Lukas 22
22
Ya palpa sa pagpatay kan Jisus
1Na, agpet da ya allaw na Pista na Pan na Walaꞌ Patulina na pigtawag uman na Pista na Paglabay na Anghil na Tyumanem. 2Aw ya manga mangkatas na magdadugsu-ay aw manga magpalna-uway sa Uldin na manga Judiyu, gayed silan nyaninaw sa pa-agi kun unun nilan ya pagpapatay kan Jisus na walaꞌ ya maka-edeꞌ, kay nyallek silan sa manga utaw.
Ya pagpakang ni Judas na lubidan si Jisus
3Sa talana pa nilan migpalpa seiy, syumeled si Satanas adti kan Judas Iskariyoti na yan ya sambuk dun ni sampuluꞌ tag duwa (12) ya apostolés ni Jisus. 4Aw nyadtu si Judas adti manga mangkatas na magdadugsu-ay aw manga kapitan na manga magtatunggu-ay dun ni Témplo. Aw pigbalawbalawan nilan kun unun nan ya pagtumbay kan Jisus adti kanilan. 5Aw to-o silan migleya, aw pigka-unawa͡an nilan na atagan si Judas na kuwalta. 6Yanagaw tyumandeꞌ si Judas aw tyumagad sa selat pada lubidan nan si Jisus adti kanilan na diliꞌ ka-ede-an na madég na manga utaw.
Ya pagtagilan sa pangiyambungay na Pista na Paglabay na Anghil na Tyumanem
7Na, dyumateng da ya tagnaꞌ na allaw na Pista na Pan na Walaꞌ Patulina. Yeiy ya allaw na magsi-iyaw ya manga Judiyu sa nati na karniro, kay yan ya un nilan kanen dun ni pangiyambungay sa Pista na Paglabay na Anghil na Tyumanem.#22:7 Kada umay dun ni Pista na Paglabay na Anghil na Tyumanem, pig-anenganeng na manga Judiyu ya pagpaluwaꞌ na Tyumanem sa manga tyugbulan nilan asini muna lekat adti nasud na Ihiptu. 8Yanagaw pigsuguꞌ ni Jisus si Pédro aw si Juan, law nan, “Kadtu kamu aw tagilana mayu kanaten ya pangiyambungay sa Pista.” 9Aw pig-usip nilan si Jisus, “Ayin apit ya kaliman mu na magtagilan kami?” 10Aw tyumubag si Jisus, “Sa pagseled da mayu adti syudad, sungunun kamu na sambuk na eseg na dyumala sa sibulan na nyatmuꞌ na tubig. Agad kamu kanan adti balay na un nan kadtuwan. 11Aw paglonga mayu ya tagtun sa balay, ‘Nyameneꞌ ya Magpalna-uway: Ayin kunu ya tambiꞌ na un nan pagkanan sa pangiyambungay sa Pista eped nan ya kanan manga umagakan?’ 12Aw yanagaw pakitaꞌ nan kamayu ya dakulaꞌ na gibalayan adti kadwa na kansad na balay na dadan da pigtagilan. Aw dun da mayu tagilana ya pangiyambungay tadun.” 13Yanagaw nyanaw ya duwa na pigsuguꞌ nan. Aw sa pagdateng nilan dun, kyinitaꞌ da nilan ya kadég na piglong ni Jisus, aw pigtagilan nilan ya pangiyambungay sa Pista na Paglabay na Anghil na Tyumanem.
Ya pagkan ni Jisus aw kanan umagakan sa pangiyambungay sa pista
14Na, sa pagdateng da na udas na kuman da silan, syumambuk si Jisus sa manga apostolés nan kyuman dun ni lamisa. 15Aw piglongan nan silan, “To-o ku kaliman sumambuk kamayu kuman sa pangiyambung ini sa Pista sa diliꞌ pa aku magti-is. 16Aw paglongun ta kamu na diliꞌ da aku kuman salut seiy mendaꞌ na malingeb ya kakawasan nan adti Kasakupan na Pighari-an na Tyumanem.” 17Aw migkamang si Jisus sa tabuꞌ na pigseledan sa bino na paras aw pigpasalamatan nan adti Tyumanem, aw tigkas yan miglong sakanan, “Dawata mayu ya tabuꞌ aw pagsayusayu kamu inem. 18Paglongun ta kamu: Diliꞌ da aku salut minem sa bino na paras mendaꞌ na dumateng ya Paghariꞌ na Tyumanem sa Kasakupan nan.” 19Aw migkamang si Jisus sa pan aw pigpasalamatan nan adti Tyumanem. Pagkatigkas yan pigtenga-tengaꞌ nan ya pan aw pigpan-atag nan adti kanan manga umagakan na un nilan kanen, aw law nan, “Yeiy ya kanak lawas na pig-atag kamayu. Gayed mayu imo-a ya maynini pada ka-anenganengan aku mayu.” 20Aw maynan uman, pagkatigkas nilan mangiyambung, pigkamang nan ya tabuꞌ na syeledan sa bino, aw law nan, “Yeiy ya kanak duguꞌ na pa-iligen pada kamayu. Magi sa duguꞌ ku, yan ya magpa-iganget sa bagu na pakang na Tyumanem.
21“Manang pakanyegi mayu ya un ku paglongun: Awun eped tadun na kyuman asini lamisa na un maglubid kanak. 22Aku na Iseꞌ na Utaw un saba patayen kay yan ya dadan pigpalpa na Tyumanem. Manang malatay ya un datengan na utaw na maglubid kanak.” 23Aw migpan-usip-usipay silan kun singalan kanilan ya maglubid kan Jisus.
Ya palna-u ni Jisus sa pagpadalem
24Na, nya-imoꞌ ya ayil na manga umagakan ni Jisus. Mig-ayil silan kun singalan ya to-o matas kanilan. 25Yanagaw miglong si Jisus adti kanilan, “Kya-ede-an da mayu ya bet na manga hariꞌ na asini tas na lupaꞌ. Silan da ya gayed migbayaꞌ sa manga sakup nilan. Aw ya awun katundanan, kaliman nilan na sayaꞌ silan na manga utaw kay manimbet kunu silan. 26Manang diliꞌ mayu silan pagsilingan. Ya to-o dakulaꞌ adti kamayu ka-ilangan masiling baling na to-o mangud. Aw ya magdumala, ka-ilangan masiling sakanan na sugu-anen. 27Singalan kaꞌ ya matas, ya pigbasa͡an sa kakan aw kun ya nyamasa kanan? Yan saba ya matas ya pigbasa͡an. Manang ini aku saba na nyamasa kamayu.”
28Aw miglong pa uman si Jisus kanilan, “Kamu ya gayed mig-agad-agad kanak dun ni manga kalugan na kya-agiyan ku. 29Yanagaw, asuntu na pigtaliguwan aku na kanak Ama sa pagdumala sa Kasakupan nan, taliguwan ta kamu uman kagaya sa Kasakupan nan, 30pada magdengan kitadun kuman aw minem adti kanak lamisa dun ni kanak Kasakupan. Aw mingkud kamu adti manga trunu aw magdumala kamu aw mag-ukum sa manga buwadbuwad na sampuluꞌ tag duwa (12) ya iseꞌ ni Isra-él na eseg.”
Ya pagpa-edeꞌ ni Jisus na balyaw sakanan ni Pédro
31Tigkas yan, miglong si Jisus kan Pédro, “Kay Simon, pakanyegi ya un ku kanmu paglongun: Pigsekat ni Satanas na tanda-en ya kamayu pagpangintu-u. Ya pagtandaꞌ nan kamayu kasiling na pagbulus sa umay pada matani ya tipig aw ya awun seled. 32Manang nyanawagtawag aku na diliꞌ mu ayawan ya pagpangintu-u mu. Aw sa pagpakalikuꞌ da mu adi kanak, mabatug mu pakabagsegen ya pagpangintu-u na manga eped mu.” 33Aw miglong si Pédro kanan, “Kay Magpalna-uway, magad aku kanmu pangkay adti kalabusuwanan aw adti pagkamatay!” 34Manang tyumubag si Jisus kanan, “Paglongun ta kaw kay Pédro: Sa diliꞌ pa tumaga-uk ya manuk kagaya na gabi, balyaw aku mu na makatlu.”
Ya pagtagilan sa manga allaw na malug
35Pagkatigkas yan, miglong si Jisus kanilan, “Idtu na muna, sa pagsuguꞌ ku kamayu, piglongan ta kamu na diliꞌ kamu magdala sa pu-ut aw kabil aw manga sandal. Na, unu kaꞌ, migkapelek kamu?” Aw tyumubag silan, “Walaꞌ saba.” 36Aw miglong pa si Jisus, “Manang adun, pangkay singalan kamayu ya awun pu-ut aw kabil, dala͡a la mayu. Aw pangkay singalan ya walaꞌ ya kampilan, galinen nan ya kanan kadégkadég aw pagbayad nan sa kampilan. 37Kay ka-ilangan magi kanak matuman ya pigpasulat na Tyumanem asini muna: ‘Nyaka-iyeped sakanan sa manga makasasalaꞌ.’ #22:37 Mabasa adti Isayas 53:12. Aw un da saba yeiy matuman.” 38Aw miglong ya manga umagakan nan, “Kay Magpalna-uway, tanawa! Awun duwa ya kampilan ini.” Aw tyumubag si Jisus, “Umbaꞌ da yan.”
Ya pagpanawagtawag ni Jisus adti Buntud na Manga Olibo
39Aw lyumuwaꞌ si Jisus adti balay aw nyanaw pasinan adti Buntud na Manga Olibo kay yeiy ya kanan kyanalaman. Aw nyagad uman ya manga umagakan nan. 40Aw sa pagdateng da nilan, miglong si Jisus, “Panawagtawag kamu pada diliꞌ kamu degen na pagtandaꞌ.” 41Aw migpa-awat si Jisus kanilan, aw lyumuhud sakanan aw nyanawagtawag, law nan, 42“Kay Ama, kun kaliman mu, kamanga beg kanak ya pagti-is na un ku ka-agiyan. Manang bekeꞌ na kanak pagkaliman ya matuman, kanmu saba pagkaliman ya matuman.” 43[Na, migpakitaꞌ kan Jisus ya sambuk na anghil lekat adti tas na langit aw migpakabagseg kanan. 44Aw asuntu na to-o migkalat ya ginawa nan, nyatibulluk pa sakanan nyanawagtawag. Aw nyantagduꞌ adti lupaꞌ ya init nan kasiling na duguꞌ.]
45Pagkatigkas nan manawagtawag, nyindeg sakanan aw lyumikuꞌ adti manga umagakan nan aw kyinitaꞌ nan na nyampakatulug silan kay to-o migkalat ya ginawa nilan. 46Aw miglong si Jisus kanilan, “Anangaꞌ kamu makatulug? Pagbangun kamu aw panawagtawag pada diliꞌ kamu degen na pagtandaꞌ.”
Ya pagdakep kan Jisus
47Sa talana pa ni Jisus miglong, dyumateng ya madég na manga utaw. Aw ya nyuna kanilan si Judas Iskariyoti na sambuk dun ni sampuluꞌ tag duwa (12) ya apostolés ni Jisus. Dyumulud si Judas adti kan Jisus aw aleki nan,#22:47 Ya katanem adti banwa na Isra-él, ya kanilan pagpangumusta, pag-alekan nilan ya kanilan ubaybay. 48manang miglong si Jisus kanan, “Kay Judas, anangaꞌ mu lubidan aku na Iseꞌ na Utaw magi sa alek?” 49Aw sa pagkitaꞌ na manga umagakan ni Jisus sa un ma-imoꞌ kanan, miglong silan, “Kay Magpalna-uway, unu, pantibasen nami silan na kampilan?” 50Aw pigtibas na sambuk kanilan ya sugu-anen na pangulu na manga magdadugsu-ay, aw dayaw nya-ilap ya kalintu na talinga nan. 51Manang pigsagda sakanan ni Jisus, “Umbaꞌ da yan!” Aw pig-uliꞌ nan ya talinga na sugu-anen aw dayaw nyaka-uliꞌ.
52Na, ya manga nyagad kan Judas na un magdakep kan Jisus, yan ya manga mangkatas na magdadugsu-ay, aw manga magtatunggu-ay sa Témplo, aw manga magdadumala͡ay sa manga Judiyu. Aw miglong si Jisus kanilan, “Anangaꞌ kamu dumala sa manga kampilan aw manga babunal? Kasiling kamu na migdakep sa ribildi! 53Kada allaw awun aku ni Témplo, aw walaꞌ aku mayu dakepa. Manang yeiy da saba ya kamayu selat, aw yeiy da uman ya pagdumala na kangitngit.”
Ya pagbalyaw ni Pédro kan Jisus
54Aw pigdulus nilan si Jisus aw pigpa-agad adti balay na pangulu na manga magdadugsu-ay. Aw dyumalug uman si Pédro kanilan, manang migpa-awatawat sakanan. 55Adti pamanag na balay, migduluk ya manga utaw aw nyan-ingkud silan dun pada manalang. Aw migpalapit uman si Pédro aw nyingkud adti tampid nilan. 56Aw awun sambuk na sugu-anen na bubay na kyumitaꞌ kanan na nyingkud dun, aw pigtengtengan nan si Pédro aw miglong, “Ya utaw ini sambuk uman na eped nan!” 57Manang migbalyaw si Pédro, law nan, “Kay Déꞌ, walaꞌ ku kilala͡a ya utaw yan!” 58Walaꞌ kadugay, awun da uman eseg na kyumitaꞌ kanan, aw law nan, “Ikaw uman ya sambuk na eped nilan.” Manang tyumubag si Pédro, “Bekeꞌ ku, kay Lew!” 59Lyumabay da ya sangka-udas aw miglong pa uman ya sambuk na utaw, “Ya eseg ini eped nilan saba, kay taga Galiliya sakanan!” 60Manang miglong si Pédro, “Kay Lew, walaꞌ ku ka-ede-i ya piglong mu!” Sa talana pa nan miglong, tigkan tyumaga-uk ya manuk. 61Aw lyumingiꞌ si Jisus aw pigtengtengan nan si Pédro. Aw dun da ni Pédro ka-anenganengi ya piglong kanan ni Jisus, “Sa diliꞌ pa tumaga-uk ya manuk kagaya gabi, balyaw aku mu na makatlu.” 62To-o migkalat ya ginawa ni Pédro, yanagaw lyumuwaꞌ sakanan aw to-o migsugaw.
Ya pag-odoy-odoy kan Jisus
63Na, ya manga migtungguꞌ kan Jisus, pig-odoy-odoy nilan sakanan aw pigpanumbag nilan. 64Aw pigtampeng nilan ya mata nan aw piglongan nilan, “Ubatan kanami kun singalan ya migsumbag kanmu!” 65Aw madég pa uman ya tingeg na piglong nilan na pagmulamula kanan.
66Na, pagkamaselem da, migkatipun ya manga magdadumala͡ay sa manga Judiyu, dala ya mangkatas na magdadugsu-ay aw ya manga magpalna-uway sa Uldin. Aw tigkas yan, pigpa-agad nilan si Jisus adti pag-usayan nilan. 67Aw miglong silan kan Jisus, “Ubati kami kun ikaw ya Misiyas.” Manang tyumubag si Jisus kanilan, “Pangkay kun ubatan pa ta kamu, diliꞌ aku mayu pangintu-uwan, 68aw kun usipen ta kamu, diliꞌ kamu uman tumubag. 69Manang agpet da ya allaw na mingkud aku na Iseꞌ na Utaw apit adti kalintu na Tyumanem na To-o Matulus.” 70Aw miglong ya kadég nilan, “Unu kaꞌ, ikaw kadiꞌ ya Iseꞌ na Tyumanem?” Aw tyumubag si Jisus kanilan, “Piglong da mayu saba.” 71Aw miglong silan, “Anangaꞌ pa kitadun maninaw sa eped na un magmatinaw? Dyengeg da tadun saba ya kanan piglong.”
ទើបបានជ្រើសរើសហើយ៖
Lukas 22: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
Lukas 22
22
Ya palpa sa pagpatay kan Jisus
1Na, agpet da ya allaw na Pista na Pan na Walaꞌ Patulina na pigtawag uman na Pista na Paglabay na Anghil na Tyumanem. 2Aw ya manga mangkatas na magdadugsu-ay aw manga magpalna-uway sa Uldin na manga Judiyu, gayed silan nyaninaw sa pa-agi kun unun nilan ya pagpapatay kan Jisus na walaꞌ ya maka-edeꞌ, kay nyallek silan sa manga utaw.
Ya pagpakang ni Judas na lubidan si Jisus
3Sa talana pa nilan migpalpa seiy, syumeled si Satanas adti kan Judas Iskariyoti na yan ya sambuk dun ni sampuluꞌ tag duwa (12) ya apostolés ni Jisus. 4Aw nyadtu si Judas adti manga mangkatas na magdadugsu-ay aw manga kapitan na manga magtatunggu-ay dun ni Témplo. Aw pigbalawbalawan nilan kun unun nan ya pagtumbay kan Jisus adti kanilan. 5Aw to-o silan migleya, aw pigka-unawa͡an nilan na atagan si Judas na kuwalta. 6Yanagaw tyumandeꞌ si Judas aw tyumagad sa selat pada lubidan nan si Jisus adti kanilan na diliꞌ ka-ede-an na madég na manga utaw.
Ya pagtagilan sa pangiyambungay na Pista na Paglabay na Anghil na Tyumanem
7Na, dyumateng da ya tagnaꞌ na allaw na Pista na Pan na Walaꞌ Patulina. Yeiy ya allaw na magsi-iyaw ya manga Judiyu sa nati na karniro, kay yan ya un nilan kanen dun ni pangiyambungay sa Pista na Paglabay na Anghil na Tyumanem.#22:7 Kada umay dun ni Pista na Paglabay na Anghil na Tyumanem, pig-anenganeng na manga Judiyu ya pagpaluwaꞌ na Tyumanem sa manga tyugbulan nilan asini muna lekat adti nasud na Ihiptu. 8Yanagaw pigsuguꞌ ni Jisus si Pédro aw si Juan, law nan, “Kadtu kamu aw tagilana mayu kanaten ya pangiyambungay sa Pista.” 9Aw pig-usip nilan si Jisus, “Ayin apit ya kaliman mu na magtagilan kami?” 10Aw tyumubag si Jisus, “Sa pagseled da mayu adti syudad, sungunun kamu na sambuk na eseg na dyumala sa sibulan na nyatmuꞌ na tubig. Agad kamu kanan adti balay na un nan kadtuwan. 11Aw paglonga mayu ya tagtun sa balay, ‘Nyameneꞌ ya Magpalna-uway: Ayin kunu ya tambiꞌ na un nan pagkanan sa pangiyambungay sa Pista eped nan ya kanan manga umagakan?’ 12Aw yanagaw pakitaꞌ nan kamayu ya dakulaꞌ na gibalayan adti kadwa na kansad na balay na dadan da pigtagilan. Aw dun da mayu tagilana ya pangiyambungay tadun.” 13Yanagaw nyanaw ya duwa na pigsuguꞌ nan. Aw sa pagdateng nilan dun, kyinitaꞌ da nilan ya kadég na piglong ni Jisus, aw pigtagilan nilan ya pangiyambungay sa Pista na Paglabay na Anghil na Tyumanem.
Ya pagkan ni Jisus aw kanan umagakan sa pangiyambungay sa pista
14Na, sa pagdateng da na udas na kuman da silan, syumambuk si Jisus sa manga apostolés nan kyuman dun ni lamisa. 15Aw piglongan nan silan, “To-o ku kaliman sumambuk kamayu kuman sa pangiyambung ini sa Pista sa diliꞌ pa aku magti-is. 16Aw paglongun ta kamu na diliꞌ da aku kuman salut seiy mendaꞌ na malingeb ya kakawasan nan adti Kasakupan na Pighari-an na Tyumanem.” 17Aw migkamang si Jisus sa tabuꞌ na pigseledan sa bino na paras aw pigpasalamatan nan adti Tyumanem, aw tigkas yan miglong sakanan, “Dawata mayu ya tabuꞌ aw pagsayusayu kamu inem. 18Paglongun ta kamu: Diliꞌ da aku salut minem sa bino na paras mendaꞌ na dumateng ya Paghariꞌ na Tyumanem sa Kasakupan nan.” 19Aw migkamang si Jisus sa pan aw pigpasalamatan nan adti Tyumanem. Pagkatigkas yan pigtenga-tengaꞌ nan ya pan aw pigpan-atag nan adti kanan manga umagakan na un nilan kanen, aw law nan, “Yeiy ya kanak lawas na pig-atag kamayu. Gayed mayu imo-a ya maynini pada ka-anenganengan aku mayu.” 20Aw maynan uman, pagkatigkas nilan mangiyambung, pigkamang nan ya tabuꞌ na syeledan sa bino, aw law nan, “Yeiy ya kanak duguꞌ na pa-iligen pada kamayu. Magi sa duguꞌ ku, yan ya magpa-iganget sa bagu na pakang na Tyumanem.
21“Manang pakanyegi mayu ya un ku paglongun: Awun eped tadun na kyuman asini lamisa na un maglubid kanak. 22Aku na Iseꞌ na Utaw un saba patayen kay yan ya dadan pigpalpa na Tyumanem. Manang malatay ya un datengan na utaw na maglubid kanak.” 23Aw migpan-usip-usipay silan kun singalan kanilan ya maglubid kan Jisus.
Ya palna-u ni Jisus sa pagpadalem
24Na, nya-imoꞌ ya ayil na manga umagakan ni Jisus. Mig-ayil silan kun singalan ya to-o matas kanilan. 25Yanagaw miglong si Jisus adti kanilan, “Kya-ede-an da mayu ya bet na manga hariꞌ na asini tas na lupaꞌ. Silan da ya gayed migbayaꞌ sa manga sakup nilan. Aw ya awun katundanan, kaliman nilan na sayaꞌ silan na manga utaw kay manimbet kunu silan. 26Manang diliꞌ mayu silan pagsilingan. Ya to-o dakulaꞌ adti kamayu ka-ilangan masiling baling na to-o mangud. Aw ya magdumala, ka-ilangan masiling sakanan na sugu-anen. 27Singalan kaꞌ ya matas, ya pigbasa͡an sa kakan aw kun ya nyamasa kanan? Yan saba ya matas ya pigbasa͡an. Manang ini aku saba na nyamasa kamayu.”
28Aw miglong pa uman si Jisus kanilan, “Kamu ya gayed mig-agad-agad kanak dun ni manga kalugan na kya-agiyan ku. 29Yanagaw, asuntu na pigtaliguwan aku na kanak Ama sa pagdumala sa Kasakupan nan, taliguwan ta kamu uman kagaya sa Kasakupan nan, 30pada magdengan kitadun kuman aw minem adti kanak lamisa dun ni kanak Kasakupan. Aw mingkud kamu adti manga trunu aw magdumala kamu aw mag-ukum sa manga buwadbuwad na sampuluꞌ tag duwa (12) ya iseꞌ ni Isra-él na eseg.”
Ya pagpa-edeꞌ ni Jisus na balyaw sakanan ni Pédro
31Tigkas yan, miglong si Jisus kan Pédro, “Kay Simon, pakanyegi ya un ku kanmu paglongun: Pigsekat ni Satanas na tanda-en ya kamayu pagpangintu-u. Ya pagtandaꞌ nan kamayu kasiling na pagbulus sa umay pada matani ya tipig aw ya awun seled. 32Manang nyanawagtawag aku na diliꞌ mu ayawan ya pagpangintu-u mu. Aw sa pagpakalikuꞌ da mu adi kanak, mabatug mu pakabagsegen ya pagpangintu-u na manga eped mu.” 33Aw miglong si Pédro kanan, “Kay Magpalna-uway, magad aku kanmu pangkay adti kalabusuwanan aw adti pagkamatay!” 34Manang tyumubag si Jisus kanan, “Paglongun ta kaw kay Pédro: Sa diliꞌ pa tumaga-uk ya manuk kagaya na gabi, balyaw aku mu na makatlu.”
Ya pagtagilan sa manga allaw na malug
35Pagkatigkas yan, miglong si Jisus kanilan, “Idtu na muna, sa pagsuguꞌ ku kamayu, piglongan ta kamu na diliꞌ kamu magdala sa pu-ut aw kabil aw manga sandal. Na, unu kaꞌ, migkapelek kamu?” Aw tyumubag silan, “Walaꞌ saba.” 36Aw miglong pa si Jisus, “Manang adun, pangkay singalan kamayu ya awun pu-ut aw kabil, dala͡a la mayu. Aw pangkay singalan ya walaꞌ ya kampilan, galinen nan ya kanan kadégkadég aw pagbayad nan sa kampilan. 37Kay ka-ilangan magi kanak matuman ya pigpasulat na Tyumanem asini muna: ‘Nyaka-iyeped sakanan sa manga makasasalaꞌ.’ #22:37 Mabasa adti Isayas 53:12. Aw un da saba yeiy matuman.” 38Aw miglong ya manga umagakan nan, “Kay Magpalna-uway, tanawa! Awun duwa ya kampilan ini.” Aw tyumubag si Jisus, “Umbaꞌ da yan.”
Ya pagpanawagtawag ni Jisus adti Buntud na Manga Olibo
39Aw lyumuwaꞌ si Jisus adti balay aw nyanaw pasinan adti Buntud na Manga Olibo kay yeiy ya kanan kyanalaman. Aw nyagad uman ya manga umagakan nan. 40Aw sa pagdateng da nilan, miglong si Jisus, “Panawagtawag kamu pada diliꞌ kamu degen na pagtandaꞌ.” 41Aw migpa-awat si Jisus kanilan, aw lyumuhud sakanan aw nyanawagtawag, law nan, 42“Kay Ama, kun kaliman mu, kamanga beg kanak ya pagti-is na un ku ka-agiyan. Manang bekeꞌ na kanak pagkaliman ya matuman, kanmu saba pagkaliman ya matuman.” 43[Na, migpakitaꞌ kan Jisus ya sambuk na anghil lekat adti tas na langit aw migpakabagseg kanan. 44Aw asuntu na to-o migkalat ya ginawa nan, nyatibulluk pa sakanan nyanawagtawag. Aw nyantagduꞌ adti lupaꞌ ya init nan kasiling na duguꞌ.]
45Pagkatigkas nan manawagtawag, nyindeg sakanan aw lyumikuꞌ adti manga umagakan nan aw kyinitaꞌ nan na nyampakatulug silan kay to-o migkalat ya ginawa nilan. 46Aw miglong si Jisus kanilan, “Anangaꞌ kamu makatulug? Pagbangun kamu aw panawagtawag pada diliꞌ kamu degen na pagtandaꞌ.”
Ya pagdakep kan Jisus
47Sa talana pa ni Jisus miglong, dyumateng ya madég na manga utaw. Aw ya nyuna kanilan si Judas Iskariyoti na sambuk dun ni sampuluꞌ tag duwa (12) ya apostolés ni Jisus. Dyumulud si Judas adti kan Jisus aw aleki nan,#22:47 Ya katanem adti banwa na Isra-él, ya kanilan pagpangumusta, pag-alekan nilan ya kanilan ubaybay. 48manang miglong si Jisus kanan, “Kay Judas, anangaꞌ mu lubidan aku na Iseꞌ na Utaw magi sa alek?” 49Aw sa pagkitaꞌ na manga umagakan ni Jisus sa un ma-imoꞌ kanan, miglong silan, “Kay Magpalna-uway, unu, pantibasen nami silan na kampilan?” 50Aw pigtibas na sambuk kanilan ya sugu-anen na pangulu na manga magdadugsu-ay, aw dayaw nya-ilap ya kalintu na talinga nan. 51Manang pigsagda sakanan ni Jisus, “Umbaꞌ da yan!” Aw pig-uliꞌ nan ya talinga na sugu-anen aw dayaw nyaka-uliꞌ.
52Na, ya manga nyagad kan Judas na un magdakep kan Jisus, yan ya manga mangkatas na magdadugsu-ay, aw manga magtatunggu-ay sa Témplo, aw manga magdadumala͡ay sa manga Judiyu. Aw miglong si Jisus kanilan, “Anangaꞌ kamu dumala sa manga kampilan aw manga babunal? Kasiling kamu na migdakep sa ribildi! 53Kada allaw awun aku ni Témplo, aw walaꞌ aku mayu dakepa. Manang yeiy da saba ya kamayu selat, aw yeiy da uman ya pagdumala na kangitngit.”
Ya pagbalyaw ni Pédro kan Jisus
54Aw pigdulus nilan si Jisus aw pigpa-agad adti balay na pangulu na manga magdadugsu-ay. Aw dyumalug uman si Pédro kanilan, manang migpa-awatawat sakanan. 55Adti pamanag na balay, migduluk ya manga utaw aw nyan-ingkud silan dun pada manalang. Aw migpalapit uman si Pédro aw nyingkud adti tampid nilan. 56Aw awun sambuk na sugu-anen na bubay na kyumitaꞌ kanan na nyingkud dun, aw pigtengtengan nan si Pédro aw miglong, “Ya utaw ini sambuk uman na eped nan!” 57Manang migbalyaw si Pédro, law nan, “Kay Déꞌ, walaꞌ ku kilala͡a ya utaw yan!” 58Walaꞌ kadugay, awun da uman eseg na kyumitaꞌ kanan, aw law nan, “Ikaw uman ya sambuk na eped nilan.” Manang tyumubag si Pédro, “Bekeꞌ ku, kay Lew!” 59Lyumabay da ya sangka-udas aw miglong pa uman ya sambuk na utaw, “Ya eseg ini eped nilan saba, kay taga Galiliya sakanan!” 60Manang miglong si Pédro, “Kay Lew, walaꞌ ku ka-ede-i ya piglong mu!” Sa talana pa nan miglong, tigkan tyumaga-uk ya manuk. 61Aw lyumingiꞌ si Jisus aw pigtengtengan nan si Pédro. Aw dun da ni Pédro ka-anenganengi ya piglong kanan ni Jisus, “Sa diliꞌ pa tumaga-uk ya manuk kagaya gabi, balyaw aku mu na makatlu.” 62To-o migkalat ya ginawa ni Pédro, yanagaw lyumuwaꞌ sakanan aw to-o migsugaw.
Ya pag-odoy-odoy kan Jisus
63Na, ya manga migtungguꞌ kan Jisus, pig-odoy-odoy nilan sakanan aw pigpanumbag nilan. 64Aw pigtampeng nilan ya mata nan aw piglongan nilan, “Ubatan kanami kun singalan ya migsumbag kanmu!” 65Aw madég pa uman ya tingeg na piglong nilan na pagmulamula kanan.
66Na, pagkamaselem da, migkatipun ya manga magdadumala͡ay sa manga Judiyu, dala ya mangkatas na magdadugsu-ay aw ya manga magpalna-uway sa Uldin. Aw tigkas yan, pigpa-agad nilan si Jisus adti pag-usayan nilan. 67Aw miglong silan kan Jisus, “Ubati kami kun ikaw ya Misiyas.” Manang tyumubag si Jisus kanilan, “Pangkay kun ubatan pa ta kamu, diliꞌ aku mayu pangintu-uwan, 68aw kun usipen ta kamu, diliꞌ kamu uman tumubag. 69Manang agpet da ya allaw na mingkud aku na Iseꞌ na Utaw apit adti kalintu na Tyumanem na To-o Matulus.” 70Aw miglong ya kadég nilan, “Unu kaꞌ, ikaw kadiꞌ ya Iseꞌ na Tyumanem?” Aw tyumubag si Jisus kanilan, “Piglong da mayu saba.” 71Aw miglong silan, “Anangaꞌ pa kitadun maninaw sa eped na un magmatinaw? Dyengeg da tadun saba ya kanan piglong.”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.