Utumbuli 37
37
Josepu naka akaabeli baki
1Yakobu jaendaliya kutama ku nndema wa Kanani, moatamika atati baki ngati ageni. 2Haga ndi majambu gaka Yakobu. Josepu pajabii nkombu jwa yaka komi na saba, jombi na akaabeli baki bababii bana baka Biliha na Zilipa akaawala ba atati baki babiya alima makondoo ni imbui.
Josepu jabiya jaamanyisa atati baki kupete tabia jiliya jaka alongu mundu.
3Izilaeli ampai ngamaa Josepu kuliku bana baki boti kwa ndaba jabiya jubelekiki kipindi su useja waki. Ansonila Josepu kanzu nasu jebijilembiki ngani. 4Lakini akaabeli baki pababona atati babu ampai Josepu kuliku bombi, bunsuki ngamaa ata kulonge naku ku lukwali kwatenda kusindikana.
Ndotu yaka Josepu
5Ikilu jimu, Josepu jalota ndotu, lakini pajaasimuliya akaabeli baki, bombi ndi bajonzukiya kunsuki. 6Jaapwagila, “Nzooninya ndotu jenotiki. 7Notika ana twaboa, twabii mu litui tukongika makenda gi inganu na apalapa likenda li inganu langu libopuka nukujema wema. Makenda ginu gabonganika nukuyongolota nukulijinamii likenda li inganu la nepani.”
8Akaabeli baki bunndalukiya, “Boo, gupala kutupwagi wiitenda kutulongosa? Boo, wiibiya nu uwesu kupete twepane?” Ndienu baendaliya kunsuki nakanopi, ndaba ja ndotu na malobi gaki.
9Ndipala Josepu jalota kabee ndotu jengi, jasimuliya kabee akaabeli baki, kupwaaga, “Nzoaninya notiki kabee ndotu jengi, nilibweni lyoba, mwei na ndondu komi na jimu itenda kunyinamii.”
10Lakini pajaasimuliya ahengo naka kaka baki ndotu jeheji, atati baki batenda kunndakali kupwaaga, “Boo, jenieji je ndi ndotu bole jegulotiki jene? Boo, kwatupalika nepani amabu baku naka alongu baku kuhika kugujinamii kwi isima palongi jako?” 11Akalongu baki bumbonila wipu, lakini atati baki babiya aholale lijambu leheli.
Josepu atenda kunndombesa
12Lisoba limu, alongu baka Josepu bajenda kulima inyama ya atati babu pambipi nu kumusi uku Shekemu. 13Ndienu, Izilaeli ampwagila Josepu, “Gumanyiki alongu baku alima inyama ku Shekemu. Henu mbala nugutuma kwabu.” Josepu jajibua, “Hena nndumaje.”
14Atati baki ampwagila, “Jenda wakalinga akalongu baku ni inyama ngati abii sapi, ndi wiika kumbwagi.” Ndienu Yakobu antuma Josepu kuhuma ku libonde luku Hebuloni.
Josepu pajahegaliya ku Shekemu, 15mundu jumu anketaninya jakajendajenda kukioli, anndalukiya, “Gutaputa kyane?”
16Josepu jajibua, “Naataputa akaabeli bango. Gupepa koku gumbwagila pandu paalima inyama.”
17Mundu jola ampwagila, “Niwasalii bibiya abokani, ndaba najoana bakapwaganinya ajenda ku Dotani.” Ndienu Josepu jaapwata akaabeli baki jaakolila ku Dotani.
18Akaabeli baki pabummbona jubii sukutali na kabula ngasejuhegali bapwaganiya ankoma. 19Bapwaganinya, “Linga! Jojulotalota ndotu jojuhuma ako. 20Henu, tunkoma nukundeke mulibomba limu kati ja mabomba haga. Mwenikatai twiipwaga jutei kukomeka nu kulewa ni inyama ikali imwikioli. Henu twaibona ndotu yake ye ibiya boo.”
21Lakini Lubeni pajajoa malobi haga, japala kunhoko mwamaboku gabu, henu jaapwagila akalongu baki, “Mpepakoku, twaankoma. 22Mwaankoma ila munzegala mu libomba lela pulukoba, lakini mwanhumisa.” Japwaaga hela ndaba juwesa kunhoko Josepu mu maboku gabu, na mwenikatai ankelubua kwa atati baki. 23Josepu pajahikila akalongu mundu bombi bunhula kanzu jaki jejabalembiki sapi. 24Ndipala bunkamula nukundeke mu libomba langa na masi.
25Pabatamaniya kula posu likundi la Aisimaili ahuma ku Gileadi kujenda ku Misili latenda kupeta. Ngamia wabu babiya atotwi ubani, mitela juntomoni jebijikema zeli na manemane. 26Hapa Yuda jaapwagila alongu baki, “Twiipata kii anatunkomiki nndongu witu nukunhiya jojukomiki? 27Nambanga tunndombesi kwa bandu baka Ishimaili, lakini twiigusa womi waki, ndaba jombi ndi nndongu witu, jombi mwai gumu natwenga.” Alongu baki bajetanganinya naku. 28Baalombesa nu kulomba buku Midiani pabahika pandu je hapa, akalongumundu hapa bumpia Josepu mu libomba, nukunndombesa kwa Aisimaili kwi ipandi isilini ga feza, nabombi bunzukua Josepu mbaka ku Misili.
29Ndienu, Lubeni pajakelubukia mu libomba mola, ngakummbona kabee Josepu jajendula ingobu yaki su ubini, 30jaajendila alongu baki, jaapwagila, “Nkombu ngasejubii na nepani kabete, boo, ngiti henga kike?”
31Ndienu, basinza imbui, bajukua kanzu jaka Josepu nukutobake mu mwai wi imbui gola. 32Ndipala baapelakiya atati babu kanzu je jela, baapwagila, “Tujitondwi kanzu jenze. Mwijilingalakia ana jaka mwana winu au boo.”
33Atati babu bijimanyiki kanzu, bapwaaga, “Sakaka! Neholale kinyama si mwikioli ankamwi nu kunkula. Sakaka Josepu ansekulini ipandi ipandi.” 34Ndienu, Yakobu jajendula ingobu yaki ku usungu, jawata ligunii mwikibunu. Nukundelee mwana waki kwa masoba gingi. 35Bana baki boti bahika ili kungangamalisa mwoju, lakini jakana kungangamalisa japwaaga, “Nekaje nhendale kundele mwana wangu, mbaka panihuluka pai pajubii koatama bandu baawi.” Ndipala atati baki ebundelila.
36Kipindi sehesi ku Misili kola, Amidiani bala bunndombisa Josepu kwaka mundu joankema Potipa, jumu jwaka ntumisi nkolongu mu ulongosi waka Palau, jojuwe jakabii nkolongu jikikosi su ulonda mu nyumba jaka bambu nkolongu.
ទើបបានជ្រើសរើសហើយ៖
Utumbuli 37: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.