Utumbuli 9
9
Sapanga juhenga lilaganu na Noa
1Sapanga ampengila Noa na bana mundu, jaapwagila, “Mmbelikana mkajonzukika, mkatwelakiya nndema. 2Inyama yoti, ijuni yoti yu nnani, iumbi yoti yeikwaba panani ju nndema na homba yoti yu mu nhanga itenda kunzogopa mwanganya. Yoti aibei pai ju uwesu winu. 3Inyama yoti yomi yiibiya posu inu ngati enumpeki mimea kuba posu jinu. 4Lakini mwiikula inyama jejibii na mwai, ndaba womi gubii mmwai. 5Nampekiya azabu kila mundu jojankoma nnzaki. Nakikoma kila kinyama sesankoma mundu. 6Joankoma mundu, najombi jikomika na mundu, ndaba Sapanga ambombiki mundu ku kulengana naku.”
7Nanamu mmbelikana, mwakajonzukika, “Mmbelikana ngani, mwakajonzukika mu nndema.”
8Ndipala Sapanga ampwagila Noa na bana baki, 9“Lelenu meka lilaganu langu na mwanganya ni kibeleku sinu, 10ni iumbi yoti yomi, Ijuni ni inyama yukupugwa ni inyama imwikioli na yoti yeihumiki mu sapina pamu na mwanganya. 11Meka lilaganu langu na mwanganya ana iumbi yoti yomi nganaikomi kabee kwa masi gingi wala ngakwipitii kabeti masi gingi gukuhalabana nndema.” 12Kabee Sapanga jaapwaga, “Jenze ndi alama ji lilaganu lenhenga kati jangu na mwanganya na kila kiumbi somi sesabii pamu na mwanganya kwi ibeleku yoti yeihika. 13Meka lusisi lwangu ku maundi, nalwombi lwibiya nginyuli ji lilaganu kati jangu nu nndema. 14Kila panaliyekaliya lianga na maundi giiyula, nu lusisi lwi iyula elwibonikana mu maundi, 15nalikombuka lilaganu langu lemei na mwanganya ni iumbi yomi yoti. Masi gingi ngagipiti kabee nu kukoma iumbi yomi yoti. 16Lusisi lwe holu elwipitila mu maundi, nalubona nu kulikomboka lilaganu le heli la yaka yanga na mwisu kati jangu ni iumbi yomi yoti yu punndema.” 17Sapanga ampwagila Noa, “Jenze ndi nginyuli jejuje nijihengiki ni iumbi yomi yoti punndema.”
Noa na bana baki
18Bana baka Noa babapita mu sapina babiya Shemu na Amu na Japeti. Amu babia atati baka Kanani. 19Haba ndi bana atatu baka Noa nu kupete bombi bandu boti baenia pundema.
20Noa jabiya nndemi, na jwabiya mundu ju utumbuli kulema litui li mizabibu, 21jakunywa divai, jalobila ndienu jagonila heu mu lihema laki. 22Amu atati baka Kanani, bijibweni heu ja atati baki, japita kunza nakaapwagi akalongu mundu abeli bala. 23Lakini Shemu na Japeti bajukua suka, bijibeka mwamabega gabu, bajenda kihanganyuma nukuyekale heu ja atati babu. Balingaliya mulutengu, wala ngasebijibweni heu ja atati babu. 24Noa ejakikanuka nu kumanya seanhengi mwanamundu nsoku, 25japwaaga,
“Kanani jupata yambamba!
Jiibiya ntumwa kwaka alongu baki.” 26Kabee japwaaga,
“Shemu jupengiliwa na Bambu Sapanga wangu!
Kanani jubiya ntumwa kwaka Shemu. 27Sapanga anzonzukiya mipaka ja musi waki Japeti,
ibeleku yaki itama pamu na bandu baka Shemu,
Kanani jubiya ntumwa waka Japeti.”
28Noa jatama yaka mia tatu hamsini egapeta masi gingi, 29ndienu jatenda kuwa koni jubii wa yaka mia tisa hamsini.
ទើបបានជ្រើសរើសហើយ៖
Utumbuli 9: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.