Juan 16
16
1“Piglong da ku dadan ya kadég yeiy kamayu pada diliꞌ kamu makasuway sa pagpangintu-u mayu kanak. 2Alilinan kamu na manga magdadumala͡ay sa manga Judiyu dun ni manga sinagoga. Aw dumateng pa ya manga allaw na kun singalan ya magpatay kamayu iman nilan aw kyatutukan ya Tyumanem sa pig-imoꞌ nilan. 3Maynini ya imo-un nilan kamayu kay walaꞌ nilan ka-ede-i ya Ama aw walaꞌ nilan uman ka-ede-i aku. 4Manang piglong ku yeiy dadan pada kun ma-imoꞌ ya maynan, ka-anenganengan mayu ya pigpa-edeꞌ ku kamayu.
Ya imo-unun na Ispiritu Santo
“Idtu muna, walaꞌ ku kamayu ubat-ubatan ya kadég yeiy kay ini pa aku ni tampid mayu. 5Manang adun, agpet da aku lumikuꞌ adti Ama na migpadala kanak, aw walaꞌ ya pangkay sambuk kamayu na nyusip kun ayin aku kadtu. 6Aw sa pag-ubat ku yeiy adti kamayu, migkalat da baling ya ginawa mayu. 7Manang matinaw ya paglongun ku kamayu: To-o madyaw kamayu na indegan ta kamu. Kay kun diliꞌ aku mindeg asini, diliꞌ dumateng ya mag-apitay na yan ya Ispiritu Santo na magpalna-u kamayu. Manang kun mindeg aku, un ku padala sakanan adti kamayu. 8Aw sa pagdateng da nan asini, pa-edeꞌ nan sa manga utaw kun unu ya manga salaꞌ nilan, aw pa-edeꞌ nan uman kanilan na walaꞌ ya salaꞌ asini kanak, aw ya Tyumanem yan ya mag-ukum kanilan. 9Bangalen nan adti kanilan na nyakasalaꞌ silan kay walaꞌ aku nilan pangintu-uwi. 10Aw bangalen nan uman adti kanilan na walaꞌ ya salaꞌ dun ni kanak, yanagaw lumikuꞌ aku adti tampid na Ama aw diliꞌ da kamu kumitaꞌ kanak. 11Aw bangalen nan uman kanilan na ya Tyumanem yan ya mag-ukum sa manga utaw kay pig-ukuman da nan ya migdumala asini tas na lupaꞌ na si Satanas.
12“Madég pa galu ya un ku paglongun kamayu manang malug pa mayu adun kalabetan. 13Pagdateng da na Ispiritu Santo, alag matinaw ya paglongun nan aw gagaden nan ya anenganeng mayu adti pagka-edeꞌ sa kadég na matinaw. Kay ya palna-u nan kamayu diliꞌ lekat adti kanan manang yan oloꞌ ya pa-edeꞌ nan ya kanan pigdengeg. Pa-edeꞌ nan uman kamayu kun unu ya un dumateng. 14Aw ya Ispiritu, patasen nan ya kanak dengeg. Kay ubat nan ya pangkay unu na dengegen nan lekat adti kanak, aw pa-edeꞌ nan adti kamayu. 15Ya kadég na adti anenganeng na Ama, yan uman ya kanak. Yanagaw pangkay unu ya dengegen na Ispiritu lekat adti kanak, yan uman ya pa-edeꞌ nan adti kamayu.
Ya kakalatan na ginawa kasayuwan na pagleya
16“Na, dakman tagbiꞌ ya pagsambuk tadun aw diliꞌ da aku mayu kita-en, manang diliꞌ madugay uman da aku mayu kita-en.” 17Asuntu sa piglong ni Jisus kanilan, mig-usip-usipay ya manga umagakan nan, “Unu ya kakawasan na piglong nan na ‘Dakman tagbiꞌ ya pagsambuk tadun aw diliꞌ da aku mayu kita-en, manang diliꞌ madugay uman da aku mayu kita-en’? Aw miglong pa uman sakanan, ‘Lumikuꞌ aku adti tampid na Ama.’ ” 18Aw gayed silan mig-usip-usipay na maglong, “Unu ya pyalabet nan na ‘diliꞌ madugay’? Walaꞌ tadun ka-ede-i kun unu ya pyalabet nan.”
19Na, kya-ede-an ni Jisus na kaliman nilan galu musip kanan, yanagaw piglongan nan silan, “Endaꞌ, mig-usip-usipay kamu kun unu ya kakawasan na piglong ku kakayna na ‘Dakman tagbiꞌ ya pagsambuk tadun aw diliꞌ da aku mayu kita-en, manang diliꞌ madugay uman da aku mayu kita-en’? 20Matinaw ya un ku paglongun kamayu: Magsugaw kamu asuntu sa kakalatan na ginawa mayu, manang ya manga utaw na walaꞌ pangintu-u kanak, magleya silan. Aw pangkay magkalat ya ginawa mayu, manang ya kakalatan yan kasayuwan saba na pagleya. 21Kasiling na ka͡ubayan na migti-is pyetesan. Manang sa pagka͡utaw da na iseꞌ nan, kalingawan da nan ya pagti-is asuntu na magleya sakanan kay nya͡utaw da ya kanan iseꞌ. 22Maynan uman kamu. Migkalat ya ginawa mayu adun asuntu sa piglong ku kamayu, manang diliꞌ madugay magkakita͡ay kitadun salut aw to-o kamu magleya. Aw walaꞌ ya pangkay singalan na makakamang sa pagleya na awun ni kamayu.
23“Dun ni allaw yan, bekeꞌ da aku ya sekatan mayu. Matinaw ya un ku paglongun kamayu: Pangkay unu ya sekaten mayu adti Ama magi sa kanak ngalan, un nan saba imo-un kamayu. 24Taman adun, walaꞌ kamu pagsekat sa pangkay unu adti kanan magi sa kanak ngalan. Manang adun, pagsekat da kamu, aw atag nan saba pada malingeb ya kamayu pagleya.
Pigdeg da ni Jisus ya katulus ni Satanas
25“Miglong aku kamayu adun magi sa manga pundinganan, manang dumateng ya allaw na diliꞌ da aku maglong kamayu magi sa manga pundinganan manang bangalen da ku adti kamayu ya kana Ama ku. 26Dun ni allaw yan, kamu la ya magsekat adti kanan dun ni pagpanawagtawag mayu magi sa kanak ngalan. Diliꞌ da ka-ilangan na aku ya magsekat adti Ama pada kamayu. 27Pigginawa͡an kamu na Ama asuntu na gyuminawa kamu kanak aw nyangintu-u kamu na aku lekat adti Ama. 28Lyumekat aku adti Ama, aw nyadi aku asini tas na lupaꞌ. Manang adun, indegan da ku ya banwa ini aw lumikuꞌ da aku adti Ama.”
29Aw miglong ya manga umagakan nan, “Kyalabetan da nami adun ya piglong mu kay bekeꞌ da na pundinganan ya piggamit mu! 30Nya-edeꞌ da kami na kya-ede-an mu ya kadég. Pangkay walaꞌ pa kami usip kanmu, dadan da mu kya-ede-an ya kanami pig-anenganeng. Yanagaw nyangintu-u la kami na lekat kaw adti Tyumanem.” 31Aw nyusip si Jisus kanilan, “Unu, tengteng kamu nyangintu-u kanak? 32Dumateng ya udas aw adun migpalekat da saba na magpansibeklag kamu mampamalaguy pasinan adti kamayu manga balay. Aw ayawan aku mayu na oloꞌ ku sayda. Manang bekeꞌ na sayda ku oloꞌ kay gayed aku pig-agad-agadan na kanak Ama. 33Ya kadég yeiy, piglong da ku kamayu pada awun kalinaw mayu asuntu na nyangintu-u kamu kanak. Asini tas na lupaꞌ, magti-is kamu sa madég na kalugan. Manang diliꞌ magkalumay ya ginawa mayu, kay pigdeg da ku ya kadég na malatay asini tas na lupaꞌ na nyatu sa Tyumanem.”
ទើបបានជ្រើសរើសហើយ៖
Juan 16: klgv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Wycliffe Bible Translators, Inc. All rights reserved.
