Utumbuli 30
30
1Lakini Laeli pajabona ngasejubeleka bana, ammbonila wipu Lea, ampwagila Yakobu, “Mbekiya bana ananga hela ngiti ndenda kua.”
2Yakobu anhyomila Laeli ngamaa nukumpwagila, “Boo, nepani lee Sapanga kubanga nhwesa kugupengale wehapa wiibeleka bana?” 3Laeli jajibua, “Ntumisi wangu Bilia jubii. Gonila naku ili jubelika bana badala jangu, nanepani niipata bana kuboka kwaka jombi.” 4Henu Laeli ampekiya Yakobu ntumisi waki Bilia jubiya nhwanamundu jatenda kugone naku. 5Bilia japata kitumbu nu kummbelake Yakobu mwana mwanalomi. 6Laeli japwaaga, “Sapanga juhengi sapi, jujoini kilelu sangu nukumbeke mwana mwanalomi.” Ankema mwana hoju liina laki Dani. 7Bilia ntumisi waka Laeli japata kabee kitumbu sengi nukummbeleke Yakobu mwana wa pili mwanalomi. 8Hapa Laeli japwaaga, “Mbengini ngamaa nu mmbeli wangu, nanepani nunhwesiki.” Henu ankema mwana we hoju Naputali.
9Lea pajabona jukotwiki kubeleka, anzukua Zilipa ntumisi waki nukumpeke Yakobu jubiya nhwanamundu. 10Zilipa ammbelakiya Yakobu mwana mwanalomi. 11Lea japwaaga, “Mbatiki ndondukela,” Henu ankema mwana we hoju Gadi. 12Zilipa ntumisi waka Lea ammbelakiya Yakobu mwana wa pili mwanalomi. 13Lea jaapwaga, “Mii na ndogule ngamaa! Henu akammbomba boti ngiti angema jwana ndogule.” Henu ankema mwana we hoju Asheli.
14Kwabiya kipindi sukuhuna inganu, Leubeni jajenda ku litui japata mitela jejibii ngati matungulusi gobugukema mandilake, jaaletila anyongo baki. Laeli ampwagila Lea, “Gupepakoku maguliya kasokopi mandilaki gaka mwana waku.”
15Lea andosa ku ukali, “Boo, guholale lenieli lijambu lisoku kunyopa nepani nndomi wangu na henu gupala kujuku mandilake ga mwana wango?”
Laeli jajibua, “Ana wimbekiya mandilake gaka mwana waku, Yakobu jakagonila kwaku lelenu.”
16Ndienu, pakamii Yakobu pajabiya jutenda kukelabuka kuhuma ku litui, Lea japita kujenda kunzopa nukumpwagi, “Lelenu gupalika kugone nanepani, ndaba nugulombiki kwa mandilake gaka mwana wangu.” Henu Yakobu jagonila na Lea ikilu heji.
17Sapanga jajoaniya kuloba kwaka Lea, najombi japata kitumbu nukummbelake Yakobu mwana wa tanu mwanalomi. 18Lea japwaaga, “Sapanga jummbeki malepu gangu ndaba numpeki nndomi wangu ntumisi wangu.” Henu ankema mwana we hoji Isakali. 19Lea japata kitumbu kabee nukummbelake mwana wa sita mwanalomi. 20Japwaaga, “Sapanga jumbeki nhupi ja sapi. Henu nndomi wangu ngiti jundendila isima ndaba numbelaki bana sita akanalomi.” Henu ankema mwana we hoju Zebuluni. 21Mwenikatai ambelakiya mwana mmbomba, ankema Dina.
22Ndipala Sapanga ankombuka Laeli, jajetakiya kuloba kwaki nu kumpeke mwana. 23Laeli japata kitumbu, jabelika mwana mwanalomi, japwaaga, “Sapanga jumoki iyoni yangu.” 24Henu ankema mwana we hoju Josepu japwaaga, “Bambu Sapanga nandi gumbekiya mwana jongi mwanalomi.”
Yakobu jukuba na mali gingi
25Baada jaka Laeli kumbeleka Josepu, Yakobu ampwagila Labani, “Nyetakiya muja kunyumba mu nndema wango. 26Mbekiya akanhanu bangu na bana bangu babube mbatiki kuhuma mu utumisi wangu kwaku moka naku. Gumanyiki nugutumaki sapi.”
27Lakini Labani ampwagila, “Gupepa koku gunyetakali mbwaga sindu. Manyiki kwi indela jukulondo Bambu Sapanga jumbengi kupete wehapa. 28Logula malepu gaku gagupala nanepani mwiti nugulepa.” 29Yakobu ampwagila, “Wamweti gumanyiki namuna henugutumaki na namuna henitunziki inyama yaku na eijonzukiki. 30Ndaba kabula nepani ngasenhikiki wabii na mali masoku pena lakini tumbuka enahika, mali gaku gajonzukiki na kuba ni inyama hingi ngani, na Bambu Sapanga jugupengi kila konyendika. Boo, henu bana baa nitumbuliya kwaatunza lile?”
31Labani andalukiya, “Nugupekiya kyane?”
Yakobu jajibua, “Wiimbekee sokapi. Niendaliya kwiitunza inyama yaku ana wibiya guhengi lijambu ale. 32Nyetakaliya mbeta kati ji inyama yaku yoa lelenu, nhagula mu likundi la kila makondoo gana madoadoa na mabakamabaka, kila likondoo lijilu, ni imbui yeibii na madoadoa na mabakamabaka. Haga ndi gibiya malepu gangu. 33Ndienu, masoba gagahika kuhobaleka kwangu kwibonikana hotuhotu pawihika kulingali malepu gangu. Imbui jokapi janga na madoadoa au mabakamabaka au likondoo lokapi langa lijilu analibonakini mu likundi langu, heli niibiya nyiibiki.”
34Labani japwaaga, “Hena! Kubiya ngati egupwagiki.” 35Lakini lisoba alelale Labani jajenda kugatenga mapongu goti gagabii na misitali na madoadoa, ni imbui yoti yunkolu yeibii na madoadoa na mabakamabaka, kila kinyama sekibii lidoa lihuu nyhenga jaki, na kila likondoo lijilu, jaabeka pai ju ulonda wa bana baki. 36Labani jatama kutali na Yakobu nu utali ukujenda masoba matatu, najombi Yakobu jahigaliya kulima inyama yaka Labani yeyahigalii.
37Ndienu, Yakobu jajukua lundela lubei lu mikongu ju mlubuni, mlozi na mwalamoni, jatuba ili misitali miuu jibonikana mu ndela yeheyi. 38Ndienu jabeka ndela yejatubiki mu lukoi likunkenge masi inyama, ili ibiya palongi ja makundi pagahika kunywa masi. Ni inyama payahika kunywa masi ibetwiki, 39inyama yeyela yakwelwa palongi ja ndonga yehei, nayombi yabelika inyama yeibii ni misitali na mabakamabaka na madoadoa.
40Yakobu jagabeka pulutengu makondoo, ndipala jiihenga ilingalania ni inyama yengi yeibii ni misitali ni inyama ijilu mu likundi laka Labani. Kwi indela heji, Yakobu japata likundi laki mweni, wala ngasejahanganaki na laka Labani.
41Kwabiya kila ekuhika ipindi yi inyama yeibii na afya kupata kitumbu, Yakobu jabeka ndonga yela palongi jabu mu mikoi yukukenge masi, ili ipata itumbu paibii ndonga heyi. 42Lakini ngasejabeka ndonga heyi palongi ji inyama yanga na makili payapata itumbu. Apalapa inyama yanga na makili yela yabiya yaka Labani, na yeyabii na yanga na makili yabiya yaka Yakobu. 43Ndienu Yakobu jabii na mali gingi ngamaa, jabiya na makundi makolongu ni inyama atumisi baki akammbomba na akanalomi, ngamia na maponda.
ទើបបានជ្រើសរើសហើយ៖
Utumbuli 30: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.