Johani 1
1
Yesu po Diywi dyo mwoyo
1Ku matatekero Diywi ko dyekarire. Karo Diywi dyekarire kwa Nyambi, mane nedi Nyambi. 2Wekarire kwa Nyambi ku tunda ku matatekero. 3Nyambi wombire enu yoihe kenthzi, karo kwithsa ethsi thsombiwire ko kupira aye. 4Ku kwenthzi kwekarire mwoyo, karo oo mwoyo wa retire mwethzi kwanu wahe. 5Mwethzi waa muneka mu mirema, karo mirema ka na thzi u othzo#1.5 Mirema ka na thzi u yuvithsithsa..
6Nyambi wa tumine mukwerume o dithzina dyo Johani, 7ku na pa ombangi keyi yoo mwethzi ci munu yomuhe a tawe mukaci kombangi wenthzi. 8Aye nedi ka di cingwa yodiyo mwethzi, unone shime a keyire ku na pa ombangi o o mwethzi. 9Aye mwethzi shemwa, oyu munekera anu wahe, o ku keya mu kaye.
10Wekarire mu kaye aka ombire, unone kaye ka ka mu dimukire. 11Wa keyire kwanuenthzi shemwa, unone awo ka mu tamburire. 12Unone wahe awa mu tamburire no ku tawa ku kwenthzi, wa wa pire okoro o kwikara ana Nyambi. 13A nerekiwa ope, uno honi kadi konyinga nji keshima yerama nji keshima yo mukwerume, unone kwerekiwa ko ku tunderera kwa Nyambi.
14Diywi dya pirukire munu no ku tunga mu kaci ketu. Na tu mono kutethzima kwenthzi, kutethzima kwa Mwana yofoci pakamutwa oyu naa tundu kwa Tata, aye o kuyara thsihemo noshemwa.
15Johani wa na pire ombangi keyi yenthzi, wa kuererire ci: “Oyu yodiyo na ambire yenthzi uya na ambire ci: ‘Kwaa di oyu keya o mukuru ku kwange oyu keya mu nyima thzange, inene kwa ekarire ame o ku ni shime.’”
16Inene mu kuyara kwenthzi twahe na tu rundekiwera rundekiwera thsihemo. 17Inene murao shime wa piwire ka Mushe, unone thsihemo noshemwa ya keyire ka Yesu Krisitu. 18Kwithsa oyu wa mona Nyambi, shime aye Mwane yofoci pakamutwa, aye Nyambi shemwa, oyu di mu mbando thza Tata. Yodiyo naa mu hokora ku kwetu.
Ombangi wa Johani Mukwakukorovethza
(Mat 3.1-12; Mar 1.1-8; Luk 3.1-18)
19Ou wodiyo ombangi a pire Johani, Majuda o ku Yerusalema ou a tumine mapurisita no Malivi ku na mwipura ci: “Yowe odye?” 20Johani wa pire ombangi, ka a hamurire, unone wa pire ombangi ci: “Kadi yame no Mesiya.”
21Ngou a mwipurire ci: “Yowe odye honi ne? Yowe o Eliya nji?”
Wa ambire ci: “Dyombo.”
Nji yowe o Mukwakukethza oyu tu taterera?
Wa tawire ci: “Dyombo.”
22“Nji yowe odye honi ne? Twaa fota eyi tu ka tongwera awa a na tu tumu. O ciambere, yowe odye?”
23Johani wa tawire ko ku cikwathsithsa maywi a mukwakukethza Isaya ci:
“Yame no diywi edi di kuerera mu dikunguthsitu ci:
‘Mu orore mukwakwa wa Fumu!’”
24Afarithsi awa a tumiwire ngou 25epurire ci: “Ine honi eyi o korovethzera ngeci ka di yowe o Mesiya nji Eliya nji Mukwakukethza oyu tu na taterera?”
26Johani wa wa tawire ci: “Naa mi korovethza ko meyu, uno honi mu kaci kenu mwaa di oyu mu na kana ku dimuka. 27Yodiyo oyu keya munyima thzange, ka ni roerire shaanga ku putura tuangithso to mashangu enthzi.”
28Eyi yoihe shime ya tendaharerire mu Betania#1.28 Thza ethsiwa karo ci Betabara., ndau thzo ku muvo o Rware rwa Jorodani, oku a korovethzerire Johani.
Yesu, Dinguana dya Nyambi
29Diyuwa edi dya randireko, Johani wa monine Yesu o ku mu tamba. Ngou a ambire ci: “Mu mone! Oya Dinguana dya Nyambi, aye o ku tundithsa thsivi thso kaye! 30Yodiyo na ambire yenthzi uya na ambire ci: ‘Munyima thzange aa keya mukwerume o mukuru ku kwange, inene kwa ekarire ame o ku ni shime.’ 31Ka na mu dimukire ci yodiyo Mesiya, unone na ni korovethza ko meyu ci a dimukiwe kwanu o mu Isiraele.”
32Johani wa pire ombangi ci: “Na monine Mupepo o ku u keya ku tunda ku wiru eci dikuci no ku na tura pa penthzi. 33Ka na mu dimukire, unone oyu wa ni tumine ku na korovethza ko meyu, wa ni amberire ci: ‘Oyu wa ku mona o ku u mu shurumukera Mupepo Oukenu no ku na tura pa penthzi yodiyo wa ku korovethza ko Mupepo Oukenu.’ 34Na ni mono eyi o ku i tendahara kwa Yesu, mweyo, naa pa ombangi ci yodiyo Mwana Nyambi.”
Yesu aethsa erongwa yo kutanga
35Diyuwa edi dya randireko, Johani shime emanine karo nerongwa idi kwirongwa yenthzi. 36Yesu o ku pitapita, Johani wa mu kengererire no ku amba ci: “Mu mone! Dinguana dya Nyambi oya!” 37Eyo erongwa idi ya Johani ou ya yuvire eyi, ya shupwerire Yesu.
38Yesu wa cithsetukire no ku i mona o ku i mu shupwera, wa i amberire ci: “Ine eyi mu fota?” Ya tawire ci: “Rabi,” (ku amba ci Murongithsi), “kupi oku o nekaranga?” 39Wa i tawire ci: “Mu keye na mu mone.” Ya thzire no ku ka mona oku na ekaranga, karo ya ka onthzire nenthzi, inene nedi runguro.
40Yumweya kwawo aidi awa a yuvire eyi a ambire Johani no ku shupwera Yesu po nedi Andereasi mina Simoni Peturu. 41Thso kutanga ethsi a kwamine Andereasi po ku thza ku ka fota mukurwe Simoni no ku mu ambera ci: “Tu na mu wana Mesiya (ku amba ci Krisitu).”
42Ngou Andereasi a retire Simoni kwa Yesu. Yesu wa mu kengererire thsithzui no ku amba ci: “Yowe o Simoni mwana Johani. Ku tunda pano kenge wa kwithsiwa Kefasi (ku amba ci Peturu nji ci Diwe).”
Yesu aethsa Filipu na Natanaele
43Diyuwa edi dya randireko, Yesu wa anekerire ku thza ku Galilea. Wa wanine Filipu no ku mu ambera ci: “O ni shupwere.” 44Filipu po nedi wa ku Betisaida, mbongi omu a tungire a Andereasi na Peturu.
45Filipu wa wanine Natanaele, ayepo mu ambera ci: “Tu na mu wana oya munu a ambire yenthzi Mushe mu Murao, aye oyu karo a ñorire yenthzi akwakukethza. Yodiyo Yesu dithzina dyenthzi, mwana Josefa o ku Nazareta.”
46Natanaele wa mwipurire ci: “Ene kenge nga ku tunda thsinu thsothsiwa mu Nazareta?”
Filipu wa mu tawire ci: “O keye no mone!”
47Yesu ou a monine Natanaele o ku keya ku kwenthzi, wa ambire yenthzi ci: “Oyu po Muisiraele shemwa o kupira kwangera.”
48Natanaele wepurire Yesu ci: “Waa ni dimuka ngepi?” Yesu wa mu tawire ci: “Shime naa ku mona o ku di mwimi thzo thsitondo thsokuyu Filipu o ku shime ku kwithsa.”
49Natanaele wa tawire ci: “Murongithsi, yowe o Mwana Nyambi! Yowe o Fumu wa Isiraele!”
50Yesu wa mwipurire ci: “Ene waa tawa pakuninga ci ni na ku tongwera ci shime naa ku mona mwimi thzo thsitondo thsokuyu? Kenge wa ku mona enu yoikuru kupita eyi.” 51Yesu wa ambire karo ci: “Naa mi tongwera yoshemwa ci kenge mwa ku mona diwiru o ku di na yanthzuruka no tungeru twa Nyambi o ku tu thzina mu wiru no ku shiruka mu wiru peuru thza Mwana Munu.”
ទើបបានជ្រើសរើសហើយ៖
Johani 1: mho
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2023 The Seed Company
