1 Bakorindo 14

Eano era luulu se'kureba ne'kuteta mu mateta ma màteshibwe

1Muhóndaa tanga kunde mwásimana. Kanji mundaa mwásima busese kubona enyêmbo se'Muchima Mubuya-buya, si tanga elwêmbo lwe'kureba. 2Emundu ola wáteta mu mateta ma màteshibwe, énde ába atáteta ne'bandu, si énde ába áteta na Ongo, bushi kutáli ola wénde wába wòmvire bya áteta. Kurengera ebuashi bwe'Muchima Mubuya-buya, oyu mundu énde ába áteta myasi era ìbishirwe. 3Si ola wáreba,#14:3 Ekureba: Echi chinwa chéte myasi inene. Mwa Chilaano cho'kwa Mira ekureba kuli kubalira ebandu emyasi era ingáika. Anabe no'mwa chilaano chiyayaya* namo kubinali bacha mu bimbi biuma-biuma. Si mu njira siuma, mwa Chilaano Chiyayaya, echi chinwa chitúla cha kuhonda kukusa bandu mwa bwemeresi na kubasesa emichima kurengera emyasi era yátenga mwa Bibuliya (Mikolo ye'ndumwa 15:32). Ebi byoshi, eMuchima wa Ongo iwénde wábihulira'bi ebandu (1 Bakorindo 14:26, 30). énde ába ábura ebandu myasi ya kubakusa mwa bwemeresi kanji ya kubasesa emichima na kuberesa emisi. 4Emundu ola wáteta mu mateta ma màteshibwe, énde ába ákusa ebwemeresi bwai yeine. Si ola wáreba, énde ába ákusa ebandu bo'mwa luhu lwa Ongo mwa bwemeresi.

5Nyìngasimire muboshi múnde mwáteta mu mateta ma màteshibwe. Si nyìngasimire busese múnde mwáreba, bushi ola wáreba iwète mufa kwo'la wáteta mu mateta ma màteshibwe. Si oyu wáteta mu mateta ma màteshibwe nai anéte mufa akaba kuli unji mundu ola wáanulula bya áteta, chasiya bikuse ebandu bo'mwa luhu lwa Ongo mwa bwemeresi. 6Rero banyaketu, mufa muchiye nyingábaachira, akaba nyìngaika eyi mwenyu, na nátangirisa náteta nenyu mu mateta ma màteshibwe? Ndàngabaachira mufa asibya akaba ndàngabafulira myasi era yábaa ìbishirwe era Ongo ànyilosaa, nesi myasi ya bwenge, nesi ya burebi nesi ya kubakangirisa.

7Kubinali bacha no'kwa bindu bye'musiki, nga'kuno emurumbu, nesi enzenze. Ebi bindu, akaba bìtangana mirenge era irenzenye, kute emundu àngamenyerera elwimbo lwa lwáombibwa ne'murumbu nesi ne'nzenze? 8Ne'kaperere nako, akaba kàtabanjibwe'mo kwa kuundukere, nde i'ùngachikunganya kuya kwa bita?#14:8 Somaa Muanjo 10. 9Rero nenyu kubinali bacha. Akaba mùngateta mu mateta ma màteshibwe, kute ebandu bàngamenyerera bya mwáteta, no'ku bìtaundukere? Mwa kuira bacha, mùngaba nga'ba báteta ne'mbusi. 10Mwa butala mùli mateta manene busese ma marenzenye, si kutáli chiro na liuma lya litéte kwa lìtechire. 11Akaba ndeshi teta lirebe, nánaba nga muenyi era muhondo so'la wáteta'li, nai ánaba nga muenyi era muhondo sanyi. 12Rero, nenyu oku mutúla musimire kubona enyembo se'Muchima Mubuya-buya, mundaa mwáchisesa kuhonda busese sa sìngaasa ebandu bo'mwa luhu lwa Ongo kukula mwa bwemeresi.

13Bushi no'ku, ola wáteta mu mateta ma màteshibwe, émaa Ongo àmwêrese ne'lwêmbo lwe'kunde áanulula'mo. 14Bushi akaba néma Ongo mu mateta ma màteshibwe, emuchima wanyi iwénde wába wěma, si ebwenge bwanyi bwénde bwába butákola.

15Rero, chi nyiíraa? Nyingénde néma Ongo mwa muchima wanyi, nánamwěma no'kwa kùngomvikala. Nyingénde námwembira mwa muchima wanyi, nánamwembira no'kwa kùngomvikala. 16Akaba wátonga Ongo mwa muchima wao oshâo, emundu ola ulí mwa lubuanano àtangamenya bya wáira. Rero kute àngaala kwǎkula mbu: «bibe bacha» no'ku àtomvire bya wáteta? 17Chiro angaba mbu amu memo mao me'kutonga Ongo makomire busese, màtangakusa ebwemeresi bwe'unji mundu.

18Nátonga Ongo bushi nénde náteta mu mateta ma màteshibwe kubarenza muboshi. 19Si mango nyìri mwa lubuanano mwa luhu lwa Ongo, nyitúla nyìsimire kuteta binwa bitano bya bandu bàngǒmva, chasiya nyìbakangirise, wakúteta byumbi ekumi bya binwa mu mateta ma màteshibwe.

20Banyaketu, muténdaa mwáanyisa nga bana batoto. Mwa myasi ibi, mundaa mwáchitola nga bana batoto, si emianyisa yenyu indaa yába nga ya bandu ba bera bàsene. 21Bitúla byǎnjikirwe mwa Mwaso* mbu:

«Enawetu àtechire bacha:

‹Nyingénde náteta no'luno lubaa

kurengera ebandu ba bátengera burerere,

ba báteta mateta ma chienyi,

si chiro bacha, batákende bányumvira.›»#14:21 Somaa Isaya 28:11-12.

22Bushi no'ku, ekuteta mwa mateta ma màteshibwe, kàli kalorero kwa ba batá bemeresi, si kata kalorero kwa bemeresi. Ne'kureba kali kalorero kwa bemeresi, si kata kalorero kwa ba batá bemeresi.

23Mǔmvaa, ebemeresi boshi bàngaba bàli mwa lubuanano, na boshi bátangirisa báteta mu mateta ma màteshibwe. Chasinda mwo'lu lubuanano, mwánêngirira bandu ba bàteshi bya mwáira, nesi ba batá bemeresi. Mùtasene kwa'bu bandu bàngachichinga mbu mwasíreire? 24Si boshi bàngareba. Emundu ola utá mwemeresi nesi ola ùteshi bya mwáira ánêngirira mwa lubuanano. Rero byoshi bya àngomva bi bìngatuma ámenyerera kanangana kwa àli mukosi wa mabi. Aola, àngachûmva ngo'la wàchinjibusibwe na boshi. 25Mwo'lu, emyasi era abáa àbishire mwa muchima wai yánabihukala. Mwa bacha, àngafukama era muhondo sa Ongo na kumwèra, mwa kuteta mbu: «Kubinali! Ongo análi mwa kachi-kachi kenyu!»

Ongo àtatula Ongo wa kafango

26E banyaketu, chi nyitétaa kasi? Mango mùli mwa lubuanano, mundu muuma mu mwabo àngemba lwimbo, ne'unji angakángirisa echinwa cha Ongo, ne'unji àngateta myasi era Ongo amúbihuliraa, era yábaa ìbishirwe, ne'unji àngateta mu mateta ma màteshibwe, ne'unji àngaanulula amu mateta. Ne'bi byoshi, byěmire kunde byáiribwa kwa kuhonda kukusa ebemeresi mwa bwemeresi bwabo. 27Akaba kuli bandu ba báteta mu mateta ma màteshibwe, bitěmire bábe banene ku babiri nesi bahatu. No'mwa kuteta, běmire kuteta muuma-muuma. Kanji byěmire kube mundu ola ungénde wáanulula bya báteta. 28Akaba kutáli mundu wa kuanulula, rero ba báteta mwa mateta ma màteshibwe basíraa mwa lubuanano. Aola, chira muuma atéteraa mwa muchima wai yeine buna Ongo. 29Kwa bya byerékere ekureba, bitěmire kube bandu banene ku babiri nesi bahatu ba báteta. Ne'banji bánalola kubuya-buya akaba bya báteta bináli bya kanangana. 30Si akaba kuli mundu ola wáteta, chasinda unji mundu ola ulí mwa lubuanano, Ongo ánamubihulira myasi, oyu wabáa wáteta, asíraa. 31Muboshi mùnganareba muuma-muuma, chasiya ebandu boshi bakángirisibwe, na kusesibwa emichima. 32Elwêmbo lwe'kureba lwěmire kunde lwába era chibanda se'buashi bwo'la wèresibwe'lo, 33bushi Ongo àtatula Ongo wa kafango, si atúla wa bôlo.

Ngo'kwa byénjire byánairibwa mwa nyuhu sa Ongo soshi, 34ebakasi běmire kunde básira mwa nyibuanano. Bàteresibwe loso lwa kuteta, si běmire kunde báchirembeka ngo'kwa Mwaso* atúla àtechire. 35Akaba báhonda baménye mwasi murebe, babúsa'o beba babo mwa mahosi mabo. Bushi sìri honyi kwa mukasi ekuteta mwa luhu lwa Ongo.

36Mwáanyisa mbu eyi mwenyu ye'chinwa cha Ongo chátengeraa? Nesi mbu mubeine oshâo mu chánaikirire? 37Akaba emundu áanyisa kwa àli murebi*, nesi mbu éte lwêmbo lwe'Muchima Mubuya-buya, ěmire kumenyerera kwa ene myasi nàbǎnjikirire, àli muomba* wa Enawetu. 38Akaba oyu mundu àteshi ei myasi, eri nai Ongo àtamwîshi.

39Bushi no'ku banyaketu, mundaa mwáhonda busese elwêmbo lwe'kureba. Si chiro bacha, muténdaa mwângika ebandu kunde báteta mwa mateta ma màteshibwe. 40Si emyasi yoshi, indaa yáiribwa mwa njira era ìtungenene, kanji era ilóngomanyire.

ទើបបានជ្រើសរើសហើយ៖

1 Bakorindo 14: tbt

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Echilaano Chiyayaya

1 Bakorindo 14

ខគម្ពីរពេញនិយមពី
1 Bakorindo 14

ស្ដាប់នូវ 1 Bakorindo 14

ព្រះគម្ពីរ:

Tembo

ជំនាន់បកប្រែ: Echilaano Chiyayaya - tbt

1 Bakorindo 14

1 Bakorindo 14

ខគម្ពីរពេញនិយមពី 1 Bakorindo 14

ស្ដាប់នូវ 1 Bakorindo 14

ព្រះគម្ពីរ:

Tembo

ជំនាន់បកប្រែ: Echilaano Chiyayaya - tbt

1 Bakorindo 14

ខគម្ពីរពេញនិយមពី
1 Bakorindo 14