Utumbuli 16
16
Ajili na Isimaili
1Ndienu, Sala nhwanu waka Abulamu, jabiya jakona ngase ammbelaki nndomi mwana. Lakini jabii nu ntumwa jobunkema Ajili jojwaaumila ku Misili. 2Ndi Salai ampwagila Abulamu, “Gumanyiki le Bambu Sapanga ngase jumbengi mwana, ndi Salai ampwagila Abulamu Sapanga ngase junekaki mbata mwana henu nzukua Ajili ntumwa wangu pangi niipata mwana kupete jombi.” Abulamu jwajetakiya lijambu lejapwaga Salai. 3Ndipala, Salai ampekiya Abulamu Ajili, ntumisi waki juku Misili jubia nhwanu waki. Haga gapitila baada jaka Abulamu kutama ku Kaanani ku kipindi sa yaka komi. 4Abulamu anzukua Ajili, najombi Ajili japata kitumbu. Ajili hejwamanya jubii ni kitumbu jatumbuliya kunndongama Salai.
5Salai ampwagila Abulamu, “Ajili juhenga haga ndaba jaku weapa, nepani nugupekiya ntumisi wangu henu juboniki jubii ni kitumbu jutenda kunongama! Leka Bambu Sapanga juamua kati jangu na wehapa nya jojuhengiki gaamboni!”
6Lakini Abulamu ampwagila Salai, “Ntumisi waku jubii pai ju uwesu waku, nhengila ngati egupala.” Ndienu Salai ang`alisa Ajili mbaka jaamua kutila.
7Ntumi ju kunani kwaka Bambu Sapanga ammbona Ajili kulukoba pambipi ni kiliba sa masi sesabii mulutengu ji indela jejijenda ku Shuli. 8Ntumi ju kunani kwaka Sapanga andalukiya, “Ajili, ntumi waka Salai! Guhuma kwako na gujenda kwako?”
Ajili jajibua, “Nuntila nkolongu wangu Asalai.”
9Ntumi waka Bambu Sapanga jola ampwagila, “Kelubuka kukunkolongu waku Salai na wakajetakiya malagalaki gaki ngati ntumwa waki.” 10Ntumi jwaka Bambu Sapanga jaendaliya kumpwagi Ajili, “Niijonzukiya ibeleku yaku hata ngabiiwesi kubalangika kukujoloka kwabu.” 11Ndipala Ntumi waka Sapanga jola ampwagila, “Weapa gubii ni kitumbu na wiibelika mwana mwanalomi, wakema Isimaili, ndaba Bambu Sapanga jujoini mang`aliku gaku. 12Isimaili jwiibiya mwini milomu ngati kinyama sekisinda kupugika, jwiibiya jukomana na kila mundu na kila mundu jwitenda kukomana naku. Jwiitama koni jukomana na akalongu baki.”
13Ndienu, Ajili ampekiya liina Bambu Sapanga jojalongii naku, “Weapa ndi wa Sapanga jogumona,” ndaba Ajili japwaaga mmwoju jaki, “Henu nummbweni Sapanga jojumona nepani!” 14Ndi mana kiliba sela akikema Beeli lahai loi maana jaki kiliba saka jojubii na womi jojumona. Kiliba sehesi kibii pikilanda ja Kadeshi na Beledi.
15Ajili ammbelakiya Abulamu mwana mwanalomi. Abulamu ankema mwana we hoju Isimaili. 16Abulamu jabiya na yaka semanini na sita Ajili paampapa Isimaili.
ទើបបានជ្រើសរើសហើយ៖
Utumbuli 16: MaBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Matengo Language ©The Word for the World International and Matengo Language Translation, 2020. All rights reserved.