Juan 7
7
Si Jisus aw ya manga inulug nan
1Pagkatigkas yan, piglegeb ni Jisus ya banwa na Galiliya. Walaꞌ sakanan kalim kadtu ni probinsiya na Judiya kay kya-ede-an nan na ya manga magdadumala͡ay sa manga Judiyu nyaninaw kanan pada patayen sakanan. 2Na, malapit da magpalekat ya Pista na Manga Layaglayag.#7:2 Ya Pista na Manga Layaglayag, yan ya pag-anenganeng na manga Judiyu sa pag-eyaꞌ na manga tyugbulan nilan adti manga layaglayag na magka-alin-alin adti kaligbinan dun ni manga allaw ni Moysis. Mabasa adti Libitiko 23:34-36. 3Aw piglongan si Jisus na manga inulug nan, “Panaw kaw asini aw kadtu kaw ni Judiya, pada kita-en na manga dyumalug kanmu ya manga milagru na pigpan-imoꞌ mu. 4Kay kun kaliman na utaw magkadengeg, diliꞌ nan pagtagu-un ya kanan manga imo-unun manang pakitaꞌ nan baling adti kadég na utaw!” 5Maynan ya piglong na manga inulug nan kay pangkay silan walaꞌ pangintu-u kan Jisus. 6Yanagaw miglong si Jisus kanilan, “Walaꞌ pa dateng ya allaw na umbaꞌ aku madtu. Manang panaw da kamu sa kamayu kay walaꞌ ya kamayu salang. 7Ya manga utaw na walaꞌ pangintu-u kanak, walaꞌ ya du-an na dumutan kamu nilan. Manang aku pigdumutan nilan kay pigmatinaw ku na malatay ya kanilan imo-unun. 8Kamu la ya kadtu ni pista! Manang diliꞌ aku sa kanak tumambung, kay walaꞌ pa dateng ya allaw na tumanen ku ya palpa na Tyumanem.” 9Yanagaw, pagkatigkas nan maglong seiy, nyatingen pa sakanan dun ni Galiliya.
Ya pagkadtu ni Jisus adti Jérusalim
10Manang sa pagpanaw da na manga inulug ni Jisus na un tumambung sa Pista, nyindeg uman si Jisus aw dyumalug kanilan. Manang walaꞌ sakanan pagpa-edeꞌ sa manga utaw kay diliꞌ malim sakanan kilala͡en. 11Na, dun ni Pista, pigpaninaw sakanan na manga magdadumala͡ay sa manga Judiyu, aw pigpan-usip nilan ya manga utaw, “Ayin yeiy sakanan?” 12Aw mig-ipasuꞌ ya balawbalaw na manga utaw. Ya eped miglong, “Madyaw sakanan na utaw.” Manang miglong ya manga eped, “Bekeꞌ yan na matinaw! Pigpasuway nan baling ya manga utaw magi sa palna-u nan!” 13Manang oloꞌ silan migtumantumanay aw walaꞌ silan paglong adti madég na utaw kay nyallek silan kadamanan na manga magdadumala͡ay sa manga Judiyu.
14Na, sa pagkatenga-tengaꞌ da na Pista,#7:14 Sangkasimana ya Pista na Manga Layaglayag. nyadtu si Jisus adti pamanag na Témplo aw pigpalekat nan ya pagpalna-u. 15Aw sa pagdengeg na manga magdadumala͡ay sa manga Judiyu sa palna-u nan, to-o silan nya-enneng-enneng, aw law nilan, “Ayin lekat ya katadeng nan yeiy? Walaꞌ saba sakanan palna-uwi sa kanaten Uldin.” 16Aw miglong si Jisus kanilan, “Ya palna-u ku kamayu, walaꞌ lekat adi kanaken. Manang lyumekat saba adti migpadala kanak. 17Pangkay singalan ya malim mag-imoꞌ sa pagkaliman na Tyumanem, maka-edeꞌ kun ayin lekat ya palna-u ku, kun lyumekat adti Tyumanem aw kun lekat oloꞌ adi kanak. 18Ya utaw na migpalna-u na lekat adti kanan anenganeng, pigpakadengeg nan oloꞌ ya kanan pagka-utawun. Manang ya migpakadengeg sa migpadala kanan, yan ya tengteng pangintu-uwan kay walaꞌ ya galuꞌ dun ni kanan. 19Endaꞌ, pig-atag kamayu ni Moysis ya Uldin? Manang walaꞌ ya pangkay sambuk kamayu na nyakatuman sa kadég na manga suguꞌ dun. Kay kun pigtuman pa mayu, na, anangaꞌ kaliman aku mayu patayen?” 20Manang miglong ya manga utaw, “Pigseledan kaw gya na busaw! Singalan kaꞌ ya un malim magpatay kanmu?” 21Aw tyumubag si Jisus kanilan, “Nyabelengbeleng kamu kay migpaguliꞌ aku sa utaw dun ni Allaw na Paglagdeng. 22Manang kamu uman, pangkay Allaw na Paglagdeng migtalabahu kamu. Kay pigtuliꞌ mayu ya kamayu mangayseꞌ na eseg kasiling na pigsuguꞌ kamayu ni Moysis, manang ya tengteng matinaw bekeꞌ nan ya mig-atag sa suguꞌ yeiy. Yan saba ya suguꞌ na Tyumanem adti manga tyugbulan tadun asini muna sa walaꞌ pa si Moysis.#7:22 Adti Uldin na manga Judiyu, pagtuli-en ya iseꞌ na eseg sa walungallaw lekat adti pagka͡utaw nan. Mabasa adti Libitiko 12:3. Yanagaw kun Birnis ya pagka͡utaw na iseꞌ, Sabado ya pagtuliꞌ kanan, aw yan ya Allaw na Paglagdeng nilan. 23Kun pigpatuliꞌ mayu ya kamayu manga mangayseꞌ dun ni Allaw na Paglagdeng pada diliꞌ mayu kalakadan ya suguꞌ na Uldin, na, anangaꞌ kamu madaman kanak asuntu sa pagpaguliꞌ ku sa sambuk na utaw dun ni Allaw na Paglagdeng? 24Diliꞌ kamu mag-ukum asuntu oloꞌ sa pigkitaꞌ mayu! Anenganenga mayu una kun unu ya tengteng matinaw pada madyaw ya kamayu pag-ukum.”
Ya pagkatenga-tengaꞌ na anenganeng na manga utaw kun singalan Jisus
25Ya eped na manga utaw na nyeyaꞌ dun ni Jérusalim miglong silan, “Endaꞌ, yeiy ya utaw na un galu patayen na manga magdadumala͡ay tadun na manga Judiyu? 26Manang ini baling sakanan! Aw mig-ubat-ubat adti asdangan na kadég na utaw, aw walaꞌ kanilan ya nyakapaglong kanan! Unu, pig-anenganeng nilan na yeiy ya Misiyas? 27Nya-edeꞌ kitadun kun ayin lekat ya utaw yeiy. Aw kun Misiyas ya dumateng, walaꞌ ya maka-edeꞌ kun ayin sakanan lekat.”
28Yanagaw miglong si Jisus sa mabagseg na tingeg adti manga utaw na pigpalna-uwan nan dun ni pamanag na Témplo, law nan, “Mig-anenganeng kamu na kya-ede-an da mayu kun singalan aku aw kun ayin aku lekat. Manang ya tengteng matinaw walaꞌ mayu ka-ede-i kun ayin aku lekat. Aw bekeꞌ na kanak pagbayaꞌ na nyadi aku. Ya migpadala kanak yan ya lyekatan sa kadég na matinaw, aw walaꞌ mayu sakanan ka-ede-i. 29Manang kya-ede-an ku sakanan kay nyindeg aku lekat adti kanan, aw yan ya migpadala kanak asini!”
30Asuntu sa piglong ni Jisus, kaliman da galu na manga magdadumala͡ay sa manga Judiyu dakepen sakanan, manang walaꞌ ya migdakep kanan kay walaꞌ pa dateng ya umbaꞌ na udas. 31Pangkay maynan ya pig-anenganeng nilan, manang madég pa ya utaw dun na migpakanyeg sa palna-u ni Jisus aw nyangintu-u kanan, aw miglong silan, “Yeiy da saba ya Misiyas, kay walaꞌ ya pangkay singalan na maka-unawa sa kadég na milagru na pigpan-imoꞌ nan.”
Ya pagsuguꞌ sa manga magtatunggu-ay na dakepen si Jisus
32Kyadenggan na manga Parisiyo ya balawbalaw na manga utaw sa manga piglong ni Jisus. Yanagaw migkasambuk ya anenganeng nilan aw ya manga mangkatas na manga magdadugsu-ay, aw pigsuguꞌ nilan ya manga magtatunggu-ay sa Témplo na dakepen nilan si Jisus. 33Yeiy ya du-an na miglong si Jisus sa manga utaw na migkatipun dun, “Tagbiꞌ dakman ya manga allaw ku asini tampid mayu, aw tigkas yan, lumikuꞌ aku adti migpadala kanak. 34Paninawun aku mayu manang diliꞌ da aku mayu kita-en aw diliꞌ kamu makakadtu adti kanaken kadtuwan.” 35Yanagaw, mig-usip-usipay ya manga magdadumala͡ay sa manga Judiyu, law nilan, “Ayin kadiꞌ sakanan kadtu na diliꞌ da naten sakanan kita-en? Unu kaꞌ, madtu sakanan ni banwa na manga Grigo na pig-eya-an na manga eped tadun na Judiyu, aw adtu sakanan pagpalna-u sa manga utaw na Grigo? 36Unu ya kakawasan na piglong nan na ‘Paninawun aku mayu manang diliꞌ da aku mayu kita-en, aw diliꞌ kamu makakadtu adti kanaken kadtuwan’?”
Ya tubig na nyatag sa tengteng ginawa
37Na, dyumateng ya allaw na to-o matas dun ni katigkasan na Pista. Aw nyindeg si Jisus aw miglong sa mabagseg na tingeg adti asdangan na madég to-o na manga utaw, “Pangkay singalan kamayu ya pigtalaynem, madi kanak aw minem. 38Kasiling na pigpasulat na Tyumanem asini muna: ‘Pangkay singalan ya nyangintu-u kanak, miswak adti seled nan ya palangad tubig na matag sa tengteng ginawa.’ ”#7:38 Mabasa adti Zakariyas 14:8 aw Isayas 58:11. 39Na, ya pigpalabet ni Jisus, yan ya Ispiritu Santo na un pa dawaten na manga mangintu-uway. Walaꞌ pa atagan ya Ispiritu kay walaꞌ pa si Jisus ka-engat adti tas na langit na un dumawat sa dengeg na lekat adti kanan Ama.
40Pagdengeg na manga utaw sa piglong ni Jisus, awun manga eped na miglong, “Ya utaw ini, yeiy saba ya Propita na pigtagadan tadun!” 41Aw miglong uman ya manga eped, “Yeiy saba ya Misiyas!” Manang awun manga eped na miglong, “Bekeꞌ yan! Kay ya Misiyas diliꞌ lumekat adti Galiliya. 42Kay pigpasulat na Tyumanem na ya Misiyas lumekat adti buwadbuwad ni Dabid aw ma͡utaw adti Bétléhém na piglekatan ni Dabid asini muna.” 43Yanagaw nyatenga-tengaꞌ ya anenganeng na manga utaw kan Jisus. 44Awun manga eped kanilan na kaliman nilan dakepen sakanan manang walaꞌ nilan ka-imoꞌ ya pagdakep kanan.
Ya manga magdadumala͡ay sa manga Judiyu na walaꞌ pangintu-u kan Jisus
45Sa paglikuꞌ na manga magtatunggu-ay sa Témplo adti manga Parisiyo aw manga mangkatas na magdadugsu-ay, pig-usip silan na manga migsuguꞌ kanilan: “Anangaꞌ na walaꞌ mayu sakanan dakepa aw dala͡a asini?” 46Tyumubag kanilan ya manga magtatunggu-ay, “Walaꞌ pa ya utaw na dyengeg nami na miglong na kasiling na maynan!” 47Aw nyusip ya manga Parisiyo kanilan, “Unu kaꞌ, pangkay kamu, kyagawayan nan uman? 48Sa kadég na migdumala aw kadég nami na manga Parisiyo, singalan kaꞌ ya nyangintu-u sa piglong nan? 49Ya manga utaw asini katipun na migpakanyeg kanan, walaꞌ silan paka-edeꞌ sa Uldin tadun. Katullunan silan!”
50Na, ya sambuk na Parisiyo na si Nikodimo, yan ya nyadtu ni kan Jisus idtu muna na migtengaꞌ da ya gabi. Aw miglong si Nikodimo adti manga eped nan, 51“Walaꞌ tumbayan na Uldin tadun ya pag-ukum sa utaw kun walaꞌ pa dengega lekat adti kanan kun unu ya pig-imoꞌ nan.” 52Aw tyumubag silan kanan, “Unu kaꞌ, taga Galiliya kaw uman? Tanawa aw sadsadi ya pigpasulat na Tyumanem aw ka-ede-an mu na walaꞌ ya propita nan na lumekat adti Galiliya!” 53[Pagkatigkas yan, migsi-uliꞌ ya kadég nilan.]
ទើបបានជ្រើសរើសហើយ៖
Juan 7: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
