Utumbuli 32
32
Yakobu jiliandiya kuketangana na Esau
1Yakobu jaendaliya na sapwali jaki. Ndienu, atumi baka Sapanga bukunani batenda kuketangana naku. 2Yakobu pajaabona, jaapwaga, “Haba alonda baka Sapanga!” Henu japakema pandu je hapa Mahanaimu.
3Yakobu jaatuma bandu andonguliya kujenda kukundongu waki Esau ku Seili ku nndema uku Edomu. 4Jaatuma akumpwagila Esau, “Bambu wangu Esau nndongu waku Yakobu jupwaaga ana, ndami kwaka Labani masoba goti haga ngati nunngeni. 5Mina ng`ombi na maponda na makundi ga makondoo na atumisi akanalomi na akammbomba. Nugutumii malobi ganga, bambu wangu, ili gunyetakiya kuhika hoku.”
6Bandu bala pabakelabuka kwaka Yakobu bumpwagila, “Tuhiki kukundongu waku Esau, najombi jubii mwiindela kuhika kugujopa, koni jubii na bandu mia nsesi.” 7Ndienu Yakobu jajogipi ngamaa nukuhangajika. Jaabagula makundi mabeli bandu bababii pamu najombi na makondoo ni mipugu jengi na ngamia, 8jaholaliya, “Ana Esau jihika nukulioa likundi limu henu lelihigaliya liitenda kutila.”
9Ndipala Yakobu andoba Sapanga nukupwaaga, “Wa Sapanga wa ahoku bangu Ibulaimu, Sapanga wa atati ba Isaka! We ndi wa Bambu Sapanga wogumbwagi muja ku nndema wangu na kwaka alongu bangu, nu kunagi kubanga winhengila gaamboni, 10ngasembalika hata kasokopi majambu gaamboni gagunhengi sukuhobaleka nepani nu mtumi waku. Panalombuka losi lwa Yoludani, ngasenabii na sindu ila ndonga, lakini sajenu mii na makundi mabeli haga. 11Nuguloba gunhokua sajenu kuhuma kukundongu wangu Esau, ndaba mi ni kiholu kuba juwesa kutukamu nukutukoma twaboa, akanyongoo pamu na bana. 12Wehapa wanagi kunhenge gaamboni na kwiihenga ibeleku yangu ibiya hingi ngati nsangi guku nhanga nkolongu gogugwe ngasegubalangika kukujoloka kwaki.”
13Ndienu, Yakobu jagonila pala ikilu je heji. Ndipala jatenga pandu pa mali gaki pabiya nhupi kukunndongu waki Esau. 14Imbui yunkolu mia ibeli na mapongu ishilini na makondoo gunkolu mia ibeli na mapongu ishilini, 15ngamia selasini yeijongesa pamu na matoli gaki, ng`ombi alubaini na makambaku komi na maponda gunkolu ishilini na makambaku komi. 16Jaakabisa atumisi baki kila jumu likundi laki, jaapwagila, “Nndonguliya mwijileka napwasi kati ji likundi limu ni likundi lengi mu sapwali jinu.” 17Andagalakiya jojalonguli jola “Nndongu wa Esau pajiketangana na wehapa nukugulaluki, ‘Wehapa gu ntumisi waka nyane? Gujenda kwako? Ni inyama haye yaka nyane?’ 18Wehapa wanzibua, ‘Ganga mali gukuntumisi waku Yakobu tuguleti jibia nhupi yaku na mweni jubii munyuma hamo jutenda kuhika.’ ” 19Japia lilagisu lele kuku ntumisi ulikundi la pili na la tatu na gangi goa, japwaaga, “Mukumpwagila Esau malobi gaga pamwakaketangana naku. 20Kabee mukumpwagila, ‘Ntumisi waku Yakobu jubii munyuma juhika.’ ” Yakobu jahenga hela jaholaliya, “Pangi kwa nantulisa kwa nhupi yenundongulaki heyi, na mwenikatai nhwesa kubonana naku ana kwa ana, tosa mbaka junyopi.” 21Ndienu, jalongulakiya nhupi yaki, lakini mweni jagonila mu likambi ikilu jeheji.
Yakobu jukomana malimba na mundu Kupenieli
22Ikilu jeje Yakobu jajumuka, jajukua akahanamundu abeli, atumisi baki abeli na bana baki abeli komi na jumu, japeta kalosi ka Yaboki. 23Ejabiya jaalombwi kwii bababii na mali gaki goti, 24Yakobu jahigaliya kajika jaki. Mundu jumu jahika nukukomana naku malimba mbaka lioba pa lapita. 25Mundu we hoju pajabona ngajuwesi kunhwesa Yakobu jagusa nyonga ji kibunu, najombi jatenda kuteguka pajabiya jukomana naku malimba. 26Ndipala mundu jola ampwagila Yakobu, “Neka nyendaje, ndaba kutenda kukusa.”
Lakini Yakobu ampwagila, “Nganugulekake hata kasokopi mbaka gumbengaliya.”
27Najombi anndalukiya, “Liina laku nyane?” Jombi jajibua, “Yakobu.”
28Mundu jola ampwagila, “Ngabagukemi wa Yakobu kabete, ila bagukema wa Izilaeli, ndaba gukumini malimba na Sapanga kabee na bandu, nawe waawesiki.”
29Ndipala Yakobu ampwagila, “Gupepa koku, nuguloba gumbwagila liina laku.”
Lakini jombi ampwagila, “Boo, ndaba ja kii gunaluki liina lango?” Ndipala nukumpengale Yakobu.
30Yakobu japakema pandu je pala Panueli, japwaaga, “Numbweni Sapanga hotuhotu, nanepani ngasenguwike.” 31Liyoba labiya lipitike kipindi Yakobu pajaboka ku Panueli, jabiya jutenda kusepe ndaba ja nnyonga jaki jateikuteguka. 32Ndi mana mbaka lelenu Aizilaeli ngaseakula nsipa wikibaba, ndaba jaka mundu jola angusiki Yakobu papabii ni kibaba mu nsipa ukibunu saki.
ទើបបានជ្រើសរើសហើយ៖
Utumbuli 32: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.