Kubhoka 14
14
Kujhomboka mbwane jha Chamu
1Peniya, Bhambo Chapanga ngannobholila Mucha, 2“Malobholele Akaichilahele bhabhujhe unyuma, na bhabheke kighono pahina na Pi Hahilote, pakate jha muche gwa Megidole na mbwane jha Chamu, palonge jha mbwane Chefone. Peniya nammeka kighono pahina na mbwane. 3Falao ngalongila kubhehe, ‘Akaichilahele bhilyungalyunga tugha, nhwalo njenga jhahibhikiye kubhoka.’ 4Peniya, nenga nanitenda Falao abhe nalighoho, najwenie nankengamila mangota. Na nenga chinikipatila ung'alicho kwa kunkomelekeya Falao jwene na akakomana ngondo bhake. Na Akamichile nabhamanya kubhehe nenga ndi Bhambo Chapanga.” Bhahe, Akaichilahele ngabhateila ngita chabhalobholilwa.
5Falao, munahota nkolongwa jwa Akamichile, pajhohina kubhehe Akaichilahele bhatilite, jwene na akatumiche bhake ngabhaghalambwika malango ghabhe, ngabhalongila, “Bho, chenje nike? Anda twalekekekiye Akaichilahele bhakibhokele, abhii jhe jhonge kabhele jwa kututumikila!” 6Peniya, Falao ngalenganikiya mutuka jhake jha ngondo na akakomana ngondo bhake. 7Ngatola mutuka yake yambone ya ngondo miya chita pamonga na mutuka henge yoha ya ngondo yuku Michile yilongochwa na akatumiche bha ngondo. 8Bhambo Chapanga ngantenda Falao, munahota nkolongwa jwa ku Michile kubhehe na lighoho, na jwenie ngankengamila Akaichilahele, bhibhabhokite ku Michile changajhoghopa. 9Akamichile pamonga na falache yabhe yoha na mutuka ya ngondo na bhakwela falache, ngabhapengelila Akaichilahele, ngabhakolila bhabhekite kighono muupele jha mbwane, pahina na Pi Hahilote, palonge jha Mbwane Chefone.
10Akaichilahele pibhaghalabwika unyuma nu kummona Falao na akakomana ngondo bhake, ngabhahechwika hake ngibhannelila Bhambo Chapanga. 11Ngabhannobholila Mucha, “Bho, kukilambo chuku Michile pakibha jhe na chehemo jha kuchikana, ade twe tuhwele kunjenga? Kilebhe ghane chimutubhoikiya ku Michile? 12Tukannobholi jhe patukibha ku Michile, ‘Tukannobholii mwe mutuleke twatumikii Akamichile?’ Mbaha kwatumikii Akamichile kuliku kuwele kunjenga kone.”
13Mucha ngabhajhangwila, “Mangajhoghopa jhe ntama nganganga! Deleno nannola Bhambo Chapanga champa kunkombola. Akamichile bhamba namabhone ng'o kabhele. 14Bhambo Chapanga nankombola mangota, mipalwa ntama nuu tugha.”
15Peniya, Bhambo Chapanga ngannobholila Mucha, “Nhwalo gwanike minnelela? Malobholele Akaichilahele bhajhendele na mwanja gwabhe. 16Tondobheya nkongocho gwino panane jha mbwane. Mache naghabhaghanika kongo na kongo na Akaichilahele ngabhajhombwika pajhomo. 17Nenga chinatenda Akamichile kubhehe na miyojho minonoho, nabhankengama Akaichilahele pakate jha mbwane, peniya chinikipatila ung'alicho nhwalo gwa kukomelekelwa kwa Falao na akakomana ngondo bhake na mutuka yake ya ngondo pamonga na akakwela falache. 18Pambakunhotola Falao na akakomana ngondo bhake na akakwela falache na mutuka yabhe ya ngondo, nabhamanya kubhe nenga ndi Bhambo Chapanga.”
19Peniya, ntumiche jwa kunane kwa Chapanga jwakibha ajhemite palonge jha nchambe gwa Akaichilahele ngabhujha unyuma jhabhe. Hele lukelekete lwa lihunde ngaibhoka palonge na kubhujha unyuma jhabhe, 20ngaitama panakate jha Akaichilahele na Akamichile. Kilo ndaa lihunde lela ngalyabhekila lubhendo Akamichile, nambo lyakamulikile Akaichilahele kilo. Yene, akibha jhe jwakammandiki nnyake kilo ndaa.
21Peniya Mucha ngatondobhiya lubhoko lwake panane jha mbwane, Bhambo Chapanga ngaghakangita mache gha mu mbwane kwa upepo nkolonga kuhumii kulihumi lyobha. Ngaubhaghanicha mbwane chehemo ibhele na pakate ngapapitila undope nnyomo. 22Akaichilahele ngabhajhombwika panakate jha mbwane chehemo nyomo, nhwalo mache ghakaghabhanike upande gwa lubhoko lwa ulelo na ngejha. 23Akamichile ngabhankengima momo pamonga na falache yabhe na mutuka yabhe ya ngondo na akakwela falache bhoha. 24Pikubhandikila kuchegha, Bhambo Chapanga ngalingulila akakomana ngondo bha Akamichile kubhoke mu luheke lwa mwotu na luheke lwa lihunde, ngabhabhila mu mbwelelo ngolongwa. 25Maghuludumo gha mutuka yabhe ngaghatindila kwa kukwakamila hake. Akamichile ngabhalongila, “Twatile Akaichilahele! Nhwalo Bhambo Chapanga abhakengalila.”
26Peniya, Bhambo Chapanga ngannobholila Mucha, “Tondobheya lubhoko lwino panane jha mbwane, kupala mache ghakonganike na kwayekelela Akamichile pamonga na mutuka yabhe na akakwela falache bhabhe.” 27Yene, Mucha ngatondobhiya lubhoko lwake panane jha mbwane, pakuchila mbwane ngaibhila njelembo ngita makacho. Akamichile ngibhajhigha kughatila mache, nambo Bhambo Chapanga ngabhakangila mu mbwane. 28Mache ngaghayekelela mutuka pamonga na akakwela falache na akakomana ngondo bhoha bha Falao bhibhakengimila Akaichilahele ngabhawelila momo umbwane. Akahighii jhe Umichile hilu jhumo. 29Nambo Akaichilahele ngabhajhombwika pajhomo panakate jha mbwane, mache ghakibha upande gwa lubhoko lwalelo na ngejha.
30Lichiko lyene Bhambo Chapanga ngabhakombwila Akaichilahele mu mabhoko gha Akamichile, na Akaichilahele ngabhabhona malelo gha Akamichile muupele jha mbwane. 31Akaichilahele pibhalola kilebhe chenio chukujhoghoha chateila Bhambo Chapanga kwa Akamichile, ngabhannomba Bhambo Chapanga, ngabhabha na kihobholelo na Bhambo Chapanga na Mucha ntumiche gwake.
ទើបបានជ្រើសរើសហើយ៖
Kubhoka 14: NdeBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in the Ndendeule Language @The Word for the World International and Ndendeule Language Translation. All rights reserved