يوحنای انجیل 11

ایلعازَرِ موردَن

1یکته مردکه بایسمِ ایلعازَر ناخوش بو. او بیت عَنْیا دهاتِ مردمؤن جی بو، هو دهاتی که مریم و اونه خاخور مارتا اوره زیندگی گودَن. 2مریم هو زنی بو که خداوندِ پائنه سر روغنی عطر فوده و خوشِ موؤنِ اَمره اونه خوشکَ گوده. اونه برأر ایلعازَر ناخوشَ بؤ بو. 3پس ایلعازَر خاخورؤن، عیسی بِه پیغؤم سرا دَئن و بوُتن: «آقا، تی عزیز ریفق ناخوشِ.» 4عیسی وختی ایی خبرِ بشتؤسه بوته: «ایی ناخوشی، موردَن اَمره تمنَه نبنه، بلکه خدا جلال وَسه ایسّه تا خدا ریکه بواسطه او، جلال پیدا کونی.» 5عیسی مارتا و اونهخاخور و ایلعازَرِ دوست داشت. 6پس وختی بشتؤسه که ایلعازَر ناخوشِ، دو روز دیگرم اوجایی که ایسأ بو، بیسأ.

7بازین خوشِ شاگردؤن بوته: «بأین هنده یهودیه ولایت بشیم.» 8اونه شاگردؤن بوُتن: «اوستاد، خیلی نوگذشته که یهودی أن خواسَن تَه سنگسار بکونَن، تو هنده خؤانی اوره بشی؟» 9عیسی جواب بدا: «مگه روز دوازده ساعت نییه؟ اونی که روز میئن راه بشی اینه پا هیچ جا گیر نوکوئنه تا بکّای، چونکه ایی دونیا نور اینه. 10امّا اونی که شؤ میئن راه شنه کِئنه، چونکه خوشِ میئن نور ندَئنه.» 11عیسی بعدِ ایی گبؤن خو شاگردونِ بوته: «امه ریفق ایلعازَر خوته، امّا شَنم تا اونه بیدارَ کونم.» 12شاگردؤن اونه بوُتن: «آقا، اگه خوته، خوبَه بنه.» 13عیسی ایلعازرِ موردنای گب زی، ولی اونه شاگردؤن فکر گودَن که عیسی منظور اینه که ایلعازر خوته تا استراحت بکونی. 14هو زمون عیسی واضح اوشونه بوته: «ایلعازَر بمورده. 15شيمه وَسه خوشحالم که اوره نِیسَه بوم، تا ایمؤن بأرین. امّا الؤن اونه ورجه بشیم.» 16پس توما که اونه دوقلو گوتن، اوته شاگردؤن بوته: «باین أمَرَم بشیم و اونه أمره بمیریم.»

قیامت و زیندگی مو ایسّم

17وختی عیسی، بیت عنیا دهات برسه، بفَهمسه که چهار روزِ که ایلعازَره مقبره میئن بنئن. 18بیت عَنْیا، دوروبرِ سه کیلومتر اورشلیم أمره فاصله داشت. 19خیلی از یهودی أن، اورشلیمای مریم و مارتا ورجه بومئبون تا اوشؤنِ برأرِ موردن واسه اوشونِ أمره همدردی بکونن. 20پس وختی که مارتا بشتؤسه عیسی أمَئدره، اونه پیشواز بوشو. امّا مریم خونه میئن بیسأ. 21مارتا عیسی بوته: «آقا، اگه إرِه ایسأبی، می بَرأر نموردنابو. 22امّا دؤئنم که الؤنم هر چی خدا جَی بخوأی، تَه هدِئنه. 23عیسی اونه بوته: «تی برأر دومرته زنده بنه.» 24مارتا اونه بوته: «دؤنم که قیامت روزِ میئن دومرته زنده بنه.» 25عیسی بوته: «قیامت و زیندگی مو ایسّم. اونی که مه ایمؤن بأره، حتّی اگه بمیره، هنده زنده بنه. 26و هر کس زنده ایسّه و مه ایمؤن دئنه، هرگی نمینه؛ اینه باور کؤئنی؟» 27مارتا بوته: «بله، آقا، مو ایمؤن بأردَم که تو مسیح موعود ایسی، خدا ریکه، اونی که باء ایی دونیا میئن بمابی.»

28وختی مارتا اینه بوته، بوشو خوشِ خاخور مریم دوخُونده. و خلوت میئن اونه بوته: «اوستاد إرِه ایسأ و تَه دوخُوبِئنه.» 29مریم وختی اینه بشتؤسه، تأتأدی ویریسا و عیسی ورجه بوشو. 30عیسی حلِه دهاتِ میئن نومَه بو، بلکه هوجایی ایسأ بو که مارتا اونه دئنِ به بوشو بو. 31یهودی أنی که مریم أمره خونه میئن ایسأ بوئن و اونه أمره همدردی گودن، وختی بدِئن که مریم تأتأدی ویریسا و بیرون بوشو، اونه دومبالسر راه دکتن، فکر گودن که مقبره سر شؤدره تا اوره ونگ بزنی. 32وختی مریم اوره برسه که عیسی ایسأ بو، اونه بدِه و اونه پاجیر بَکته و بوته: «آقا، اگه إرِه ایسأبی، می برأر نموردنابو.» 33وختی عیسی، مریم ونگ زئن و یهودی أنی که اونه أمره ایسابؤن بدِه، روحِ میئن خیلی ناراحت و پریشونَ بؤ. 34عیسی بپورسه: «ایلعازرِ کوره بنأین؟» اوشؤن بوتَن: «آقا، بیأ و بَین.» 35عیسی چیشمونای اَرسو بکالسه. 36بازین یهودی أن بوُتن: «بینین چنی اون دوستداشت.» 37ولی بعضیأن بوُتن: «کسی که او كوره مردأک چیشمونِ وأگوده، منیس ایلعازَرِ موردنِ جلوئه بگیری؟»

عیسی ایلعازَر زنده کوئنه

38بازین عیسی، هنده خیلی پریشون بو، مقبره سر بومَه. مقبره، یکته غار بو که اونه دهنه سر یکته سنگ بَنه بوئن. 39عیسی بوته: «سنگ ویگیرین.» مارتا، او بمورده خاخور بوته: «آقا، الؤن ده بی کوئنه، چونکه چهار روزِ بمورده.» 40عیسی اونه بوته: «مگه تَه نوتَم که اگه ایمؤن بأری، خدا جلال اینی؟» 41پس اوشؤن سنگ ویتَن. هوموقع عیسی آسمؤن نیگاه بُوده و بوته: «پِئر، تَه شکر کوئنَم که می صدا بشتؤسی. 42مو دؤنَسم که همیشه می صدا ایشتؤنی. ولی اینه، اوشؤنی وَسه بوُتم که إرِه ایسَئن، تا ایمؤن بأرَن که تو مه سرا دای.» 43عیسی اینه بوته و بازین پیله صدا اَمره دوخُونده: «ایلعازَر، بیرون بیه!» 44پس او مردکای که بمورده بو، دست و پا کفنِ میئن دوَسّه و یکته دستمال اونه دیم دور فیبیته، مقبره جی بیرون بومَه. عیسی اوشونه بوته: «اونه بازَ کونین و بوگزارین بشی.»

توطئه عیسی کشتنِ به

45پس خیلی از یهودی أنی که مریم دِئن وسه بومَئبون و کاری که عیسی اونه برارِ به بوده بو بدِئن، عیسی ایمؤن بأردن. 46ولی بعضی از اوشون، فریسی فرقه عالمون ورجه بوشوئن و اوشونه از اوچیزی که عیسی بُوده بو، واخُبَ گودن. 47پس کاهنؤن سرون و فریسی أن جلسه بیتَن ، بوتن: «چی بکونیم؟ نشونه أن و معجزات زیادی ایی مردکه جی انجوم بنه. 48اگه بوگذاریم هیطو پیش بشی، همه اونه ایمؤن أَبِئنَن و رومی أن هنن و امه عبادتگاه و امه قومِ، امه دست جَی هگینن.» 49امّا یکته از اوشؤن که اینه ایسم قیافا بو و او سال میئن پیله کاهن بو، اوشؤنِ بوته: «شمه هیچي ندؤنین. 50نفهمین که شیمه صلاح اینه که یه نفر مردومِ وَسه بمیری، تا اونکه تموم ملّت نابودَ بوئن.» 51ایی گب قیافا جی نبو، بلکه وختی او سال میئن کاهن اَعظم بو، ایطوری نبّوت بُوده که عیسی ملت وَسه مینه، 52نه فقط ملت وَسه، بلکه خدا همته زاکؤن وسه که پخش ایسّن، جومَه کونی و یکی بکونی. 53پس، از هو روز، عیسی کوشتنِ به توطئه بودَن.

54هینه وسه دِه عیسی آشکارا یهودی أن میئن شوئون أَمئن نود، بلکه اورای یکته شهر به ایسم اِفْرایم که بیابون نزدیکی بو بوشو و خوشِ شاگردؤن أمره اوره بیسأ.

55یهودی أن عید پِسَخ نزدیکه بوُ، خیلی أن، دورو اطرافَ جی شهر اورشلیم بوشؤئن تا قبل اینکه عیدِ پسخ شروع ببی رسم و رسومِ پاکی بجا بأرَن. 56اوشؤن عیسی دومبال گرسن و هوطو که معبدِ میئن ایسأ بوئن، همدیگرِ گوتَن: «چی فکر کوئنین؟ یعنی اصلا عید بِه نَئنه؟» 57ولی کاهنؤنِ سرؤن و فریسی أن دستور بَده بُوئن که اگر یه کس بودؤنه عیسی کوره ایسأ، باء خبر بَدای تا اونه بگیرَن.

ទើបបានជ្រើសរើសហើយ៖

يوحنای انجیل 11: EGB

គំនូសចំណាំ

ចែករំលែក

ចម្លង