Mikolo ye'ndumwa 17

Paulo na Sila mwa musi we'Tesalonika

1Paulo na Sila bera kuendekera ne'lubalamo lwabo, bera kurenga mwa musi we'Amvipoli ne'we'Apoloniya, bera kuika mwa we'Tesalonika. Mwo'yu musi mwábaa mutúla bushenge bwa Bayuta. 2Rero, Paulo era kukulikanya suku ehatu sa Sabato* énjire êngirira mwa bushenge bwe'Bayuta*, bushi ábaa atúla àkomere kwêngirira'mo. Mwo'bu bushenge, ábaa énjire áhambala ne'bandu era luulu se'Maanjiko Mabuya-buya. 3Ábaa énjire ábakangirisa ne'kubalosa kwa byábaa byěmire Masiya* alíbuke, anômwoke. Kanji era kunde ábabura mbu: «Oyu Yesu nénjire nábahambalira era luulu sai, i'na Masiya*.» 4Bayuta bauma bera kwire bêmerera na báya kwa lunda lwa Paulo na Sila. Na lunji luamba lwa Bakiriki ba bábaa bàtunjire Ongo, ala'uma na bakasi banene ba bábaa bète tunda, nabo bera kunêmerera.

5Si Bayuta bauma bera kufa mufula. Bera kubuanyanya bihumusi biuma byo'mwa nama. Bera kuchibika ala'uma, na bátangirisa báreta lwayo mwa musi woshi. Mwo'lu, bera kuya kutabalira enyumba ya Yasoni báhondera'mu Paulo na Sila, chasiya babêke era muhondo se'bandu. 6Si chiro bákababuana'mo. Bera kwire bêka Yasoni ala'uma na banji bemeresi era muhondo se'bakulu-kulu be'musi. Bera kutangirisa bálakanga mbu: «Bano bandu bàrechire lwayo mwa butala boshi, rero bu babano baíka no'kuno. 7No'no Yasoni, iwàbahúkasaa mwa mwai. Kanji kutáli chiro na muuma mubo ola wénjire wátunda emwaso wa Mwami we'Baroma, bushi beke bénjire báteta mbu kuli unji mwami mbu i'Yesu.» 8Ei myasi yera kusibusa eluamba lwe'bandu ala'uma ne'bakulukulu be'musi. 9Yasoni na balikabo bera kwâna chikinja cha buteya bunene era mwa'bu bakulu-kulu, era muhondo se'kubalikula.

Paulo na Sila mwa musi we'Beroya

10Ábere bwera butufu, ebemeresi bera kwêrekesa Paulo na Sila mwa musi we'Beroya. Báikire'mo, bera kwêngira mwa bushenge bwe'Bayuta*. 11Besha Beroya bábaa bandu ba muchima mubuya kurenza besha Tesalonika, bushi beke bángiriraa eChinwa cha Ongo na muchima muuma. Chira lusuku béndee básoma eMaanjiko Mabuya-buya mwa kuhonda baményerere akaba bya Paulo abáa énjire ábura'bo bináli bya kanangana. 12Bayuta banene mubo, bera kuhuba bemeresi, ala'uma na bandu banene be'sinji mbaa. Mwa'bu bandu, mwábaa mùli bakasi ba bábaa bète tunda na balume.

13Si eBayuta bo'mwa musi we'Tesalonika mango bômvaa kwa Paulo énjire áhubanganya eChinwa cha Ongo mwa musi we'Beroya namo, bera kuhuba kubakulikira'mo. Bera kutangirisa báshiirisa ebandu, ne'kunálinda báreta lwayo lunene. 14Bushi no'ku, ebemeresi bera kwire bêrekesa Paulo kuikira kwa chihabukiro. Si Sila na Timoteo beke, bera kwéshiba eBeroya. 15Ebandu ba bérekesaa Paulo bera kunálinda bámuisa mwa musi we'Atene. Mwa kuhuba eBeroya, Paulo era kubalaira mbu babúraa Timoteo na Sila kwa bàmubuanaa fuba.

Paulo áhambala na besha Atene

16Mango Paulo ábaa anáchiri álinjira Timoteo na Sila mwa musi we'Atene, era kunde álola kwa mwo'yu musi mwehwíre bihuhanyi bya baongo. Echera chera kumuluma busese kwa muchima. 17Era kwire énde áhambala ne'Bayuta mwa bushenge bwabo ala'uma ne'banji bandu be'sinji mbaa ba bábaa bàtunjire Ongo. Kanji chira lusuku, era kunde áhambala ne'bandu ba éndee ábuana mwa chisiki che'lubuanano.

18Bakangirisi bauma bo'mwa chikembe che'Baepukuriyo na banji bo'mwa che'Basitoiko #17:18 Kwa mira, eBaepukuriyo ne'Basitoiko byábaa bikembe bibiri bya masomo ma méndee mákangirisa ebandu emyasi ye'bwenge. nabo bera kutangirisa báenda ebwaka na Paulo. Bauma mubo, bábaa bénjire bábusanya mbu: «Chiye chi ono katetera énjire áhonda kuteta?» Ne'banji mbu: «Àli ngo'la wénjire wáhubanganya era luulu sa baongo bauma ba chienyi.» Béndee bábusa bacha bushi Paulo ábaa énjire ábahubanganyisa eMwasi Mubuya-buya wa Yesu, ne'ra luulu se'kômoka kwai. 19Bushi no'ku, bera kuya nai era muhondo se'Karubanda ka kerikirwe mbu Areyopako. #17:19 Areyopako yábaa ndulungu era besha Atene béndee bábuanana'ko. Aku Karubanda kera kunérikwa esina lye'i ndulungu. Ebakulu-kulu ba'ku Karubanda bera kumubusa mbu: «Ei myasi iyayaya wénjire wáhubanganyisa ebandu, tùngasimire ùtukange kute ku ìtechire. 20Twàtechire bacha, bushi emyasi wénjire wátubura ìtaundukere kubuya mwa matwi metu. Rero tùngasimire tuményerere kute ku ìtechire.» 21Byábaa bacha bushi besha Atene boshi ala'uma ne'baenyi ba bábaa batúla'mo, béndee bánarenza ebihangi byabo byoshi mwa kunde bômvirisa nesi kuteteresa era luulu se'myasi iyayaya.

22Paulo era kwire êmanga mwa kachi-kachi ke'bakulu-kulu be'Karubanda ke'Ayeropako, era kuteta mbu: «Emu besha Atene! Nyiséne kwa mubeke, mu chira kandu mutúla muhóndosise emyasi ye'tini busese! 23Nàtechire bacha bushi mango nabáa nénjire násungula mwo'no musi wenyu, nàchiloreraa kwa bihuhanyi bya mwénde mwêra. Nera kulola na ku'kahaha kauma ke'mitulo* ka babáa baánjikire'ko mbu: Ka ongo ola ùteshibwe. Rero, oyu Ongo mwénde mwêra busira kumumenya, ino'yu i'nénjire nábahubanganyisa.

24«Ongo iwábumbaa ebutala na byoshi bya bitúla'mo, kanji i'na Ena enguba ne'butala. Bushi no'ku, atékala mwa nyuhu sa sáimbwaa ne'bandu. 25Kanji àtatula àlaire ku kuasibwa na mundu, bushi iwénde wêresa ebandu boshi emuka we'kalamo, ala'uma ne'bindu byoshi. 26Kanji ebandu be'mbaa soshi ba ábumbaa, ku mundu muuma ku bánashokaa chasiya běhule mwa butala boshi. Era kubairira ne'byanda, ne'nyibibi se'bio byabo. 27Ongo áiraa ebyera, bushi ábaa áhonda ebandu bàmuhonde, banálinde bámubona chiro angaba mbu bámuhonda mwa kutala-tala. Si chiro bacha, Ongo àtatula burerere na chira muuma mu tubano! 28Bushi ebuashi bwai bu butúmire twába'o, twáhaala, twánaumula. Echera chinákulikene no'kwa bandu bauma mu mwabo ba bénde báanjika emyasi báanjikaa mbu: ‹Netu, tunátula bana bai.› 29Rero, oku tùli bana ba Ongo, bitěmire túnde twáanyisa mbu Ongo atúla ahúhire nga bihuhanyi bya bandu bákwisaa kwa burenga mwa horo, nesi mwa miringa, nesi mwa makoi.

30«Bya bandu béndee báira mango bábaa bàli mwa buuta, Ongo ásimaa kútabianja. Si rero, kubura ku era énjire ábura ebandu boshi ba bàli mu chira chisiki babíndule emyanya yabo. 31Bushi álondwere lusuku luuma lwa akáchinjibusa mwe'bandu boshi busira kulonda mundu. No'bu buchinjibusi, bukêmangirwa na mundu muuma ola Ongo yeine álondwere mira. Kanji Ongo álosise ebandu boshi echera mwa kwômola oyu mundu mwa bafu.»

32Abu bakulu-kulu, mango bômvaa kwa Paulo áhambala era luulu se'kwômoka kwe'bafu, bauma mubo, bera kutangirisa bámushekera. Si ebanji beke, bera kumubura mbu: «Tungáhuba kuika kûmvirisa kwe'i myasi lunji lusuku.»

33Chasinjire, Paulo era kurekana nabo. 34Si chiro bacha, bandu bauma bera kuhuba bemeresi na báya kwa lunda lwa Paulo. Mwa'bu bandu, mwábaa mùli Tiyonisiyo, muuma mwa ba bábaa bàli mwa karubanda ke'Areyopako, na mukasi muuma mbu i'Tamari, ala'uma na banji bandu.

ទើបបានជ្រើសរើសហើយ៖

Mikolo ye'ndumwa 17: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya