ДжакӀуэ 4
4
ЕплӀанэ Ӏыхьэ
Дэкъузэныгъэмрэ лэжьыгъэмрэ
1Къэслъэгъуащ итӀанэ зыр зым дикъузэн щхьэкӀэ, мы уафэм и щӀагъым щалэжь псори:
къэслъэгъуащ дэкъузахэм я нэпсыр,
щымыӀэ ахэр зыгъэудэӀун,
лъэщыгъэр дэзыкъузэм дежщ здэщыӀэр,
яхэмыт абыхэм щыжакӀуэ.
2Псэум еплъытмэ,
щымыӀэжым и махуагъэу къэслъытащ.
3Ауэ сыткӀи ехъулӀар
иджыри дунейм къытемыхьарщ,
мы уафэм и щӀагъым щалэжь ер
зи зымылъэгъуарщ.
4Къэслъэгъуащ гуащӀэдэкӀри, ехъулӀэныгъэри псори хьэрхуэрыгъэм къызэрыхэкӀыр#4:4 Е «Къэслъэгъуащ гуащӀэдэкӀми ехъулӀэныгъэми цӀыхухэм я зэхуакум фыгъуэ-ижэр къызэрыдилъхьэр».. Мыри пщӀэншэщ, зи щхьэпи щыӀэкъым.
5ПкъыщӀэлӀэ хъурэ пэт,
Ӏулэм и Ӏэхэр зэтелъу щысщ.
6Зи щхьэпи щымыӀэу ерагъмыгъуейкӀэ къэблэжь дзэкъэгъуитӀым нэхърэ,
гупсэхугъуэр зыщӀыгъу шхын Ӏулъхьэр нэхъыфӀщ.
Дзей гъусэ уиӀэным фӀагъыу хэлъыр
7Мы уафэм и щӀагъым щыслъэгъуащ пщӀэ зимыӀэ нэгъуэщӀ гуэри:
8и щхьэ закъуэ и лъакъуитӀу псэут цӀыхур, къыгуэувэну анэкъилъхуи лъхугъи зыри имыӀэу. Ӏуэхуу илэжьми кӀэ иӀэтэкъым, мылъкуу бгъэдэлъымкӀи зигъэнщӀыжыртэкъым. «Хэт мыпхуэдизу гугъу зыщӀезгъэхьыр, – йогупсыс ар, – мыпхуэдизу си псэри бэлыхь щӀыхэзгъэтыр сыт?» Мыри пщӀэ зимыӀэ Ӏуэхущ, зиунагъуэрэ, насыпкъэмыгъакӀуэщ!
9Зи щхьэ закъуэм нэхърэ, дзеегъу зэхуэхъуахэм я пхъэ нэхъ къокӀ: я лэжьыгъэ къыпэкӀуэр фӀыуэ нэхъыбэщ.
10Зыр укӀуриймэ, зым къегъэувыжыр.
Ауэ уанэ мыгъуэр тезылъхьар зи щхьэ закъуэращ,
укӀуриймэ, къэзыгъэувыжын иӀэнукъым.
11ТӀур зэдэгъуэлъмэ, зэрыгъэхуэбэнщ,
зи щхьэ закъуэм дауэ зигъэхуэбэжын?
12Закъуэм пэувыгъуафӀэ щхьэкӀэ,
тӀакъуэм зыкъагъэгъунэжыфынущ.
ӀуданищкӀэ зэӀуща кӀапсэр щӀэх зэпычынукъым.
Пащтыхьыгъуэ хабзэхэр пщӀэ зимыӀэщ
13УпщӀэжу ирахьэлӀэм щӀэмыдэӀужу жьы хъуа пащтыхь Ӏулэм нэхърэ, тхьэмыщкӀэми, щӀалэ Ӏущыр нэхъыфӀщ. 14Пащтыхьыгъуэм щыщ унагъуэ хуэмыщӀам къыхэкӀа пэтми, щӀалэр лъэхъуэщым къикӀыжри пащтыхь тахътэм дэкӀуеящ. 15Асыхьэтми мы уафэм и щӀагъым щӀэт дэтхэнэ зыми и щхьэ кърикӀуэр къэслъэгъуащ: а щӀалэми и пӀэ иувэну нэгъуэщӀ гуэр къыкъуэкӀынущ. 16Абы и лъэныкъуэ хъуну цӀыхум и бжыгъэри къыпхуэмылъытэным хуэдизщ. АрщхьэкӀэ нэхъ иужьыӀуэкӀэ дунейм къытехьэнухэм ари ядэжынукъым. Мыбыи пщӀэ иӀакъым, зи щхьэпи щыӀакъым.
ПсынщӀэетэу ящӀа тхьэлъанэхэр
17Тхьэм и Унэм ущыкӀуэкӀэ, зыхуэсакъыж. УдэӀуэн щхьэкӀэ абы уекӀуэлӀэныр нэхъыфӀщ бзаджагъэ зэралэжьым гу лъызымытэж акъылыншэхэм хуэдэу абдеж къурмэн щыпщӀыным нэхърэ.
ទើបបានជ្រើសរើសហើយ៖
ДжакӀуэ 4: АдгФЛ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2009, 2018, 2021