Matiyo 10
10
Ya sampuluꞌ tag duwa (12) ya apostolés ni Jisus
1Yanagaw pigpatawag ni Jisus adti sayid nan ya sampuluꞌ tag duwa (12) ya umagakan na pigpamalliꞌ da nan. Aw pig-atagan nan silan na katulus na un mag-alilin sa manga busaw aw magguliꞌ sa kadég na punganan na magkedel na manga utaw. 2Na, ini ya manga ngalan na sampuluꞌ tag duwa (12) ya apostolés: Ya tagnaꞌ si Simon na pigngalanan uman na Pédro aw ya inulug nan na si Andrés, aw si Santiago aw ya inulug nan na si Juan na alag iseꞌ ni Zibidiyo, 3aw si Pilipi aw si Bartolomi,#10:3a Ya eped na ngalan ni Bartolomi, si Natanyél. Mabasa adti Juan 1:43-51. aw si Tomas aw ya mangungubla͡ay sa buwis idtu na muna na si Matiyo,#10:3b Sambuk na ngalan ni Matiyo si Libi. Mabasa adti Lukas 5:27. aw si Santiago na iseꞌ ni Alpiyo, aw si Tadiyo,#10:3c Ya eped na ngalan ni Tadiyo, si Judas. Mabasa adti Lukas 6:16. 4aw si Simon na Kananiyo aw si Judas Iskariyoti na yan ya un maglubid kan Jisus.
Ya pagsuguꞌ ni Jisus sa manga apostolés nan
5Na, sa walaꞌ pa ni Jisus papanawa ya sampuluꞌ tag duwa (12) yeiy, piglongan nan silan, “Sugu-un ta kamu adti manga utaw, manang diliꞌ pa mayu adun pagkadtuwan ya manga banwa na manga Héntil aw ya manga lunsud na manga Samariyanen. 6Yan baling ya kadtuwi mayu adun ya manga buwadbuwad ni Isra-él, kay kasiling silan na manga karniro na migkabuluy. 7Dun ni pagpanaw mayu, ubat-ubati mayu silan na ya Paghariꞌ na Tyumanem sa Kasakupan nan malapit da. 8Aw pangguli-a mayu ya manga magkedel na utaw, aw matawa mayu ya bayaꞌ nyatay, aw pangguli-a mayu ya manga ibungun pada magkalinis da silan, aw alilini mayu ya manga busaw na syumeled adti utaw. Aw diliꞌ mayu pagkalingawan na madég ya nyadawat mayu na walaꞌ ya bayad, yanagaw diliꞌ kamu magsekat sa bayad sa manga pig-imoꞌ mayu. 9Dun ni pagpanaw mayu, diliꞌ kamu magdala sa kuwalta. 10Aw diliꞌ kamu magdala sa kabil aw ilisan aw sandal, aw pangkay bangkaꞌ. Kay ya manga utaw na un mayu ubat-ubatan, silan galu ya matag sa kamayu kapelekan. Kasiling kamu saba na magtalabahuway na umbaꞌ atagan sa kapelekan.
11“Yanagaw pangkay unu lunsuda aw baranggay ya datengan mayu, pangusip kamu kun singalan ya utaw dun na madyaw magpamasa. Aw yan ya bantuki mayu ya kanilan balay, aw pag-eyaꞌ pa kamu dun ni tampid nilan mendaꞌ sa allaw na indegan mayu ya lunsud yan. 12Sa pagseled mayu adti kanilan balay, paglonga mayu ya manga utaw na nyeyaꞌ dun, ‘Atagan na kalinaw ya kadég na utaw asini balay ini.’ 13Kun dawaten kamu nilan, atagan saba silan na Tyumanem na kalinaw. Aw kun diliꞌ nilan dawaten, bawi-a la ya piglong mayu kanilan. 14Aw dun ni banwa na pigdatengan mayu, kun diliꞌ silan malim dumawat kamayu aw diliꞌ uman malim magpakanyeg sa pag-ubat-ubat mayu, na, sa pag-indeg mayu adti kanilan, taptapa ya alikabuk na siki mayu kay yan ya pangilala na ukuman silan na Tyumanem. 15Matinaw saba ya un ku paglongun kamayu: Pagdateng da na allaw na pag-ukum, to-o pa mabegat ya pa-emel-emel kanilan kay sa manga utaw na nyeyaꞌ dun ni syudad na Sodoma aw Gomora.
Ya manga pamulayam na un dumateng
16“Manang pakanyegi ya un ku kamayu paglongun: Sugu-un ta kamu adti manga utaw na mangkalatay ya bet. Masiling kamu saba na manga karniro na piglibedan na manga malyaw na iduꞌ na to-o mangkabulut. Yanagaw pagpakatanaw kamu to-o na walaꞌ ya dumeg kamayu aw walaꞌ uman ya un pagsalaꞌ kamayu. 17Magpakatanaw kamu sa manga utaw na malim maglimanda aw magdala kamayu adti usayanan. Aw badasan kamu nilan na lalabet dun ni seled na manga sinagoga nilan. 18Aw asuntu sa pagpangintu-u mayu kanak, un kamu nilan pa-indegen adti asdangan na manga gubirnador aw manga hariꞌ. Aw dun da kamu pakaselat pagpa-edeꞌ kanilan sa Madyaw na Ubat-ubat kanak aw adtu uman ni manga utaw na Héntil. 19Kun tumbay kamu nilan adti asdangan na mag-usayay aw pan-usipen kamu nilan, diliꞌ magkakamang ya ginawa mayu kun unu ya un mayu tubag kanilan. Kay dun ni udas yan, ya Ispiritu na Ama yan ya maggagad sa kamayu anenganeng sa un mayu tubag kanilan. 20Aw ya paglongun mayu kanilan bekeꞌ na lekat adti kamayu, manang lekat adti Ispiritu na Ama.
21“Aw bekeꞌ yeiy oloꞌ ya un ma-imoꞌ. Diliꞌ madugay awun manga mangkaylug na magtumbay sa inulug nan adti manga po-on pada patayen. Aw awun uman manga ama na magtumbay sa kanilan iseꞌ na patayen. Aw awun manga iseꞌ na matu sa mangkatikadeng nilan aw magtumbay kanilan adti manga po-on pada patayen. 22Aw dumutan kamu na madég na manga utaw asuntu sa pagdalug mayu kanak. Manang pangkay singalan ya magpadeleg dun ni pagpangintu-u nan kanak taman adti katigkasan, yan saba ya utaw na paluwa-en na Tyumanem. 23Kun pamulayaman kamu adti sambuk na lunsud, palaguy kamu adti eped na lunsud. Matinaw saba ya un ku paglongun kamayu: Sa diliꞌ pa mayu matigkas ya imo-unun adti kadég na lunsud na Isra-él, aku na Iseꞌ na Utaw lumikuꞌ da.
24“Ya pigpalna-uwan diliꞌ matas sa migpalna-u kanan. Aw walaꞌ ya sugu-anen na matas pa sa amu nan.#10:24 Tanawun uman ya Juan 15:20. 25Umbaꞌ da sa pigpalna-uwan ya magkatadeng kasiling na migpalna-u kanan. Aw maynan uman ya allang masiling na tagtun kanan. Yanagaw kun aku ya tagtun sa balay aw pigtawag aku na manga utaw na ‘Bilsibul,’ #10:25 Si Bilsibul, yan ya sambuk na ngalan ni Satanas. Aw ya eped na ngalan nan, yan si Bilsibub. na, to-o pa dun baling malatay ya pagtawag nilan sa kanak ka-epedanan dun ni balay.
26“Yanagaw diliꞌ kamu magkallek sa manga utaw. Kay ya kadég na pigpan-imoꞌ da nilan na malatay, alag saba ka-ede-an. Walaꞌ ya nyataguꞌ adun na diliꞌ kagaya kabukasan. 27Ya piglong ku kamayu dun ni mangitngit, bekkalen da mayu kun magkalalamdag da. 28Aw diliꞌ kamu magkallek sa manga utaw na un magpatay sa lawas mayu, kay diliꞌ nilan saba mabatug patayen ya kamayu kalaluwa. Yan baling ya kalleki mayu ya Tyumanem. Kay alag nan mabatug kalaten ya lawas aw ya kalaluwa na utaw adti atulun na diliꞌ pagkapatayan.
29“Anenganenga mayu na tagbiꞌ to-o ya pagbayad sa duwa ya langgam na maya, manang walaꞌ ya pangkay sambuk kanilan na molug na walaꞌ tumbayan na Ama mayu. 30Aw kamu uman, kya-ede-an da saba na Tyumanem kun pila ya kadég na lugay mayu. 31Yanagaw diliꞌ kamu magkallek kay to-o pa dakulaꞌ ya alagaꞌ mayu kay sa madég na manga maya!
32“Pangkay singalan ya maglong adti asdangan na manga utaw na umagakan ku sakanan, aku na Iseꞌ na Utaw maglong uman adti asdangan na manga anghil na Tyumanem na umagakan ku ya utaw yan. 33Manang pangkay singalan ya magbalyaw kanak adti asdangan na manga utaw, balyaw ku uman sakanan adti asdangan na Ama na awun ni tas na langit.
34“Diliꞌ kamu mag-anenganeng na nyadi aku pada dumala sa kalinaw asini tas na lupaꞌ. Ya pagkadi ku, yan baling ya du-an na magtanam ya manga utaw. 35Asuntu sa pagkadi ku, tanamen na iseꞌ na eseg ya kanan ama. Aw ya iseꞌ na ka͡ubayan tanamen nan uman ya kanan ina. Aw ya makeyeꞌ na ka͡ubayan tanamen nan ya ugangan nan na ka͡ubayan. 36Yanagaw ya eped mayu dun ni seled na balay, yan da baling ya eped mu magtanam.#10:35-36 Mabasa adti Mika 7:6. 37Ya utaw na to-o gyuminawa sa kanan ama aw ina manang tagbiꞌ ya pagginawa nan kanak, yan ya utaw na diliꞌ umbaꞌ ma-imoꞌ kanak umagakan. Aw ya utaw na to-o gyuminawa sa kanan iseꞌ na eseg aw iseꞌ nan na ka͡ubayan manang tagbiꞌ ya pagginawa nan kanak, diliꞌ uman umbaꞌ ma-imoꞌ kanak umagakan. 38Aw ya utaw na diliꞌ magpisan sa kanan krus aw dumalug kanak, ya utaw yan diliꞌ umbaꞌ ma-imoꞌ kanak umagakan. 39Aw pangkay singalan ya gyuminawa sa kanan pag-eyaꞌ asini tas na lupaꞌ, kalagakan baling sa ginawa na walaꞌ ya katigkasan. Manang kun singalan ya magtibulluk dumalug kanak pangkay pa adti pagkamatay, matagtun nan ya ginawa na walaꞌ ya katigkasan.
40“Pangkay singalan ya dumawat kamayu, kasiling na aku ya pigdawat nan. Aw pangkay singalan ya dumawat kanak, dun da nan uman dawata ya Ama na migpadala kanak. 41Aw pangkay singalan utawa ya mamasa sa propita asuntu sa pagpa-edeꞌ nan sa tingeg na Tyumanem, dumawat ya utaw yan sa kasiling na un dawaten na propita. Aw kun singalan ya mamasa sa utaw na gayed mig-imoꞌ sa pagkaliman na Tyumanem, dawaten nan uman ya kasiling na un dawaten na manga utaw yan. 42Aw matinaw saba ya un ku paglongun kamayu: Pangkay singalan utawa ya magkallat sa umagakan ku na madalem aw matag sa pangkay sangkatabuꞌ ya tubig, yan ya utaw na awun madawat nan kagaya.”
ទើបបានជ្រើសរើសហើយ៖
Matiyo 10: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
