Matiyo 24
24
Ya pagpa-edeꞌ ni Jisus na un kalaten ya Témplo
1Na, sa adtu la si Jisus ni luwaꞌ na Témplo, dyumulud adti kanan ya manga umagakan nan aw pigtulliꞌ nilan ya Témplo aw ya kadég na kyinitaꞌ nilan dun. 2Aw miglong si Jisus kanilan, “Kyinitaꞌ pa mayu adun ya kadég yeiy, manang matinaw ya un ku paglongun kamayu: Dumateng ya allaw na walaꞌ da ya kita-en asini na manga mangkabaklaꞌ na batu na pig-ilantulantu. Ya kadég yeiy alag saba mangkagettan.”
Ya pagpa-edeꞌ ni Jisus sa manga kalugan na un dumateng
3Aw pagkatigkas yan, tyumukud silan adti Buntud na Manga Olibo aw nyingkud si Jisus dun. Aw dyumulud uman kanan ya manga umagakan nan na oloꞌ silan aw nyusip silan, “Ubati kami kun kinunu katuman ya kadég na piglong mu kakayna. Aw unu ya pangilala na agpet da ya paglikuꞌ mu aw ya kamoliyan na allaw?”
4Tyumubag si Jisus kanilan, “Magpakatadeng kamu pagaw awun magpasuway kamayu. 5Kay awun madég na utaw na un dumateng na dumala sa kanak ngalan aw maglong silan, ‘Aku saba ya Misiyas’ aw madég ya gawayan nilan. 6Aw makadengeg kamu sa manga dakulaꞌ na tanam na malapit adti kamayu aw manga ubat-ubat sa dakulaꞌ na tanam adti eped na manga banwa. Manang diliꞌ kamu magkallek. Ka-ilangan una ma-imoꞌ ya kadég yeiy manang bekeꞌ pa nan ya katigkasan. 7Ya sambuk na nasud manubbuk sa eped na nasud, aw ya sambuk na kasakupan tumanam sa eped na kasakupan. Dumateng ya dakulaꞌ na getem, aw manga linug adti madég na banwa. 8Manang ya kadég yeiy, oloꞌ pa yan pagpalekat sa pagti-is na un dumateng, kasiling na ka͡ubayan na bagu pyetesan.
9“Dumateng ya allaw na tumbay kamu adti pagpamulayam, aw pamatayen kamu. Dumutan kamu na madég na manga utaw asuntu na dyumalug kamu kanak. 10Aw dun ni manga allaw yan, madég ya tumalikud sa pagpangintu-u nilan kanaken. Aw maglalubiday silan aw magdadumutay. 11Aw madég uman ya dumateng na sallong kunu propita aw pasuwayen nilan ya madég na utaw. 12Aw asuntu na magkadég to-o ya imo-unun na malatay, magkanikiꞌ ya paggaginawa͡ay na madég na utaw. 13Manang kun singalan ya magpadeleg dun ni pagpangintu-u nan taman adti katigkasan, yan ya utaw na paluwa-en na Tyumanem. 14Aw sa diliꞌ pa dumateng ya katigkasan, pa-edeꞌ adti kadakulaꞌ na banwa ya Madyaw na Ubat-ubat sa Kasakupan na Pighari-an na Tyumanem.
Ya manga pangilala sa paglikuꞌ ni Jisus
15“Na, dun ni manga allaw yan, kita-en mayu adti seled na Témplo na Tyumanem ya to-o malatay aw kallekanan. Yeiy ya pigsulat na propita na si Danyél asini muna. Aw ya magbasa seiy, kalabetan nan galu ya kakawasan.#24:15 Mabasa adti Danyél 11:31 aw 12:11. 16Kun kita-en da mayu ya maynan adti Témplo, kamu na awun ni Judiya, maksay kamu palaguy adti manga buntud. 17Aw kun awun utaw adti luwaꞌ na balay, diliꞌ da sakanan maglikuꞌ adti seled na un kumamang sa pangkay unu. 18Kun awun utaw na magtalabahu adti pawaꞌ nan, diliꞌ da sakanan mag-uliꞌ na un mangay sa kadégkadég nan. 19Dun ni manga allaw yan, makalalat ya manga ka͡ubayan na mabdes, aw ya manga kalmukan. 20Manang panawagtawagi mayu adti Tyumanem na ya pagpalaguy mayu diliꞌ galu ma-imoꞌ dun ni bulan na to-o manikiꞌ aw dun ni Allaw na Paglagdeng. 21Kay to-o malat ya un kagamakan na manga utaw, aw walaꞌ pa na utaw lemena asini tas na lupaꞌ ya maynan lekat pa adti pag-imoꞌ na Tyumanem sa kadakulaꞌ na banwa taman adun. Manang pagkatigkas yan, diliꞌ da yeiy masalut. 22Kun pigpakadugay pa na Tyumanem ya manga allaw yan na to-o malug, walaꞌ ya utaw na masamaꞌ asini tas na lupaꞌ. Manang walaꞌ nan pakadugaya asuntu sa kallat nan sa manga utaw na pigpamalliꞌ nan.
23“Aw dun ni manga allaw yan, kun awun utaw na maglong kamayu, ‘Tanawa! Ini la ya Misiyas!’ aw maglong ya sambuk, ‘Awun da kunu sakanan!’ Manang diliꞌ mayu silan pagpangintu-uwan. 24Kay awun dumateng na sallong kunu Misiyas. Aw awun uman dumateng na sallong kunu manga propita na Tyumanem. Magpakitaꞌ silan sa manga pangilala aw milagru pada pasuwayen ya manga utaw. Pangkay ya manga pigpamalliꞌ da na Tyumanem pasuwayen nilan kun mabatug. 25Na, pig-ubatan ta kamu dadan pada ka-ede-an mayu ya kadég yeiy.
26“Yanagaw pagaw awun maglong kamayu, ‘Tanawa, adtu ya Misiyas ni kaligbinan!’ Manang diliꞌ kamu magkadtu. Aw kun maglong silan, ‘Tanawa, awun da sakanan ni seled na tambiꞌ na balay!’ Manang diliꞌ mayu silan pagpangintu-uwan. 27Kay aku na Iseꞌ na Utaw, dun ni kanak paglikuꞌ, kita-en saba na kadég kasiling na kilat na magpaka-ilaw sa kadakulaꞌ na langit.
28“Awun pundinganan na maglong: ‘Kun ayin ya awun lawas na nyatay da, adtu yan uman pagkatipunuk ya manga uwak.’ Maynan uman, kun kita-en mayu ya manga pangilala na bagu ku piglong, ka-ede-an mayu na agpet da ya katigkasan.
Ya paglikuꞌ ni Jisus
29“Na, pagkatigkas da na dakulaꞌ na manga kalugan dun ni manga allaw yan, ya sega aw bulan diliꞌ da matag sa kalalamdag. Aw mangkolug ya madég na manga bitun. Aw walaꞌ da ya katundanan na kadég na awun ni dalem na langit.#24:29 Mabasa adti Isayas 13:10 aw 34:4. Adti madég na manga nasud asini muna dun ni allaw ni Matiyo, iman na manga utaw aw matulus ya sega aw bulan aw manga bitun, aw pig-imoꞌ nilan kanilan manga tyumanem. 30Pagkatigkas yan, kita-en dun ni langit ya pangilala sa paglikuꞌ ku na Iseꞌ na Utaw. Aw magpansisugaw ya kadég na kasakupan na manga utaw na walaꞌ pangintu-u. Kay aku na Iseꞌ na Utaw, kita-en nilan dun ni labun aw ka-agadan na katulus aw dakulaꞌ na kalalamdag na pagka Tyumanem ku. 31Aw magi sa uni na trumpita na to-o mableg, sugu-un ku ya kanak manga anghil. Aw madtu silan ni silatan aw adti sallepan aw adti balabagan na kadakulaꞌ na banwa, aw un nilan angayen aw pantipunun ya manga utaw na pigpamalliꞌ da ku.
32“Na, anenganenga mayu ya pundinganan sa kawuy na igira: Kun ya sanga manalingsing aw dumawun da, ka-ede-an na agpet da ya manga bulan na to-o mapasuꞌ. 33Aw maynan uman, kun kita-en mayu ya kadég na piglong ku kamayu, dun da mayu ka-ede-i na malapit da ya paglikuꞌ ku. 34Matinaw ya un ku paglongun kamayu: Ya manga utaw asini tas na lupaꞌ adun na allaw yeiy, diliꞌ pa silan mabus mangkamatay mendaꞌ na matuman da ya kadég na piglong ku.#24:34 Ya manga utaw na migpakanyeg kan Jisus, kita-en pa na eped kanilan ya pagkalat na manga sundalu na Romanen sa Jérusalim aw sa Témplo na Tyumanem. 35Pangkay kun ma-uman ya langit aw ya kadakulaꞌ na banwa manang ya manga tingeg na piglong ku diliꞌ saba ma-uman.
Walaꞌ ya nyaka-edeꞌ sa allaw na paglikuꞌ ni Jisus
36“Na, ya allaw aw udas na paglikuꞌ ku, walaꞌ ya utaw na nyaka-edeꞌ. Yan oloꞌ ya nyaka-edeꞌ ya Ama ku na awun ni tas na langit. Pangkay ya manga anghil, aw pangkay aku na Iseꞌ nan walaꞌ uman paka-edeꞌ. 37Kay kasiling na nya-imoꞌ dun ni manga allaw ni Nuwi, maynan uman ya un ma-imoꞌ dun ni allaw na paglikuꞌ ku na Iseꞌ na Utaw. 38Kay sa walaꞌ pa dateng ya dakulaꞌ na lenep, migpadeleg ya manga utaw kyuman aw nyan-inem, aw nyampangugnan silan, mendaꞌ sa allaw na syumeled si Nuwi adti arka. 39Aw walaꞌ nilan ka-ede-i kun unu ya kagamakan na un dumateng mendaꞌ na miglenep na dakulaꞌ aw nyabus silan nyangkalemes. Aw maynan uman, diliꞌ na manga utaw imanmanen ya paglikuꞌ ku na Iseꞌ na Utaw. 40Dun ni allaw yan, kun awun duwa ya eseg adti pawaꞌ, ya sambuk kamangen aw ya sambuk ka-ayawan. 41Aw maynan uman, kun awun duwa ya ka͡ubayan na miggiling, ya sambuk kamangen aw ya sambuk ka-ayawan. 42Yanagaw gayed kamu magpakatanaw, kay walaꞌ mayu ka-ede-i kun kinunu ya paglikuꞌ na kamayu Matas na Pangulu. 43Anenganenga mayu yeiy: Kun nyaka-edeꞌ pa ya tagtun sa balay na awun matakaw na sumeled na gabi yan, magpulaw galu sakanan aw pakatanawan nan ya kanan balay pada diliꞌ makaseled ya matakaw. 44Yanagaw ka-ilangan mayu magtagilan, kay pangkay unu udasa lumikuꞌ aku na Iseꞌ na Utaw na diliꞌ mayu pag-imanmanen.”
Ya sugu-anen na kasaligan aw ya diliꞌ kasaligan
45Miglong pa si Jisus sa pundinganan, law nan, “Ya sugu-anen na kasaligan aw to-o matadeng, yan ya taliguwan na amu nan sa manga eped nan na sugu-anen dun ni balay. Aw yan ya matag kanilan sa kakan umbaꞌ sa allaw yan. 46Madyaw ya kana sugu-anen yan kun sa pag-uliꞌ na amu nan, kita-en sakanan na pigpakadyaw nan ya talabahu na pigtaligu kanan. 47Matinaw ya un ku paglongun kamayu: Ya sugu-anen yeiy un saba taliguwan na amu nan sa kadakulaꞌ na nyatagtun nan. 48Manang kun malatay ya bet na sugu-anen, pagaw mag-anenganeng sakanan, ‘Nyasalang pa ya amu kay madugay walaꞌ likuꞌ.’ 49Yanagaw palekaten nan ya pagpanlabet sa manga eped nan na sugu-anen, aw gayed sakanan kuman aw minem eped na manga pala-inem. 50Manang dumateng ya kanan amu dun ni udas na walaꞌ nan pag-imanmana. 51Aw to-o sakanan pa-emel-emelen aw pasambuk adti banwa na pagludukan sa manga migpantallalingu. Aw dun ni banwa yan to-o silan magsugaw aw magsipanguliteb ya untu nilan.”
ទើបបានជ្រើសរើសហើយ៖
Matiyo 24: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
