Johani 8
8
Mbuyama oyu wa kwatiwire mu mirembe
1Uno honi Yesu wa thzire ku Mukinya wEtondo yo Miywera. 2Mathsikuthsiku diyuwa o ku di va wa keyire karo ku Tembere. Anu wahe a keyire ku kwenthzi, wekarire pashi no ku tateka ku wa rongithsa. 3Arongithsi o murao nAfarithsi a retire ku kwenthzi mbuyama oyu wa kwatiwire mu mirembe no ku na mwimeka mu kaci ko mbunga.
4A amberire Yesu ci: “Murongithsi, oyu mbuyama na kwatiwa o ku rembeka. 5Mu murao Mushe wa tu raererire ci mbuyama o mushovo o kengeyo aa roera kwipaiwa ko ku povauriwa ko mawe. Owe honi ne waa ambapo ine?”
6Shime ambire eyi ku mu ta pa rudimi ci a wane po ku mu thzekithsera. Yesu wa kotamine no ku ñora pashi no munwe wenthzi. 7Ou a kwatererire ku mwipaura mangudi Yesu wa kotokire no ku wa ambera ci: “Oyu wa kana ku tendapo thsivi mu kaci kenu ekare o kutanga ku mu kuha diwe.” 8Wa kotamine karo no ku ñora pashi.
9Ou a yuvire eyi, a tatekire ku thsevuka yofoci yofoci ku tatekera akuru. Ku hura Yesu wa thsiarire yofoci, noya mbuyama o ku nemana pa rupara rwenthzi. 10Yesu ngou a kotokire no ku mwipura ci: “Mama, kupi a di waya a na ku thzekithsa?” O kwithsa oyu na thsiara ku ku thzekithsa?
11Wa tawire ci: “Okwithsa, ñathsire wange.” Yesu ngou a ambire ci: “Name ka ni ku ratura. O thze, unone mbera wa tenda thsivi karo.”
Yesu, aye mwethzi o kaye
12Yesu wa wa amberire karo ci: “Yame no mwethzi o kaye. Yomuhe o ku ni shupwera mbera ka a ende mu mirema, unone kenge mba a wana mwethzi o mwoyo.”
13Afarithsi ngou a mu amberire ci: “Waa pa ombangi woe yowe othsinda, ombangi woe kadi wa shemwa.”
14Yesu wa tawire ci: “Shaanga yame ni pa ombangi wange nothsinda, eyi ni na amba po yashemwa. Inene ni na dimuka oku na ni tundu noku ni thza, uno honi amwe ka mu dimuka oku na ni tundu noku ni thza. 15Amwe po mwaa ratura konu, ame ka ni raturangire munu. 16Uno honi ngeci naa ratura, raturo thzange thza shemwa, inene ka ni raturire nofoci, unone ame na Tata oyu naa ni tumu. 17Ku na ñoriwa mu Murao wenu ci ombangi wanu aidi po wa shemwa. 18Naa pa ombangi keyi yange, no Tata oyu naa ni tumu naye aa pa ombangi keyi yange.”
19A mwipurire ci: “Kupi a di Tata woe?” Yesu wa tawire ci: “Ame ka mu ni dimuka, no Tata naye ka mu mu dimuka. Nga mu na ni dimuka, no Tata nga mu na mu dimuka.” 20Yesu wa ambire aa maywi o ku rongithsa mu Tembere mu ndau omu kekarire kakoño ko nupu. Unone kwithsa oyu wa mu kwatire, inene thsikati thsenthzi ka thsa kumine.
Tumba mu twethsa ku thza oku ni thza
21Wa wa amberire karo ci: “Naa thza, kenge mwa ku ni fotafota, unone kenge mwa ku fera mu thsivi thsenu. Oku ni thza amwe tumba mu twethsa ku kumako.”
22Majuda ngou a ambire ci: “Ene kenge a ku cipaa ngeyi a ambera ci: ‘Oku ni thza, amwe tumba mu twethsa ku kumako nji’?”
23Wa wa amberire ci: “Amwe po mwaa tunda pano pashi, ame naa tunda ku wiru. Amwe po mwakwa muno mu kaye, ame kadi no mukwa muno mu kaye. 24Ni na mi ambera ci kenge mwa ku fera mu thsivi thsenu, inene ngeci ka mwa ku tawa ci Yame, kenge mwa ku fera mu thsivi thsenu.”
25A mwipurire ci: “Ci yowe odye?” Yesu wa wa amberire ci: “Ko ku matatekero ni na mi tongwera ci yame nodye. 26Ni di nenu yoingi eyi ni na roera ku amba keyi yenu no ku mi ratura. Unone oyu naa ni tumu po wa shemwa, karo naa tongwera anu o mu kaye eyi na ni yuvu ku kwenthzi.” 27Ka yuvithsithsire ci Yesu shime a wa tongwerire ya Tata wenthzi.
28Yesu ngou a wa amberire ci: “Ou mwa ku mana ku kureka Mwana Munu mbeci mwa ku dimuke ci Yame, no ku ninga ci kwithsa eyi ni na kwamanga kokoro wange nothsinda, unone naa amba dyodi a ni rongithsire Tata. 29Karo oyu naa ni tumu nange a di. Ka a ni thsiererire nofoci, inene thsikati thsothsihe naa tendanga yo ku mu roerithsa.” 30Owangi awa a mu yuvire o ku amba eyi enu a tawire ku kwenthzi.
Oshemwa kenge wa ku mi rukurura
31Yesu wa amberire Majuda awa a tawire ku kwenthzi ci: “Mwerongwa yange shemwa ngeci amwepo mu hengeka erongithsa yange. 32Karo kenge mwa ku dimuka oshemwa, karo oshemwa kenge wa ku mi rukurura.”
33A mu tawire ci: “Twanahoka a Aburahama, twa diyerire kwikara apika ku munu. Ine eyi o ambera ci: ‘Kenge mwa kurukururiwa?’” 34Yesu wa wa tawire ci: “Naa mi tongwera yoshemwa ci munu yomuhe o ku tenda thsivi po mupika thsivi. 35Mupika ka a variwerire mu rupathsi diyere, unone Mwana aye aa variwera mu rupathsi diyere. 36Mweyo, ngeci Mwana aa mi rukurura, kenge mwa ku rukuruka shemwa. 37Ni na dimuka ci mwanahoka a Aburahama, uno honi mwaa fota ku nipaa, inene ka mu fotire ku tambura diywi dyange. 38Ame naa mi ambera eyi na monine kwa Tata, unone amwe mwaa tenda eyi na mu yuvu kwa tata wenu.”
39A mu tawire ci: “Mukwathsañuru wetu po Aburahama.” Yesu wa wa amberire ci: “Nga mwana Aburahama nga mwaa tenda eyi a tendire. 40Uno honi amwe mwaa fota ku nipaa shaanga ci na ni mi tongwera oshemwa ou na ni yuvu kwa Nyambi. Eyi ka di yodiyo a tendire Aburahama. 41Mwaa tenda eyi a tendire tata wenu.”
A mu tawire ci: “Ka twerekiwerire mu ruthziho atwe, tu di no Tata wetu yofoci pohuma aye Nyambi.”
42Yesu wa wa amberire ci: “Nyambi nga Tata wenu, nga mu na ni shimi, inene kodiyo na ni tundu karo yame ono pano. Ka na ni cikeyera nothsinda, unone yodiyo na a ni tumu. 43Ine eyi mu kanena ku yuvithsithsa eyi ni amba? Mukaci ko ku ninga ci ka mu fotire ku cinyandithsa ku ni teerera. 44Mwaa tunda kwa tata wenu shamaonga, karo eshima yenu po ku tenda eshima ya tata wenu. Nedi thsipaanu ku tunda ku matatekero, karo ka a fota oshemwa, inene ka a di noshemwa mu mwenthzi. Yoihe angera, a amba eyi a neirera, inene wa kwangera karo yo tata o kwangera. 45Uno honi ame naa amba oshemwa ngeyi mu kanena ku tawa ku kwange. 46Ene kwaa di ku kwenu oyu nga o amba ci ni na tende thsivi? Ngeci naa mi tongwera oshemwa, ine eyi mu kanena ku tawa ku kwange? 47Munu yomuhe o ku tunda kwa Nyambi aa teerera maywi a Nyambi. Uno honi amwe kadi cingwa mwaa tunda kwa Nyambi ngeyi mu kanena ku ni teerera.”
Yesu na Aburahama
48Majuda a mu tawire ci: “Ene kadi ya shemwa eyi tu amba ci o Musamaria owe karo ci o di no mupepo oumango?”
49Yesu wa tawire ci: “Ka ni di no mupepo oumango. Naa remeka Tata, uno honi amwe ka mu ni remekire. 50Kadi cingwa naa fota direma kwanu, unone kwaa di oyu di ni fotera, karo yodiyo mukwakuratura. 51Naa mi tongwera yoshemwa, yomuhe o ku hengenga diywi dyange mbera ka a fu.”
52Majuda a mu amberire ci: “Tu na dimuka honi yoshemwa ci o di no mupepo oumango. Aburahama wa fa, nakwakukethza wahe a fa, uno honi owe wa amba ci o ku hengeka diywi dyoe mbera ka a fu. 53Owe ne o mukuru kupita tata wetu Aburahama oyu wa fire nji? Nakwakukethza nawo a fire, owe ne waa anekera ci yowe odye?”
54Yesu wa tawire ci: “Ngeci nga o ni cishangare nothsinda, kucishangara kwange nga ka ku kwathsa thsimweya. Oyu na ni shangara po Tata oyu mu ninga ci Nyambi wenu. 55Uno honi amwe ka mu mu dimuka, ame ni na mu dimuka. Ou nga ni amba ci ka ni mu dimuka, apo kenge nga nikara o kwangera eci amwe. Uno honi ni na mu dimuka no ku hengeka diywi dyenthzi. 56Tata wenu Aburahama wa nyanyukire ci nga na mono diyuwa dyo kukeya kwange. Wa di monine karo wa nyanyukire nene.”
57Majuda ngou a mu amberire ci: “Ko di no myaka shaanga thzo makumi mutanu thzo kwerekiwa, ngepi honi nga o amba ci shime waa mona Aburahama?”
58Yesu wa wa amberire ci: “Naa mi tongwera yoshemwa ci Aburahama o ku shime kwerekiwa ame o ku ni diko.” 59Ngou a torire mawe ci a mu kuhe, unone Yesu wa cihorekire no ku puna mu Tembere.
ទើបបានជ្រើសរើសហើយ៖
Johani 8: mho
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2023 The Seed Company
