Matiyo 13
13
Ya pundinganan sa pagsabug sa manga biniꞌ
1Aw dun ni allaw yan, lyumuwaꞌ si Jisus adti balay aw nyingkud adti dulug na danaw. 2Aw walaꞌ kadugay, migkalimpung kanan ya to-o madég na manga utaw. Yanagaw mig-alin si Jisus adti balangay na malapit dun ni baklayan aw nyingkud sakanan na un magpalna-u kanilan. Aw nyan-indeg ya manga utaw dun ni baklayan kay kaliman nilan magpakanyeg sa palna-u nan. 3Aw migpalekat sakanan migpalna-u kanilan magi sa manga pundinganan, law nan:
“Pakanyegi mayu ya un ku paglongun! Awun sambuk na utaw na nyadtu ni pawaꞌ nan na un magsabug sa manga biniꞌ. 4Sa pagsabug nan sa manga biniꞌ, awun eped na nyakasabug adti kilid na dalan. Aw nyangkawun ya manga langgam aw pyanubug nilan ya manga biniꞌ. 5Aw awun manga eped na nyakasabug adti kabatuwan aw maksay gyumitiꞌ kay walaꞌ abay ya lupaꞌ. 6Manang pagsilat da na sega, nyangkalanes baling ya manga tanem kay walaꞌ to-o pakadalid. 7Ya eped na manga biniꞌ nyakasabug adti magalet na suksukun. Gyumitiꞌ ya manga biniꞌ, manang asuntu na tyumulin uman ya magalet, nyalemes baling ya manga tanem. 8Ya eped na manga biniꞌ nyakasabug adti matabaꞌ na lupaꞌ, aw tyumulin aw to-o nyamunga. Awun nyunga na tag sanggatus (100), aw awun nyunga na tag ka͡eneman (60), aw awun uman nyunga na tag katluwan (30). 9Kamu na migpakanyeg, ka-ilangan kalabetan mayu ya kamayu pigdengeg.”
Ya tud na manga pundinganan
10Sa pag-uliꞌ da na madég na manga utaw, dyumulud kan Jisus ya kanan manga umagakan, aw nyusip silan kanan, “Anangaꞌ magi sa manga pundinganan ya pagpalna-u mu sa manga utaw?” 11Aw tyumubag si Jisus kanilan, “Kamu ya pig-atagan na Tyumanem na maka-edeꞌ sa manga pigtaguꞌ idtu muna sa Kasakupan na Pighari-an nan. Manang awun manga eped na pangkay dyengeg da nilan ya pundinganan ku manang walaꞌ tumbayan adti kanilan ya pagpakalabet sa kakawasan. 12Kay ya utaw na dyumalug sa pigpalna-u la kanan, dugangan pa ya kyalabetan nan aw magkadakulaꞌ pa. Manang ya utaw na walaꞌ dalug sa palna-u yan, kamangen baling adti kanan anenganeng ya pangkay tagbiꞌ na kyalabetan da nan. 13Yeiy ya du-an na ya kanak pagpalna-u pigpa-agi ku sa manga pundinganan. Pangkay gayed nilan inunuwun manang diliꞌ nilan kalabetan ya kyinitaꞌ nilan. Aw pangkay gayed nilan dengegen manang diliꞌ nilan uman kalabetan ya kakawasan na dyengeg nilan. 14Aw dun ni kanilan katuman ya pigpasulat na Tyumanem magi sa propita nan na si Isayas asini muna:
‘Pangkay pakanyegan mayu, manang diliꞌ mayu saba kalabetan,
aw inunuwun mayu manang diliꞌ mayu uman kita-en.
15 Kay mangkategel da ya anenganeng na manga utaw yeiy.
Pigsengseng da nilan ya kanilan manga talinga pada diliꞌ silan makadengeg,
aw pigpileng da nilan ya kanilan manga mata pagaw kita-en nilan ya matinaw aw ka͡apetan na anenganeng nilan,
aw diliꞌ silan malim magselsel sa manga salaꞌ nilan pada paluwa-en ku silan.’#13:14-15 Mabasa adti Isayas 6:9-10.
16Manang madyaw ya kamayu kay kyinitaꞌ da mayu aw kyalabetan da mayu ya kakawasan na kamayu pigdengeg! 17Aw matinaw ya un ku paglongun kamayu: Awun madég na manga propita aw manga utaw na dyumalug sa pagkaliman na Tyumanem asini muna na kaliman galu nilan kumitaꞌ sa kyinitaꞌ da mayu, aw kaliman nilan uman galu dengegen ya dyengeg da mayu. Manang walaꞌ nilan kita-a aw walaꞌ nilan uman dengega.
Ya kakawasan na pundinganan sa manga biniꞌ
18“Na, pakanyegi mayu to-o ya kakawasan na pundinganan sa migsabug sa manga biniꞌ: 19Ya kilid na dalan na kyasabugan sa manga biniꞌ, yan ya manga utaw na dyumengeg da sa ubat-ubat sa Kasakupan na Pighari-an na Tyumanem manang diliꞌ nilan kalabetan ya tengteng kakawasan. Yanagaw dumateng si Satanas aw dampasen nan adti kanilan ya tingeg na Tyumanem na dyengeg da nilan.
20“Aw ya kabatuwan na kyasabugan sa manga biniꞌ, yan ya manga utaw na dyumengeg sa tingeg na Tyumanem aw maksay nilan pigdawat na awun pagleya 21manang diliꞌ to-o makadalid ya pagpangintu-u nilan. Kun awun dumateng na manga kalugan aw manga pagpamulayam asuntu sa tingeg na Tyumanem na dyengeg nilan, maksay nilan ayawan ya kanilan pagpangintu-u.
22“Aw ya magalet na suksukun na kyasabugan uman sa manga biniꞌ, yan ya manga utaw na dyumengeg da sa tingeg na Tyumanem manang ya kanilan anenganeng nyatmuꞌ na kakaypengan sa pagpakabetang nilan, aw sa pag-anenganeng na ma-imoꞌ mayaman. Aw ya sampetan yan, diliꞌ makabunga ya pagpangintu-u nilan.
23“Manang ya matabaꞌ na lupaꞌ na kyasabugan sa manga biniꞌ, yan ya manga utaw na migpakanyeg sa tingeg na Tyumanem aw kyalabetan nilan ya tengteng kakawasan. Aw mamunga silan sa madég. Ya sambuk, mamunga na sanggatus (100), aw ya eped, ka͡eneman (60), aw ya eped, katluwan (30).”
Ya pundinganan sa manga sagbet na pigdaliꞌ adti manga tanem
24Aw pig-ubat-ubatan pa silan ni Jisus sa sambuk na pundinganan, law nan, “Ya Kasakupan na Pighari-an na Tyumanem, kasiling na maynini: Awun utaw na migpatanem adti pawaꞌ nan. 25Manang sa pagkagabi la, talana nyampakatulug ya kadég, nyawun ya kanan po-on dun ni pawaꞌ. Aw pigsabugan nan uman na manga biniꞌ na sagbet, aw tigkas yan nyanaw sakanan. 26Na, sa paggitiꞌ da na manga trigu, gyumitiꞌ uman ya manga sagbet. Aw sa pagbunga la na trigu, dun da ka-ede-i na awun kadiꞌ sagbet na nyakadaliꞌ. 27Aw nyadtu ya manga magtalabahuway adti tagtun sa pawaꞌ, aw miglong silan, ‘Kay Amu, madyaw ya biniꞌ na pigpatanem mu kanami dun ni kanmu pawaꞌ. Anangaꞌ awun sagbet na nyakadaliꞌ aw ayin uman lekat ya manga sagbet yan?’ 28Aw tyumubag kanilan ya tagtun, ‘Yeiy saba ya pag-imo-un na po-on.’ Yanagaw nyusip silan kanan, ‘Kay Amu, unu, panggabutun nami ya manga sagbet?’ 29Manang tyumubag ya amu nilan, ‘Ya-i mayu paggabuta pagaw maka-agad baling ya manga trigu! 30Pabaya-i la ya trigu aw manga sagbet na magdengan tumulin mendaꞌ na dumateng ya allaw na aniyen da. Aw dun ni allaw yan, paglongun ku ya manga mag-aniyay, “Una͡a mayu panimuna ya manga sagbet aw pamanggeti aw agbelan adti atulun. Aw tigkas yan, panimuna mayu uman ya trigu aw betangan adti kanak pul.” ’ ”
Ya pundinganan sa biniꞌ na mustardo
31Aw pig-ubat-ubatan pa uman silan ni Jisus sa sambuk na pundinganan, law nan, “Ya Kasakupan na Pighari-an na Tyumanem, kasiling uman na sambuk na biniꞌ na mustardo na pigtanem na utaw adti pawaꞌ nan. 32Pangkay yan ya to-o tagbiꞌ sa kadég na punganan na manga biniꞌ, manang kun tumulin yeiy, matas pa sa eped na manga tanem. Kasiling saba na kawuy na umbaꞌ kapugadan na manga langgam ya manga sanga nan.”#13:32 Ya biniꞌ na mustardo, yan ya to-o tagbiꞌ na biniꞌ dun ni banwa na Isra-él, manang kun gumitiꞌ aw pagkatas da, magdateng na tulung ka mitro.
Ya pundinganan sa patulinay sa pan
33Aw miglong pa uman si Jisus kanilan sa eped na pundinganan, law nan, “Ya Kasakupan na Pighari-an na Tyumanem kasiling uman na tagbiꞌ na patulinay na pigdaliꞌ na ka͡ubayan adti dakulaꞌ na harina, aw pigtagadan nan na mabus tumulin ya kadakulaꞌ na harina na pigmasa nan.”
Ya pagpalna-u ni Jisus magi sa manga pundinganan
34Ya kadég yeiy na pigpalna-u ni Jisus adti madég na manga utaw, pigpa-agi nan sa manga pundinganan. Walaꞌ nan silan palna-uwi na bekeꞌ na magi sa pagpundinganan. 35Aw dun ni kan Jisus katuman ya pigpasulat na Tyumanem asini muna sa sambuk na propita:
“Magi sa manga pundinganan ya pagpalna-u ku.
Bangalen ku ya manga nyataguꞌ asini muna lekat pa na pagka-imoꞌ na kadakulaꞌ na banwa.”#13:35 Mabasa adti Salmo 78:2.
Ya kakawasan na pundinganan sa manga tanem aw manga sagbet
36Pagkatigkas ni Jisus migpalna-u, pig-indegan nan ya manga utaw aw syumeled sakanan adti balay. Aw nyagad uman ya kanan manga umagakan, aw miglong silan, “Ubati kami sa kakawasan na pundinganan sa manga sagbet adti pawaꞌ.” 37Aw miglong si Jisus kanilan, “Ya utaw na pyalabet dun na migtanem sa madyaw na biniꞌ, aku saba na Iseꞌ na Utaw. 38Ya pawaꞌ, yan ya kadakulaꞌ na banwa na pig-eya-an na manga utaw. Aw ya mangkadyaw na biniꞌ, yan ya manga utaw na nyaka-akup dun ni Kasakupan na Pighari-an na Tyumanem. Manang ya manga sagbet, yan ya manga utaw na awun ni kasakupan ni Satanas. 39Aw ya po-on na migsabug sa manga biniꞌ na sagbet, yan si Satanas. Aw ya pag-ani, yan ya un ma-imoꞌ adti kamoliyan na manga allaw. Aw ya manga mag-aniyay, yan ya manga anghil na Tyumanem. 40Yanagaw, kasiling na manga sagbet na pigbanggetan da aw sangaben adti atulun, maynan uman ya ma-imoꞌ kagaya dun ni kamoliyan na manga allaw. 41Aw aku na Iseꞌ na Utaw, sugu-un ku ya kanak manga anghil, aw alilinan nilan lekat adti kanak Kasakupan ya kadég na migbuyu sa manga utaw adti pag-imoꞌ sa manga malatay aw ya kadég na gayed migpakasalaꞌ. 42Aw alag silan pan-agbel adti atulun na diliꞌ pagkapatayan. Aw adtu silan pagpansisugaw aw magpansipanguliteb ya manga untu nilan. 43Pagkatigkas yan, ya manga utaw na dyumalug sa pagkaliman na Tyumanem, sumilat silan kasiling na sega adti Kasakupan na Pighari-an na kanilan Ama.
“Kamu na migpakanyeg, ka-ilangan kalabetan mayu ya kamayu pigdengeg.
Ya pundinganan sa pametang na dakulaꞌ ya alagaꞌ
44“Na, ya Kasakupan na Pighari-an na Tyumanem, kasiling uman na pametang na dakulaꞌ ya alagaꞌ na pigtaguꞌ adti dalem na lupaꞌ dun ni pawaꞌ. Pigkitaꞌ na sambuk na utaw, aw to-o sakanan migleya. Yanagaw piglikuꞌ nan pigtabunan, aw tigkas yan piggalin nan ya kadég na nyatagtun nan, aw pigbayadan nan ya pawaꞌ yan.
Ya pundinganan sa pérlas na to-o dakulaꞌ ya alagaꞌ
45“Aw ya Kasakupan na Pighari-an na Tyumanem kasiling uman na maynini: Awun utaw na magbalikwatay na nyaninaw sa to-o manenggeya na manga pérlas. 46Tantanan nan paninawun kyinitaꞌ nan ya sambuk na pérlas na to-o dakulaꞌ ya alagaꞌ. Yanagaw maksay nan piggalin ya kadég na nyatagtun nan aw pigbayadan nan ya pérlas yan.
Ya pundinganan sa pukut
47“Aw maynan uman, ya Kasakupan na Pighari-an na Tyumanem kasiling na maynini: Awun pukut na pig-ulug na mangisda-ay adti tubig. Aw walaꞌ kadugay, madég ya punganan na isdaꞌ na nyakamang. 48Pagkatmuꞌ da na pukut, pigguyud nilan adti ligad. Aw nyingkud silan aw nyamalliꞌ sa isdaꞌ. Ya manga mangkadyaw na isdaꞌ pigseled nilan adti manga babalanan, manang ya manga isdaꞌ na walaꞌ ya guna pyan-agbel nilan. 49Maynan uman ya ma-imoꞌ sa manga utaw adti kamoliyan na manga allaw. Madi ya manga anghil asini tas na lupaꞌ, aw tapiden nilan ya manga utaw na mangkalatay lekat adti manga utaw na dyumalug sa pagkaliman na Tyumanem. 50Aw agbel nilan ya manga mangkalatay adti atulun na diliꞌ pagkapatayan. Aw adtu silan pagpansisugaw aw magpansipanguliteb ya manga untu nilan.”
51Pagkatigkas ni Jisus maglong sa manga pundinganan yeiy, nyusip sakanan sa manga umagakan nan, “Unu, kyalabetan da mayu ya kadég na piglong ku kamayu?” Aw tyumubag silan kanan, “E-e.” 52Aw miglong pa si Jisus kanilan, “Alimbawaꞌ, kun awun magpalna-uway sa dadan na Uldin na manga Judiyu, aw dawata nan ya bagu na palna-u sa Kasakupan na Pighari-an na Tyumanem, kasiling sakanan na utaw na mayaman na migkamang sa bagu aw dadan na pametang lekat adti kaban nan. Kay kya-ede-an nan alag ya dadan aw ya bagu na palna-u.”
Ya pag-uliꞌ ni Jisus adti Nazarit aw ya pagkele kanan na manga utaw dun
53Na, pagkatigkas ni Jisus migpalna-u sa manga utaw magi sa manga pundinganan, pig-indegan nan ya banwa yan. 54Aw nyuliꞌ sakanan adti lunsud na Nazarit na yan ya pigtulinan nan, aw migpalekat sakanan migpalna-u sa manga utaw dun ni sinagoga nilan. Aw sa pagdengeg nilan sa pigpalna-u nan, to-o silan nyabelengbeleng. Aw miglong silan, “Ayin lekat ya katadeng nan yeiy? Aw pig-unu nan ya pagpaka-imoꞌ sa manga milagru? 55Iseꞌ saba oloꞌ sakanan na panday. Endaꞌ, ya ina nan si Maria. Aw ya manga inulug nan, yan si Santiago, aw si José, aw si Simon, aw si Judas! 56Aw asini uman pag-eyaꞌ ya kadég na manga bubay nan. Ayin kamanga na utaw yeiy ya katulus aw ya katadeng nan?” 57Yanagaw walaꞌ silan pangintu-u kanan. Aw miglong si Jisus kanilan, “Walaꞌ ya propita na pagbasa͡an adti kanan banwa aw kanan kadégan, manang adti eped baling na banwa pagbasa͡an sakanan.” 58Aw asuntu na walaꞌ silan pangintu-u kanan, tabay ya manga milagru na pig-imoꞌ ni Jisus dun ni kanilan.
ទើបបានជ្រើសរើសហើយ៖
Matiyo 13: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
