Kubhoka 8
8
Libulo lyubhele, Madokwa
1Peniya Bhambo Chapanga ngannobholila Mucha, “Nnyende kwa Falao makannobholele, Chapanga ilonge naha, ‘Maleke bhando bhango bhabhoke bhajhende bhakannyinamile. 2Anda nkanite kwalekekeya, kilambo chino chinikibula kwa kunnete madokwa. 3Lukemba Naile nautwelela madokwa, na madokwa gheniya naghajhingila mu nyumba jhino na mu chumbi chino ade pakindanda chino, na mu nyumba jha akatumiche bhino na bhando bhino. Madokwa gheniya naghajhingila pa kihinja chino na muyombo ya kuteleke mabumunda. 4Madokwa gheniya naghabhaha kwii pahyegha jhino na pahyegha jha bhando bhino na akatumiche bhino.’ ”
5Peniya Bhambo Chapanga ngannobholila Mucha, “Munnobholela Alune, antondobheya nkongocho gwake panane jha mungemba na michinge na ilibha na madokwa gheniya naghapitila nu kujhenela mu kilambo choha chuku Michile.”
6Bhahe, Alune ngateila yene, na madokwa ngaghapitila nu kujhene mu kilambo choha chuku Michile. 7Nambo akahabhe bhu ku Michile kwa uhabhe gwabhe helahela ngabhaletita madokwa mu kilambo chuku Michile.
8Peniya Falao ngankema Mucha na Alune, ngabhalobholila, “Munyope Bhambo Chapanga ammohe madokwa ghano, kwanenga na kwa bhando bhango, na ne chinalekekeya Akaichilahele bhajhende bhakampikii Bhambo Chapanga litambiko.”
9Mucha nganyangwila Falao, “Tela! Kipinde ghane chimipala ninnyope Chapanga, aghakomelekeya madokwa ghighabhii mu nyumba jhino, na akatumiche bhino na bhando bhino, kupala naghahighilika ghala tugha ghighabhii mu lukemba Naile!”
10Falao ngannobholila, “Kilabho.”
Mucha ngannyangwila, “Nandenda ngita channongi, mbala umanye abhii jhe jwalengana na Bhambo Chapanga, Chapanga gwito.”
11Madokwa ghanga naghabhoka pa nyumba jhino na mu nyumba jha akatumiche bhino na bhando bhino, naghahighilika ghala tugha ghighabhii mulukemba Naile. 12Bhahe, Mucha na Alune ngabhabhokita ukajha kwa Falao, na Mucha ngannelila Bhambo Chapanga ammoheke Falao madokwa ghighanyingilila. 13Na Bhambo Chapanga ngateila ngita Mucha channyopita, madokwa gha munyumba na gha palubhanja na ghakung'onda ngaghawila. 14Bhando bha ku Michile ngabhajholita malundo gha madokwa gheniya na kilambo choha ngakinunganila njii. 15Nambo Falao pabwehina mbaha kilambo kinunga jhe kabhele, ngajhendelela kubhehe na lighoho, ngankanita mbe kunnyokanikiya Mucha na Alune, ngita chalaghila Bhambo Chapanga.
Libulo lyuutato, Mipapane
16Peniya Bhambo Chapanga ngannobholila Mucha, “Munnobholela Alune, antondobheya nkongocho gwake na kulubula lutukunda lwa pannema, na lwene lutukunda nalughalambwika kubhehe upapane mu kilambo choha chuku Michile.” 17Mucha na Alune ngabhateila yene. Alune ngantondobheya nkongocho gwake na kulubula lutukunda, na lwene ngalughalambwika kubhehe mipapane na kwanyomanila bhando na inyama. Lutukunda lwa kukilambo choha chuku Michile ngalughalambwika kubhehe mipapane. 18Nambo akahabhe bha ku Michile pibhajhighita kuhenga yene kwa uhabhe gwabhe, ngabhalepilila. Na mipapane jhene ngajhanyomanila bhando na inyama. 19Peniya akahabhe bhala bhajhakunnobholela Falao, “Lende ndi lihengo lya lubhoko lwa Bhambo Chapanga.” Nambo mwojho gwa Falao ngaujhendilila na lighoho, ngakanita mbe kunnyokanakii Mucha na Alune, ngita chalongila Bhambo Chapanga.
Libulo lyu ncheche, Mabhembe
20Peniya Bhambo Chapanga ngannobholila Mucha, “Kilabho jhimka putepute munyendela Falao pajhenda kuloche munnobholela, ‘Bhambo Chapanga ilonge naha, malekekeya bhando bhango bhajhende bhakannyimile. 21Anda mahibhilila kubhoka, nanimbula kwa malongo gha mabhembe ghighaluma, mwenga pamonga na akatumiche bhino na bhando bhii bhoha. Naghajhingila mu nyumba hino na nyumba yoha ya Akamichile naghatwelela mabhembe, na kila chehemo jhoha ku Michile. 22Nambo lichiko lyene chanibhabheka kutale ku Gochene, kwabhitama bhando bhango, mwenio mabhembe naghabhe jhe. Peniya ndi namanya kubhehe nenga ndi Bhambo Chapanga mmi mu kilambo chino. 23Bhando bhango naghakolejhe ilebhe ipakwakole bhando bhino. Na nginyililo jhene jha kukangacha naipitila kilabho.’ ” 24Bhambo Chapanga ngateila yene, malongo makolongwa gha mabhembe ngaghajhingila mu nyumba jha unahota nkolongwa gwa Falao, na munyumba ya akatumiche bhake na kilambo choha chuku Michile kikahangabhinwe na mabhembe.
25Peniya Falao ngabhakema Mucha na Alune, na kwalobholela, “Nyendengane makapiye litambiko Chapanga gwino, nambo ibhaha mombonemone mu kilambo cha Michile.”
26Nambo Mucha ngajhangwila, “Nahijhe! Lyene nalibhaha jhe lenga, nhwalo litambiko yatupakumpii Bhambo Chapanga, Chapanga gwito, naihanganicha jhe Akamichile. Anda tubhohite litambiko palonge jhabhe, bho, nabhatunkong'onda jhe maghanga? 27Ngita chitulaghila Bhambo Chapanga, Chapanga gwito, tupalwa tubhaha na mwanja gwa machiko matato kunjenga kupala kumpikiya Chapanga litambiko.”
28Falao ngabhalobholila, “Naninnekekeya nnyende makampiki litambiko Bhambo Chapanga gwino, kunjenga. Nambo nkotoka kujhenda kutale, na makanyopela na nenga.”
29Mucha nganyangwila, “Pimoka tu pamba chininyopa Bhambo Chapanga kilabho ammohe malongo gha mabhembe pa nyumba jhino mwenga pamonga na akatumiche bhino na bhando bhino. Nambo mwenga mangatutendejhe chanake kabhele, kukana kwalekekeya bhando kujhenda kumbikii litambiko Bhambo Chapanga.”
30Bhahe Mucha ngabhokita ukajha kwa Falao, ajhakunyopa Bhambo Chapanga. 31Bhambo Chapanga ngateila ngita Mucha chanyopita, na Bhambo Chapanga ngabhohita mabhembe kwa Falao na akatumiche bhake na bhando bhake, hilu likahighi jhe libhembe ata limo. 32Nambo kipinde chene Falao ngajhendelila kubhehe na mwojho unonoho, ngakanita kwalekekeya Akaichilahele bhabhoke.
ទើបបានជ្រើសរើសហើយ៖
Kubhoka 8: NdeBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in the Ndendeule Language @The Word for the World International and Ndendeule Language Translation. All rights reserved