Jenɛɛsë 40
40
1'Ia 'fɩɔ ‑sia' nɩ, ‑Jää nyɔɔlɔ 'kamaa' 'kɩɩa 'flɔɔpinyüü nyra nyɔɔlɔ 'kamaa' 'kɩɩa 'nʋpinyüü 'nyɩ nʋ 'üa 'kamanyɔɔ Ejiipëtëa 'kɩɩ ‑balʋ ‑gba. 2Faraɔɔn#40.2 Faraɔɔn: 'Asɩ Ejiipëtë 'dara 'üa 'kɩɩ. nya ‑träärä nyɔɔlɔ 'kamaa' 'flɔɔpinyüü nyra ɔ 'kamaa' 'nʋpinyüü 'crɛ ‑gba. 3Faraɔɔn nya 'pla 'üün 'ɔa ‑gälɩglaranyüüa 'cifia nyüköli, ‑plɩɩlɩ 'ɔ plaa' Josɛɛfë. 4‑Gälɩglaranyüüa 'cifi nya ‑nyɩ 'üün Josɛɛfë kälɩ 'ɔmä 'üün 'nyiöligäälä. 'Ü ‑si 'lɩ jrüü jie.
‑Jienyüüa sanyülü kä ‑gbaa Josɛɛfë 'saa' 'lɩ
5‑Gbia 'dööa 'mlɩ, Ejiipëtëa 'kɩɩa 'flɔɔpinyüüa 'kamanyɔɔ nyra 'nʋpinyüüa kamanyɔɔ nya sa sanyü. ‑Maa 'üa ‑gbaa bä 'dɔrɔdɔ. 6‑Srɩ paa' ‑suwla Josɛɛfë nya 'jrä ‑plɩɩ 'üün; 'üa 'kpɔɔ 'kpɔɔa nü. 7'Ɔnya 'bete Faraɔɔn a 'nyiöligäälänyüü kpakülü 'ɔnyra 'üün bäa' ‑jie 'lɩ: «Dɛplɛɛ kä ‑gʋ 'ana 'klʋɩ 'caklalɩ le?» 8'Ü ‑nëma: «A sa sanyü, ‑maa nyɔɔlɔ 'mäa' amɩ 'üa ‑gbaa ‑nyɩ 'ɔnyɩ 'lɩ ‑a bä.» Josɛɛfë ‑nëma: «‑Mää Nyɔsʋa 'nyɩ 'sasra sanyü ‑gälɩ? 'Ba ‑gbala 'mɩ 'üün!»
9'Nʋpinyüüa 'kamanyɔɔ nya dɔrɔ wii 'wʋ 'ɔ ‑nëma: «'Na sanyüa 'mlɩ nɩ, 'n 'järä 'na 'klɩ viinyëtuu#40.9 viinyëtuu: Tuujɔ bäsaa 'uu tʋä rɛsɛɛn. 'A rɛsɛɛn 'ü nö ‑bɛ 'ü pie ‑duvɛɛn.. 10Viinyëtuulu kä katë tää. Katëlë nya tɔpɔ, 'ü plöa' dotro 'unya tʋ ‑fɔflɔɔ rɛsɛɛn a ‑glëgbi. 11‑Bɛ 'n 'klaa Faraɔɔn a ‑köwö kälɩ. 'Nyaa dɔrɔ ‑glëgbili 'wʋ 'nyaa 'nyatra 'iin Faraɔɔn a ‑köwöa 'mlɩ, 'nyaa ‑nyɩ 'ään Faraɔɔn kälɩ.» 12Josɛɛfë ‑nëma: «‑Jää 'üa ‑gbaa. Katë täälä nɩ, 'üü bä jrüü tää. 13Jrüü tääa 'mlɩ nɩ, Faraɔɔn nya ‑mɩ 'nyüsü 'lɩbaa, 'ɔnya ‑mɩ ‑na 'jrʋpa ‑nyɩa, ‑mä 'ɔɔn 'ɔa ‑köwö kälɩ ‑nyɩ 'sɩrɩ ma nöa'. 14‑Maa ‑nyɩ ‑trɔ 'na ‑gä 'taɩn 'lɩ 'imäa' ‑mɩ kälɩ 'nara, 'n bibie ‑mɩ, bobo 'na 'pɛlɩ, 'kä ‑gbala 'na ‑gä Faraɔɔn; ‑mä 'mɩ ‑tɛ ‑jie 'lɩba. 15'Be Ebröönyüüa ‑tʋtʋ ‑gälɩ 'ü 'ba 'mɩ, ‑tɛa 'mʋgbɛ 'nyɩ dɛɛa nʋ 'ünya 'pa 'mɩ ‑jie 'lɩ.»
16'Flɔɔpinyüüa 'kamanyɔɔ 'jäa' 'sɩrɩ ‑mɔlɔa sanyüa plɛlɩsasrakʋlʋ 'naa' nɩ, 'ɔnya 'saralɩ 'ɔa nü Josɛɛfë: «'Na 'mʋgbɛ, 'na sanyüa 'mlɩ 'n tro 'flɔɔa ‑kätë tää 'wli. 17‑Mälä bäa' cɛlɩ nɩ, Faraɔɔn a 'flɔɔa 'kaɩn 'kaɩn 'kɔkɔmlɛ bälɩ 'mlɩ, ‑bɛ nyisie 'koto 'uun 'na 'wli.» 18Josɛɛfë ‑nëma: «‑Jää 'üa ‑gbaa. ‑Kakë täälä nɩ, 'üü bä jrüü tää. 19Jrüü tääa 'mlɩ nɩ, Faraɔɔn nya ‑na 'wli ‑plɩ 'klɩ 'baa. 'Ɔnya ‑mɩ tuu 'wli pösöröa 'kä nyisie nya ‑na 'jajɛ 'koto.»
20Jrüü tääa ‑srɩlɩ nɩ, 'i bä Faraɔɔn a ‑gloorosrɩa ‑glɩsɩglɩsɩ. 'Ɔnya we 'ɔa 'jrʋpafɛnyüüa 'fɩɔ 'ümä dɛɛji. 'Ɔnya 'cie 'nʋpinyüüa 'kamanyɔɔ nyra 'flɔɔpinyüüa 'kamanyɔɔ ‑jienyukulua ‑wälɩ. 21'Nʋpinyüüa 'kamanyɔɔlɔ nɩ, 'ɔnya ‑nyɩ 'ɔɔn 'ɔa ‑kätɩ 'jrʋpa 'ɔmä Faraɔɔn ‑köwö kälɩ ‑nyɩ. 22'Flɔɔpinyüüa 'kamanyɔɔlɔ nɩ, 'ɔnya pösö 'ɔɔn tuu 'wli 'sɩrɩ Josɛɛfë 'sasra ɩa' 'üün ‑gälɩ. 23‑Maa 'nʋpinyüüa 'kamanyɔɔlɔ ‑kanyɩ Josɛɛfëa ‑gä plɛ ‑a 'pa; 'ɔ ‑trɔ 'ɔɔn.
ទើបបានជ្រើសរើសហើយ៖
Jenɛɛsë 40: Bakwé
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc.