Utumbuli 21
21
Kusaliwa kwaka Isaka
1Bambu Sapanga ankombuka Sala, anhengila ngati ejalagila. 2Ibulaimu pajabiii nseja ngani, Sala japata kitumbu ammbelakiya mwana mwanalomi kipindi aselase Sapanga sejabiya anndagi. 3Ibulaimu ankema mwana we hoju Isaka jojuwe jabelika. 4Isaka pajahikila masoba nani, Ibulaimu ansekula jandu ngati Sapanga eandagalakiya. 5Ibulaimu jabiya na yaka mia moja kipindi Isaka pajasaliwa. 6Najombi Sala japwaaga, “Sapanga jummbeki kiheku, jokapi jojijoa lijambu heli, jitoguliya pamu na nepani.” 7Jaendaliya kupwaaga, “Nya jojakawesa kumpwagi Ibulaimu kubanga nepani Sala niijongisa bana? Ndaba nummbelaki mwana mwanalomi mu useja waki.”
8Isaka jaendaliya kukola, ni lisoba lejwalekiswa kujonga, Ibulaimu jahenga tipati ngolongu.
Ajili na Isimaili atenda kwaabenga
9Lisoba limu Sala ammbona Isimaili mwana waka Ibulaimu na Hagali mundu juku Misili akunndongama Isaka. 10Ndienu, Sala ampwagila Ibulaimu, “Mbengila kutali ntumwa ajo na mwana waki. Ngakuwesikana mwana jwaka ntumwa hoju kulisi pamu na mwana wangu Isaka.” 11Lijambu leheli lumbiniki ngamaa mwoju jaki Ibulaimu ndaba Isimaili kabee jabiya mwana waki. 12Lakini Sapanga ampwagila Ibulaimu, “Wiibina mwoju ndaba jaka mwana hoju wala ntumwa hoju. Sokapi sejagupwagila Sala guhenga, sakaka ibeleku yaku bihumila kwaka Isaka. 13Nukupete mwana waka ntumwa waku najombi nampekiya bana bingi, henu jwibiya atati ba bandu bingi ndaba najombi kabee mwana waku.”
14Henu, pulukela namangani, Ibulaimu jajukua posu ni kikoi sa masi, ampekiya Ajili nu kuntweka puubega, ammbenga pamu na mwana mundu. Ajili jaboka, jabiya jutenda kujendajenda mu lukoba luku Beli Sheba. 15Masi pagajomuka mu kikoi, Hagali anngonika mwana waki pai ji kitutu. 16Najombi jajenda kutama utali wa ngati atua mia jimu hela, japwaaga mmwoju waki, “Ngasembala kummbona mwana wangu ejukua.” Na pajabiya jutami pala na jwatumbulia kulela.
17Sapanga anzoana mwana jola jakalela, nu ntumi jukunani waka Sapanga ankema Ajili kuhuma kunani, anndalukia, “Ajili gubi na sida bole? Wijogopa, Sapanga jujoini kilelu saka mwana waku kojubii hoku. 18Jema gunzumua mwana hoju nu kumpolesa mwoju, ndaba nanhenga jubiya atati ba bandu bingi.” 19Sapanga anhogula Agali mihu, najombi jikibona kiliba sa masi. Jajenda nukutwelake masi mu kikoi nukunkenga mwana waki. 20Sapanga jabiya pamu na mwana hoju, najombi jaendaliya kukola. Jatama mu lukoba na jabiya jojubenga inyama nkolongu. 21Jabiya jutama kulukoba luku Palani, na anyongo baki anzukiya mmbomba kuhuma ku Misili.
Kujetangane na Abimeleki
22Kipindi se hesi, Abimeleki pamu na Pikoli, nkolongu jwa alonda baki, anzendila Ibulaimu, nukumpwagi, “Sapanga jubii pamu na wehapa mu kila sindu seguhenga. 23Henu gunapila palongi jaka Sapanga kubanga ngawingongi nepani au bana bangu au ibeleku yangu. Ngati nepani enuguhengila saamboni, ahelahe nawehapa gutuhengila saamboni nepani na bandu bangu mu nndema gogutama.”
24Ibulaimu japwaaga, “Hena ndenda kulapa.”
25Ndienu Ibulaimu andalamaki Abimeleki kupete kiliba sa masi sesuse atumisi baka Abimeleki babiya bunyagiki. 26Abimeleki ampwagila, “Nepani ngasemanyiki nya jojuhengiki hela mbaka lelenu wehapa ngasegumbwagi, wala nepani ngasenhwaiki kujoana majambu ngati haga mbaka lelenu.” 27Ndienu, Ibulaimu jajukua likondoo na ng`ombi kumpeke Abimeleki, nabombi abeli haba batenda kujetangane. 28Ibulaimu jagatenga makondoo gunkolu saba kuhuma kulikundi. 29Abimeleki anndalukiya Ibulaimu, “Boo, ndaba jakii gugatenga makondoo gunkolu saba?”
30Ibulaimu jajibua, “Gajukua makondoo saba ganga gunkolu kuhuma kwangu nepani ili kulangi wehapa gumanyiki nepani ndi nenahembiki kiliba senze.” 31Henu pandu pala bapakema Beli sheba, ndaba boti abeli batenda kulapani pandu pe pala.
32Baada jukujetanga ku Beli sheba, Abimeleki na Fikoli nkolongu jwa alonda baki baboka nu kukelabuka mu nndema gwa Apilisti. 33Ibulaimu jwapandu nkongu gu nkwaju ku Beli Sheba hoku na pala anndumbalia Bambu Sapanga jojutama masoba ganga na mwisu. 34Ibulaimu jatama mu nndema wa Apilisti ku kipindi kilasu.
ទើបបានជ្រើសរើសហើយ៖
Utumbuli 21: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.