Mikolo ye'ndumwa 15

Elubuanano lwe'ndumwa mwa musi we'Yerusalemu

1Mwe'si suku, bandu bauma bátengeraa mwa chio che'Yuteya bera kwândaalira mwa musi we'Andiyokiya. Abu bandu bera kutangirisa kunde bákangirisa ebemeresi mbu: «Akaba mùtarengire mwa mwiya we'kumona kukulikana no'kwa Mwaso wa Musa atúla àtechire, mùtangabona ebununusi.» 2Oyu mwasi, Paulo na Baranaba bera kunana'o. Bera kunde báenza'bo bwaka bunene kusibu era luulu so'yu mwasi. Bushi no'ku, ebemeresi bera kwêmeresanya kutuma bauma mubo ala'uma na Paulo na Baranaba báye eYerusalemu kuhambalira'yi kwo'yu mwasi ala'uma ne'sinji ndumwa*, ne'bangumwa be'luhu lwa Ongo.

3Ábere ebemeresi be'Andiyokiya bera bàtumaa'bo, bera kurengera mwa chio che'Foinikiya ne'che'Samariya, báenda bábalikisisa besha'yi kwa bandu be'sinji mbaa nabo bàhubire bemeresi. Oyu mwasi era kunde ásimisa ebemeresi boshi busese.

4Mango Paulo na balikabo báikaa eYerusalemu, ebemeresi, ne'ndumwa*, ala'uma ne'bangumwa be'luhu lwa Ongo, bera kubahuukasa. Chasinda, nabo bera kubabalikisisa byoshi bya Ongo aíraa kubarengera'ko. 5Si bandu bauma bo'mwa chikembe che'Bafarisayo* ba báhubaa bemeresi, bera kwîmanga na báteta mbu: «Byěmire ebemersi be'sinji mbaa nabo bàrenge mwa mwiya we'kumona, na kubabura kwa béndaa bátunda eMwaso wa Musa.»

6Bushi no'ku, endumwa* ala'uma ne'bangumwa be'luhu lwa Ongo, bera kwire bábuanana chasiya bahámbale era luulu so'yu mwasi. 7Petero álolire kwa bwaka bwanáendekere bwáluwa, era kwire êmanga ne'kubabura mbu: «Banyaketu! Si mwìshi kwa kutengera mira, Ongo ányilondwere mwa kachi-kachi kenyu, nyinde náhubanganyisa ebandu be'sinji mbaa eMwasi Mubuya-buya chasiya bómve kuo, nabo bábe bemeresi. 8No'yu Ongo yeine i'utúla wìshi emichima ye'bandu, iwàlosise kanangana kwa emérere ebandu be'sinji mbaa nabo, mwa kuberesa eMuchima Mubuya-buya ngo'kwa netu ánatuwaa'o. 9Kutali kalondo kasibya ka aírire ala kachi-kachi ketu nabo, bushi kurengera ei njira ye'kwêmerera Yesu, ku nabo àkomise emichima yabo. 10Rero, chi chera chìngatuma mwáereka Ongo mwa kwêsa abu bemeresi emusio ola bahokulu betu, netu tubeine twàfundwaa kwéka? 11Anabe netu tunêshi kwa twánunulibwe bushi ne'bonjo bwa Enawetu Yesu! Nabo kuno'ku!»

12Ebandu boshi ba bábaa bàli mwo'lu lubuanano bera kwire básira. Bera kuteya Baranaba na Paulo ematwi, bômvirisa kwa myasi ye'bimenyeso ne'bisomerano bya Ongo áiraa kurengera'bo mwa kachi-kachi ke'bandu be'sinji mbaa. 13Ábere bera bamálaa kuteta, Yakobo nai era kuuma mwa bunu mbu: «Banyaketu, munyûmvirisaa! 14Simoni #15:14 Simoni kanji i'Petero. Somaa Matayo 4:18.era àtuburaa kwa kutengera mwa ndangiriso, Ongo yeine álondwere ebandu be'sinji mbaa, chasiya bauma mubo bábe lubaa lwai. 15Echera chìkulikene ne'myasi era barebi* bátetaa, bushi bacha ku eMaanjiko Mabuya-buya matúla màtechire:

16‹Mwa suku sa sěshire, nyono nyi Ongo, nyikáhuba kubaha,

kwa kwîmanza kanji ebwami bwa Tauti,

nyikáhuba kubwemanza,

ngo'kwa bénde báimba,

enyumba era yábaa yàsuukire.

17Echera chi chikátuma ebanji bandu boshi bányialukira,

chasiya ebandu be'mbaa soshi ba nâmaere, bábe bandu banyi.

Ku nàtechire bacha nyi Nyamusinda.

18Kanji nyinálosaa ei myasi kutengera mira.›»#15:16-18 Amosi 9:11-12.

19Yakobo era kunaendekera áteta mbu: «Bushi no'ku, nyono nyiséne kwa ebandu be'sinji mbaa ba bénjire bêmerera Ongo, tùtêmire kunde twálibusa'bo. 20Si cha tuíraa, tùbaanjikiraa emaruba me'kubabura kwa baténdaa bálya ebiryo bya byàtulwaa ebasimu, nesi kubanda ekiri, nesi kulya nyama era yàchitumbiraa, nesi kulya mwamba. 21Bushi kutengera mira, eMwaso wa Musa kusomwa ku énde ánasomibwa mwa mashenge me'Bayuta, na kunde ábalibwa chira lusuku lwa Sabato* mu chira musi.»

Elwango kwa ba bàtatula Bayuta

22Chasinda, endumwa* ne'bangumwa be'luhu lwa Ongo ala'uma ne'bemeresi boshi bera kwire bêmeresanya kwa kukomire balóndole bandu bauma mwa kachi-kachi kabo ba bangêrekesa Paulo na Baranaba eAndiyokiya. Bera kulondola Yuta ola wásulwaa esina lya Barisaba ala'uma na Sila. Mwa kachi-kachi ke'bemeresi, abu bandu babiri bábaa béte etunda. 23Bera kwêsa'bo amu maruba, na bacha ku mábaa maánjikirwe:

Tubano tu ndumwa*, ne'bangumwa be'luhu lwa Ongo, ala'uma ne'banji bemeresi, twàbalamusise mu banyaketu bemeresi, mu mùtatula Bayuta, mu mutúla mwa musi we'Andiyokiya, no'mwa chio che'Suriya, ne'che'Kirikiya.

24Twômvaa emwasi kwa kuli bandu bauma ba bàtengaa ene mwetu báya kubabura myasi ya kubalibusa na kubasungulisa ebwenge. Abu bandu atá tutwàbatumaa eyera. 25Bushi no'ku, tuboshi tweméresanyise kulondola bandu babiri mwa kachi-kachi ketu, tutúme'bo eyi mùli ala'uma na banyaketu basiirwa, Baranaba na Paulo, 26bu bèmerere kwâna ekalamo kabo kwa kukorera Enawetu Yesu Kirisito. 27Rero ebandu twàbatumirire, bàli Yuta na Sila. Abola bu bangábabalikisisa bunu kwa bunji bine twaánjikire.

28«Kanji kukulikana ne'ano lye'Muchima Mubuya-buya, ne'lyetu tubeine, twalólaa kwa kutakomire tubêse inji misio, kureka bine byète mufa: 29Muténdaa mwálya ebiryo bya bandu bátulaa ebasimu, nesi kúlya mwamba, nesi kúlya nyama sa sàchitumbiraa, nesi kubanda ekiri. Mukáchilanga kwe'bi, mungába eri mwaírire kubuya. Muáhanyirwaa!»

30Ábere bera baláanaa, abu bátumwaa bera kuchiuma bândaalira eAndiyokiya. Báikire'yi, nabo bera kubuanyanya ebemeresi ne'kubǎngirisa ma maruba. 31Ábere abu bemeresi bera bàmasomaa, bera kumoa bushi emyasi era yábaa yǎnjikirwe'mo yábaa ya kubasesa emichima. 32Yuta na Sila bushi bábaa batúla barebi*, bera kubura abu bemeresi balikabo, inji myasi inene ya kubasesa emichima.

33Ábere bamála suku burebe eyi Andiyokiya, ebemeresi bera kubalaa na kubabura mbu bafúlukaa ne'bôlo era ba bàtumaa'bo bàli. [ 34Si Sila yeke era kulola kwa kukomire ashibe eyera] 35Paulo na Baranaba nabo bera kushiba eAndiyokiya. Abu babiri ala'uma na banji bandu banene, bera kunde bákangirisa na kuhubanganya eChinwa cha Enawetu.

Paulo na Baranaba bálikana mwa mulimo

36Era nyuma sa suku burebe, Paulo era kubura Baranaba mbu: «Tuhúbaa kanji mu chira musi ola twàhubanganyaa mwe'Chinwa cha Enawetu, tutángule ebemeresi, tulóle kute báendekera.» 37Mwo'lu lubalamo, Baranaba era kuhonda mbu Yowani ola wásulwaa esina lya Mariko nai áende nabo. 38Si Paulo yeke era kunana busese kwa bàtachiendaa no'yu mundu, bushi mango babáa bàli mwa chio che'Pamufiriya, àchikulaa kubo, chiro ákachikola kwa mulimo ola báenderaa.#15:38 Mariko ábaa àhubire eYerusalemu. Somaa 13:13. 39Echera, chera kubaretera lubangano lunene busese, bera kunálinda bálikana. Baranaba era kuenda na Mariko, bera kutola ebwato, na báhabukira kwa chisimba che'Chipuro#15:39 Baranaba ábaa mwesha kwa chisimba che'Chipuro. Somaa 4:36. 40Paulo nai era kwire álondola Sila. Ábere ebemeresi bera babémeraa engahanyi era mwa Enawetu, nabo bera kuchiuma. 41Bera kusungula mwa chio che'Suriya ne'che Kirikiya báenda básesa ebemeresi emichima.

ទើបបានជ្រើសរើសហើយ៖

Mikolo ye'ndumwa 15: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya

ខគម្ពីរពេញនិយមពី
Mikolo ye'ndumwa 15

ស្ដាប់នូវ Mikolo ye'ndumwa 15

វីដេអូសម្រាប់ Mikolo ye'ndumwa 15

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

BibleProject

Mikolo ye'ndumwa 15

ខគម្ពីរពេញនិយមពី
Mikolo ye'ndumwa 15

ស្ដាប់នូវ Mikolo ye'ndumwa 15

វីដេអូសម្រាប់ Mikolo ye'ndumwa 15

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Tembo

ជំនាន់បកប្រែ: Echilaano Chiyayaya - tbt