဟဲ့ꩻသဲင်ꩻ ဗာႏတဝ်း ခမ်းသူꩻကွေး၊
7ခွေကအဝ်ႏနီဖါလမ်း၊ ခွေခွိုꩻမျိုꩻ အခမ်းကိုချိန်ႏ ခမ်းထီမို့ꩻလောင်း ထာဝရဘုရာꩻ ဗွေႏဘုရာꩻ နဝ်ꩻ ဟဲ့ꩻလွဉ်ခွေတဲင် ခမ်းယိုနဝ်ꩻ အီႏဖေႏ ခွေပိုလီꩻစွိုးခွိုꩻဖုံႏ ဝွေꩻဗွေႏတွိုင်ႏတယ်ႏ အွဉ်ႏသေꩻခါꩻ ခွေဂတိ နုဲင်းနဝ်ꩻသွူ။ နာꩻထုမ်ႏဖေႏ ခွေပိုခိုမာ ဖေႏကလꩻနဝ်ꩻ ဝွေꩻဗွေႏ အီႏအွဉ်ႏစွꩻလွေꩻငါရီး ဝွေꩻဗွေႏ မို့ꩻလောင်းတမန်ႏ နာꩻဆꩻငါသွူ။ 8ပါꩻမူႏပေႏ မဉ်ႏတသဲင်ꩻလွဉ်ꩻတဝ်း တွမ်ႏနာꩻနဝ်ꩻ နာꩻအီႏလွစ် ဂတိယိုသွူ။ ကွဲတွော့ꩻ အကျောင်ꩻခရာႏ အမျိုꩻမုဲင်ꩻ တရိုꩻတဝ်းနဝ်ꩻ ခွေပိုခိုယို နာꩻဟဲ့ꩻသဲင်ꩻ ချာဗာႏတဝ်း ခမ်းသူꩻ” နုဲင်းနဝ်ꩻသွူ။ 9ကွပ်နဝ်ꩻမꩻ သွဉ်းစူနဝ်ꩻအွဉ်ႏ အဗြာဟံ ကီႏဆꩻလꩻတဲင် နုဲင်းအဗွေႏ အဗြာဟံ ကထွဉ်ႏအတွိုင်ꩻ အီႏမာꩻဒျာႏကျောင်ꩻ အွဉ်ႏသစ္စာႏနဝ်ꩻသွူ။
10အဗြာဟံသွဉ်း ကထိန်ꩻထွားဖေႏဗာႏဒါႏ ထာꩻခြိုꩻဥစ္စာႏဖုံႏနဝ်ꩻ ဝွေꩻထူႏ ကလာအုပ် အဗာႏတဆီ အွိုးအဗွေႏ ကလာအုတ်ဖုံႏကိုတဲင် ထန်ႏလွေꩻခင်ႏလမ်း နာဟော် ကအဝ်ႏအုံဒါႏ ဝေင်ꩻတန် မဲက်သိုပိုတေးမီးယားခမ်း အခဝ်ထင်ꩻဖဲ့ꩻနဝ်ꩻသွူ။ 11ဝွေꩻထွိုင်ႏဖျော်လွေꩻ ဝေင်ꩻတန်သောင်နဝ်ꩻ အွဉ်ႏအွပ်ꩻလင်ꩻ ဝွေꩻကလာအုပ် ထီအုံႏထျꩻသွူ။ အချိန်ႏနဝ်ꩻထွာ မွူးပင်ꩻလင်ꩻ လိုꩻမူႏဖုံႏ အီႏလွဉ်တွောင်ထီ ချိန်ႏသွူ။ 12ဝွေꩻဆုတောင်ꩻ “ခွေသွဉ်းအဗွေႏ အဗြာဟံ ထာဝရဘုရာꩻ အဗွေႏဘုရာꩻ၊ ဟန်ႏနီꩻယို ခွေသွဉ်းကလွဉ်ဗာႏ ကိစ္စယို နုဲင်းကအွဉ်ႏဂတိ သေꩻခါꩻဒါႏ ခွေသွဉ်းအဗွေႏနဝ်ꩻ ဖေႏဗဲင်း ထာꩻအောင်ႏမျင်ႏမွိုင်ဗွေႏ။ 13ယိုခါ ခွေသွဉ်း ဖျော်လွဉ်လဲဉ်း ခင်ႏလမ်း လိုꩻမူႏပေႏဖုံႏ အဝ်ႏဝေင်ꩻကို ကအီႏလွဉ်တွောင်ဒါႏထီ၊ ထီအုံႏထျꩻနဝ်ꩻသွူ။ 14ဝွေꩻသီးအကို တဖြာꩻ ခွေသွဉ်းအီႏရိုꩻဖေႏ၊ မာꩻကေꩻဇူꩻ အွဉ်ႏလင်ꩻနာꩻထီဖွိုင်ꩻ၊ ခွေအီႏအွꩻတစိꩻငါႏတဲင်၊ ဝွေꩻမူႏမဉ်ႏရိုꩻ အွꩻဟုဲင်း၊ ခွေအီႏတွောင်ဖေႏပါက နာꩻကလာအုတ်ဖုံႏတာႏ ကနုဲင်းနဝ်ꩻနဝ်ꩻ ဝွေꩻမူႏယို ယံကထွာသွော့ အဖြာꩻ နီဗွေႏ ကလွိုက်ဖေႏ နီဗွေႏသွဉ်း ဣသဲစ်တာႏသွူ၊ မဉ်ႏထွာမွေးနုဲင်း ခွေသွဉ်း ကကွီယို နီဗွေႏနဝ်ꩻ အဝ်ႏမာꩻဖေႏနုဲင်း ကအွဉ်ႏဂတိသစ္စာႏ သေꩻခါꩻဒါႏ ခွေသွဉ်းအဗွေႏနဝ်ꩻ ခွေသွဉ်း အီႏသေဗာႏ” နုဲင်းနဝ်ꩻသွူ။ 15ဝွေꩻအဝ်ႏဆုတောင်ꩻ လꩻထွူဒွိုန်းချိန်ႏ ရီဗက္ကနဝ်ꩻ ထီဖွိုင်ꩻအွဉ်ႏဒင်ႏနေး အပြေင်လောင်းတဲင် ဖျော်လွဉ်သွူ။ ဝွေꩻမူႏနဝ်ꩻထွာ ဗေသွေလပိုမူႏသွူတဲင် ဗေသွေလနဝ်ꩻထွာ အဗြာဟံဖူးခို နာဟော်တွမ်ႏ အမာမိလခါနဝ်ꩻ ပိုမူႏသွူ။ 16ဝွေꩻမူႏနဝ်ꩻထွာ လိုꩻမူႏယောင်ꩻရေꩻငါႏတဲင် ထွာမူႏနမ်ꩻပေႏသွူ၊ ဝွေꩻလင်ꩻထီအုံႏ တွောင်ဗွေထီ အဖွိုင်ꩻကိုတဲင် ထန်ႏလွဉ်သွူ။ 17သွဉ်းနဝ်ꩻ ဖင်းလွေꩻ ဝွေꩻမူႏထျꩻတဲင်ဒေါ့ꩻ “မာꩻကေꩻဇူꩻ ဖေႏအွꩻဗဲင်းခွေထီ နာꩻထီဖွိုင်ꩻကို တစိꩻငါႏမွိုင်” နုဲင်းနဝ်ꩻသွူ။
18မူႏနမ်ꩻပေႏဒေါ့ꩻ “အွꩻဟုဲင်း၊ ဗွေႏ” ဝွေꩻထီဖွိုင်ꩻ အဝ်ႏပြေင်လောင်းနဝ်ꩻ အွဉ်ႏလင်ꩻမွိုင်တဲင် ဖေႏစွဉ်ႏဝွေꩻသွူ။ 19ဖေႏအွꩻဝွေꩻ ထွိုင်ႏထွူ မူႏနမ်ꩻပေႏရိုꩻ “ခွေအီႏလွေꩻတွောင်ဖေႏပါက နာꩻကလာအုတ်ဖုံႏတာႏတဲင် ဖေႏအွꩻကွို့ꩻကွို့ꩻသွော့” နုဲင်းနဝ်ꩻသွူ။ 20ထီကအဝ်ႏဖွိုင်ꩻကိုနဝ်ꩻ ပါꩻမူႏထောက်ꩻဖေႏလို့စွဉ်ႏ ထာꩻသားဖုံႏ ထီတခြောင်ကိုတဲင် ဖင်းလွေꩻတွောင်ထဲင်း ယင်းထီ၊ ဗတွိုႏစွဉ်ႏ ကလာအုတ်ဖုံႏ ကအွꩻကွို့ꩻလို့နဝ်ꩻသွူ။ 21ထာဝရဘုရာꩻ ဗွေႏဘုရာꩻ အီႏဖေႏဝွေꩻ ထာꩻအောင်ႏမျင်ႏခွင်ꩻနဲ့ တဖေႏတဝ်းနဲ့ ဖေႏကသေဗာႏနဝ်ꩻ သွဉ်း အဝ်ႏအုံပွေါးထွား တေ့ꩻပါꩻမူႏပေႏနဝ်ꩻသွူ။
22ပါꩻမူႏပေႏ ဖေႏအွꩻကုလာအုပ်ထီ ထွိုင်ႏထွူ ပါꩻခိုယို ထေထန်ႏအခံꩻ အယာႏခဉ်ႏ ဟားသျိုး အွဉ်ႏခေင်းဖေႏ ဝွေꩻမူႏနေ့ဖူတဲင် ထူႏယင်းစူခဲဥ်း ခံꩻနီပင် အယာႏ တခန်နဝ်ꩻတဲ့ အွဉ်ႏဆွဖေႏယင်း အစူဗောင်လောင်းသွူ။ 23ဝွေꩻဒေါ့ꩻ၊ “မာꩻကေꩻဇူꩻတဲင် ဒေါ့ꩻနယ်ခွေ၊ နာꩻနဝ်ꩻ ပါမုဲင်ꩻပိုမူႏဟောင်း၊ သီဖါလမ်းနဝ်ꩻ ခွေတွမ်ႏ ခွေလိုꩻဖုံႏ မဉ်ႏမာꩻထဉ်ႏနဝ်ꩻ လꩻနေဟောင်း” နုဲင်းနဝ်ꩻသွူ။
24“နီဖါနဝ်ꩻထွာ နာဟော်တွမ်ႏ မိလခါ အပိုခို ဗေသွေလ” ပါꩻမူႏပေႏ လဝ်းချာ နုဲင်းနဝ်ꩻသွူ။ 25“နီဖါလမ်းနဝ်ꩻ ဗေဖူတွမ်ႏ ထာꩻအံႏဖုံႏ အဝ်ႏဗွေဗောႏဒျာႏတဲင် သီ အုံတာႏနဝ်ꩻတဲ့ ခင်ႏလမ်းဖုံႏ အဝ်ႏဒျာႏ” နုဲင်းနဝ်ꩻသွူ။
26နဝ်ꩻထွူ ပါꩻခို အုံခွပ်လင်ꩻ ဝုဲင်ႏကိုꩻကွယ်ႏ ထာဝရဘုရာꩻ၊ 27ဝွေꩻရိုꩻ၊ “နုဲင်းကအွဉ်ႏ သေꩻခါလဲဉ်းဒါႏ ခွေသွဉ်းအဗွေႏ ဂတိတောႏ အတွိုင်ꩻ ကွပ်သစ္စာႏအဝ်ႏနဝ်ꩻမꩻ အုပ်ꩻထင်ႏဒျာႏ ထာဝရဘုရာꩻ ခွေဗွေႏအဗြာဟံ အဗွေႏဘုရာꩻ အကေꩻဇူꩻတောႏသွူ။ ထာဝရဘုရာꩻနဝ်ꩻ ပသာတွိုႏထွူစွဉ်ႏ ခွေသွဉ်းအဗွေႏ ဖူးဝေးဖုံႏထျꩻ” နုဲင်းနဝ်ꩻသွူ။
28မူႏနမ်ꩻပေႏနဝ်ꩻ ဖင်းသဲင်ꩻချာ အမွိုးလမ်းတဲင် ဒေါ့ꩻနယ်စွဉ်ႏ အကျောင်ꩻခရာႏ ကားကအဝ်ႏသွူ။ 29ရီဗက္ကနဝ်ꩻ အဝေးခို မဉ်ꩻလာဗန် အဝ်ႏတဖြာꩻတဲင် ဝွေꩻနဝ်ꩻဖင်းထန်ႏလွေꩻ အဗြာဟံသွဉ်း ကအဝ်ႏဒါႏ ထီအုံႏထျꩻသွူ။ 30လာဗန်နဝ်ꩻ ထီႏလဲဉ်း အဖူးမူႏဟွဲ နေ့ဖူခေင်းခံꩻ၊ ဆွစူခဲဉ်းခံꩻ လွုမ်ꩻတကာႏတဝ်း ဟွိုန်ဗာႏအဖူးမူႏ ခြုဲင်းနယ် ပါခို ကဒေါ့ꩻနယ်လဲဉ်းဒါႏ ဝွေꩻဖူးမူႏနဝ်ꩻ အခရာႏသွူ။ နဝ်ꩻမꩻ ဝွေꩻဖင်းလွေꩻ အဗြာဟံသွဉ်းထျꩻ ကအဝ်ႏအုံထွိုင်ႏထာꩻ ဝွေꩻကလာအုတ်ဖုံႏထျꩻ ထီအုံႏလောင်းတဲင်ဒေါ့ꩻ 31“နာꩻနဝ်ꩻ ထွာဒျာႏလိုꩻလꩻ ထာဝရဘုရာꩻ မင်္ဂလာႏတဖြာꩻသွူ၊ သဲင်ꩻလွဉ်ꩻ ခွေလမ်းဟုဲင်း။ ပွိုးတမုဲင်ꩻ နာꩻအုံထွိုင်ႏဗာႏတွိုႏ ယိုကိုဟောင်း၊ ခွေလမ်းကိုနဝ်ꩻ ဖျင်ရဲဉ်ꩻ သေꩻခါꩻထွူလဲဉ်း နာꩻတာႏ အခန်ꩻတဲင် နာꩻကလာအုတ်ဖုံႏတာႏတဲ့ ခင်ႏလမ်းဖုံႏ အဝ်ႏဒျာႏ” နုဲင်းနဝ်ꩻသွူ။
32ပွိုးနဝ်ꩻမꩻ ပါꩻခိုနဝ်ꩻ သဲင်ꩻလွဉ်ꩻ လမ်းတဲင် လာဗန် အွဉ်ႏချလင်ꩻဖေႏ ထာꩻခြိုꩻ ကလာအုတ်ဖုံႏလောင်းထွူ ဖေႏအံႏဗေဖူတွမ်ႏ အဆာႏဖုံႏသွူ။ နဝ်ꩻထွူ ဝွေꩻအီလွဉ်ဖေႏ အဗြာဟံသွဉ်း တွမ်ႏဝွေꩻအလိုꩻဖုံႏတာႏ ထီဟွာႏခင်ႏသွူ။ 33အီလွဉ်အွဉ်ႏတမ်ꩻဖေႏ ထာꩻအံႏချိန်ႏနဝ်ꩻ အဗြာဟံသွဉ်းဒေါ့ꩻ “ခွေအဝ်ႏလိုႏဒေါ့ꩻခရာႏ ပေါႏတဒေါ့ꩻနယ် ဗာႏတဝ်းဒွိုန်းနဝ်ꩻ ခွေတအံႏတဝ်းထာꩻအံႏ” နုဲင်းနဝ်ꩻသွူ။
လာဗန်ရိုꩻ “ဒေါ့ꩻဟုဲင်း” နုဲင်းနဝ်ꩻသွူ။
34နဝ်ꩻမꩻ ဝွေꩻဒေါ့ꩻ “ခွေသွဉ်းနဝ်ꩻ ထွာဒျာႏ အဗြာဟံ အသွဉ်းသွူ။ 35ထာဝရဘုရာꩻနဝ်ꩻ ဖေႏအာႏမွေးနေးစွဉ်ႏ ခွေဗွေႏ အဗြာဟံ မင်္ဂလာႏ၊ နဝ်ꩻမꩻ ဝွေꩻနဝ်ꩻ ခြွေမွေးနေးစွဉ်ႏသွူ။ ထာဝရဘုရာꩻ ဖေႏဝွေꩻ သွိုꩻဖုံႏ၊ ဗဲဖုံႏ၊ ဖိုးပနားဖုံႏ၊ ရွဉ်ဖုံႏ၊ ခံꩻဖုံႏ၊ သွဉ်းမူႏ သွဉ်းခိုဖုံႏ၊ ကလာအုတ်ဖုံႏတွမ်ႏ သေလာꩻဖုံႏသွူ။ 36ခွေသွဉ်းဗွေႏ အမာ သာရာနဝ်ꩻ ထွိုင်ႏဖြားမꩻ လွူးဖေႏဝွေꩻ ပိုခိုတဖြာꩻလွုမ်ꩻတဲင် ခွေဗွေႏ အမွီႏဥစ္စာႏ ကားကအဝ်ႏနဝ်ꩻ ဖေႏလို့ဒျာႏ ဝွေꩻပိုခိုသွူ။ 37ခွေဗွေႏတွမ်ႏ ခွေနဝ်ꩻ အွဉ်ႏလဲဉ်း ဂတိ ဝွေꩻကပညတ် ထွဉ်ႏသေꩻခွေ ဖေႏခွေကလွောက်ꩻနာႏဗာႏနဝ်ꩻ ခွေခံႏခါꩻလဲဉ်းသစ္စာႏ ဝွေꩻဒေါ့ꩻ၊ ‘ခွေပိုခိုတာႏမာနဝ်ꩻ နာꩻထုမ်ႏဖေႏဗာႏတဝ်း လိုꩻမူႏ ခါနန်ခမ်းကို 38သဲင်ꩻချာ ခွေဖါလိုꩻမျိုꩻ ဖူးဝေးဖုံႏထျꩻတဲင် ထုမ်ႏဖေႏသွော့ ဝွေꩻမာတဖြာꩻ၊’ 39နဝ်ꩻမꩻ ခွေရီခွေဗွေႏ၊ ‘ပါꩻမူႏပေႏ မဉ်ႏတသဲင်ꩻလွဉ်ꩻတဝ်း တွမ်ႏခွေနဝ်ꩻ ခွေအီႏမာꩻဗာႏ နုဲင်းမုဲင်ꩻဟောင်း၊’ နုဲင်းနဝ်ꩻသွူ။ 40အဗြာဟံလဝ်းချာ ‘ခွေကအဝ်ႏရိုႏသေႏ သေႏသေႏဒါႏ ထာဝရဘုရာꩻ အမို့ꩻလောင်းတမန်ႏနဝ်ꩻ အီႏအွဉ်ႏစွꩻလွေꩻငီꩻနာꩻတဲင် အီႏမာꩻအောင်ႏမျင်ႏ ဖေႏဒျာႏ နာꩻသွူ။ နာꩻအီႏထုမ်ႏဖေႏဗာႏ ခွေပိုခိုတာႏ မာတဖြာꩻ ခွေဖါလိုꩻမျိုꩻကထွာ အွိုးခွေဖါတမွိုးဖါပိုစွိုꩻဖုံႏကို။ 41နာꩻကအီႏလွစ်ကင်ꩻဗာႏ ငဝ်းစိန်ႏတရေႏနဝ်ꩻ အဝ်ႏဒျာႏ တနယ်ꩻလွုမ်ꩻ၊ နာꩻလွေꩻ ခွေဖူးဝေးဖုံႏထျꩻတဲင် ဝွေꩻသီး မဉ်ႏတလက္ခံႏတဝ်း နာꩻငဝ်းနဝ်ꩻ နာꩻအီႏလွစ်ကင်ꩻဗာႏတွမ်ႏ ငဝ်းစိန်ႏတရေႏယိုသွူ။’ 42ဟန်ႏနီꩻ ခွေသွဉ်း ထွိုင်ႏဖျော်လွဉ် ထီအုံႏထျꩻချိန်ႏ ယိုနဝ်ꩻ ခွေဆုတောင်ꩻ၊ ‘ထာဝရဘုရာꩻ ကထွာ ခွေဗွေႏအဗြာဟံ အဗွေႏ ထာဝရဘုရာꩻ၊ မာꩻကေꩻဇူꩻတဲင် ခွေသွဉ်းကအဝ်ႏမာꩻ ထာꩻယိုနဝ်ꩻ ဖေႏဗဲင်း ထာꩻအောင်ႏမျင်ႏ။’ 43ခွေသွဉ်း ကအဝ်ႏ ထီအုံႏထျꩻချိန်ႏယို မူႏနမ်ꩻပေႏတဖြာꩻ မဉ်ႏလွဉ်တွောင်ထီနဝ်ꩻ ခွေအီႏကွီအွꩻဗဲင်း အထီတစိꩻ ဝွေꩻအဲင်ႏကို၊ 44ပါꩻမူႏပေႏ သဘော်ꩻမဉ်ႏတူႏ မဉ်ႏတွောင် ဖေႏအွꩻပါက ခွေကလာအုတ်ဖုံႏထီနဝ်ꩻ ဝွေꩻမူႏနဝ်ꩻ ယံဖေႏကထွာသွော့ နီဗွေႏ ကလွိုက်သေꩻခါꩻဖေႏဒါႏ ခွေသွဉ်းအဗွေႏ ပိုခိုတာႏအမာ။ 45ခလားခွေသွဉ်း ကအွဉ်ႏဆွိုး ငဝ်းဆုတောင်ꩻ၊ ရီဗက္ကနဝ်ꩻ အထီဖွိုင်ꩻ အွဉ်ႏဒင်ႏနေး အပြေင်လောင်းတဲင် ဖျော်လွဉ် လင်ꩻတွောင်ထီ ထီအုံႏကိုထွူ ခွေဒေါ့ꩻဖေႏဝွေꩻ ‘မာꩻကေꩻဇူꩻ ဖေႏအွꩻဗဲင်း ခွေထီ တစိꩻငါႏမွိုင်၊’ 46ဝွေꩻထီဖွိုင်ꩻ အဝ်ႏအပြေင်လောင်းနဝ်ꩻ အွဉ်ႏလင်ꩻမွိုင် တဲင်ဒေါ့ꩻ ‘အွꩻဟုဲင်း၊ ခွေအီႏဖေႏအွꩻပါက နာꩻကလာအုတ်ဖုံႏ နဝ်ꩻမꩻ ခွေအွꩻတဲင် ဝွေꩻဖေႏအွꩻပါက ခွေကလာအုတ်ဖုံႏ ထီသွူ။ 47ခွေရီ ဝွေꩻမူႏ၊ ‘သီဖါနဝ်ꩻ ပါꩻမုဲင်ꩻဟောင်း’ တဲင်ဝွေꩻလဝ်းချာ၊ ‘ခွေဖါနဝ်ꩻ မဉ်ꩻဗေသွေလ၊ နာဟော်တွမ်ႏ မိလခါ ပိုခိုသွူ။’ နဝ်ꩻထွူ ခွေအွဉ်ႏဟွဲဖေႏ ဝွေꩻမူႏ နေ့ဖူကေင်းတဲင် အွဉ်ႏဆွဖေႏစူခဲဉ်း အစူဗောင်လောင်းသွူ။ 48ခွေအွပ်ꩻလင်ꩻ ကိုꩻကွယ်ႏဝုဲင်ႏ ထာဝရဘုရာꩻတဲင် ခွေအုပ်ꩻထင်ႏ ထာဝရဘုရာꩻ ခွေအဗွေႏ အဗြာဟံ ဗွေႏဘုရာꩻ၊ ခွေဗွေႏပိုခိုတာႏနဝ်ꩻ ကွပ်ပွိုး ပသာတနꩻထွူစွဉ်ႏ ခွေဗွေႏ အဖူးဝေးဖုံႏထျꩻ ခွေမော့ꩻထွူစွဉ်ႏ ဝွေꩻပိုမူႏနဝ်ꩻသွူ။ 49ယိုခါ သီအင်းရွယ်ႏ အွဉ်ႏနယ်ချာဖေႏခွေဗွေႏ မေတ္တာႏတဲင် နုဲင်းကအွဉ်ႏလဲဉ်း ဂတိအတွိုင်ꩻနဝ်ꩻ အီႏမာꩻဗွေ စွုံႏလင်ႏ ဖေႏနွောင်ꩻဟောင်း၊ တမာꩻဖေႏ နွောင်ꩻတဝ်းဟောင်း ဖေႏကသေ၊ မဉ်ႏသေဗာႏနဝ်ꩻမꩻ ခွေအီႏမာꩻသွုပ်ဗာႏ နုဲင်းမုဲင်ꩻနဝ်ꩻ ခွေအီႏဆွုံꩻဖျတ်” နုဲင်းနဝ်ꩻသွူ။
50လာဗန်တွမ်ႏ ဗေသွေလလဝ်းချာ “ထာꩻမာꩻကိစ္စယိုနဝ်ꩻ အဝ်ႏဒျာႏ ထာဝရဘုရာꩻထျꩻ ထွာလွဉ်ဒျာႏနဝ်ꩻမꩻ နီတအဝ်ႏလိုႏ ဆွုံꩻဖျတ်တဝ်းသွူ။ 51ရီဗက္ကနမ်း အဝ်ႏဒျာႏယိုဟာ ဟဲ့ꩻလွေꩻသွော့ဝွေꩻဟုဲင်း နုဲင်းထာဝရဘုရာꩻ ကမိန်းသေꩻအတွိုင်ꩻ ဖေႏနေးဝွေꩻမူႏ ကထွာဗာႏ နာꩻဗွေႏပိုခိုမာနဝ်ꩻ ဟဲ့ꩻသဲင်ꩻဟုဲင်း” နုဲင်းနဝ်ꩻသွူ။ 52အဗြာဟံသွဉ်း ထွိုင်ႏဟွိုန် ငဝ်းနုဲင်းယို ဝွေꩻအွပ်ꩻလင်ꩻတဲင် ကိုꩻကွယ်ႏဝုဲင်ႏစွဉ်ႏ ထာဝရဘုရာꩻသွူ။ 53နဝ်ꩻထွူ ဝွေꩻထေထန်ႏ ခွမ်ꩻလာꩻတွမ်ႏ ရွဉ်ခံꩻ ၊ ရတနာႏဖုံႏတဲင် ဖေႏစွဉ်ႏ ရီဗက္ကသွူ။ ဝွေꩻဖေႏပါက ပါꩻမူႏဝေးခိုတွမ်ႏ အမွိုး အဖိုꩻတန်ႏ ထာꩻခြိုꩻ လက်ဆောင်ႏဖုံႏသွူ။
54နဝ်ꩻထွူ အဗြာဟံသွဉ်းတွမ်ႏ အလိုꩻစွိုꩻဖုံႏနဝ်ꩻ အံႏအွꩻထွူတဲင် ဗေင်ႏနဝ်ꩻကို တသာသွူ။ နုဲင်းမွူးရဝ်ꩻ ဝွေꩻသီးဗေင်ႏထွိုင်ႏတဲင် ဝွေꩻဒေါ့ꩻ “နီအွဉ်ဝင်ꩻသဲင်ꩻချာတွမ် နီအဗွေႏထျꩻ” နုဲင်းနဝ်ꩻသွူ။
55ကွဲႏတွော့ꩻ ရီဗက္ကဝေးခိုတွမ်ႏ အမွိုးနဝ်ꩻဒေါ့ꩻ “မူႏပေႏယိုနဝ်ꩻ အွဉ်ႏအုံငီꩻဒွိုန်းကနီ တပတ်ငါႏ မဉ်ႏတမွေးတဝ်း မွူးနီꩻတဆီရပ်ငါႏဟုဲင်း၊ ထွူမꩻအွဉ်ႏစွꩻလွေꩻဝွေꩻ” ရိုꩻဖေႏနုဲင်းနဝ်ꩻသွူ။
56ကွဲႏတွော့ꩻ ဝွေꩻရိုꩻ “တွမ်ႏရဲဆီꩻမွိုန်းဒွုမ်နီ ထာဝရဘုရာꩻနဝ်ꩻ မာꩻအောင်ႏမျင်ႏဖေႏလဲဉ်း ခွေကိစ္စနဝ်ꩻမꩻ ဖေႏသဲင်ꩻချာသွော့ ခွေနီဗွေႏအထျꩻ” နုဲင်းနဝ်ꩻသွူ။ 57ဝွေꩻသီးရိုꩻ “ဟဲ့ꩻလွဉ်ပါꩻမူႏပေႏတဲင် ရီစမ်ꩻဝွေꩻသဘော်ꩻ” နုဲင်းနဝ်ꩻသွူ။ 58ပွိုးနဝ်ꩻမꩻ ဝွေꩻသီးဟဲ့ꩻလွဉ် ရီဗက္ကတဲင်ရီ “နာꩻမဉ်သဲင်ꩻလွဉ်ꩻနေ တွမ်ႏဝွေꩻသီးဟောင်း” နုဲင်းနဝ်ꩻသွူ။
ဝွေꩻမူႏလဝ်းချာ “သဲင်ꩻလွဉ်ꩻ” နုဲင်းနဝ်ꩻသွူ။
59နဝ်ꩻမꩻ ရီဗက္ကတွမ်ႏ ဝွေꩻမူႏ အသွဉ်းဖုံႏနဝ်ꩻ ဝွေꩻသီး အွဉ်ႏစွꩻသဲင်ꩻလွဉ်ꩻငီꩻတွမ်ႏ အဗြာဟံသွဉ်းစွဉ်ႏ ဝွေꩻအလိုꩻဖုံႏနဝ်ꩻသွူ။ 60ဝွေꩻသီးရိုꩻ
“နီဖူးမူႏနာꩻနဝ်ꩻ ယံဖေႏကထွာသွော့ လိုꩻအသိန်ႏအသောင်ꩻဖုံႏ အမွိုးနော။
နာꩻပိုလီꩻ စွိုးခွိုꩻဖုံႏနဝ်ꩻ ယံဖေႏကတွိုက်ꩻ အောင်ႏနွောင်ꩻသွော့ ရန်ႏသူႏဝေင်ꩻဖုံႏနော” ဖေႏရီဗက္က မင်္ဂလာႏ နုဲင်းနဝ်ꩻသွူ။
61နဝ်ꩻထွူ ရီဗက္ကတွမ်ႏ ဝွေꩻအသွဉ်း မူႏနမ်ꩻပေႏဖုံႏနဝ်ꩻ ထင်ႏထုမ်ႏ ကလာအုတ်တဲင် စွဉ်ႏအဗြာဟံ သွဉ်းဖုံႏနဝ်ꩻ ဝွေꩻသီး ထန်ႏလွေꩻစစွဉ်ႏဖုံႏသွူ။
62ဣသဲစ်နဝ်ꩻ ဖျော်လွဉ်သော့ꩻ ကန္တာရထာꩻခြာကို “အသက်အဝ်ႏမွန်ဒါႏဗွေႏ ကထီႏခွေထီအုံႏ” ထျꩻတဲင် အုံသော့ꩻ ခါနန်ခမ်း အခဝ်နဝ်ကိုသွူ။ 63မွူးပင်ꩻလင်ꩻချိန်ႏ ဝွေꩻအဝ်ႏလွေꩻ လုဲင်းတုံးကိုတွင်ꩻ ထီႏကလာအုတ်ဖုံႏ အဝ်ႏလွဉ်နဝ်ꩻသွူ။ 64ရီဗက္ကထွိုင်ႏထီႏ ဣသဲစ်နဝ်ꩻ ဝွေꩻအဝ်ႏ ကလာအုတ်လောင်း လင်ꩻလွဉ် 65တဲင်ရီအဗြာဟံသွဉ်း “အဝ်ႏလုဲင်းတုံးကို ထောင်ခင်ႏလွဉ်ထာꩻ နီထျꩻနဝ်ꩻ ပါꩻမုဲင်ꩻခိုဟောင်း”နုဲင်းနဝ်ꩻသွူ။
“ဝွေꩻနဝ်ꩻ နီဗွေႏဒျာႏ” သွဉ်းလဝ်းချာ နုဲင်းနဝ်ꩻသွူ။ ကွပ်နဝ်ꩻမꩻ ဝွေꩻထူႏဖေါက်ဝါးခဝ်တဲင် အွဉ်ႏဒို့ꩻခါꩻစွဉ်ႏ ဝွေꩻမူႏအမဲ့ငါသွူ။
66သွဉ်းနဝ်ꩻတဲ့ꩻ ဝွေꩻကမာꩻလဲဉ်း ကိစ္စ ကားကအဝ်ႏနဝ်ꩻ ဒေါ့ꩻနယ်လို့စွဉ်ႏ ဣသဲစ်သွူ။ 67နဝ်ꩻထွူ ဣသဲစ်ဟဲ့ꩻသဲင်ꩻ ရီဗက္က ဝွေꩻမွိုးသာရာ ကအုံသော့ꩻဒါႏ သုမ်းကိုတဲင် ဝွေꩻမူႏနဝ်ꩻ ထွာလွဉ်စွဉ်ႏ ဝွေꩻမာသွူ။ ဣသဲစ်နဝ်ꩻ ရက်ငါႏရီဗက္က နဝ်ꩻမꩻ ကွပ်ပွိုး ဝွေꩻမွိုးသီထိုꩻတဲင် ဝွေꩻသꩻပေႏဒါႏနဝ်ꩻ သက်သာႏချာယင်းသွူ။
ទើបបានជ្រើសរើសហើយ៖
ကမ္ဘာႏစ 24: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.
ကမ္ဘာႏစ 24
24
ဣသဲစ်တာႏမာ
1ယိုခါ အဗြာဟံနဝ်ꩻ ဖြားလဲဉ်းတဲင် ဝွေꩻထာꩻမာꩻ စွုမ်ႏစွိုးနဝ်ꩻ ထာဝရဘုရာꩻ ဖေႏမင်္ဂလာႏသွူ။ 2ဝွေꩻဒေါ့ꩻဖေႏ ဝွေꩻအသွဉ်း သက်တန်တဖြာꩻ ကထိန်ꩻထွား ဖေႏဒါႏ ဝွေꩻထာꩻခြိုꩻဥစ္စာႏ ကားကအဝ်ႏ “ခွေပိုတာႏနဝ်ꩻ နာꩻထုမ်ႏဖေႏဗာႏတဝ်း ဝွေꩻမာ ခါနန်ခမ်းကိုယိုနဝ်ꩻ ခွေမဉ်အွဉ်ႏနာꩻ မာꩻကေꩻဇူꩻ အွဉ်ႏသော့ꩻနာꩻစူ ခွေကီႏဆꩻလယိုတဲင် ခံႏသွော့သစ္စာႏဟုဲင်း၊ 3တွိုင်ႏတယ်ႏအီနေးတွမ်ႏ မို့ꩻတွမ်ႏဟံႏ ထာဝရဘုရာꩻ အဗွေႏဘုရာꩻ အမဉ်ꩻနာႏမသွူ။ 4နာꩻနဝ်ꩻ သဲင်ꩻချာ ခွေကလွူးဒါႏ ဇာႏတိခမ်းတဲင် ခွေပိုခို ဣသဲစ်တာႏနဝ်ꩻ နာꩻထုမ်ႏဖေႏဗာႏ ဝွေꩻမာတဖြာꩻ အွိုးခွေဖူးဝေး စွိုးခွိုꩻကို” နုဲင်းနဝ်ꩻသွူ။
5ကွဲတွော့ꩻ အသွဉ်းရီ၊ “ပါꩻမူႏပေႏ မဉ်ႏအွဉ်ႏကုဲင်တဝ်း အလမ်း မဉ်ႏတသဲင်ꩻလွဉ်ꩻတဝ်း ခွေသွဉ်းခမ်းယိုနဝ်ꩻ အီႏမာꩻနုဲင်းမုဲင်ꩻဟောင်း၊ ခွေသွဉ်း အီႏအွဉ်ႏစွꩻသဲင်ꩻဗာႏ နီဗွေႏပို အွိုး နီဗွေႏဇာႏတိ ခမ်းသူꩻဟောင်း” နုဲင်းနဝ်ꩻသွူ။ 6အဗြာဟံလဝ်းချာ “ခွေပိုခိုနဝ်ꩻ နာꩻဟဲ့ꩻသဲင်ꩻ ဗာႏတဝ်း ခမ်းသူꩻကွေး၊
7ခွေကအဝ်ႏနီဖါလမ်း၊ ခွေခွိုꩻမျိုꩻ အခမ်းကိုချိန်ႏ ခမ်းထီမို့ꩻလောင်း ထာဝရဘုရာꩻ ဗွေႏဘုရာꩻ နဝ်ꩻ ဟဲ့ꩻလွဉ်ခွေတဲင် ခမ်းယိုနဝ်ꩻ အီႏဖေႏ ခွေပိုလီꩻစွိုးခွိုꩻဖုံႏ ဝွေꩻဗွေႏတွိုင်ႏတယ်ႏ အွဉ်ႏသေꩻခါꩻ ခွေဂတိ နုဲင်းနဝ်ꩻသွူ။ နာꩻထုမ်ႏဖေႏ ခွေပိုခိုမာ ဖေႏကလꩻနဝ်ꩻ ဝွေꩻဗွေႏ အီႏအွဉ်ႏစွꩻလွေꩻငါရီး ဝွေꩻဗွေႏ မို့ꩻလောင်းတမန်ႏ နာꩻဆꩻငါသွူ။ 8ပါꩻမူႏပေႏ မဉ်ႏတသဲင်ꩻလွဉ်ꩻတဝ်း တွမ်ႏနာꩻနဝ်ꩻ နာꩻအီႏလွစ် ဂတိယိုသွူ။ ကွဲတွော့ꩻ အကျောင်ꩻခရာႏ အမျိုꩻမုဲင်ꩻ တရိုꩻတဝ်းနဝ်ꩻ ခွေပိုခိုယို နာꩻဟဲ့ꩻသဲင်ꩻ ချာဗာႏတဝ်း ခမ်းသူꩻ” နုဲင်းနဝ်ꩻသွူ။ 9ကွပ်နဝ်ꩻမꩻ သွဉ်းစူနဝ်ꩻအွဉ်ႏ အဗြာဟံ ကီႏဆꩻလꩻတဲင် နုဲင်းအဗွေႏ အဗြာဟံ ကထွဉ်ႏအတွိုင်ꩻ အီႏမာꩻဒျာႏကျောင်ꩻ အွဉ်ႏသစ္စာႏနဝ်ꩻသွူ။
10အဗြာဟံသွဉ်း ကထိန်ꩻထွားဖေႏဗာႏဒါႏ ထာꩻခြိုꩻဥစ္စာႏဖုံႏနဝ်ꩻ ဝွေꩻထူႏ ကလာအုပ် အဗာႏတဆီ အွိုးအဗွေႏ ကလာအုတ်ဖုံႏကိုတဲင် ထန်ႏလွေꩻခင်ႏလမ်း နာဟော် ကအဝ်ႏအုံဒါႏ ဝေင်ꩻတန် မဲက်သိုပိုတေးမီးယားခမ်း အခဝ်ထင်ꩻဖဲ့ꩻနဝ်ꩻသွူ။ 11ဝွေꩻထွိုင်ႏဖျော်လွေꩻ ဝေင်ꩻတန်သောင်နဝ်ꩻ အွဉ်ႏအွပ်ꩻလင်ꩻ ဝွေꩻကလာအုပ် ထီအုံႏထျꩻသွူ။ အချိန်ႏနဝ်ꩻထွာ မွူးပင်ꩻလင်ꩻ လိုꩻမူႏဖုံႏ အီႏလွဉ်တွောင်ထီ ချိန်ႏသွူ။ 12ဝွေꩻဆုတောင်ꩻ “ခွေသွဉ်းအဗွေႏ အဗြာဟံ ထာဝရဘုရာꩻ အဗွေႏဘုရာꩻ၊ ဟန်ႏနီꩻယို ခွေသွဉ်းကလွဉ်ဗာႏ ကိစ္စယို နုဲင်းကအွဉ်ႏဂတိ သေꩻခါꩻဒါႏ ခွေသွဉ်းအဗွေႏနဝ်ꩻ ဖေႏဗဲင်း ထာꩻအောင်ႏမျင်ႏမွိုင်ဗွေႏ။ 13ယိုခါ ခွေသွဉ်း ဖျော်လွဉ်လဲဉ်း ခင်ႏလမ်း လိုꩻမူႏပေႏဖုံႏ အဝ်ႏဝေင်ꩻကို ကအီႏလွဉ်တွောင်ဒါႏထီ၊ ထီအုံႏထျꩻနဝ်ꩻသွူ။ 14ဝွေꩻသီးအကို တဖြာꩻ ခွေသွဉ်းအီႏရိုꩻဖေႏ၊ မာꩻကေꩻဇူꩻ အွဉ်ႏလင်ꩻနာꩻထီဖွိုင်ꩻ၊ ခွေအီႏအွꩻတစိꩻငါႏတဲင်၊ ဝွေꩻမူႏမဉ်ႏရိုꩻ အွꩻဟုဲင်း၊ ခွေအီႏတွောင်ဖေႏပါက နာꩻကလာအုတ်ဖုံႏတာႏ ကနုဲင်းနဝ်ꩻနဝ်ꩻ ဝွေꩻမူႏယို ယံကထွာသွော့ အဖြာꩻ နီဗွေႏ ကလွိုက်ဖေႏ နီဗွေႏသွဉ်း ဣသဲစ်တာႏသွူ၊ မဉ်ႏထွာမွေးနုဲင်း ခွေသွဉ်း ကကွီယို နီဗွေႏနဝ်ꩻ အဝ်ႏမာꩻဖေႏနုဲင်း ကအွဉ်ႏဂတိသစ္စာႏ သေꩻခါꩻဒါႏ ခွေသွဉ်းအဗွေႏနဝ်ꩻ ခွေသွဉ်း အီႏသေဗာႏ” နုဲင်းနဝ်ꩻသွူ။ 15ဝွေꩻအဝ်ႏဆုတောင်ꩻ လꩻထွူဒွိုန်းချိန်ႏ ရီဗက္ကနဝ်ꩻ ထီဖွိုင်ꩻအွဉ်ႏဒင်ႏနေး အပြေင်လောင်းတဲင် ဖျော်လွဉ်သွူ။ ဝွေꩻမူႏနဝ်ꩻထွာ ဗေသွေလပိုမူႏသွူတဲင် ဗေသွေလနဝ်ꩻထွာ အဗြာဟံဖူးခို နာဟော်တွမ်ႏ အမာမိလခါနဝ်ꩻ ပိုမူႏသွူ။ 16ဝွေꩻမူႏနဝ်ꩻထွာ လိုꩻမူႏယောင်ꩻရေꩻငါႏတဲင် ထွာမူႏနမ်ꩻပေႏသွူ၊ ဝွေꩻလင်ꩻထီအုံႏ တွောင်ဗွေထီ အဖွိုင်ꩻကိုတဲင် ထန်ႏလွဉ်သွူ။ 17သွဉ်းနဝ်ꩻ ဖင်းလွေꩻ ဝွေꩻမူႏထျꩻတဲင်ဒေါ့ꩻ “မာꩻကေꩻဇူꩻ ဖေႏအွꩻဗဲင်းခွေထီ နာꩻထီဖွိုင်ꩻကို တစိꩻငါႏမွိုင်” နုဲင်းနဝ်ꩻသွူ။
18မူႏနမ်ꩻပေႏဒေါ့ꩻ “အွꩻဟုဲင်း၊ ဗွေႏ” ဝွေꩻထီဖွိုင်ꩻ အဝ်ႏပြေင်လောင်းနဝ်ꩻ အွဉ်ႏလင်ꩻမွိုင်တဲင် ဖေႏစွဉ်ႏဝွေꩻသွူ။ 19ဖေႏအွꩻဝွေꩻ ထွိုင်ႏထွူ မူႏနမ်ꩻပေႏရိုꩻ “ခွေအီႏလွေꩻတွောင်ဖေႏပါက နာꩻကလာအုတ်ဖုံႏတာႏတဲင် ဖေႏအွꩻကွို့ꩻကွို့ꩻသွော့” နုဲင်းနဝ်ꩻသွူ။ 20ထီကအဝ်ႏဖွိုင်ꩻကိုနဝ်ꩻ ပါꩻမူႏထောက်ꩻဖေႏလို့စွဉ်ႏ ထာꩻသားဖုံႏ ထီတခြောင်ကိုတဲင် ဖင်းလွေꩻတွောင်ထဲင်း ယင်းထီ၊ ဗတွိုႏစွဉ်ႏ ကလာအုတ်ဖုံႏ ကအွꩻကွို့ꩻလို့နဝ်ꩻသွူ။ 21ထာဝရဘုရာꩻ ဗွေႏဘုရာꩻ အီႏဖေႏဝွေꩻ ထာꩻအောင်ႏမျင်ႏခွင်ꩻနဲ့ တဖေႏတဝ်းနဲ့ ဖေႏကသေဗာႏနဝ်ꩻ သွဉ်း အဝ်ႏအုံပွေါးထွား တေ့ꩻပါꩻမူႏပေႏနဝ်ꩻသွူ။
22ပါꩻမူႏပေႏ ဖေႏအွꩻကုလာအုပ်ထီ ထွိုင်ႏထွူ ပါꩻခိုယို ထေထန်ႏအခံꩻ အယာႏခဉ်ႏ ဟားသျိုး အွဉ်ႏခေင်းဖေႏ ဝွေꩻမူႏနေ့ဖူတဲင် ထူႏယင်းစူခဲဥ်း ခံꩻနီပင် အယာႏ တခန်နဝ်ꩻတဲ့ အွဉ်ႏဆွဖေႏယင်း အစူဗောင်လောင်းသွူ။ 23ဝွေꩻဒေါ့ꩻ၊ “မာꩻကေꩻဇူꩻတဲင် ဒေါ့ꩻနယ်ခွေ၊ နာꩻနဝ်ꩻ ပါမုဲင်ꩻပိုမူႏဟောင်း၊ သီဖါလမ်းနဝ်ꩻ ခွေတွမ်ႏ ခွေလိုꩻဖုံႏ မဉ်ႏမာꩻထဉ်ႏနဝ်ꩻ လꩻနေဟောင်း” နုဲင်းနဝ်ꩻသွူ။
24“နီဖါနဝ်ꩻထွာ နာဟော်တွမ်ႏ မိလခါ အပိုခို ဗေသွေလ” ပါꩻမူႏပေႏ လဝ်းချာ နုဲင်းနဝ်ꩻသွူ။ 25“နီဖါလမ်းနဝ်ꩻ ဗေဖူတွမ်ႏ ထာꩻအံႏဖုံႏ အဝ်ႏဗွေဗောႏဒျာႏတဲင် သီ အုံတာႏနဝ်ꩻတဲ့ ခင်ႏလမ်းဖုံႏ အဝ်ႏဒျာႏ” နုဲင်းနဝ်ꩻသွူ။
26နဝ်ꩻထွူ ပါꩻခို အုံခွပ်လင်ꩻ ဝုဲင်ႏကိုꩻကွယ်ႏ ထာဝရဘုရာꩻ၊ 27ဝွေꩻရိုꩻ၊ “နုဲင်းကအွဉ်ႏ သေꩻခါလဲဉ်းဒါႏ ခွေသွဉ်းအဗွေႏ ဂတိတောႏ အတွိုင်ꩻ ကွပ်သစ္စာႏအဝ်ႏနဝ်ꩻမꩻ အုပ်ꩻထင်ႏဒျာႏ ထာဝရဘုရာꩻ ခွေဗွေႏအဗြာဟံ အဗွေႏဘုရာꩻ အကေꩻဇူꩻတောႏသွူ။ ထာဝရဘုရာꩻနဝ်ꩻ ပသာတွိုႏထွူစွဉ်ႏ ခွေသွဉ်းအဗွေႏ ဖူးဝေးဖုံႏထျꩻ” နုဲင်းနဝ်ꩻသွူ။
28မူႏနမ်ꩻပေႏနဝ်ꩻ ဖင်းသဲင်ꩻချာ အမွိုးလမ်းတဲင် ဒေါ့ꩻနယ်စွဉ်ႏ အကျောင်ꩻခရာႏ ကားကအဝ်ႏသွူ။ 29ရီဗက္ကနဝ်ꩻ အဝေးခို မဉ်ꩻလာဗန် အဝ်ႏတဖြာꩻတဲင် ဝွေꩻနဝ်ꩻဖင်းထန်ႏလွေꩻ အဗြာဟံသွဉ်း ကအဝ်ႏဒါႏ ထီအုံႏထျꩻသွူ။ 30လာဗန်နဝ်ꩻ ထီႏလဲဉ်း အဖူးမူႏဟွဲ နေ့ဖူခေင်းခံꩻ၊ ဆွစူခဲဉ်းခံꩻ လွုမ်ꩻတကာႏတဝ်း ဟွိုန်ဗာႏအဖူးမူႏ ခြုဲင်းနယ် ပါခို ကဒေါ့ꩻနယ်လဲဉ်းဒါႏ ဝွေꩻဖူးမူႏနဝ်ꩻ အခရာႏသွူ။ နဝ်ꩻမꩻ ဝွေꩻဖင်းလွေꩻ အဗြာဟံသွဉ်းထျꩻ ကအဝ်ႏအုံထွိုင်ႏထာꩻ ဝွေꩻကလာအုတ်ဖုံႏထျꩻ ထီအုံႏလောင်းတဲင်ဒေါ့ꩻ 31“နာꩻနဝ်ꩻ ထွာဒျာႏလိုꩻလꩻ ထာဝရဘုရာꩻ မင်္ဂလာႏတဖြာꩻသွူ၊ သဲင်ꩻလွဉ်ꩻ ခွေလမ်းဟုဲင်း။ ပွိုးတမုဲင်ꩻ နာꩻအုံထွိုင်ႏဗာႏတွိုႏ ယိုကိုဟောင်း၊ ခွေလမ်းကိုနဝ်ꩻ ဖျင်ရဲဉ်ꩻ သေꩻခါꩻထွူလဲဉ်း နာꩻတာႏ အခန်ꩻတဲင် နာꩻကလာအုတ်ဖုံႏတာႏတဲ့ ခင်ႏလမ်းဖုံႏ အဝ်ႏဒျာႏ” နုဲင်းနဝ်ꩻသွူ။
32ပွိုးနဝ်ꩻမꩻ ပါꩻခိုနဝ်ꩻ သဲင်ꩻလွဉ်ꩻ လမ်းတဲင် လာဗန် အွဉ်ႏချလင်ꩻဖေႏ ထာꩻခြိုꩻ ကလာအုတ်ဖုံႏလောင်းထွူ ဖေႏအံႏဗေဖူတွမ်ႏ အဆာႏဖုံႏသွူ။ နဝ်ꩻထွူ ဝွေꩻအီလွဉ်ဖေႏ အဗြာဟံသွဉ်း တွမ်ႏဝွေꩻအလိုꩻဖုံႏတာႏ ထီဟွာႏခင်ႏသွူ။ 33အီလွဉ်အွဉ်ႏတမ်ꩻဖေႏ ထာꩻအံႏချိန်ႏနဝ်ꩻ အဗြာဟံသွဉ်းဒေါ့ꩻ “ခွေအဝ်ႏလိုႏဒေါ့ꩻခရာႏ ပေါႏတဒေါ့ꩻနယ် ဗာႏတဝ်းဒွိုန်းနဝ်ꩻ ခွေတအံႏတဝ်းထာꩻအံႏ” နုဲင်းနဝ်ꩻသွူ။
လာဗန်ရိုꩻ “ဒေါ့ꩻဟုဲင်း” နုဲင်းနဝ်ꩻသွူ။
34နဝ်ꩻမꩻ ဝွေꩻဒေါ့ꩻ “ခွေသွဉ်းနဝ်ꩻ ထွာဒျာႏ အဗြာဟံ အသွဉ်းသွူ။ 35ထာဝရဘုရာꩻနဝ်ꩻ ဖေႏအာႏမွေးနေးစွဉ်ႏ ခွေဗွေႏ အဗြာဟံ မင်္ဂလာႏ၊ နဝ်ꩻမꩻ ဝွေꩻနဝ်ꩻ ခြွေမွေးနေးစွဉ်ႏသွူ။ ထာဝရဘုရာꩻ ဖေႏဝွေꩻ သွိုꩻဖုံႏ၊ ဗဲဖုံႏ၊ ဖိုးပနားဖုံႏ၊ ရွဉ်ဖုံႏ၊ ခံꩻဖုံႏ၊ သွဉ်းမူႏ သွဉ်းခိုဖုံႏ၊ ကလာအုတ်ဖုံႏတွမ်ႏ သေလာꩻဖုံႏသွူ။ 36ခွေသွဉ်းဗွေႏ အမာ သာရာနဝ်ꩻ ထွိုင်ႏဖြားမꩻ လွူးဖေႏဝွေꩻ ပိုခိုတဖြာꩻလွုမ်ꩻတဲင် ခွေဗွေႏ အမွီႏဥစ္စာႏ ကားကအဝ်ႏနဝ်ꩻ ဖေႏလို့ဒျာႏ ဝွေꩻပိုခိုသွူ။ 37ခွေဗွေႏတွမ်ႏ ခွေနဝ်ꩻ အွဉ်ႏလဲဉ်း ဂတိ ဝွေꩻကပညတ် ထွဉ်ႏသေꩻခွေ ဖေႏခွေကလွောက်ꩻနာႏဗာႏနဝ်ꩻ ခွေခံႏခါꩻလဲဉ်းသစ္စာႏ ဝွေꩻဒေါ့ꩻ၊ ‘ခွေပိုခိုတာႏမာနဝ်ꩻ နာꩻထုမ်ႏဖေႏဗာႏတဝ်း လိုꩻမူႏ ခါနန်ခမ်းကို 38သဲင်ꩻချာ ခွေဖါလိုꩻမျိုꩻ ဖူးဝေးဖုံႏထျꩻတဲင် ထုမ်ႏဖေႏသွော့ ဝွေꩻမာတဖြာꩻ၊’ 39နဝ်ꩻမꩻ ခွေရီခွေဗွေႏ၊ ‘ပါꩻမူႏပေႏ မဉ်ႏတသဲင်ꩻလွဉ်ꩻတဝ်း တွမ်ႏခွေနဝ်ꩻ ခွေအီႏမာꩻဗာႏ နုဲင်းမုဲင်ꩻဟောင်း၊’ နုဲင်းနဝ်ꩻသွူ။ 40အဗြာဟံလဝ်းချာ ‘ခွေကအဝ်ႏရိုႏသေႏ သေႏသေႏဒါႏ ထာဝရဘုရာꩻ အမို့ꩻလောင်းတမန်ႏနဝ်ꩻ အီႏအွဉ်ႏစွꩻလွေꩻငီꩻနာꩻတဲင် အီႏမာꩻအောင်ႏမျင်ႏ ဖေႏဒျာႏ နာꩻသွူ။ နာꩻအီႏထုမ်ႏဖေႏဗာႏ ခွေပိုခိုတာႏ မာတဖြာꩻ ခွေဖါလိုꩻမျိုꩻကထွာ အွိုးခွေဖါတမွိုးဖါပိုစွိုꩻဖုံႏကို။ 41နာꩻကအီႏလွစ်ကင်ꩻဗာႏ ငဝ်းစိန်ႏတရေႏနဝ်ꩻ အဝ်ႏဒျာႏ တနယ်ꩻလွုမ်ꩻ၊ နာꩻလွေꩻ ခွေဖူးဝေးဖုံႏထျꩻတဲင် ဝွေꩻသီး မဉ်ႏတလက္ခံႏတဝ်း နာꩻငဝ်းနဝ်ꩻ နာꩻအီႏလွစ်ကင်ꩻဗာႏတွမ်ႏ ငဝ်းစိန်ႏတရေႏယိုသွူ။’ 42ဟန်ႏနီꩻ ခွေသွဉ်း ထွိုင်ႏဖျော်လွဉ် ထီအုံႏထျꩻချိန်ႏ ယိုနဝ်ꩻ ခွေဆုတောင်ꩻ၊ ‘ထာဝရဘုရာꩻ ကထွာ ခွေဗွေႏအဗြာဟံ အဗွေႏ ထာဝရဘုရာꩻ၊ မာꩻကေꩻဇူꩻတဲင် ခွေသွဉ်းကအဝ်ႏမာꩻ ထာꩻယိုနဝ်ꩻ ဖေႏဗဲင်း ထာꩻအောင်ႏမျင်ႏ။’ 43ခွေသွဉ်း ကအဝ်ႏ ထီအုံႏထျꩻချိန်ႏယို မူႏနမ်ꩻပေႏတဖြာꩻ မဉ်ႏလွဉ်တွောင်ထီနဝ်ꩻ ခွေအီႏကွီအွꩻဗဲင်း အထီတစိꩻ ဝွေꩻအဲင်ႏကို၊ 44ပါꩻမူႏပေႏ သဘော်ꩻမဉ်ႏတူႏ မဉ်ႏတွောင် ဖေႏအွꩻပါက ခွေကလာအုတ်ဖုံႏထီနဝ်ꩻ ဝွေꩻမူႏနဝ်ꩻ ယံဖေႏကထွာသွော့ နီဗွေႏ ကလွိုက်သေꩻခါꩻဖေႏဒါႏ ခွေသွဉ်းအဗွေႏ ပိုခိုတာႏအမာ။ 45ခလားခွေသွဉ်း ကအွဉ်ႏဆွိုး ငဝ်းဆုတောင်ꩻ၊ ရီဗက္ကနဝ်ꩻ အထီဖွိုင်ꩻ အွဉ်ႏဒင်ႏနေး အပြေင်လောင်းတဲင် ဖျော်လွဉ် လင်ꩻတွောင်ထီ ထီအုံႏကိုထွူ ခွေဒေါ့ꩻဖေႏဝွေꩻ ‘မာꩻကေꩻဇူꩻ ဖေႏအွꩻဗဲင်း ခွေထီ တစိꩻငါႏမွိုင်၊’ 46ဝွေꩻထီဖွိုင်ꩻ အဝ်ႏအပြေင်လောင်းနဝ်ꩻ အွဉ်ႏလင်ꩻမွိုင် တဲင်ဒေါ့ꩻ ‘အွꩻဟုဲင်း၊ ခွေအီႏဖေႏအွꩻပါက နာꩻကလာအုတ်ဖုံႏ နဝ်ꩻမꩻ ခွေအွꩻတဲင် ဝွေꩻဖေႏအွꩻပါက ခွေကလာအုတ်ဖုံႏ ထီသွူ။ 47ခွေရီ ဝွေꩻမူႏ၊ ‘သီဖါနဝ်ꩻ ပါꩻမုဲင်ꩻဟောင်း’ တဲင်ဝွေꩻလဝ်းချာ၊ ‘ခွေဖါနဝ်ꩻ မဉ်ꩻဗေသွေလ၊ နာဟော်တွမ်ႏ မိလခါ ပိုခိုသွူ။’ နဝ်ꩻထွူ ခွေအွဉ်ႏဟွဲဖေႏ ဝွေꩻမူႏ နေ့ဖူကေင်းတဲင် အွဉ်ႏဆွဖေႏစူခဲဉ်း အစူဗောင်လောင်းသွူ။ 48ခွေအွပ်ꩻလင်ꩻ ကိုꩻကွယ်ႏဝုဲင်ႏ ထာဝရဘုရာꩻတဲင် ခွေအုပ်ꩻထင်ႏ ထာဝရဘုရာꩻ ခွေအဗွေႏ အဗြာဟံ ဗွေႏဘုရာꩻ၊ ခွေဗွေႏပိုခိုတာႏနဝ်ꩻ ကွပ်ပွိုး ပသာတနꩻထွူစွဉ်ႏ ခွေဗွေႏ အဖူးဝေးဖုံႏထျꩻ ခွေမော့ꩻထွူစွဉ်ႏ ဝွေꩻပိုမူႏနဝ်ꩻသွူ။ 49ယိုခါ သီအင်းရွယ်ႏ အွဉ်ႏနယ်ချာဖေႏခွေဗွေႏ မေတ္တာႏတဲင် နုဲင်းကအွဉ်ႏလဲဉ်း ဂတိအတွိုင်ꩻနဝ်ꩻ အီႏမာꩻဗွေ စွုံႏလင်ႏ ဖေႏနွောင်ꩻဟောင်း၊ တမာꩻဖေႏ နွောင်ꩻတဝ်းဟောင်း ဖေႏကသေ၊ မဉ်ႏသေဗာႏနဝ်ꩻမꩻ ခွေအီႏမာꩻသွုပ်ဗာႏ နုဲင်းမုဲင်ꩻနဝ်ꩻ ခွေအီႏဆွုံꩻဖျတ်” နုဲင်းနဝ်ꩻသွူ။
50လာဗန်တွမ်ႏ ဗေသွေလလဝ်းချာ “ထာꩻမာꩻကိစ္စယိုနဝ်ꩻ အဝ်ႏဒျာႏ ထာဝရဘုရာꩻထျꩻ ထွာလွဉ်ဒျာႏနဝ်ꩻမꩻ နီတအဝ်ႏလိုႏ ဆွုံꩻဖျတ်တဝ်းသွူ။ 51ရီဗက္ကနမ်း အဝ်ႏဒျာႏယိုဟာ ဟဲ့ꩻလွေꩻသွော့ဝွေꩻဟုဲင်း နုဲင်းထာဝရဘုရာꩻ ကမိန်းသေꩻအတွိုင်ꩻ ဖေႏနေးဝွေꩻမူႏ ကထွာဗာႏ နာꩻဗွေႏပိုခိုမာနဝ်ꩻ ဟဲ့ꩻသဲင်ꩻဟုဲင်း” နုဲင်းနဝ်ꩻသွူ။ 52အဗြာဟံသွဉ်း ထွိုင်ႏဟွိုန် ငဝ်းနုဲင်းယို ဝွေꩻအွပ်ꩻလင်ꩻတဲင် ကိုꩻကွယ်ႏဝုဲင်ႏစွဉ်ႏ ထာဝရဘုရာꩻသွူ။ 53နဝ်ꩻထွူ ဝွေꩻထေထန်ႏ ခွမ်ꩻလာꩻတွမ်ႏ ရွဉ်ခံꩻ ၊ ရတနာႏဖုံႏတဲင် ဖေႏစွဉ်ႏ ရီဗက္ကသွူ။ ဝွေꩻဖေႏပါက ပါꩻမူႏဝေးခိုတွမ်ႏ အမွိုး အဖိုꩻတန်ႏ ထာꩻခြိုꩻ လက်ဆောင်ႏဖုံႏသွူ။
54နဝ်ꩻထွူ အဗြာဟံသွဉ်းတွမ်ႏ အလိုꩻစွိုꩻဖုံႏနဝ်ꩻ အံႏအွꩻထွူတဲင် ဗေင်ႏနဝ်ꩻကို တသာသွူ။ နုဲင်းမွူးရဝ်ꩻ ဝွေꩻသီးဗေင်ႏထွိုင်ႏတဲင် ဝွေꩻဒေါ့ꩻ “နီအွဉ်ဝင်ꩻသဲင်ꩻချာတွမ် နီအဗွေႏထျꩻ” နုဲင်းနဝ်ꩻသွူ။
55ကွဲႏတွော့ꩻ ရီဗက္ကဝေးခိုတွမ်ႏ အမွိုးနဝ်ꩻဒေါ့ꩻ “မူႏပေႏယိုနဝ်ꩻ အွဉ်ႏအုံငီꩻဒွိုန်းကနီ တပတ်ငါႏ မဉ်ႏတမွေးတဝ်း မွူးနီꩻတဆီရပ်ငါႏဟုဲင်း၊ ထွူမꩻအွဉ်ႏစွꩻလွေꩻဝွေꩻ” ရိုꩻဖေႏနုဲင်းနဝ်ꩻသွူ။
56ကွဲႏတွော့ꩻ ဝွေꩻရိုꩻ “တွမ်ႏရဲဆီꩻမွိုန်းဒွုမ်နီ ထာဝရဘုရာꩻနဝ်ꩻ မာꩻအောင်ႏမျင်ႏဖေႏလဲဉ်း ခွေကိစ္စနဝ်ꩻမꩻ ဖေႏသဲင်ꩻချာသွော့ ခွေနီဗွေႏအထျꩻ” နုဲင်းနဝ်ꩻသွူ။ 57ဝွေꩻသီးရိုꩻ “ဟဲ့ꩻလွဉ်ပါꩻမူႏပေႏတဲင် ရီစမ်ꩻဝွေꩻသဘော်ꩻ” နုဲင်းနဝ်ꩻသွူ။ 58ပွိုးနဝ်ꩻမꩻ ဝွေꩻသီးဟဲ့ꩻလွဉ် ရီဗက္ကတဲင်ရီ “နာꩻမဉ်သဲင်ꩻလွဉ်ꩻနေ တွမ်ႏဝွေꩻသီးဟောင်း” နုဲင်းနဝ်ꩻသွူ။
ဝွေꩻမူႏလဝ်းချာ “သဲင်ꩻလွဉ်ꩻ” နုဲင်းနဝ်ꩻသွူ။
59နဝ်ꩻမꩻ ရီဗက္ကတွမ်ႏ ဝွေꩻမူႏ အသွဉ်းဖုံႏနဝ်ꩻ ဝွေꩻသီး အွဉ်ႏစွꩻသဲင်ꩻလွဉ်ꩻငီꩻတွမ်ႏ အဗြာဟံသွဉ်းစွဉ်ႏ ဝွေꩻအလိုꩻဖုံႏနဝ်ꩻသွူ။ 60ဝွေꩻသီးရိုꩻ
“နီဖူးမူႏနာꩻနဝ်ꩻ ယံဖေႏကထွာသွော့ လိုꩻအသိန်ႏအသောင်ꩻဖုံႏ အမွိုးနော။
နာꩻပိုလီꩻ စွိုးခွိုꩻဖုံႏနဝ်ꩻ ယံဖေႏကတွိုက်ꩻ အောင်ႏနွောင်ꩻသွော့ ရန်ႏသူႏဝေင်ꩻဖုံႏနော” ဖေႏရီဗက္က မင်္ဂလာႏ နုဲင်းနဝ်ꩻသွူ။
61နဝ်ꩻထွူ ရီဗက္ကတွမ်ႏ ဝွေꩻအသွဉ်း မူႏနမ်ꩻပေႏဖုံႏနဝ်ꩻ ထင်ႏထုမ်ႏ ကလာအုတ်တဲင် စွဉ်ႏအဗြာဟံ သွဉ်းဖုံႏနဝ်ꩻ ဝွေꩻသီး ထန်ႏလွေꩻစစွဉ်ႏဖုံႏသွူ။
62ဣသဲစ်နဝ်ꩻ ဖျော်လွဉ်သော့ꩻ ကန္တာရထာꩻခြာကို “အသက်အဝ်ႏမွန်ဒါႏဗွေႏ ကထီႏခွေထီအုံႏ” ထျꩻတဲင် အုံသော့ꩻ ခါနန်ခမ်း အခဝ်နဝ်ကိုသွူ။ 63မွူးပင်ꩻလင်ꩻချိန်ႏ ဝွေꩻအဝ်ႏလွေꩻ လုဲင်းတုံးကိုတွင်ꩻ ထီႏကလာအုတ်ဖုံႏ အဝ်ႏလွဉ်နဝ်ꩻသွူ။ 64ရီဗက္ကထွိုင်ႏထီႏ ဣသဲစ်နဝ်ꩻ ဝွေꩻအဝ်ႏ ကလာအုတ်လောင်း လင်ꩻလွဉ် 65တဲင်ရီအဗြာဟံသွဉ်း “အဝ်ႏလုဲင်းတုံးကို ထောင်ခင်ႏလွဉ်ထာꩻ နီထျꩻနဝ်ꩻ ပါꩻမုဲင်ꩻခိုဟောင်း”နုဲင်းနဝ်ꩻသွူ။
“ဝွေꩻနဝ်ꩻ နီဗွေႏဒျာႏ” သွဉ်းလဝ်းချာ နုဲင်းနဝ်ꩻသွူ။ ကွပ်နဝ်ꩻမꩻ ဝွေꩻထူႏဖေါက်ဝါးခဝ်တဲင် အွဉ်ႏဒို့ꩻခါꩻစွဉ်ႏ ဝွေꩻမူႏအမဲ့ငါသွူ။
66သွဉ်းနဝ်ꩻတဲ့ꩻ ဝွေꩻကမာꩻလဲဉ်း ကိစ္စ ကားကအဝ်ႏနဝ်ꩻ ဒေါ့ꩻနယ်လို့စွဉ်ႏ ဣသဲစ်သွူ။ 67နဝ်ꩻထွူ ဣသဲစ်ဟဲ့ꩻသဲင်ꩻ ရီဗက္က ဝွေꩻမွိုးသာရာ ကအုံသော့ꩻဒါႏ သုမ်းကိုတဲင် ဝွေꩻမူႏနဝ်ꩻ ထွာလွဉ်စွဉ်ႏ ဝွေꩻမာသွူ။ ဣသဲစ်နဝ်ꩻ ရက်ငါႏရီဗက္က နဝ်ꩻမꩻ ကွပ်ပွိုး ဝွေꩻမွိုးသီထိုꩻတဲင် ဝွေꩻသꩻပေႏဒါႏနဝ်ꩻ သက်သာႏချာယင်းသွူ။
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.