Akëtë 18
18
'Pɔɔlë 'palaa' nyɔsʋaawii Korɛɛntëbätä
1'I ‑sia' nɩ, 'Pɔɔlë nya sɔ Atɛɛnëbätä, 'ɔnya mi Korɛɛntëbätä#18.1 Korɛɛntëbätä: Akaiiabrea bätä kpakü bäsaa, 'ä 'troro Grɛɛsë 'pɛlɩ. 'Ia bätäläa 'mlɩa nyüü ma ‑sümlö, 'äa 'mlɩa ‑balʋa ‑gʋ, 'äa 'nyrɩ mi.. 2'Ɔnya 'jä juifënyɔɔ 'doo 'ɔɔ 'ü 'daraa' Akilasë, Pɔɔntëa ‑tʋtʋ ‑gälɩ 'ü ‑glooro 'ɔɔn. 'Ɔɔ ‑ka sɔ ɩa' Italiia 'bre, 'ɔ ‑bɛ 'ɔa 'ŋlʋʋ Prisiilë 'sɔ. 'Kɩɩ kpakölɔ 'ü 'daraa' Kloodë nɩ, 'ɔnya ‑gbala juifëa 'fɩɔ 'ü sɔ Rɔmë, 'ia ‑gʋ 'ü 'sɔ 'lɩ. 'Pɔɔlë nya kla 'üün ‑gbötü 'lɩ. 3‑Bɛ 'ü nyra 'ɔɔn ‑fɛɛɛa' 'jrʋpa 'döö nɩ, 'ɔ nyra 'üün nya kʋwälɩ, 'ɔnya ‑fɛjrʋpa. 'Üa 'jrʋpalä 'ü käa' nɩ, mlafia ‑tetu 'ü ma 'paa. 4'Asɩ ‑fʋflʋpasrɩ jräa' 'lɩ nɩ, 'Pɔɔlë ‑bɛ juifënyüü nyra grɛɛkënyüü ‑toplo 'üa 'sraaplanyukua ‑wälɩ, 'sɩrɩ ɔmäa' nʋ ‑bɛ 'ümäa' 'ɔa 'papawii 'klɩnyiere 'ii 'ɔ 'bata.
5Silasë nyra Timotee 'ciea' Masedoanë ‑bɛ 'ü jia' 'lɩ nɩ, ‑Susu nya 'tuto 'Pɔɔlë#18.5 ‑Susu nya 'tuto 'Pɔɔlë: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «'Pɔɔlë nyɔsʋaawiia 'dooa 'jrʋpa 'ɔ kä.», 'ɔnya 'saralɩ juifë 'sɩrɩ Jesu bäa' 'Kriisë. 6Juifënyüü 'nyɩ 'ɔɔn 'casɩ ‑a ‑nyɩ, 'ünya ‑jejre 'ɔɔn. 'Ia ‑gʋ 'Pɔɔlë nya ‑gbɔplɔ 'lɩ 'ɔa 'koti#18.6 ‑gbɔplɔ 'lɩ 'ɔa 'koti: 'Jä wiili ‑jɩjraa' ‑pɔɔkʋ ‑wälɩ Akëtë 13.51. 'ɔnya ‑gbala 'üün: «Abɩa 'ana ‑toru ‑gblɔɔ 'ana 'wli 'kä! 'Mɔɔlɔ 'nyɩ 'lɩ 'mlɩ ‑a bä! 'Bala 'saarɩ ‑gälɩ nɩ, nyüülü 'nyɩa' juifë bä, 'üa ‑nyɛɛ 'n mö.» 7'Ɔ sɔa' ‑plɩɩ nɩ, 'ɔnya mi nyɔɔ 'dooa nyuku ‑wälɩ, 'ɔa 'nyrɩ bä Jusëtusë#18.7 Jusëtusë: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «Titiusë Jusëtusë»., 'ɔ ‑träärälɩ Nyɔsʋa. 'Ɔa nyuku bä juifëa 'sraaplanyuku ‑gba. 8‑Bɛ 'sraaplanyukua 'wliklɩanyɔɔ 'doo 'ü 'daraa' Krisëpusë nɩ, 'ɔ toro 'Pläkänyɔɔ plɛ, 'ɔɔ ‑bɛ 'ɔ ‑gböööa 'fɩɔ. Korɛɛntënyüü 'kɔkɔmlɛlü 'nua' 'iin 'wli nɩ, 'ünya toro Nyɔsʋa plɛ, 'ünya 'pala 'nɩwli.
9‑Gbiara nɩ, 'Pläkänyɔɔ nya ja 'Pɔɔlë sanyü 'nyü ‑gälɩ, 'ɔnya ‑gbala 'ɔɔn ‑maa: «Ŋalɛ 'nyɩ 'bla ‑mɩ, 'pawiia 'doo, ‑nyɩ 'kpla 'mä! 10'N bä ‑mɩ dɛrɩ. Nyɔɔ ‑nëmä ‑mɩ ‑a 'kpla 'ɔmä ‑mɩ ‑gbi ‑gba nʋ, 'be 'na nyüü ‑sümlö ‑taa bätäläa 'mlɩ.» 11'Ɔnya kʋ 'üa ‑nyɛɛ ‑sʋ 'doo ‑söplü ‑uundoo, ‑bɛ 'ɔ 'kpɩa nyüü nyɔsʋaawii.
'Taɩn 'lɩ juifë werea' 'Pɔɔlë tropina 'lɩ
12'Taɩn 'lɩ Galiɔɔn bä käa' Akaiia ‑gofɩanëma nɩ, juifënyüüa 'fɩɔ nya trara 'Pɔɔlëa ‑gʋ, 'ünya fa 'ɔɔn ‑gäträäräfa 'wʋ. 13'Ü nɩnɩa: «Nyɔɔlɔ kʋa' ‑pɩ, 'ɔɔ 'tuto nyüü 'ü ‑pʋpʋa Nyɔsʋa ‑pasasa, 'sɩrɩ ‑dɔ 'nyɩa' ‑gba.» 14'Pɔɔlë nya ɩ wii 'paa ‑maa Galiɔɔn nya ‑gbala juifë: «‑Wooi juifë 'amɩ, 'ima 'da ɩ bʋbɔgbi kpakü nɩ, 'nyaa ɩ 'amɩ 'nyaklipo ɩa' 'mʋfasa. 15‑Maa 'i bäa' wapɩa, nyra 'nyrɩ ‑gälɩa ‑toplokʋ nyra 'ana ‑dɔ nɩ, 'ana wii bäsaa. 'Nyɩ 'bata 'ia ni wiili kʋa' ‑pɩa ‑gätʋnyɔɔa bäbäkʋ ‑a!» 16'Ɔnya prɛ 'üün ‑gäträäräfa 'wʋ. 17'Ia ‑gʋ grɛɛkënyüüa#18.17 grɛɛkënyüü: ‑Taa waklöölä 'nyɩ grɛɛkë ‑pɔɔkɩ ‑mɩdooa 'mlɩ ‑a bä. 'fɩɔ nya 'kpla juifëa 'sraaplanyukua 'wliklɩanyɔɔ, Sotɛɛnë; 'ünya bɔtrɔ 'ɔɔn ‑gäträäräfa 'wʋa 'mʋgbɛ. 'Inyɩ Galiɔɔn dɛɛ ‑gbaa ‑a nʋ.
'Pɔɔlë 'blööa' Antiɔɔsë dɛrɩ
18'Pɔɔlë nya ‑si ‑plɩɩ jrüü 'kɔkɔmlɛ. 'Ɔnya sɔ 'cɛcɩnyüüa ‑tɔrʋpɩɔ, 'ɔnya 'jra 'mɩɩ 'lɩ 'ɔnya mi Siriia 'bre. Prisiilë nyra Akilasë bä 'ɔɔn ‑gba. 'Ɔ nëmäa' mi nɩ, 'ɔ kpla 'ɔa 'wli Senereebätä, 'be 'ɔ 'sɔrɩ 'kä#18.18 'sɔrɩ 'kä: Juifëa ‑nyɛɛ nɩ, nyɔɔ ma 'sɔrɩ Nyɔsʋa 'sɩrɩ ‑Dɔ ‑gbaa' nɩ, 'ɔnyɩ 'böbö 'ɔa 'ŋuei ‑a, 'aiɛ 'ɔnyɩ 'mla kaklanʋ ‑a. 'Ii 'lɩ 'ɔ nëmä kʋ kʋ 'kä wiili kä ‑gʋ 'ɔ 'sɔrɩa' nya nrörö, 'fɩɔwʋ ‑a ji 'ɔmä 'ŋuei 'böbö ‑bɛ 'ɔmä ‑gbɔ 'sa Nyɔsʋaanyuku kpaku ‑wälɩ (Nɔɔbrë 6.5-18). ‑Pɩ 'klɩ nɩ, 'Pɔɔlë nʋ wiili kä ‑gʋ 'ɔ 'sɔrɩa', 'a 'ia ‑gʋ 'ɔ 'böbö 'ɔa 'ŋuei.. 19'Ɔ 'tɔa' Ɛfɛsëbätä nɩ, 'ɔnya tɩ Prisiilë nyra Akilasë, 'ɔnya pa juifëa 'sraaplanyuku ‑wälɩ ‑bɛ 'ɔ nyra juifë ‑topo. 20'Ünya bibie 'ɔɔn ɔ ‑si 'üa ‑nyɛɛ jrüü ‑jie, ‑maa 'ɔnyɩ 'nyie ‑a 'nyie. 21'Ɔ nëmäa' mi nɩ, 'ɔnya ‑gbala 'üün: «'N kä 'mä ‑glɩsɩglɩsɩlɛ jöa' Jerusalɛɛmë 'järä#18.21 'N kä 'mä ‑glɩsɩglɩsɩlɛ jöa' Jerusalɛɛmë 'järä: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.. ‑Maa Nyɔsʋa ma 'nyie 'nyaa ana ‑nyɛɛ dɛrɩ 'blööa.» 'Ɔ 'wlaraa' nɩ, 'ɔnya 'jra 'mɩɩ 'lɩ 'ɔnya 'cie Ɛfɛsë. 22'Ɔ 'cerea' Sesareebätä 'ɔnya 'jra Jerusalɛɛmë 'ɔmä 'cɛcɩnyüü 'trɛɛ. 'Ɔnya sɔ 'lɩ 'ɔnya mi Antiɔɔsë. 23'Ɔ ‑sia' 'lɩ jrüü jie nɩ, 'ɔnya srörö 'sɔɔwʋ bätëlëa mlɩ: 'ɔnya ‑srörö Galasii nyra Filigia 'bre, ‑bɛ 'ɔ 'jrara 'wʋnyɛrɛnyüüa 'fɩɔa 'klü.
Apolɔsë bä käa' Ɛfɛsëbätä nyra Korɛɛntëbätä
24Juifënyɔɔ 'doo 'ü 'daraa' Apolɔsë nya ji Ɛfɛsëbätä, 'ɔ bä Alesandriinyɔɔ. 'Ɔ jre dɛtɛkʋ ‑bɛ 'ɔ jre nyɔsʋaawii 'mʋfasa. 25'Ü srara 'ɔɔn 'Pläkänyɔɔa 'nyʋfɔ nɩ, 'bala 'lɩ ‑gälɩ 'ɔ fumlö nyɔsʋaawiili ‑gböösa, ‑bɛ 'ɔ 'kpɩa nyüü 'Pläkänyɔɔa#18.25 'Pläkänyɔɔ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: Jesu. wii 'mʋfasa. ‑Maa Jaan a 'dooa 'nɩwlipapakʋ 'ɔ jre. 26'Ɔma 'pala juifëa 'sraaplanyüköli 'wʋ wii, ŋalɛ 'nyɩ 'bla 'ɔɔn 'bla ‑a. 'Taɩn 'lɩ Akilasë nyra Prisiilë poa' 'ɔɔn 'nyakli nɩ, 'ünya fa 'ɔɔn 'üa ‑nyɛɛ 'ünya 'kpɩa 'ɔɔn Nyɔsʋaa 'nyʋfɔ 'cɩcasa.
27'I ‑sia' nɩ, Apolɔsë 'bata 'ɔmä Akaiia 'bre mi. 'Cɛcɩnyüü nya 'jrara 'ɔa 'klü, 'ünya fa 'wʋnyɛrɛnyüülü bäa' 'lɩ ‑pɔɔkʋ 'ümä 'ɔɔn 'lɩkʋɛɛ. 'Ɔ 'tɔa' 'lɩ nɩ, 'ɔnya ji nyüü 'kɔkɔmlɛlü toroa' Nyɔsʋa plɛ ‑gba 'ɔa ‑gbinanakʋa ‑gʋ. 28Nyɔsʋaa 'klüa 'nyrɩklɩ, 'ɔ 'sɔɔ juifënyüüa 'klʋɩ. 'Ɔnya nʋ nyɔsʋaawii 'ɔnya srara 'üün 'sɩrɩ Jesu bäa' 'Kriisë.
ទើបបានជ្រើសរើសហើយ៖
Akëtë 18: Bakwé
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc.
