Utumbuli 46
46
Yakobu jujenda ku Misili
1Ndienu, Yakobu jatumbuliya sapwali jaki pamu na mali gaki goa. Pajahika ku Beelisheba, ampikia matambiku Sapanga waka Isaka, atati baki. 2Sapanga jalongila na Yakobu mumabonu ikilu ankema, “Yakobu, Yakobu!”
Yakobu jajetika, “Hena mi pambane.”
3Sapanga ampwagila, “Nepani ndi Sapanga, Sapanga wa atati bako. Wiijogopa kujenda ku Misili, ewibiya hoku naguhenga gubiya waatati ba bandu bingi. 4Nepani namweti ngiti nyenda pamu nawehapa ku Misili hoku, kabee naikelubua ibeleku yaku mu nndema guku Kaanani gongo. Pawiikuwa kuboku kwaka Josepu ndi kokwiyekaliya mihu gaku.”
5Ndienu, Yakobu jaboka ku Beelisheba. Bana baki bunzukua jombi, bana babu akeki na akahanu babu mu magali gaguge Falau japelika gukunzukua. 6Bajukua kabee, mipugu na mali gabu goa gababiya apatiki mu nndema uku Kanani, bajenda ku Misili. Yakobu jajukua ibeleku yaki yoti. 7Jaajukua bana baki akanalomi, asoku baki akanalomi na bana baki akambomba na asoko baki akammbomba, boti jaaleta ku Misili.
8Bana akanalomi baka Izilaeli babapiti ku Misili pamu najombi babiya Lubeni mwana ju utumbuli jwaka Izilaeli. 9Bana akanalomi baka Lubeni, Henoki na Palu na Hesiloni na Kalimi. 10Bana akanalomi baka akanalomi baka Simoni babiya, Jemueli na Yamini na Ohadi na Yakini na Sohali na Shauli, jojabelakika nu mmbomba juku Kanani. 11Bana akanalomi baka Lawi babiya, Gelushoni na Koati na Melali. 12Bana akanalomi baka Yuda babiya, Eri na Onani na Shela na Pelesi na Zela. Lakini Eri na Onani bakuwa ku nndema uku Kanani. Bana baka Pelesi babiya Hesiloni na Amuli. 13Bana akanalomi baka Isakali babiya, Tola na Puva na Yashubu na Shimuloni. 14Bana akanalomi baka Zebuluni babiya, Seledi na Eloni na Yaleeli. 15Bana akanalomi baka Lea babube jabiya ambelaki Yakobu ku Padani alami pamu na Dina kamwali waki. Bana baki boti akanalomi na kamwali baki na asokoo baki babii bandu selasini na tatu.
16Bana akanalomi baka Gadi babiya, Sipioni na Hagi na Shuni na Esiboni na Eri na Alodi na Aleli. 17Bana anakanalomi baka Asheli babiya, Imuna na Ishuva na Ishuvi na Belia na Sela jabia nndombu wabu. Belia na bana baki na Hebeli na Malikieli. 18Haba ndi bana akanalomi baka Zilipa mtumisi jojuwe Labani ampekia Lea kamwali waki, nukummbelake Yakobu jumula ja bana na asokoo babia komi na sita.
19Laeli ammbelakiya Yakobu bana abeli, Josepu na Benjamini. 20Ku Misili Asenati, kamwali waka Potipela, jojabii nngolu wa musi uku Oni, ammbelakiya Josepu bana abeli, Manase na Epulaimu. 21Bana akanalomi baka Benjamini bakabii Bela na Bakeli na Ashibeli na Gela na Naamani na Ehi na Loshi na Mupimu na Hupimu na Alidi. 22Bandu haba komi nu nnsesi ndi bana baki na asoko baka Yakobu na Laeli nhwana mundu. 23Mwana waka Dani jwabiya Hushimu. 24Bana akanalomi baka Naputali babiya, Yaseeli na Guni na Yeseli na Shilemu. 25Bandu saba haba ndi bana na asoko baka Yakobu na Bilia kamwali waka Laeli jobumpekiya atati baki Labani.
26Bandu boti babapiti ku Misili na Yakobu, babaii kibeleku saki, sanga kwaabalanga akahanu ba bana mundu, jumla babii bandu sitini na sita. 27Ku nndema uku Misili Josepu jabelika bana abeli akanalomi. Bandu boti bi kibeleku saka Yakobu babajingala ku Misili babii sabini.
Yakobu na ibeleku yaki juhika ku Misili
28Yakobu anndongulikiya Yuda kwaka Josepu kunndoba abonana ku Gosheni, nabombi bahika ku Gosheni. 29Josepu jakwela ligali laki la Palasi, jajenda kunzopa Yakobu atati baki ku Gosheni. Josepu pajahikila atati baki, jajobatiya nukulela ku kipindi kilasu ngani. 30Izilaeli ampwagila Josepu, “Henu mi tayali kuwa, ndaba nugubweni nukumanya wakona wamwome.”
31Josepu jaapwagila alongu baki ni kilongu soti sa atati baki, “Nyenda kumpwagii Falau ana mwaalongu bangu ni ilongu yoti ya atati babii mu nndema uku Kanani ahikiki kwango. 32Nukundandila ana mwanganya mwaalimi ndaba mkubika mndima mipugu, nunhikiki pamu ni imbui na makondoo na ng`ombi na mali gii goa. 33Ndienu Falau anajunkemiki nukunndaluki, nhenga lihengu bole, 34mwakapwaaga, bambu twepani twaa atumisi baku ndi twaalimi bi mipugu tumbuka umwana witu mbaka lelenu, hela ndi ebabii akahoku bitu, mwakapwaga hela ili bukunnzetakaliya kutama mu lieneu luku Gosheni.” Josepu japwaaga hela, ndaba kwa Amisili baasunga makondoo kwabu ngakupalika.
ទើបបានជ្រើសរើសហើយ៖
Utumbuli 46: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.