Данил 4
4
1Сэ тыншыгъуэ сиӀэу си сэрейм сытхъэжу сыщыпсэут. 2Ауэ зэгуэр пщӀыхьэпӀэ слъагъури сигъэшынащ; си гъуэлъыпӀэм силъу пщӀыхьым хэту къысхуэлъэгъуам гулэгущтэ сищӀащ. 3Арати, Бабылейм усэрэжу исхэр къашэну унафэ сщӀащ, си пщӀыхьэпӀэм къикӀыр абыхэм жезгъэӀэн папщӀэ. 4Ӏэзэгъуазэхэри, нэщыпхъуэхэри, мэгъухэри, удхэри къакӀуэри си пщӀыхьэпӀэр яхуэсӀуэтащ, арщхьэкӀэ абы къикӀыр зыми къыхуэщӀакъым. 5ИкӀэмикӀэжым Данил, си тхьэм и цӀэкӀэ иджыри БэлътэщэркӀэ зэджэр, тхьэ лъапӀэхэм я псэр#4:5 тхьэ лъапӀэхэм я псэр – Е «Тхьэ лъапӀэм и псэр»; апхуэдэуи еплъ пычыгъуэ 6-нэм, 15-нэм. зыхэтыр, къакӀуэри си пщӀыхьэпӀэр хуэсӀуэтащ.
6Сэ жысӀащ: «Мэгъухэм я пашэу Бэлътэщэр, сэ сощӀэ тхьэ лъапӀэхэм я псэр зэрыпхэтыр, икӀи уэ къыщӀэбгъэщынкӀэ къогугъуэкӀын щэху зэрыщымыӀэр. КъедаӀуэ си пщӀыхьэпӀэр зыхуэдэми, къикӀыр къызжеӀэ. 7Мыращ сызэпщӀыхьар, си гъуэлъыпӀэм силъу:
ЩӀыгум и кум итт жыг лъагэшхуэ –
8уардэрэ лъэ быдэу,
и щхьэкӀэр уафэм нэсрэ,
щӀым и гъунэми щыплъагъуу;
9и тхьэмпэхэр Ӏуврэ, и пыкӀэр бэву,
псоми я шхын абы пыту;
и жьауэм хьэкӀэкхъуэкӀэхэр щӀэсрэ,
и къудамэхэр къуалэбзухэм я абгъуэу,
псэ зыӀут псоми ар я шхыныгъуэу.
10Си пӀэщхьагъ силъыжу адэкӀэ солъагъу –
ХъумакӀуэ лъапӀэр уафэм къехри,
11къыжиӀащ макъышхуэкӀэ мыпхуэдэу:
„ИвупщӀыкӀ жыгри, гуэвуд и къудамэхэр,
и тхьэмпэхэр ффыщӀи, пывгъэщэщ пыкӀэхэр,
и лъабжьэм щӀэс хьэкӀэкхъуэкӀэр зэбгрыреж,
и къудамэхэм тес къуалэбзухэри зэбгрелъэтыж.
12Жыг дакъэ закъуэр лъабжьэм и гъусэу
щӀым къыхэвнэ, губгъуэ удзхэм яхэту, жыррэ гъуаплъэкӀи зэщӀэлъэхъауэ.
Уафэм къех уэсэпсым ар игъэщӀытэу,
хьэкӀэкхъуэкӀэхэми ядэщӀыгъуу,
щӀыгу удзыпцӀэр егъэзыпӀэ хурехъу.
13ЦӀыху акъылым икӀынурэ ар,
хьэкӀэкхъуэкӀэ гупсысэм ихьэнущ,
апхуэдэуи илъэсибл#4:13 илъэсибл – Хьэрфхэм къарыкӀыр: «зэманибл»; апхуэдэуи еплъ пычыгъуэ 20-нэм, 22-нэм, 29-нэм. «Блы» бжыгъэр «нэгъэсам, зыри зыхуэмычэмым» и дамыгъэу къагъэсэбэпу куэдрэ ущрохьэлӀэ журтхэм я хабзэм. ней дэкӀынущ.
14А унафэр ХъумакӀуэхэм ейщ,
а хьэкумыр ЛъапӀэхэм я псалъэщ!
Псэ зыӀут псоми ящӀапхъэщ,
тепщэныгъэр зыхуейм ириту
Я нэхъ Лъагэм зэрыӀэщӀэлъыр, уеблэмэ,
ямылъытэхэри пащтыхьыпӀэм иришэу“.
15Мис аращ сэ сызэпщӀыхьа пщӀыхьэпӀэр зыхуэдэр, – жиӀащ Нэбыхъунэщыр пащтыхьым. – ИӀэ иджы, Бэлътэщэр, абы къикӀыр къызжеӀэ, си пащтыхьыгъуэм и зы усэрэжи ар лъэкӀакъым, ауэ уэ пхузэфӀэкӀынущ, тхьэ лъапӀэхэм я псэр пхэтщи».
Данил пщӀыхьэпӀэм къикӀыр къызэрыжиӀар
16БэлътэщэркӀэ зэджэ Данил абдежым заулкӀэ Ӏэнкуну щытащ, и гупсысэхэм хуабжьу игъэгузавэу.
Пащтыхьым жиӀащ: «Бэлътэщэр, а пщӀыхьэпӀэми абы къикӀми уримыгузавэ».
Бэлътэщэр жэуап къритыжащ: «Си зиусхьэн, а пщӀыхьэпӀэри абы къикӀри уи бийхэм ялъысам нэхъыфӀт! 17Уэ плъэгъуа жыгыр – уардэрэ лъэ быдэр, уафэм зи щхьэкӀэр нэсрэ, щӀым и гъунэми щыплъагъур; 18зи тхьэмпэхэр Ӏуврэ, зи пыкӀэр бэвыр, псоми я шхыныгъуэ зыпытыр, зи жьауэм хьэкӀэкхъуэкӀэхэр щӀэсрэ, зи къудамэхэр къуалэбзухэм зи абгъуэр – 19ар уэращ, ди пащтыхь лъапӀэ! Уэ щэджащэ, лъэщышхуэ ухъуащ; уи инагъыр уафэм нэсащ, уи пащтыхьыгъуэр щӀым и гъунэм нос.
20Уэ, ди пащтыхь, ХъумакӀуэ лъапӀэр уафэм къехыу плъэгъуащ, мыпхуэдэу жиӀэу: „ИвупщӀыкӀ жыгри вгъэкӀуэд, ауэ и лъабжьэм щӀыгъуу и дакъэр щӀым къыхэвнэ, жыррэ гъуаплъэкӀэ лъэхъауэ губгъуэ удзым хэту, уафэм къех уэсэпсым игъэщӀытэу, хьэкӀэкхъуэкӀэхэм ящӀыгъуу ар ирепсэу, илъэсибл ней дэкӀыхукӀэ“.
21Абы къикӀыращи, ди пащтыхь лъапӀэ, уэ уэхьэлӀауэ Я нэхъ Лъагэм и унафэр мыращ: 22цӀыхухэм укъыхахунурэ, хьэкӀэкхъуэкӀэхэм уахэту упсэунущ, Ӏэщым хуэдэу удз цӀынэр уи шхыныгъуэу, уэсэпсыр къыптехэу. Апхуэдэу илъэсибл дэкӀынурэ, итӀанэ уэ къыбгурыӀуэнущ – Я нэхъ Лъагэм цӀыхухэм я тепщэныгъэр зыхуейм ириту зэрыӀэщӀэлъыр.
23Жыг дакъэр лъабжьэм щӀыгъуу къагъэнэну ящӀа унафэм къокӀыр уи пащтыхьыгъуэр зэрыпфӀэмыкӀуэдынур, Уафэм и къарум псори зэрыщӀэтыр зэхэпщӀыкӀа нэужь ар къызэрыпӀэрыхьэжынур. 24Абы къыхэкӀкӀэ, ди пащтыхь лъапӀэ, си чэнджэщым ущӀэдэӀуамэ арат: уи гуэныхьхэм пыкӀи, захуагъэ лэжь; тхьэмыщкӀэхэм гущӀэгъу яхуэпщӀурэ уи хабзэншагъэм кӀэ ет; итӀанэ, хэт ищӀэрэ, уи махуэфӀхэм къыпащэнкӀи хъунщ».
ПщӀыхьэпӀэр нэхуапӀэ зэрыхъуар
25А псори Нэбыхъунэщыр пащтыхьым къыщыщӀащ. 26Мазэ пщыкӀутӀ дэкӀауэ, абы Бабылейм ит и сэреишхуэм и унащхьэм тету къыздикӀухьым, 27мыпхуэдэу жиӀащ: «Сыту иныщэ мы Бабылейр! Си щӀыхьымрэ си пщӀэмрэ игъэбагъуэу, пащтыхь къалащхьэу сэ ар зэрызухуар си лъэщыгъэшхуэкӀэщ!»
28А псалъэхэр жиӀэн имыух щӀыкӀэ уафэм макъ къиӀукӀащ: «Мыращ, Нэбыхъунэщыр пащтыхьым, уи натӀэр: уи пащтыхьыгъуэр къыпӀэщӀахащ. 29ЦӀыхухэм укъыхахунурэ, хьэкӀэкхъуэкӀэхэм я гъусэу упсэунущ, Ӏэщми хуэдэу удз цӀынэ пшхынущ. Апхуэдэурэ илъэсибл дэкӀынурэ, итӀанэ уэ къыбгурыӀуэнущ: Я нэхъ Лъагэм цӀыхухэм я тепщэныгъэр зыхуейм ириту зэрыӀэщӀэлъыр».
30Нэбыхъунэщыр теухуауэ жаӀар асыхьэтым къэхъуащ. ЦӀыхухэм къыхахури, абы Ӏэщым хуэдэу удз ишхащ. Уэсэпсыр къытехэу псэуащ ар, и щхьэцыр бгъэм и къабзийхэм хуэдэу кӀыхьышхуэ, и лъэбжьанэхэр къуалэбзу лъэбжьанэм хуэдэ хъуху.
31АдэкӀэ къэхъуари къиӀуэтэжащ Нэбыхъунэщыр: «Зэман дэкӀщ, сэ уафэм сыдэплъейри, си акъылым сихьэжащ. Абдежым Я нэхъ Лъагэм фӀыщӀэ хуэсщӀащ; щытхъу хужысӀэурэ ИгъащӀэкӀэ Псэур згъэлъэпӀащ.
Абы и тепщэныгъэр мыкӀуэдыжынщ,
и пащтыхьыгъуэми кӀэ иӀэнукъым.
32ЩӀым щыпсэухэр зыри ищӀыскъым;
уафэм и дзэхэри щӀылъэм тетхэри
зэрегъакӀуэ Абы Езым и ӀэмыркӀэ.
Зыми лъэкӀынукъым Абы и Ӏэр иубыдыну
хьэмэрэ „Сыт Уэ пщӀар?“ жриӀэну.
33Си акъылым сызэрихьэжу, пащтыхьым и пщӀэри, и щӀыхьри, и лъапӀагъэри къысӀэрыхьэжащ. Си чэнджэщэгъухэми си блыгущӀэтхэми, си деж къагъэзэжри, аргуэру пащтыхьу салъытэ хъужащ, икӀи япэм нэхърэ ӀэджэкӀэ сынэхъ лъэщщ. 34Иджы сэ сыщотхъу, соӀэт, согъэлъапӀэ уафэм и Пащтыхьыр. Абы ищӀэ псори пэжыгъэщ икӀи захуагъэщ. Абы лъокӀ пагэхэр Ӏэсэ ищӀыну».
ទើបបានជ្រើសរើសហើយ៖
Данил 4: АдгФЛ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2009, 2018, 2021