Juan 5
5
Ya pagguliꞌ ni Jisus sa utaw adti linaw na Bétésda
1Pagkatigkas yan, nyadtu si Jisus adti Jérusalim na un tumambung sa Pista na manga Judiyu. 2Na, adti syudad na Jérusalim, awun linaw na pigngalanan adti tingeg na Hibriyu, Bétésda.#5:2 Adti eped na kopya na Grigo: Bétsata aw Bétsayda. Ya linaw yeiy malapit adti suwangan na pag-agiyan na manga karniro, aw kyapalibedan na lima ya silunganan. 3Aw dun ni manga silunganan yeiy, kyumulang ya madég na manga utaw na awun magkedel, kasiling na manga buta, aw manga pulid aw manga kimay. 4[Migtagad silan na mag-inang ya tubig. Kay awun kunu udas na magpanog ya anghil na Tyumanem na un magpa-inang sa tubig. Aw kun singalan ya maka-una magtingelem adti tubig na pigpa-inang na anghil, kaguli-an pangkay unu ya magkedel nan.] 5Na, awun sambuk na eseg dun na awun magkedel nan na seled da na katluwan tag walu (38) ka umay. 6Aw pigkitaꞌ ni Jisus na kyumulang sakanan dun, aw kya-ede-an nan uman na to-o la madugay ya magkedel nan. Yanagaw nyusip si Jisus kanan, “Unu, kaliman mu kaguli-an?” 7Tyumubag ya eseg, “Kay Sir, walaꞌ beg ya utaw na malim dumala kanak adti linaw kun mag-inang da ya tubig. Talana pa ku migpasinan adtu, awun da nyaka-una kanak na eped na utaw.” 8Aw miglong si Jisus kanan, “Pagbangun kaw! Dala͡a ya kamen mu aw panaw da kaw!” 9Aw dayaw kyaguli-an ya eseg yan. Aw dyala nan ya kanan kamen aw panaw da.
Na, nya-imoꞌ yeiy dun ni Allaw na Paglagdeng. 10Yanagaw miglong ya manga magdadumala͡ay sa manga Judiyu adti eseg na bagu kyaguli-an, law nilan, “Adun ya Allaw na Paglagdeng! Walaꞌ saba tumbayan ya pagdala sa kamen!”#5:10 Ya manga magpalna-uway sa manga Judiyu, pigdugangan nilan na katluwan tag siyam (39) ya pigpigil na diliꞌ imo-un dun ni Allaw na Paglagdeng. Aw ya sambuk na pigpigil nilan, yan ya diliꞌ magdala ya utaw sa pangkay unu dun ni Allaw na Paglagdeng. 11Manang pigtubag nan silan, “Ya utaw na migguliꞌ kanaken, yan ya migsuguꞌ kanak, law nan, ‘Dala͡a ya kamen mu aw panaw da kaw.’ ” 12Aw nyusip silan kanan, “Singalan ya utaw yan na miglong kanmu?” 13Manang walaꞌ na eseg yan kilala͡a kun singalan ya migguliꞌ kanan. Kay nyanaw da si Jisus asuntu na madég to-o ya manga utaw dun.
14Pagkatigkas yan, pigkitaꞌ ni Jisus ya eseg yan adti pamanag na Témplo aw piglongan nan, “Tanawa! Migkadyaw da kaw. Yanagaw diliꞌ da kaw magpakasalaꞌ pagaw to-o pa malatay ya dumateng kanmu.” 15Aw nyadtu ya eseg yan adti manga magdadumala͡ay sa manga Judiyu aw piglongan nan silan na si Jisus ya migguliꞌ kanan. 16Yanagaw, asuntu sa pagguliꞌ ni Jisus dun ni Allaw na Paglagdeng, dun da pagpalekat ya palpa nilan na pamulayaman si Jisus.
17Manang miglong si Jisus kanilan, “Migpadeleg ya kanak Ama sa kanan imo-unun. Yanagaw magpadeleg aku uman.” 18Aw asuntu sa piglong ni Jisus, to-o pa nilan kaliman na patayen sakanan. Aw bekeꞌ oloꞌ na kyalakadan nan ya suguꞌ sa Allaw na Paglagdeng, manang yan ya to-o nilan kyadaman ya piglong ni Jisus na Ama nan ya Tyumanem, na ya kakawasan: migpa-unawa sakanan sa Tyumanem.
Ya katundanan ni Jisus na lyumekat adti Ama
19Yanagaw miglong si Jisus kanilan, “Matinaw saba ya un ku paglongun kamayu: Aku na Iseꞌ na Tyumanem, walaꞌ ya un ku mabatug kun walaꞌ ya katundanan ku na lekat adti kanak Ama. Yan oloꞌ ya pig-imoꞌ ku ya kyinitaꞌ ku na pig-imoꞌ nan. Kay kun unu ya pig-imoꞌ na Ama, yan uman ya pig-imoꞌ ku na Iseꞌ nan. 20Kay pigginawa͡an aku na Ama, aw pigpakitaꞌ nan kanak ya kadég na kanan pigpan-imoꞌ. Aw pangkay awun da kyinitaꞌ mayu na pig-imoꞌ nan, manang to-o pa dun dakulaꞌ ya un nan pakitaꞌ magi kanak na Iseꞌ nan, pada to-o pa kamu ma-enneng-enneng. 21Ya Ama magpakamataw sa manga nyangkamatay aw mag-atag adti manga utaw sa ginawa, maynan uman aku na Iseꞌ nan maka-atag sa ginawa adti pangkay singalan ya kaliman ku atagan. 22Aw bekeꞌ na Ama ya mag-ukum sa manga utaw, kay pig-atag da nan adti kanak na Iseꞌ nan ya kadakulaꞌ na katundanan sa pag-ukum, 23pada aku na Iseꞌ nan basa͡an na kadég na utaw kasiling na pagpamasa nilan sa Ama. Yanagaw pangkay singalan ya walaꞌ pamasa kanak na Iseꞌ nan, walaꞌ nilan uman basayi ya Ama na migpadala kanak.
24“Matinaw ya un ku paglongun kamayu: Pangkay singalan ya migpakanyeg sa ubat-ubat ku aw nyangintu-u sa migpadala kanak, yan ya utaw na nyakatagtun da sa ginawa na walaꞌ ya katigkasan. Aw diliꞌ sakanan ukuman na pa-emel-emelen kay walaꞌ da sakanan ka-eleti adti Tyumanem aw pig-atagan da na tengteng ginawa. 25Matinaw saba uman ya un ku paglongun kamayu: Ya manga utaw na kya-eletan pa lekat adti Tyumanem kasiling silan na nyatay, manang dyumateng da ya allaw na dumengeg silan sa tingeg ku na Iseꞌ na Tyumanem. Aw ya kadég na magpakanyeg aw mangintu-u sa ubat-ubat ku, silan ya atagan sa bagu na ginawa. 26Kay ya Ama, yan ya lyekatan sa ginawa, aw kanan pagbayaꞌ na aku na Iseꞌ nan lekatan uman sa ginawa. 27Aw pig-atagan aku nan uman na katundanan sa pag-ukum asuntu na aku ya Iseꞌ na Utaw. 28Diliꞌ kamu magkabelengbeleng sa tingeg ku, kay dumateng saba ya udas na dengegen na kadég na nyangkamatay ya tingeg ku na Iseꞌ na Utaw 29aw lumuwaꞌ silan lekat adti kanilan manga lebeng. Ya manga utaw na mig-imoꞌ sa madyaw, un silan matawun aw atagan sa ginawa na walaꞌ ya katigkasan. Aw ya manga utaw na mig-imoꞌ sa malatay, matawun silan uman manang ukuman na pa-emel-emelen.
Ya manga migmatinaw kun singalan si Jisus
30“Walaꞌ ya un ku mabatug kun aku oloꞌ. Ya kanak pag-ukum magi saba sa piglong na kanaken Ama, aw matinaw ya pag-ukum ku. Diliꞌ aku makabayaꞌ mag-ukum manang ya migpadala kanak yan ya magbayaꞌ. 31Na, kun aku oloꞌ ya magmatinaw adti manga utaw sa kanaken pagka-utawun, diliꞌ kamu mangintu-u na matinaw ya piglong ku. 32Manang awun pa sambuk na migmatinaw kanak, aw nya-edeꞌ aku na alag saba umbaꞌ ya piglong nan kun singalan aku. 33Awun saba pigsuguꞌ mayu na manga utaw adti kan Juan na Magba͡utismuway pada usipen sakanan, aw pigmatinaw aku nan adti kanilan. 34Walaꞌ aku pagsalig sa utaw na mig-ubat-ubat kun singalan aku, manang pigkasampetan ku yeiy oloꞌ pada paluwa-en kamu na Tyumanem. 35Si Juan kasiling na saleng na syumiga, aw migleya kamu dagawdagaw asuntu na kya-ilawan kamu sa ubat-ubat nan. 36Manang awun pa to-o matas kay kan Juan na migmatinaw kanak. Ya manga imo-unun na pigpa-imoꞌ kanak na Ama na un ku lingeben, yeiy saba ya migmatinaw na pigpadala aku nan. 37Aw ya Ama na migpadala kanak, yan ya tengteng na migmatinaw kun singalan aku. Manang kamu, walaꞌ mayu pakanyegi ya piglong nan, aw walaꞌ mayu sakanan kita-a. 38Aw walaꞌ mayu betangan adti kamayu anenganeng ya manga tingeg nan. Kay walaꞌ mayu pangintu-uwi ya kanan pigpadala. 39Pigsadsadan mayu ya pigpasulat na Tyumanem, kay mig-anenganeng kamu na magi dun ni pagsadsad mayu matagtun mayu ya ginawa na walaꞌ ya katigkasan. Manang adti pigpasulat nan, aku saba ya pigmatinaw dun! 40Manang diliꞌ kamu baling malim magpalapit adi kanak pada matagtun mayu galu ya ginawa na walaꞌ ya katigkasan!
41“Walaꞌ aku pagtagad na deyen na manga utaw. 42Manang kya-ede-an ku ya awun ni kamayu anenganeng na walaꞌ ya pagginawa mayu sa Tyumanem. 43Nyadi aku dun ni ngalan na kanak Ama, manang walaꞌ aku mayu dawata aw walaꞌ aku mayu pakanyegi. Kun awun eped na dumateng magi oloꞌ sa kanan pagbayaꞌ, maksay mayu baling pigdawat. 44Unun mayu ya pagpangintu-u kanak, kun yan oloꞌ ya pagkaliman mayu ya pagsayaꞌ na eped na utaw aw walaꞌ mayu kalimi ya pagsayaꞌ na lyumekat adti tengteng Tyumanem? 45Manang diliꞌ kamu mag-anenganeng na aku ya maglimanda kamayu adti asdangan na Ama. Si Moysis na gayed mayu pig-iman, yan ya maglimanda kamayu. 46Kay kun tengteng kamu nyangintu-u kan Moysis, mangintu-u kamu uman kanak, kay aku saba ya pigpalabet nan dun ni kanan pigsulat. 47Manang kun walaꞌ mayu pangintu-uwi ya pigsulat nan, na, unun mayu ya pagpangintu-u sa piglong ku kamayu?”
ទើបបានជ្រើសរើសហើយ៖
Juan 5: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
Juan 5
5
Ya pagguliꞌ ni Jisus sa utaw adti linaw na Bétésda
1Pagkatigkas yan, nyadtu si Jisus adti Jérusalim na un tumambung sa Pista na manga Judiyu. 2Na, adti syudad na Jérusalim, awun linaw na pigngalanan adti tingeg na Hibriyu, Bétésda.#5:2 Adti eped na kopya na Grigo: Bétsata aw Bétsayda. Ya linaw yeiy malapit adti suwangan na pag-agiyan na manga karniro, aw kyapalibedan na lima ya silunganan. 3Aw dun ni manga silunganan yeiy, kyumulang ya madég na manga utaw na awun magkedel, kasiling na manga buta, aw manga pulid aw manga kimay. 4[Migtagad silan na mag-inang ya tubig. Kay awun kunu udas na magpanog ya anghil na Tyumanem na un magpa-inang sa tubig. Aw kun singalan ya maka-una magtingelem adti tubig na pigpa-inang na anghil, kaguli-an pangkay unu ya magkedel nan.] 5Na, awun sambuk na eseg dun na awun magkedel nan na seled da na katluwan tag walu (38) ka umay. 6Aw pigkitaꞌ ni Jisus na kyumulang sakanan dun, aw kya-ede-an nan uman na to-o la madugay ya magkedel nan. Yanagaw nyusip si Jisus kanan, “Unu, kaliman mu kaguli-an?” 7Tyumubag ya eseg, “Kay Sir, walaꞌ beg ya utaw na malim dumala kanak adti linaw kun mag-inang da ya tubig. Talana pa ku migpasinan adtu, awun da nyaka-una kanak na eped na utaw.” 8Aw miglong si Jisus kanan, “Pagbangun kaw! Dala͡a ya kamen mu aw panaw da kaw!” 9Aw dayaw kyaguli-an ya eseg yan. Aw dyala nan ya kanan kamen aw panaw da.
Na, nya-imoꞌ yeiy dun ni Allaw na Paglagdeng. 10Yanagaw miglong ya manga magdadumala͡ay sa manga Judiyu adti eseg na bagu kyaguli-an, law nilan, “Adun ya Allaw na Paglagdeng! Walaꞌ saba tumbayan ya pagdala sa kamen!”#5:10 Ya manga magpalna-uway sa manga Judiyu, pigdugangan nilan na katluwan tag siyam (39) ya pigpigil na diliꞌ imo-un dun ni Allaw na Paglagdeng. Aw ya sambuk na pigpigil nilan, yan ya diliꞌ magdala ya utaw sa pangkay unu dun ni Allaw na Paglagdeng. 11Manang pigtubag nan silan, “Ya utaw na migguliꞌ kanaken, yan ya migsuguꞌ kanak, law nan, ‘Dala͡a ya kamen mu aw panaw da kaw.’ ” 12Aw nyusip silan kanan, “Singalan ya utaw yan na miglong kanmu?” 13Manang walaꞌ na eseg yan kilala͡a kun singalan ya migguliꞌ kanan. Kay nyanaw da si Jisus asuntu na madég to-o ya manga utaw dun.
14Pagkatigkas yan, pigkitaꞌ ni Jisus ya eseg yan adti pamanag na Témplo aw piglongan nan, “Tanawa! Migkadyaw da kaw. Yanagaw diliꞌ da kaw magpakasalaꞌ pagaw to-o pa malatay ya dumateng kanmu.” 15Aw nyadtu ya eseg yan adti manga magdadumala͡ay sa manga Judiyu aw piglongan nan silan na si Jisus ya migguliꞌ kanan. 16Yanagaw, asuntu sa pagguliꞌ ni Jisus dun ni Allaw na Paglagdeng, dun da pagpalekat ya palpa nilan na pamulayaman si Jisus.
17Manang miglong si Jisus kanilan, “Migpadeleg ya kanak Ama sa kanan imo-unun. Yanagaw magpadeleg aku uman.” 18Aw asuntu sa piglong ni Jisus, to-o pa nilan kaliman na patayen sakanan. Aw bekeꞌ oloꞌ na kyalakadan nan ya suguꞌ sa Allaw na Paglagdeng, manang yan ya to-o nilan kyadaman ya piglong ni Jisus na Ama nan ya Tyumanem, na ya kakawasan: migpa-unawa sakanan sa Tyumanem.
Ya katundanan ni Jisus na lyumekat adti Ama
19Yanagaw miglong si Jisus kanilan, “Matinaw saba ya un ku paglongun kamayu: Aku na Iseꞌ na Tyumanem, walaꞌ ya un ku mabatug kun walaꞌ ya katundanan ku na lekat adti kanak Ama. Yan oloꞌ ya pig-imoꞌ ku ya kyinitaꞌ ku na pig-imoꞌ nan. Kay kun unu ya pig-imoꞌ na Ama, yan uman ya pig-imoꞌ ku na Iseꞌ nan. 20Kay pigginawa͡an aku na Ama, aw pigpakitaꞌ nan kanak ya kadég na kanan pigpan-imoꞌ. Aw pangkay awun da kyinitaꞌ mayu na pig-imoꞌ nan, manang to-o pa dun dakulaꞌ ya un nan pakitaꞌ magi kanak na Iseꞌ nan, pada to-o pa kamu ma-enneng-enneng. 21Ya Ama magpakamataw sa manga nyangkamatay aw mag-atag adti manga utaw sa ginawa, maynan uman aku na Iseꞌ nan maka-atag sa ginawa adti pangkay singalan ya kaliman ku atagan. 22Aw bekeꞌ na Ama ya mag-ukum sa manga utaw, kay pig-atag da nan adti kanak na Iseꞌ nan ya kadakulaꞌ na katundanan sa pag-ukum, 23pada aku na Iseꞌ nan basa͡an na kadég na utaw kasiling na pagpamasa nilan sa Ama. Yanagaw pangkay singalan ya walaꞌ pamasa kanak na Iseꞌ nan, walaꞌ nilan uman basayi ya Ama na migpadala kanak.
24“Matinaw ya un ku paglongun kamayu: Pangkay singalan ya migpakanyeg sa ubat-ubat ku aw nyangintu-u sa migpadala kanak, yan ya utaw na nyakatagtun da sa ginawa na walaꞌ ya katigkasan. Aw diliꞌ sakanan ukuman na pa-emel-emelen kay walaꞌ da sakanan ka-eleti adti Tyumanem aw pig-atagan da na tengteng ginawa. 25Matinaw saba uman ya un ku paglongun kamayu: Ya manga utaw na kya-eletan pa lekat adti Tyumanem kasiling silan na nyatay, manang dyumateng da ya allaw na dumengeg silan sa tingeg ku na Iseꞌ na Tyumanem. Aw ya kadég na magpakanyeg aw mangintu-u sa ubat-ubat ku, silan ya atagan sa bagu na ginawa. 26Kay ya Ama, yan ya lyekatan sa ginawa, aw kanan pagbayaꞌ na aku na Iseꞌ nan lekatan uman sa ginawa. 27Aw pig-atagan aku nan uman na katundanan sa pag-ukum asuntu na aku ya Iseꞌ na Utaw. 28Diliꞌ kamu magkabelengbeleng sa tingeg ku, kay dumateng saba ya udas na dengegen na kadég na nyangkamatay ya tingeg ku na Iseꞌ na Utaw 29aw lumuwaꞌ silan lekat adti kanilan manga lebeng. Ya manga utaw na mig-imoꞌ sa madyaw, un silan matawun aw atagan sa ginawa na walaꞌ ya katigkasan. Aw ya manga utaw na mig-imoꞌ sa malatay, matawun silan uman manang ukuman na pa-emel-emelen.
Ya manga migmatinaw kun singalan si Jisus
30“Walaꞌ ya un ku mabatug kun aku oloꞌ. Ya kanak pag-ukum magi saba sa piglong na kanaken Ama, aw matinaw ya pag-ukum ku. Diliꞌ aku makabayaꞌ mag-ukum manang ya migpadala kanak yan ya magbayaꞌ. 31Na, kun aku oloꞌ ya magmatinaw adti manga utaw sa kanaken pagka-utawun, diliꞌ kamu mangintu-u na matinaw ya piglong ku. 32Manang awun pa sambuk na migmatinaw kanak, aw nya-edeꞌ aku na alag saba umbaꞌ ya piglong nan kun singalan aku. 33Awun saba pigsuguꞌ mayu na manga utaw adti kan Juan na Magba͡utismuway pada usipen sakanan, aw pigmatinaw aku nan adti kanilan. 34Walaꞌ aku pagsalig sa utaw na mig-ubat-ubat kun singalan aku, manang pigkasampetan ku yeiy oloꞌ pada paluwa-en kamu na Tyumanem. 35Si Juan kasiling na saleng na syumiga, aw migleya kamu dagawdagaw asuntu na kya-ilawan kamu sa ubat-ubat nan. 36Manang awun pa to-o matas kay kan Juan na migmatinaw kanak. Ya manga imo-unun na pigpa-imoꞌ kanak na Ama na un ku lingeben, yeiy saba ya migmatinaw na pigpadala aku nan. 37Aw ya Ama na migpadala kanak, yan ya tengteng na migmatinaw kun singalan aku. Manang kamu, walaꞌ mayu pakanyegi ya piglong nan, aw walaꞌ mayu sakanan kita-a. 38Aw walaꞌ mayu betangan adti kamayu anenganeng ya manga tingeg nan. Kay walaꞌ mayu pangintu-uwi ya kanan pigpadala. 39Pigsadsadan mayu ya pigpasulat na Tyumanem, kay mig-anenganeng kamu na magi dun ni pagsadsad mayu matagtun mayu ya ginawa na walaꞌ ya katigkasan. Manang adti pigpasulat nan, aku saba ya pigmatinaw dun! 40Manang diliꞌ kamu baling malim magpalapit adi kanak pada matagtun mayu galu ya ginawa na walaꞌ ya katigkasan!
41“Walaꞌ aku pagtagad na deyen na manga utaw. 42Manang kya-ede-an ku ya awun ni kamayu anenganeng na walaꞌ ya pagginawa mayu sa Tyumanem. 43Nyadi aku dun ni ngalan na kanak Ama, manang walaꞌ aku mayu dawata aw walaꞌ aku mayu pakanyegi. Kun awun eped na dumateng magi oloꞌ sa kanan pagbayaꞌ, maksay mayu baling pigdawat. 44Unun mayu ya pagpangintu-u kanak, kun yan oloꞌ ya pagkaliman mayu ya pagsayaꞌ na eped na utaw aw walaꞌ mayu kalimi ya pagsayaꞌ na lyumekat adti tengteng Tyumanem? 45Manang diliꞌ kamu mag-anenganeng na aku ya maglimanda kamayu adti asdangan na Ama. Si Moysis na gayed mayu pig-iman, yan ya maglimanda kamayu. 46Kay kun tengteng kamu nyangintu-u kan Moysis, mangintu-u kamu uman kanak, kay aku saba ya pigpalabet nan dun ni kanan pigsulat. 47Manang kun walaꞌ mayu pangintu-uwi ya pigsulat nan, na, unun mayu ya pagpangintu-u sa piglong ku kamayu?”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.