Baefeso 2

Ekununulibwa kwa bonjo bwa Ongo

1Kwa mira, mwábaa mùli báfu mwa myasi ye'muchima bushi ne'bibi byenyu binene. 2Mwábaa mùli mwa mabi mwa kunde mwákulikira emyanya ibi yo'muno butala. Mwéndee mwátunda emukulu-kulu we'bihwasi bya bitúsa ebuashi mwa chanya. Rero oyu mukulu-kulu, iwìmire kwa bandu ba batàtunda Ongo.

3Kwa mira, netu tuboshi ku twábaa tunáli nga'bu bandu. Twéndee twákulikira ebuhuma-huma bwetu bwe'mubiri, twéndee twáira ekuhonda kwe'mibiri yetu ne'kuhonda kwe'mianyisa yetu ibi. Rero bushi ne'i myanya yetu ye'mubiri, twábaa twěmire kuchinjibusibwa kuuma ne'banji.

4Si Ongo atúla wa bonjo bunene, kanji atúla àtusimire na nzii inene. 5Bushi no'ku, era kutwomola ala'uma na Kirisito*, tútwabaa twáfire mwa myasi ye'muchima bushi ne'mabi metu. Kwa bonjo bwa Ongo ku mwánunulibwe. 6Kurengera ebuuma bwetu na Yesu Kirisito, Ongo átwomwere ala'uma nai, twǐme ala'uma nai kwa nguba. 7Mwakutulosa ebubuya bwai kurengera Yesu Kirisito, ábaa áhonda alóse enyibuto sa sikáika kwa bwingi bwe'buare bwe'bonjo bwai bwa bùtangamaanyibwa. 8Bushi mwánunulibwe kwa bonjo bwa Ongo, kurengera ebwemeresi. Echera chìtatenganyire nenyu, si lùli lwêmbo lwa Ongo. 9Atá bushi ne'bya mwénde mwáira, kungesha kuba mundu ola wáchitonga. 10Bushi tubano twábumbwaa na Ongo. Na kurengera ebuuma bwetu na Yesu Kirisito, átubumbire chasiya túnde twákola emabuya mwa kalamo ketu. Amu mabuya, Ongo ákunganyaa'mo kutengera mira chasiya túnde twáira'mo.

Ebuuma kurengera Kirisito

11Mwabo mu mùtatula Bayuta, mukéngeraa kute mwábaa mùli kwa mira. eBayuta bénde bámona, no'ku kumona kwénde kwáiribwa kwa mubiri oshâo. Ne'chi chi chénde chátuma mango ba bábamaana, bénde báběrika mbu: «mùtamonyire». 12Mwe'si suku, mwábaa mùli bure na Kirisito*, mwábaa mùtanali no'mwa bandu ba Ongo álondolaa, mwábaa baenyi mwa kachi-kachi kabo. Kanji mwábaa mutéte na mwango kwa bilaano bya Ongo álaanyaa eBaisiraeli. Mwábaa mùli mwa butala busira munyiiro, kanji busira Ongo. 13Si rero kurengera ebuuma bwenyu na Yesu Kirisito, mu bandu mwábaa mùli bure, mwera mùli ofu bushi ne'mikira ya Kirisito*. 14Kirisito* yeine iwáturetere ebôlo, mwa kuira eBayuta na ba bàtatula Bayuta kuba lubaa luuma. Mwa kwâna emubiri wai, áhandwire eburenda bwa bwábaa bùli nga lusito lwa lwábaa lùlikanyise'bo. 15Áhandwire emufa we'Mwaso we'Bayuta ne'miomba* yao, ne'myasi era itèchirwe'mo. Áirire bacha, chasiya eBayuta na ba bàtatula Bayuta, bábe bandu ba lubaa luuma luyayaya. Mwe'i njira mu Kirisito* árechire ebôlo. 16Ekufa kwa Kirisito* kwa musalaba, ku kwérire kwátuma abu boshi bába mundu muuma na kubabika mwa buuma na Ongo. Kurengera oyu musalaba, áhandwire eburenda. 17Rero, Kirisito* áikaa kuhubanganya eMwasi Mubuya-buya we'bôlo, kwa ba bábaa bàli bure na Ongo, na kwa ba bábaa bàli ofu nai.#2:17 Somaa Isaya 52:7. 18Bushi kurengera Kirisito*, tuboshi twera tùngaika era muhondo sa Ongo Tata, kwa njira ye'Muchima Mubuya-buya muuma.

19Bushi no'ku, mu mùtatula Bayuta, mùtachiri baenyi nesi bábunga. Si mwera mùli besha chio ala'uma ne'bandu ba Ongo, kanji mwera mùli bandu bo'mwa ngumo yai. 20Mwera mùli nga nyumba era iímbirwe kwa musingi ola ndumwa* ne'barebi* bêmanzaa. Yesu Kirisito yeine li koi linene lyo'kwa pembe. 21Mwa kuba mwa buuma nai mu enyumba yoshi isimikire kubuya, na kuendekera yêhula chasiya lúbe luhu lubuya-buya lwa Enawetu. 22Kanji kurengera ebuuma bwenyu na Kirisito*, nenyu mwera mùli mwa buuma ne'banji bandu boshi, chasiya múbe nyumba era Ongo àli'mo, kurengera eMuchima wai.

ទើបបានជ្រើសរើសហើយ៖

Baefeso 2: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya