Akalabhe 11
11
Inyama ipalwa kulegwa na yangapalwa kulegwa
Kombokela 14:3-21
1Bhambo Chapanga ngannobholila Mucha na Alune, 2“Malobholela bhando bhuku Ichilahele kubhehe, pakate jha inyama yoha itama pannema inyama ipalwa kulyegwa ndi henge, 3mihoto kulye kinyama chochoha china kipagha chikighabhanike na chinakudukula. 4Nambo mangalye jhe kinyama chochoha chikidukula, nambo ipagha yake ighabhanike jhe, amu ipagha yake ighabhanike nambo kiduku jhe. Mangalye jhe ngamiya, nhwalo ngamiya idukula nambo ipagha yake ighabhanike jhe. Jwenio ijheketelwajhe palonge jha Bhambo Chapanga. 5Mangalye jhe kichechele jwenio idukula nambo ipagha yake ighabhanike jhe, jwenio ijheketelwa jhe palonge jha Bhambo Chapanga. 6Mangalye jhe kipecha, ku nhwalo idukula nambo ipagha yake ighabhanike jhe, jwenio ijheketelwa jhe palonge jha Bhambo Chapanga. 7Na Ligholobhe mangalye jhe ku nhwalo likwete ipagha ighabhanike, nambo liduku jhe, lyenio ndi mangalye jhe. 8Mangalye jhe inyama yenio hilu kupapaya mituhe jhabhe.
9“Homba yoyoha yu kumbwane na mungemba ina maghabatilo na majheghe mihoto kulye. 10Nambo chochoha chikitama umbwane amu mungemba, changamaghabhatilo, yane chochoha chikityanga mumache na yoha ibhii naghome, yenie ndi ilebhe yukuichimwa kwino. 11Ihumbe yenie mangalye jhe nyama jhabhe, na mituhe jhabhe ibha kilebhe chukuchimwa kwino. 12Kila kinyama chikibhii umache changa majheghe na maghabhatilo ndi kilebhe chikuchimwa kwino.”
13“Nkoto kulye ijhune henge yangajheketelwa palonge jha Bhambo Chapanga bheniya ndi, matumbuhe na lipokengano na kapongo, 14na limbanga likele na aina jhoha jha mambanga, 15na makongolo gha aina jhake, 16na limbune na matungutu na matipitipe na kila aina yoha na nyanga, 17matungutu machoko na mnande na mahilimila, 18litumbolumbenga na kiholobhele na mapanga, 19chechengo na aina yowa ya koekoe na hudehude na inimenime.
20“Na ikokoloko yoha ina mapapanilo ncheche na bhihoto kutyanga kwa makongono ncheche, yenie ndi yangajheketelwa kwino. 21Nambo ibhii ikokoloko henge ina mapapanilo na ityanga kwa makongono ncheche ghukuhombela pannema, yenie ndi mihoto kulye. 22Pakate jha henge, mihoto kulye madidima ghoha na madidima makolongwa ghoha na mambalangule ghoha. 23Nambo ikokoloko yoha ikwabha ina mapapanilo, ibhii na makongono ncheche, ndi yangajheketelwa palonge jha Bhambo Chapanga.
24“Inyama yenie ihoto kuntenda mma mangajheketelwa palonge jha Bhambo Chapanga, anda mundo jhojhoha jwapakupapaya mituhe jhabhe inyama yenie, najheketelwa jhe kwa Chapanga ade kimiye. 25Mundo jwenio jwapakukamuu chochoha mu ntuhe abhaha kutale na bhajhake na ngobho yake ipulwa. 26Mundo jhojhoha anda apapiye kinyama china kipagha chikighabhanike pakate, nambo kiduku jhe, mundo jwenio nabhaha jwangajheketelwa jhe kwa Bhambo Chapanga. 27Inyama yoha ityanga kukulebhata ighanja yake pamonga nukubhe na makongono ncheche, mangalyejhe, na jhojhoha jwapakupapaya ntuhe gwa kinyama ngita chenio, nabhaha jwangajheketelwa kwa Bhambo Chapanga ade kimiye. 28Mundo jhojhoha jwapa kughegha mituhe gwa inyama yenie nabhaha jwangajheketelwa kwa Bhambo Chapanga ade kimiye, inyama yenie ndi yangajheketelwa kwino.
29“Kabhele ihumbe henge ndi yangajheketelwa kwino, kikobhe na likule na kila aina jha ibholobhondo, 30na lighondo mache na lighondo na ibholobhondo na libholangwakwa na lwiya. 31Bheniya bhoha ndi yangajheketelwa kwino na jhojhoha jwapakupapaya mituhe jhenie, nabhaha jwangajheketelwa kwa Bhambo Chapanga ade kimiye. 32Anda ubhii ntuhe gwa ihumbe yenie ugwelii kilebhe chochoha, kibha kilebhe cha mbahu amu ngobho amu limbendela amu lijafafa amu chombo chochoha chikitumika ku lihengo lyolyoha, chombo chenie nakijheketelwa jhe palonge jha Bhambo Chapanga ade kimiye. Kupala kijheketelwa kipalwa kuchukwa kwa mache. 33Anda ntuhe gwake ugwelii mu kihulo, kilebhe chikibhii nkate jhi kihulo chenio ndi nakijheketelwa jhe palonge jha Bhambo Chapanga na kihulo chenie kipalwa kikajhulwana. 34Chakulya chochoha chikihoto kulegwa nambo kijhitikii mache kuhumii mu kihulo chenio, kijheketelwa jhe na chukunywe chikibhii mu kihulo chenie nakijheketelwa jhe palonge jha Bhambo Chapanga. 35Kila kilebhe chikigweliki na chehemo jha mtuhe nakijheketelwa jhe. Ngita kihinja amu kikalango, kipalwa kikajhulwane. Nakijheketelwa jhe, na yeneo ndi nakijheketelwa jhe kwino. 36Pamonga na gheniya, kilibha amu chembwe cha mache nakibha njelembo, nambo chombo chochoha chikipa kupapaya ntuhe gwenio nakijheketelwa jhe. 37Kipande chochoha cha ntuhe andakigwelii mbejho yukupanda, mbejho yenio naijheketelwa. 38Nambo anda mbejho ite kutumbikwa umache na ntuhe ugwelii mbejho yenio, bhahe naibhaha yangajheketelwa kwino.
39“Anda kinyama chochoha chikijheketelwa kulegwa, chikiweli chenie, jhojhoha jwapala kupapaya ntuhe gwenio, nabhaha jwangajheketelwa ade kimiye. 40Mundo jhojhoha anda alile nyama jha ntuhe jwakiweli jwenie, apula ngobho yake na nabhaha jwangajheketelwa ade kimiye na jwapa kughegha ntuhe gwenio apula ngobho yake, najwenio nabhaha jwangajheketelwa ade kimiye.
41“Na kila kilebhe chikikwabha pannema, mangalye jhe ndi changajheketelwa kwino. 42Mangalye jhe kilebhe chochoha chikityanga kulutumbo lwake na kila chikityanga kwa makongono ncheche amu makongono ndii na kila chikikwabha, nhwalo ndi changajheketelwa kwino. 43Kuyene mangahika kukanilwa kukulye ihumbe yenio ikwabha. 44Ku nhwalo nenga ndi Bhambo Chapanga, Chapanga gwino, mangota ndi ma bhando bhango, Bhambo Chapanga, yene mmaa ngita chimii nenga. 45Ne ndi Bhambo Chapanga jhunimmoita kuhumii ku kilambo chuku Michile, kupala kubhehe Chapanga gwino, mukijhelebhula, nhwalo nenga ndi nanyahinyahi.”
46“Jhenje ndi mihilo pa inyama yenio, na ijhune na kila kihumbe chikibhii ghome chikitama umache na kila kihumbi chikityanga panane jha pannema, 47mipalwa kumanya pakate jha yenie inyama ijheketelwa na yangajheketelwa palonge jha Bhambo Chapanga, na pakate jha kihumbi chikijheketelwa kulegwa na changajheketelwa kulegwa palonge jha Bhambo Chapanga.”
ទើបបានជ្រើសរើសហើយ៖
Akalabhe 11: NdeBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in the Ndendeule Language @The Word for the World International and Ndendeule Language Translation. All rights reserved