Marëkë 10
10
JESU SƆ GALILEE 'Ɔ MÖ JERUSALƐƐMË
10.1-52
'Ŋlʋʋa pɛprɛkʋ
Matiö 19.1-12; Lukë 16.18
1Jesu nya sɔwʋ, 'ɔnya 'prɛrɛ 'nielɛ 'ü 'daraa' Jurëdɛɛn, 'ɛa 'pɛ ‑mɩdee ‑gälɩ, 'i 'ɔ ‑srörö 'ɔnya 'tɔrɔ Judeea ‑tʋtʋ ‑gälɩ. Nyüü nya 'patä 'ünya trara 'ɔɔn 'klɩ; 'kpɩkpɩakʋ bäa' 'ɔa ‑dɔ nɩ, 'ɔ ‑tʋ 'sɔɔwʋ 'lɩ 'üa 'kpɩkpɩakʋ. 2Farisinyüü nya jijrö 'ɔɔn ‑gba, 'ümä 'ɔɔn bɔʋdɛrɩ 'pa. 'Ünya 'bete 'ɔɔn: «Nyɔɔ 'mrɛɛ ɔ prɛ 'ɔa 'ŋlʋʋ?» 3'Iibäa' 'ɔɔn nɩ: «‑Asɩ Moisë ‑gbala 'amɩ le?» 4'Iibäa' 'üün nɩ: «Moisë nɩnɩa, abɩa nyɔɔ ‑jɩjra ‑gbasɔsrɔpɔɔkʋ 'fɩɔwʋ, 'kä 'ɔ prɛ 'ɔa 'ŋlʋʋ#10.4 Deteronɔɔmë 24.1-4..» 5'Iibäa' Jesu nɩ: «'Ana 'nyakliwlisusukʋa ‑gʋ Moisë ‑jɩjra 'umɩ. 6'Pläa 'käkolofa 'wʋ nɩ, Nyɔsʋa nʋ nyɩbɛrʋ nyra 'ŋlʋʋ#10.6 Jenɛɛsë 1.27.; 7'ia ‑gʋ nyɔɔ nya 'ɔa tʋ nyra 'ɔa 'yio ‑gbasɔa, 'kä 'ɔ nyra 'ɔa 'ŋlʋʋ nya ‑gba kpasraa#10.7 Jenɛɛsë 2.24., 8'kä 'üa 'sɔɔ nya 'jajɛ 'dee bä#10.8 Jenɛɛsë 2.24.. 'Ia 'taɩn 'lɩ nɩ, 'ü ‑kanyɩ 'sɔɔ ‑a bä ‑maa 'jajɛ 'dee 'ü bä. 9'Ia ‑gʋ, dɛɛlɛ Nyɔsʋa nröröa' 'dee 'lɩ nɩ, nyɔɔ 'nyɩ 'sasra 'ɛɛn ‑gba.»
10'Ü 'tɔa' nyüköli nɩ, 'ɔa 'wʋnyɛrɛnyüüa 'mʋgbɛ nya 'betre 'ɔɔn 'ia ‑gba 'lɩ. 11'Ɔnya ‑gbala 'üün: «Nyɔɔ o nyɔɔ, prɛa' 'ɔa 'ŋlʋʋ, ‑bɛ ɔ 'paaa' 'tä ɔ käa' 'ŋlʋʋ ‑moloo nɩ, bätësa 'ɔ 'paa. 12'Ŋlʋʋa 'mʋgbɛ ma sɔ 'ɔa dʋɔ ‑gba, ‑bɛ ɔma kä nyɔɔ ‑moloo nɩ, bätësa 'ɔ 'paa.»
Jesu 'paa' 'jüjie 'nɩ
Matiö 19.13-15; Lukë 8.15-17
13Nyüü ja 'üa 'jü 'ɔa ‑nyɛɛ 'ɔmä 'üün klʋgba ‑gälɩ 'pie. ‑Maa 'ɔa 'wʋnyɛrɛnyüü nya 'daa 'üün. 14Jesu 'jäa' 'iin nɩ, 'ɔnya ‑tʋ 'crɛ 'ɔ ‑nëma: «'Ba 'cɛrɛ 'jü ‑wälɩ ü jijrö 'mɩ ‑gba; 'a 'nɩ kaka 'üün 'klɩ, 'be nyüülü bäa' 'üa 'saa, 'a 'üü kä Nyɔsʋaa 'kamaplä. 15'Cɩcasa 'n ‑gbala 'amɩ, nyɔɔ o nyɔɔ ‑nëmäa' 'jüjiea 'saa Nyɔsʋaa 'kamaplä ‑a 'kʋɛɛ nɩ, 'ɔ ‑nëmä ‑srɩɩ 'äa 'mlɩ ‑a 'jra.» 16'I ‑sia' 'ɔnya ‑gbere 'jülü, 'ɔnya 'pepe 'üün klʋgbë ‑gälɩ 'ɔnya 'pa 'üün 'nɩ.
'Bɩɔjisëgbanyʋklɔ 'doo
Matiö 19.16-30; Lukë 18.18-30
17Jesu sɔwʋ 'ɔmä mi, ‑bɛ nyɔɔ 'doo ja fʋfɔlʋ 'ɔ 'jrara 'ɔɔn 'klɩ, 'ɔnya 'pa 'ɔa 'klɔɔtrʋ kotifli; 'iibä: «'Cɩca 'kpɩkpɩanyɔɔ, ‑asɩ 'nyaa nʋ ‑bɛ 'nyaa 'klälä 'nyɩa' blöröfa kä 'jä le?» 18'Iibäa' Jesu nɩ: «Dɛplɛɛ kä ‑gʋ ‑daara 'mɩ 'Cɩcanyɔɔ le? Nyɔsʋaa 'doo, 'ɔɔ bä 'cɩcanyɔɔ. 19‑Jre ‑dɔlʋ 'daaa': ‑Nyɩ 'pa bätësa; ‑nyɩ 'bla nyɔɔ; ‑nyɩ 'jie; ‑nyɩ ‑tʋ nyɔɔ ‑gbagblɛ ‑gälɩ; ‑nyɩ 'sa nyɔɔ yrʋ; ‑träärälɩ ‑na tʋ nyra ‑na 'yio#10.19 Ɛgësɔɔdë 20.12-16; Deteronɔɔmë 5.16-20..» 20'Iibäa' 'ɔɔn nɩ: «'Kpɩkpɩanyɔɔ, i kä 'fɩɔ ‑daaa', 'n ‑träärälɩ 'iin kolo 'na nyɔkɔdɛɛ 'lɩ 'kä.» 21Jesu tɛ 'ɔɔn 'klɩ tee, 'ɔnya ‑wa 'ɔɔn; 'iibä: «Dɛɛ 'dee ‑ka tɩɔ 'lɩ ‑mɩ; mi, 'pa diili kä 'fɩɔ ‑klaaa' 'peru, ‑nyɩ 'iin 'pʋablanyüü, ‑bɛ ‑mä 'bɩɔ cɛlɩ kälä, 'pie ‑na plɛ 'klɩa ni, 'pie ‑na krʋa ‑plɩ ‑gälɩ#10.21 'pie ‑na krʋa ‑plɩ ‑gälɩ: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä. Krʋa ‑plɩ ‑gälɩa 'piepiekʋa ‑gbaa bä: ‑nyiie ‑mä ‑sʋɩ 'jä, ‑mä 'nɩmɩ jä Jesua ‑gʋ., 'kä ‑jö ‑bɛ 'nyraa ‑mɔ 'mä 'nyɛ.» 22‑Maa nyɔɔlɔ 'nua' wiili Jesu 'paa' 'wli nɩ, 'inyɩ 'ɔa plɛ ‑a 'bla; 'ɔa 'koi 'jɔklɔ ‑bɛ 'ɔ mö; 'be 'ɔ kä dii 'kɔkɔmlɛ.
23Jesu tɩtrɛa' 'ɔa ‑gba 'kä, 'ɔnya ‑gbala 'ɔa 'wʋnyɛrɛnyüü: «'Inya 'lɩklaa 'kä 'bɩɔjinyüü 'mä Nyɔsʋaa 'kamapläa 'mlɩ pa.» 24Jesua wiipadɛɛ kala 'ɔa 'wʋnyɛrɛnyüü plɛ 'klɩ. 'Ɔnya 'patä 'ɔnya ‑gbala 'üün: «'Na 'jü 'amɩ, Nyɔsʋaa 'kamapläa 'mlɩa papakʋ nya 'lɩklaa, 'kä nyüülü kä plɛ bäa' diikäkäkʋ dɛrɩa ‑gʋ#10.24 'kä nyüülü kä plɛ bäa' diikäkäkʋ dɛrɩa ‑gʋ: ‑Taa waklüülü 'nyɩ grɛɛkë kätɩpɔɔkɩ ‑mɩdooa 'mlɩ ‑a bä.. 25'I klalɩ 'kä Samoo 'mä 'kʋɛɛa ‑flääa 'mlɩ ‑srörö, ‑maa 'bɩɔjinyɔɔa ni nya 'wʋsia ɔma nëmä Nyɔsʋaa 'kamapläa 'mlɩ pa.» 26'Ɔa 'wʋnyɛrɛnyüüa plɛklɩ nya 'patä 'inya kala, 'üa 'kpɔ 'betre 'lɩ: «‑Mɔ 'plɛɛ nya ɔ 'lɩmlɩwʋ le?» 27Jesu nya tɛ 'üün 'klɩ, 'ɔ ‑nëma: «'Inyɩ nʋnʋsa ‑a bä nyɔɔa ‑nyɛɛ, ‑maa Nyɔsʋaa ‑nyɛɛ diia 'fɩɔ bä nʋnʋsa.»
28'Iibäa' Piɛɛrë nɩ: «Tɛ 'lɩ, ‑na ‑gʋ a ‑gba ‑nyɛɛ ana dii 'kä, a nyra ‑mɔ 'mä 'nyɛ.» 29Jesu nya ‑gbala 'ɔɔn: «'Cɩcasa 'n ‑gbala 'amɩ: nyɔɔ ma ‑gbaa ‑nyɛɛ 'ɔa nyuku 'kä, 'aiɛ, 'ɔa ‑wlajü, ‑wlayörü, tʋ, 'yio, 'ŋlʋʋ#10.29 'ŋlʋʋ: ‑Taa waklöölä 'nyɩ grɛɛkë kätɩpɔɔkɩ ‑mɩdooa 'mlɩ ‑a bä., 'ɔa 'jü, 'aiɛ 'ɔa papladii, 'kä 'na ‑gʋ nyra 'mʋfagogoa ‑gʋ nɩ, 30'ɔnya 'iin 'wʋ ‑glʋɩgböö 'wʋ 'järäa 'taɩnlɩ a kʋa' ‑plɩɩ ‑gälɩ: 'ɔa nyëka, ‑wlajü, ‑wlayörü, 'yioɩɩ, tʋɩɩ, 'jü nyra papladiia ‑glʋɩgböö käa, 'taɩn 'lɩ a kʋa' ‑plɩɩ ‑gälɩ 'ia 'mlɩ; 'ɔnya bɩa ‑sʋɩ 'jäa, 'kä 'ɔnya 'klälä 'nyɩa' blöröfa kä 'jä ‑srɩɩ ‑mɩlɩ bäa' dɛrɩ 'ia 'mlɩ. 31'Kɔkɔmlɛ bä 'wliklɩ, 'ünya dɛrɩtäpaa, 'kä 'kɔkɔmlɛlü 'paa' dɛrɩtä nya ‑srɩɩ 'wliklɩ bäa.»
Jesu 'saalɩ 'sɩrɩ 'ɔmäa' 'kuaabre sɔ
Matiö 20.17-19; Lukë 18.31-34
32'Ü mö ɩ Jerusalɛɛmë; Jesu ‑ta 'nyʋfɔ. 'I kala 'ɔa 'wʋnyɛrɛnyüü plɛklɩ; ŋalɛ 'bla 'üün ‑bɛ 'ü mö. Jesu nya 'patä 'ɔnya were 'ɔa 'wʋnyɛrɛnyüü nyüüpʋnyüüsɔɔ ‑gasë ‑gba, ‑bɛ 'ɔ ‑gbala 'üün wiili nëmäa' 'ɔɔn ‑gälɩjrä: 33«‑Jää Jerusalɛɛmë a 'jraa, Nyɔɔa 'Jʋ nya ‑gbɔsapɛrɩnyüü kpakü nyra ‑dɔkpɩanyüü kälɩ 'saraa; 'ünya 'ɔɔn jäjä ‑jie 'lɩ 'paa, 'kä 'ünya 'ɔɔn nyüülü 'nyɩa' juifë bä kälɩ 'sara, 34'kä 'ünya 'ɔɔn srörö, 'ünya 'ɔɔn ‑tatrii 'wʋ 'pa 'paa, 'ünya 'ɔɔn ‑gbalɛfi ‑gälɩgbaa, 'ünya 'ɔɔn 'blaa, ‑maa 'dugua jrüü tääa ‑srɩ 'lɩ 'ɔnya 'kuaabre sɔa.»
Wiili Sebedeea 'jü 'betrea' Jesu 'lɩ
Matiö 20.20-28; Lukë 22.24-27; Jaan 13.3-17
35Sebedeea 'jü 'sɔɔlü 'ü 'daraa' Jaakë ‑bɛ Jaan, nya jijrö Jesu ‑gba, 'iibä nɩ: «'Kpɩkpɩanyɔɔ, a 'bata ‑a ‑nʋ wiili 'amäa' ‑mɩ 'lɩ 'betre ana ‑gʋ.» 36'Iibäa' 'ɔɔn nɩ: «Wii 'plɛɛ 'a 'bata ‑a nʋ 'ana ‑gʋ le?» 37'Iibäa' 'üün nɩ: «'Taɩn 'lɩ ‑mäa' ‑na 'bʋalakʋ 'lɩ kʋ nɩ, 'nyie abɩa 'doo kʋ ‑na 'dupa 'lɩ, 'kä 'doo kʋä ‑na kʋmla 'lɩ.» 38Jesu nya ‑gbala 'üün: «Wiili 'a 'daaa' ‑a nʋa' 'anyɩ 'iin jre ‑a jre ‑bɛ 'a 'bete 'iin. ‑Sʋɩa ‑köwölä#10.38 ‑Sʋɩa ‑köwölä: ‑Kätɩ kuöa ‑pɔɔkʋ 'lɩ nɩ, ‑sʋɩ 'ü 'papla ‑köwö 'klɩ. Tɛ 'Lɩbrɛrɛpɔɔkʋ 75.9; Esaii 51.17-22; Jeremii 25.15; Esekiɛɛlë 23.31-34. 'nëmäa' 'mla 'a bɩalɩ 'amä 'ään 'mla, 'aiɛ 'sɩrɩ 'mäa' 'nɩwlipala, 'kä 'anya 'saa 'nɩwlipaa?» 39'Iibäa' 'üün nɩ: «A bɩalɩ.» 'Iibäa' Jesu nɩ: «'Kasa, ‑köwölä 'nëmäa' 'mla 'anya 'ään 'mlaa, 'sɩrɩ 'nëmäa' ‑sʋɩa 'nɩwlipala 'anya 'sa 'nɩwlipalaa#10.39 Akëtë 12.2.; 40‑maa wiili bäa' 'na 'dupa 'lɩ nyra 'na kʋmla 'lɩa kʋkʋkʋ nɩ, 'inyɩ 'mɩ ‑gba ‑a kälä. ‑Maa nyüülü kä ‑gʋ kʋfëlë kʋa' ‑plɩɩ 'üü kä 'üün.»
41'Ɔa 'wʋnyɛrɛnyüü ‑pʋ ‑mülü kʋa' ‑plɩɩ 'nua' 'iin 'wli nɩ, 'ünya ‑träärä Jaakë nyra Jaan 'crɛ ‑gba. 42Jesu nya we 'üa 'fɩɔ 'ɔnya ‑gbala 'üün: «'A jre 'iin, nyüülü 'nyɩa' juifë bä, nyüülü 'ü 'daraa' 'üa 'kamanyüü, 'üü ‑siie 'plä ‑sʋɩ. ‑Bɛ nyüü kpakü fala 'üa 'kamadɛɛ 'plä ‑gälɩ. 43'Inyɩ bä 'ana ‑tɔrʋpɩɔ. ‑Maa nyɔɔlɔ 'bata 'ɔmäa' kpaköa nɔ bä 'ana ‑tɔrʋpɩɔ nɩ, ɔ bä 'ana 'jrʋpafɛnyɔɔ; 44‑bɛ nyɔɔ o nyɔɔ bäa' 'ana ‑tɔrʋpɩɔ ɔ 'bataa' 'wliklɩa kʋkʋkʋ nɩ, ɔ bä 'ana 'fɩɔa ‑geei. 45Nyɔɔa 'Jʋ 'nyɩ ji ‑a ji 'ɔmä 'jrʋpafɛnyüü kä, ‑maa 'ɔ ji 'ɔmä 'jrʋpafɛnyɔɔ bä, ‑bɛ 'ɔmä 'ɔa 'klä 'sa 'kɔkɔmlɛ 'mä 'lɩmlɩwʋ.»
'Nɔnɔnyɔɔlɔ Jesu 'pʋɔa'
Matiö 20.29-34; Lukë 18.35-43
46'Ünya 'tɔ Jerikoo. Jesu nyra 'ɔa 'wʋnyɛrɛnyüü 'cie ɩ bätä, ‑bɛ nyüü 'kɔkɔmlɛ bä 'üün dɛrɩ. 'Nɔnɔnyɔɔ 'doo bälɩ 'ɔɔ 'ü 'dara Batimee, Timieea 'jʋ. 'Ɔ kʋ ‑plɩɩ 'nyʋfɔ ‑gba ‑bɛ 'ɔ ‑sɛɛɛ mölii. 47'Ɔ 'nu 'sɩrɩ 'i bäa' Nasarɛɛtënyɔɔ Jesu; 'ɔnya we: «Daviidëa 'Jʋ, Jesu, 'jä 'na nyatɛrɩ!» 48Nyüü 'kɔkɔmlɛ fa 'ɔɔn 'mä dɛrɩ ɔ 'kpla 'mä; ‑maa mlɩ 'ɔ ‑gbolo 'ɔnya we: «Daviidëa 'Jʋ, 'jä 'na nyatɛrɩ!» 49Jesu 'nyüglö; 'ɔnya ‑gbala 'üün ü we 'ɔɔn. 'Ünya we 'nɔnɔnyɔɔlɔ: «'Pa ‑na nyufa 'klü 'lɩ, sɔ 'wʋ, ‑mɔ 'ɔ we.» 50'Nɔnɔnyɔɔlɔ nya be ‑nyɛɛ 'kotulu 'ɔ 'pa ɩa' ‑gälɩ, ‑fua; 'ɔnya sɔ 'wʋ, 'ɔnya ji ‑tɛ Jesu bäa'. 51'Iibäa' Jesu nɩ: «‑Asɩ ‑baata ‑a nʋ ‑mɩ le?» 'Iibäa' 'nɔnɔnyɔɔlɔ nɩ: «Rabii, ‑a 'jäkä.» 52Jesu nya ‑gbala 'ɔɔn: «Mi; ‑na nyɔsʋaplɛtorokʋ 'a ‑mɩ 'pʋɔ#10.52 ‑na nyɔsʋaplɛtorokʋ 'a ‑mɩ 'pʋɔ: 'Aiɛ «‑na nyɔsʋaplɛtorokʋ 'a ‑mɩ ‑futo»..» 'A ‑plɩɩ 'ɔ kʋ 'ɔnya 'jäkä, ‑bɛ 'ɔ prɛ Jesu dɛrɩ.
ទើបបានជ្រើសរើសហើយ៖
Marëkë 10: Bakwé
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc.