Иаковонь сёрмац 1
1
Шумбракстомась
1Иаков, Шкайть и Иисус Христос Азорть покодиец, кучи пара вал Израилень кемгафтува юропненди, конат сратфт сембе масторлангова.
Кемамась и сталмотне-варчсематне
2Кемай ялгане, мзярда лангозонт прашендыхть эрь кодама сталмот-варчсемат, кенярдеда тянди. 3Вдь тинь содасасть, мзярда кемаманте ётай сталмонь-варчсемань пачк, эста касы тинь кирдемшканте. 4А кирдемшканте катк пяшкоди педа-пес, сяс мес эста тинь аратада кемамаса кенерьф ломанькс и эсонт аф ули кодамовок афсатыкс. 5А кда киндиге тинь эздонт аф сатни смузьши, ся катк веши Шкайть кядьста, и тейнза максови. Вдь Шкайсь сембонди максси пара мяльса и аф апряказь. 6Аньцек катк сон веши кемазь и аф арьси, бта вешфксоц аф максови. А кинь явонкши мялец – ся оцюведень комболксонь кондяма, конань вармась панцесы и эрь кона пяли ёрясы. 7Тяфтама ломанць катк мезевок афи арьси учемс Азорть кядьста, 8сяс мес сонь мялец явф кафтова и сон аф кеме тя али тона тевсонза.
9Ашушиса эряй кемай ялгась катк шнафты пря, сяс мес сон шнаф-кепотьф Шкайть сельмоса. 10А козясь катк кеняртькшни, мзярда Шкайсь сонь ёмлалгофтсы, сяс мес сон пужи паксянь панчфть лаца. 11Лиси мани шинясь и псиса косьфтасы тишеть, сонь панчфоц прай и мазышиц юмай. Тяфта козяське юмай-арай эсь тевонзон тиемста.
12Павазу ся ломанць, кона ётась сталмотнень-варчсематнень пачк, сяс мес пачкаст ётайти максови эряфонь каштазсь, конань Азорсь надияфтозе сятненди, кит кельгсазь Сонь. 13Катк ся, кинь лангс прашендыхть варчсемат, мзярдовок аф мярьги: «Шкайсь ёрасамань варчсематнень вельде сувафтомс пежес», сяс мес кяжть аш виец варчсемс Шкайть и Сонцьке Шкайсь киньге аф варчсесы пежес сувафтоманкса. 14Но эрь ломанть пежес сувафтсазь эсь мяленза-арьсеманза, конат ускихть-таргайхть эсонза. 15Мзярда ня мяльхне-арьсематне эвондайхть, синь шачфтыхть пеже, а мзярда пежесь касы-кемокстай, сон канды кулома. 16Кельгома ялгат, тяда васькафнев. 17Эрь кодама цебярь максомась и эрь кодама афсатыксфтома казнесь максовихть вярде, Шкай Алять эзда, кона тиезень сембе менелень валдоптоматнень. Сон мзярдовок аф полафни менелень валдоптоматнень цильфснон лаца, и Сонь валдоц мзярдовок аф тиеви шобдакс. 18Тя Сон Эсь мяленц коряс шачфтомазь минь видешинь валса – макссь тейнек од эряф Иисус Христосса, и путомазь васенце вастти Эсь тифксонзон ёткса.
Тиендеда Шкаень валть коряс, а аф аньцек кулхцонкшнесть сонь
19Кельгома кемай ялгат, мяляфтость тянь: катк эрь ломанць кенордай кулхцондома, аф кенордай корхтама и аф кенордай кяжензон сафнема. 20Кяженьбачк ломанць аф тии Шкайть видексшинь мяленц коряс. 21Сяс, кадость шири эрь кодама аф арушить и кяжть, и сятявста сявость Шкаень валть, кона ни видеф тинь седиезонт, и конань ули виец идемс тинь ваймонтень.
22Тиендеда Шкаень валть коряс, а аф аньцек кулхцонкшнесть сонь кода сят, конат васькафнесазь эсь пряснон. 23Вдь ся, кие аньцек кулхцондсы Валть, но аф тиенди сонь коряванза, шарксты стама ломань лангс, кона ванондсы эсь шаманц ваномаса: 24сон ванондозе эсь прянц, меле аердсь и эстокиге юкстазе, кодама сонь шамац. 25Но ся, кие ваны афсатыксфтома койть лангс, кона максы воляши, и ляды эсонза, и аф юкснесы кульф Валть, а эряй и тии кульфть корява, ся ули павазу эсь тевсонза.
26Кда кие эздонт арьси, бта сон покоди Шкайти, а кялец аф кирдеви, эста сон васькафнесы эсь прянц – и сонь Шкайти покодемац шава тев. 27А вага кда минь пичеттяма-канзеттяма стакашис повф уроснень и удаватнень инкса, кда ванфнесаськ эсь пряньконь масторлангонь рдазда, эста покодеманьке ули Шкай Аляньконь инголе арукс и афсатыксфтомокс.
ទើបបានជ្រើសរើសហើយ៖
Иаковонь сёрмац 1: ОС16
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Библиянь ётафтома институтсь, 2016