Lukas 24
24
Ya pagkataw ni Jisus lekat adti pagkamatay
1Pagkamaselem da na Linggo, pigkadtuwan na manga ka͡ubayan ya ilib na piglebengan kan Jisus. Aw pyandala nilan ya manga manimboꞌ na dadan da nilan pigtagilan. 2Aw sa pagdateng nilan dun, kyinitaꞌ nilan na nyaka-anggin da adti kilid ya dakulaꞌ na batu na pigtampeng sa bakaꞌ na ilib, 3manang sa pagseled da nilan, walaꞌ ya kyinitaꞌ nilan dun na lawas. 4Aw sa talana pa nilan nyabelengbeleng sa nya-imoꞌ, biglaꞌ nyaka-indeg adti sayid nilan ya duwa ya eseg, aw to-o masilang ya kadégkadég nilan. 5Aw to-o nyallek ya manga ka͡ubayan, yanagaw lyumuhud silan. Manang miglong ya duwa ya eseg, “Anangaꞌ mayu paninawun ya nyataw asini piglebengan sa nyangkamatay? 6Walaꞌ da sakanan asini! Nyataw da saba! Unu, kyalingawan da mayu kadiꞌ ya piglong nan kamayu idtu muna sa kenneꞌ pa nan adti Galiliya? 7Miglong sakanan na ‘Ka-ilangan na tumbay aku na Iseꞌ na Utaw adti manga makasasalaꞌ, aw papatay nilan adti krus, manang pagkatlu na allaw matawun aku lekat adti nyangkamatay.’ ” 8Aw kya-anenganengan na manga ka͡ubayan ya piglong ni Jisus idtu muna. 9Aw sa paglikuꞌ da nilan lekat adti lebeng, pigdandan nilan ya kadég na kyinitaꞌ nilan adti sampuluꞌ taggesyaꞌ (11) ya apostolés nan aw adti manga eped pa. 10Na, ya manga ka͡ubayan na migdandan seiy adti kanilan, yan si Maria na taga Magdala, aw si Jo-ana, aw si Maria na ina ni Santiago, aw eped pa na manga ka͡ubayan. 11Sa pagdengeg na manga apostolés sa pigdandan nilan, walaꞌ nilan pangintu-uwi. Iman nilan aw kasampetanen na pig-imo-imoꞌ oloꞌ na manga ka͡ubayan. 12Manang si Pédro nyindeg aw dyumalagan pasinan adti ilib, aw gyumukung sakanan aw syumilib, aw yan oloꞌ ya kyinitaꞌ nan ya manga téla na linum na pigbedbed sa lawas ni Jisus. Yanagaw nyuliꞌ sakanan na nyabelengbeleng sa nya-imoꞌ.
Ya pagpakitaꞌ ni Jisus adti duwa ya mangintu-uway
13Dun ni allaw yan, awun duwa ya mangintu-uway kan Jisus na nyanaw pasinan adti sambuk na baranggay na pigngalanan na Émaus, aw ya kawat nan lekat adti Jérusalim, sampuluꞌ taggesyaꞌ (11) ka kilomitro. 14Aw pigbalawbalawan nilan ya kadég na nyangka-imoꞌ. 15Aw sa talana nilan migbalawbalaw, migpalapit si Jisus aw nyagad kanilan. 16Manang walaꞌ nilan sakanan kilala͡a kay pigtaguꞌ pa adti kanilan. 17Aw miglong si Jisus kanilan, “Unu ya kamayu pigbalawbalawan talana mayu nyanaw?” Aw tyumeneng pa silan dagawdagaw aw to-o migkabegat ya gya nilan. 18Aw miglong ya sambuk kanilan na si Kliyopas, “Ikaw gya oloꞌ ya lyumabaꞌ adti Jérusalim na walaꞌ paka-edeꞌ sa nyangka-imoꞌ adun na manga allaw yeiy!” 19Aw pig-usip silan ni Jisus, “Unu kaꞌ ya nyangka-imoꞌ?”
Aw tyumubag silan kanan, “Ya nya-imoꞌ saba adti kan Jisus na taga Nazarit! Propita sakanan na migpakitaꞌ sa katulus na Tyumanem adti manga utaw magi sa manga pigpan-imoꞌ nan aw sa manga pigpalna-u nan. 20Manang ya manga mangkatas na magdadugsu-ay dun ni Témplo, aw manga magdadumala͡ay, piglimanda nilan baling sakanan aw pigtumbay adti taga Roma pada ukuman aw pakalabu adti krus! 21Pig-iman nami na si Jisus ya magpaluwaꞌ sa nasud na Isra-él. Manang katlu la baling na allaw adun lekat na pagkamatay nan. 22Aw awun pa uman nyakapabelengbeleng kanami. Kakayna na to-o pa maselem, ya manga ka͡ubayan na gayed nyagad kanami, pigkadtuwan nilan ya ilib na piglebengan sa lawas ni Jisus, 23manang walaꞌ nilan kita-a ya lawas nan dun! Aw maksay silan lyumikuꞌ adti kanami, aw mig-ubat-ubat na awun kunu migpakitaꞌ kanilan na manga anghil na miglong na nyataw da si Jisus! 24Pagkatigkas yan, awun pa uman manga eped nami na nyadtu ni ilib. Aw kyinitaꞌ nilan na matinaw ya piglong na manga ka͡ubayan. Walaꞌ saba nilan kita-a ya lawas ni Jisus.”
25Pagkatigkas nilan magdandan, miglong si Jisus kanilan, “Tay sa kadugay na walaꞌ pa mayu kalabeti. Anangaꞌ malug adti kamayu ya pagpangintu-u sa pigsulat na manga propita? 26Unu kaꞌ, walaꞌ pa mayu ka-ede-i na ka-ilangan una pati-isen ya Misiyas sa diliꞌ pa patasen ya kanan dengeg?” 27Aw pigpalabet ni Jisus kanilan ya kadég na pigpasulat sa pagka-utawun nan, lekat adti pigsulat ni Moysis aw ya manga propita.
28Na, sa malapit da silan adti baranggay na un nilan kadtuwan, iman mu aw magpadeleg si Jisus adti panaw nan. 29Manang to-o silan nyanginayuꞌ kanan, law nilan, “Asini la kaw ni tampid nami kay ambung da to-o aw agpet da magabi.” Aw nyagad si Jisus syumeled adti balay. 30Aw sa un da silan kuman, kyumamang si Jisus sa pan aw pigpasalamatan nan adti Tyumanem. Aw tigkas yan, pigtenga-tengaꞌ nan ya pan aw pig-atag nan kanilan. 31Aw kyabukasan ya anenganeng nilan aw pigkilala la nilan si Jisus, manang biglaꞌ sakanan nyalanas dun ni pag-inunu nilan. 32Aw miglong silan, “Tamanta migkaga͡an ya ginawa tadun kakayna adti dalan dun ni pagpa-edeꞌ nan kanaten sa pigpasulat na Tyumanem.”
33Aw dun ni udas yan, maksay silan lyumikuꞌ adti Jérusalim. Aw dun da nilan kita-a ya sampuluꞌ taggesyaꞌ (11) ya apostolés ni Jisus aw ya manga eped nilan na migkatipun. 34Aw miglong ya kadég nilan adti duwa, “Nyataw da saba ya kanaten Magpalna-uway! Migpakitaꞌ sakanan adti kan Simon!” 35Aw tigkas yan, pig-ubat-ubat uman na duwa adti manga eped nilan ya nya-imoꞌ dun ni dalan pasinan adti Émaus, aw ya pagpakilala kanilan ni Jisus dun ni pagtengaꞌ nan sa pan.
Ya pagpakitaꞌ ni Jisus adti kanan manga umagakan
36Aw sa talana pa nilan migbalawbalaw sa kadég na nya-imoꞌ, biglaꞌ migpakitaꞌ si Jisus dun ni tengaꞌ nilan aw miglong, “Ya kalinaw gayed magad kamayu!” 37Manang migteneb silan aw to-o nyallek kay iman nilan aw kalaluwa ya kyinitaꞌ nilan. 38Aw miglong si Jisus kanilan, “Anangaꞌ kamu mallek? Anangaꞌ magduwaduwa ya kamayu anenganeng? 39Inunuwa mayu ya manga tulluꞌ ku aw kanak manga siki! Awidi aku mayu aw ka-ede-an mayu na bekeꞌ aku saba na kalaluwa, kay ya kalaluwa walaꞌ ya lawas. Manang pigkitaꞌ aku mayu na awun pesaꞌ aw awun unud.” 40[Aw pigpakitaꞌ nan kanilan ya manga tulluꞌ nan aw siki nan.] 41Pangkay to-o silan migleya aw nya-enneng-enneng, manang kenneꞌ na malug kanilan ya pagpangintu-u sa kyinitaꞌ nilan. Yanagaw pig-usip silan ni Jisus, “Unu, awun pa kakan mayu asini?” 42Aw pig-atagan nilan sakanan na isdaꞌ na abus da pasagi, 43aw pigdawat nan aw pigkan nan dun ni asdangan nilan.
44Pagkatigkas yan, miglong si Jisus kanilan, “Idtu na migka-iyeped pa kitadun, yeiy ya piglong ku kamayu: Ka-ilangan matuman ya kadég na pigsulat sa pagkadi ku, dala ya pigsulat ni Moysis, aw ya manga pigsulat na manga propita, aw dun ni manga salmo.” 45Aw pigbukasan ni Jisus ya kanilan anenganeng pada kalabetan nilan ya pigpasulat na Tyumanem, 46aw miglong sakanan kanilan, “Ini saba ya pigpasulat asini muna: ‘Ka-ilangan magti-is ya Misiyas aw dun ni katlu na allaw mataw sakanan lekat adti pagkamatay.’ 47Aw dun ni kanak ngalan ka-ilangan ubat-ubat adti kadég na manga nasud na kun magselsel ya manga utaw sa kanilan manga salaꞌ, lanasen saba na Tyumanem ya kadég na salaꞌ nilan. Aw ya pag-ubat-ubat yeiy, magpalekat asini Jérusalim. 48Aw kamu ya magmatinaw adti kadég na manga utaw sa manga nyangka-imoꞌ. 49Pakanyegi mayu ya un ku paglongun: Padala ku kamayu ya pigpakang na kanak Ama, manang katingen pa kamu asini Jérusalim mendaꞌ na madawat mayu ya katulus na lekat adti tas na langit.”
Ya pagka-engat ni Jisus pasinan adti tas na langit
50Pagkatigkas yan, pigpa-agad silan ni Jisus adti Bétaniya. Pagdateng nilan dun, pigpatas nan ya kanan manga tulluꞌ aw migsekat adti Tyumanem na pakadyawun nan silan. 51Talana pa nan nyanawagtawag, maya-mayaꞌ sakanan nya-engat lekat dun ni tampid nilan pasinan adti tas na langit. 52Aw pigsimba nilan sakanan aw lyumikuꞌ silan adti Jérusalim na to-o migleya. 53Aw kada allaw adti Témplo, gayed nilan pigdeyen ya Tyumanem.
ទើបបានជ្រើសរើសហើយ៖
Lukas 24: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
