ಮತ್ತಾಯ 26
26
ಯೆಸುನೆ ಖಲಾಸ ಕರಾನೆ ದೆಕಲ
(ಮಾರ್ಕ 14:1-11; ಲುಕ 22:1-6)
1ಯೆಸು ತೆ ಕ್ಹಾರಿಯೊ ವಾತೊ ಕೈನ ಮುಗ್ಸಲ್ಪರ ತಿನಾ ಶಿಶ್ಯಾವೊನೆ ಬೆ ದಿನ್ನ ಥಯಲ್ಪರ ಫಸ್ಕ ಸನ್ನ ಆವಾನೊ ಛೆ ಕೈನ ತುಮೊನೆ ಗ್ವತ್ತ ಛೆ; 2ತೆಳಾಮಾ ಮನಕ್ಹನಾ ದಿಕ್ರಾನೆ ಶಿಲುಬಿಪರ ಘಾಲಾನೆ ವಪ್ಸಿನ ದಿವಸ ಕೈನ ಕದ್ಯೊ. 3ತೆ ಕಾಲಮಾ ಖಾಸ ಯಾಜಕೊ, ಶಾನಾ ಮನಕ್ಹೊ ಕಾಯಫ ಕವಾಲೊ ಮ್ಹೊಟೊ ಯಾಜಕನಾ ಭವನಮಾ ಮಳಿನ ಐನ 4ಯೆಸುನೆ ಗಪ್ಪಜ಼ ಧರಿನ ಖಲಾಸ ಕರು ಕೈನ ಮ್ಹೈನಾ ಮ್ಹೈ ವಿಚಾರ ಕರ‍್ಯಾ.
ಬಾಕ್ಡಿ ಮೊಗಾನು ತೆಲ ತಿನಾ ಮಾತಾಪರ ರಿಚಾ಼ಯಲ
5ವರಿಬಿ ಸನ್ನಮಾ ಅಪೆ ಯೆಸುನೆ ಧರುನೈ ಕೈನ, ಅಪ್ನಾ ಮನಕ್ಹೊಮಾ ಗದ್ದಲ ಥಾವಸ ಕೈನ ಬೊಲ್ಲಿದ್ಯಾ. 6ಯೆಸು ಬೆಥಾನ್ಯಮಾ ಸಿಮೊನ ಕೈನ ಕವಾಲಾ ಕುಷ್ಠರೊಗಿನಾ ಘರಮಾ ಖಾವಾನೆ ಬೈಟಲ ಟೈಮಮಾ ಯಕ್ಲಿ ಬಾಕ್ಡಿ 7ಘನ್ನು ಮೊಗು ಬಾಸನಾ ತೆಲನಿ ಭರ್ಣಿ ಲೈನ ತಿಕನ ನಜಿಕ ಐನ ತೆ ತಿನಾ ಮಾತಾಪರ ರಿಚೈ಼. 8ಶಿಶ್ಯಾ ಎ ಕ್ಹಾರು ದೆಕಿನ ಸುಕ್ನಿಜ಼ ಖರ್ಚ಼ ಕರಾನು ಕಾ? 9ಎ ತೆಲ ಮೊಗು ಇಕ್ಕಿನ ಗರಿಬೊನೆ ದಿವಾನೆ ಥಾತುತುತೊ ಕದ್ಯಾ. 10ಯೆಸುನೆ ಎ ಗ್ವತ್ತ ಥಾತಾಮಾ ತ್ಯುನೊನೆ, ಎ ಬಾಕ್ಡಿನೆ ಕಾ ತ್ರಾಸ ಕರಾಡಾಸ? ಎ ಮನೆ ಚೊ಼ಕು ಕಾಮ ಕರಿಸ. 11ಗರಿಬೊ ಹಮೆಶಾಬಿ ತುಮಾರಾ ಕ್ಹಾತೆ ರ‍್ಹವಸ್ತೊ, ಮಿ ತುಮಾರಾ ಕ್ಹಾತೆ ಹಮೆಶಾಬಿ ರ‍್ಹತೊ ನೈ.
12ಎ ಬಾಕ್ಡಿ ಎ ತೆಲ ಮಾರಾ ಅಂಗ್ಪರ ರಿಚಾ಼ಯಲ ಮಾರಾ ಉತ್ತರ ಕ್ರಿಯೆನೆ ವ್ಹೈ. 13ಮಿ ತುಮೊನೆ ಕ್ಹರಿಮಾಜ಼ ಕೌಸ, ಎ ಸುವಾರ್ತೆ ಕ್ಹಾರಿ ದುನಿಯಾಮಾ ಕವಸ ತ್ಯಾ ತ್ಯಾ ಎ ಬಾಕ್ಡಿನಾಹುತಿ ಶೆಂ ಕರಸ.
14ತೆಳಾಮಾ ಬಾರಾ ಶಿಶ್ಯಾವೊಮಾನೊ ಯಕ್ಲೊ ರ‍್ಹಯಲ ಇಸ್ಕರಿಯುತ ಯುದ ಕವಾಲೊ ಖಾಸ ಯಾಜಕೊಕನ ಗೈನ, 15ಮಿ ತಿನೆ ಧರಿನ ದಿವಾನೆ ತುಮೊನೆ ಮದತ ಕರ‍್ಯೊಮ ಮನೆ ತುಮೆ ಸು ದಿವೊಶಿ? ಕದ್ಯೊ. ತಿವ್ನೆ ತಿನೆ ಮುವತ್ತ ರುಪ್ಪಾನಾ ಬಿಲ್ಲಾ ದಿದ್ಯಾ. 16ತೆಳಾಮಾತಾ ತಿವ್ನೆ ತಿನೆ ಧರಾನಾಹುತಿ ಮೌಕೊ ದೆಕಾಡಾತಾ.
ಯೆಸು ತಿನಾ ಶಿಷ್ಯಾವೊನಾ ಕ್ಹಾತೆ ಲಾಸ್ಟಸಲಾ ಖಾದಲ
(ಮಾರ್ಕ 14:12-31; ಲುಕ 22:21-26; ಯೊಹಾನ 13:21-26)
17ಖಾಟೊ ನೈಸೊ ರೊಕ್ಲಾನೊ ಸನ್ನಾ ಪೈಲಾನಾ ದಿನ್ಮಾ ಶಿಶ್ಯಾ ಯೆಸುಕನ ಐನ, ಪಸ್ಕನು ಅನ್ನ ಖಾವಾನಾಹುತಿ ಹಮೆ ತುನೆ ಕಿಜಾ಼ ತಯ್ಯಾರ ಕರುಕೈನ ಛೆ ಕೈನ ಪುಚ್ಯಾ. 18ತೆ ತ್ಯುನೊನೆ ಗಾಮಮಾ ಮಿ ಕದಲವಾಲಾಕನ ಗೈನ ತಿನೆ, ಮಾರೊ ಟೈಮ ನಜಿಕ ಆಯೊಸ, ಮಿ ಮಾರಾ ಶಿಶ್ಯಾವೊನಾ ಕ್ಹಾತೆ ಪಸ್ಕ ಸನ್ನ ಕರುಸ ಕೈನ ಗುರು ಕವಾಡೊಸ ಕೈನ ಕವೊ ಕದ್ಯೊ.
19ಶಿಶ್ಯಾ ಯೆಸು ಕದಲ ತಿಮ್ಮಜ಼ ಪಸ್ಕಾನು ಅನ್ನ ತಯ್ಯಾರ ಕರ‍್ಯಾ. 20ಕ್ಹಾಂಜ಼ ಥಾತಾಮಾ ತಿನಾ ಬಾರಾ ಶಿಶ್ಯಾವೊನಾ ಕ್ಹಾತೆ ಖಾವಾನಾಹುತಿ ಬೈಟ್ಯೊ. 21ತ್ಯುನೆ ಅನ್ನ ಖಾತಾಮಾ ತೆ, ತುಮೊನೆ ಕ್ಹರಿಮಾಜ಼ ಕೌಸ ತುಮಾಮಾ ಯಕ್ಲೊ ಮನೆ ಧರೈನ ದಿವಸ ಕೈನ ಕದ್ಯೊ. 22ತೆಳಾಮಾ ತ್ಯುನೆ ಘನ್ನಾ ದುಖಿ ಥೈನ ಕರ್ತಾ, ಮಿ ವ್ಹೈ ಸು? ಕೈನ ಹರಿಯಕ್ಲಾ ಪುಚಾ಼ನು ಶುರು ಕರ‍್ಯಾ.
23ತೆನೈಸೊ ಯೆಸು, "ಕುಂಡಾಮಾ ಮಾರಾ ಕ್ಹಾತೆ ಹತ್ತ ಡುಬಾಲಯವಾಲೊ ಮನೆ ಧರಿನ ದಿವಾಲೊ ವ್ಹೈ. 24ಮನಕ್ಹನೊ ದಿಕ್ರೊ ತಿನಾ ವಿಷಯಮಾ ಬರದಲ ನಿಂಗತ ಗೈ ಪಡಸ; ತೆನೈಸೊ ಕುನಬಿ ಮನಕ್ಹನಾ ದಿಕ್ರಾನೆ ಧರಿನ ದಿವಸ್ತೊ ತಿನೆ ಘನ್ನು ಕೆಟ್ಟ ಥಾವಸ. ತೆ ಮನಕ್ಹ ನೈ ಹುಟ್ಟತ್ತೊ ಕೆಕ್ಲುಕಿ ಚೊ಼ಕು ರ‍್ಹತುತು ಕದ್ಯೊ. 25ತೆಳಾಮಾ ತಿನೆ ಧರಿನ ದ್ಯುಸ ಕೈನ ಕವಾಲೊ ಯುದಾ, ಪ್ರಭು ಮಿಜ ವ್ಹೈ? ಕೈನ ಪುಚ಼ತಾಮಾ ಯೆಸು ತಿನೆ, ತುಜ಼ ಕದ್ಯೊತೊ ಕೈನ ಕದ್ಯೊ.
ಕ್ಹುದಾನೊ ಕುರಬುರ‍್ಯೊ
26ತ್ಯುನೆ ಅನ್ನ ಕ್ಹಾತಾ ಟೈಮಮಾ ಯೆಸು ರೊಕ್ಲೊ ಲಿನ ಕ್ಹುದಾನೆ ಸ್ತೊತ್ರಾ ಕರಿನ ತೆ ತೊಡಿನ ಶಿಶ್ಯಾವೊನೆ ದಿನ, ಲಿವೊ, ಖಾವೊ, ಎ ಮಾರು ಅಂಗ ವ್ಹೈ ಕದ್ಯೊ.
27ಪಾಚ಼ಲ್ತೊ ಪಾನಿನೊ ತಾಂಬ್ಯೊ ಲಿನ ಸ್ತೊತ್ರಾ ಕರಿನ ತ್ಯುನೊನೆ ದಿನ ಅಮಾ ರ‍್ಹವಾನೂ ಕ್ಹಾರಾ ಜ಼ನಾ ಪಿವೊ; ಎ ಮಾರು ರಗತ ವ್ಹೈ, 28ಎ ಮಾರು ರಗತ ವ್ಹೈ. ಪಾಪ ಮಾಫನಾಹುತಿ ಘನ್ನಾ ಮನಕ್ಹೊನಾಹುತಿ ಚುವಾಯಲ ರಗತ ವ್ಹೈ. 29ಮಿ ಮಾರಾ ಬಾನಾ ರಾಜ್ಯಮಾ ತುಮಾರಾ ಕ್ಹಾತೆ ನವು ದ್ರಾಕ್ಷಿನುರಕ್ಹ ಪಿವಾನಾ ದಿನ್ನ ಲಕ್ಕಾ ಮಿ ಎ ಪಿತೊಜ಼ ನೈ ಕೈನ ತುಮೊನೆ ಕೌಸ ಕದ್ಯೊ. 30ತೆ ಥಯಲ್ಪರ ತ್ಯುನೆ ಕಿರ್ತನೆನು ಗಿದ್ದ ಕದಲ್ಪರ ತೆಲನಾ ಝಾಡೊನಾ ಡೊಂಗರ್ಪರ ಗೈಪಡ್ಯಾ. 31ತೆಳಾಮಾ ಯೆಸು, ತ್ಯುನೊನೆ, ಕುರಬುರ‍್ಯಾನೆ ಮಾರುಸ; ಹಿಂಡನಾ ಬಕ್ರಾ ಭಿಕ್ಹರೈ ಜಾ಼ವಸ ಕೈನ ಬರದಲ ನಿಂಗತ ತುಮೆ ಕ್ಹಾರಾ ಆಂ ರಾತೆ ಮಾರಾ ವಿಷಯಮಾ ಪಾಚಾ಼ ಸರಕೊಶಿ.
32ತೆನೈಸೊ ಮಿ ಜ್ಯುತ್ಯೊ ಥೈನ ಉಟಲ್ಪರ ತುಮಾರಾತಿ ಪೈಲಾಜ಼ ಗಲಿಲಾಯನೆ ಜೌಸ ಕೈನ ಕದ್ಯೊ. 33ತೆನೈಸೊ ಪೆತ್ರಾ ತಿನೆ, ಕ್ಹಾರಾಜ಼ನಾ ತಾರಾ ವಿಷಯಮಾ ಘಾಬ್ರಾ ಥೈನ ಪಾಚಾ಼ ಸರಕ್ಯಾತಬಿ ಮಿತೊ ಕೆಳಾಮಾಜ಼ ಪಾಚೊ಼ ಸರಕ್ತೊ ನೈ ಕೈನ ಉತ್ತರ ದಿದ್ಯೊ. 34ಯೆಸು ಪೆತ್ರಾನೆ, ತುನೆ ಕ್ಹರಿಜ಼ ಕೌಸ, ಎಜ಼ ರಾತಮಾ ಕುಕ್ಡೊ ಬಾಂಗ ದಿವಾತಿ ಪೈಲಾಜ಼ ತು ಮನೆ ತನ್ನ ಸಲಾ ಒಪ್ಪಿಲೆತೊ ನೈ ಕೈನ ಕದ್ಯೊ. 35ಪೆತ್ರಾ ತಿನೆ ಮಿ ತಾರಾ ಕ್ಹಾತೆ ಮರಣ ಆಯುತಬಿ ಮಿ ತುನೆ ಇನ್ಕಾರ್ತೊ ನೈ ಕೈನ ಕದ್ಯೊ.
ಯೆಸು ಗೆತ್ಸೆಮನೆ ಮಳಾಮಾ ಪ್ರಾಥನಾ ಕರಲ
(ಮಾರ್ಕ 14:32-50; ಲುಕ 22:39-46; ಯೊಹಾನ 18:1-12)
36ತೆ ಥಯಲ್ಪರ ಯೆಸು ತಿನಾ ಶಿಶ್ಯಾವೊನಾ ಕ್ಹಾತೆ ಗೆತ್ಸಮನೆ ಮಳಾಮಾ ಐನ ತ್ಯುನೊನೆ, ನ್ಹ್ಯಾಜ಼ ಬೈಟೊ, ಮಿ ಬಿಜಿಬಗಲ ಗೈನ ಪ್ರಾಥನಾ ಕರುಸ ಕೈನ, 37ಪೆತ್ರಾನೆ ಜೆಬೆದಾಯನಾ ಭಂಬಿ ದಿಕ್ರಾವೊನೆ ಅಗೊ ಬಲೈಲಿನ ಗೈನ ದುಖಿ ಥೈನ ಮನಸ ದುಖ ಕರ್ಲಿದ್ಯೊ. 38ವರಿ ತ್ಯುನೊನೆ ಮಾರು ಜ಼ಲಮ ಮರಾನಾ ಯಕ್ಲು ದುಖಮಾ ಪಡ್ಯುಸ; ತುಮೆ ನ್ಹ್ಯಾಜ಼ ರ‍್ಹೈನ ಮಾರಾ ಕ್ಹಾತೆ ಹುಶಾರ ರ‍್ಹವೊ ಕೈನ ಕದ್ಯೊ.
39ತೆ ದಕ್ಹೊ ಅಗೊ ಗೈನ ಉಂದೊ ಪಡಿನ, ಮಾರಾ ಬಾ, ತುಕನ ಸಾದ್ಯ ಥಯುರೆ ಎ ತ್ರಾಸನೊ ಘಡೊ ಮನೆ ಛೊಡಿನ ಜಾ಼ವಾದೆ; ತೆನೈಸೊ ಮಾರಿ ಚಿತ್ತನಾ ಪ್ರಕಾರ ಥಯಾವಾಚಿ ತಾರಿ ಚಿತ್ತ ಲಿಂಗತಜ಼ ಥಾವಾದೆ ಕೈನ ಕ್ಹುದಾನೆ ಪ್ರಾರ್ಥನಾ ಕರ‍್ಯೊ. 40ಪಾಚ಼ಲ್ತೊ ತೆ ಶಿಶ್ಯಾವೊಕನ ಜಾ಼ತಾಮಾ ತ್ಯುನೆ ನಿಂದರ ಕರಾನು ದೆಕಿನ ಪೆತ್ರನೆ, ಯಕ್ಕ ಟೈಮತುಬಿ ಮಾರಾ ಕ್ಹಾತೆ ಹುಶಾರ ರ‍್ಹತಾ ನೈ ಸು?
41ಶೊದನೆಮಾ ಮ್ಹೈ ಥಯಾ ಬಗರ ಹುಶಾರ ರ‍್ಹೈನ ಪ್ರಾರ್ಥನಾ ಕರೊ; ಆತ್ಮಾ ಸಿದ್ದ ಥೈಸ ತೆನೈಸೊ ಅಂಗ ಬಲಹಿನ ಥಯುಸ ಕೈನ ಕದ್ಯೊ. 42ಫರಿನ ಬೆವಾಸಲಾ ಗೈನ, ಮಾರಾ ಬಾ, ಮಿ ತ್ರಾಸ ಖಾದ್ಯಾ ಬಗರ ಎ ತ್ರಾಸ ಮನೆ ಛೊಡಿನ ಜಾ಼ತು ನೈ ಕವಾನು ರ‍್ಹಯಮ ತಾರಿ ಚಿತ್ತ ಲಿಂಗತ ಥಾವಾದೆ ಕೈನ ಕ್ಹುದಾನೆ ಪ್ರಾರ್ಥನಾ ಕರ‍್ಯೊ. 43ತೆ ಫರಿನ ಆಯಲ್ಪರ ತ್ಯುನೆ ನಿಂದರ ಕರಾನು ದೆಕ್ಯೊ; ತ್ಯುನಾ ಡೊಳಾ ವಜ್ಜಾ಼ ಥಯಾತಾ.
44ತೆ ಥಯಲ್ಪರ ವರಿ ತ್ಯುನೊನೆ ಛೊಡಿನ ಗೈನ ಫರಿನ ತೆಜ಼ ವಾತೊ ಕತೊ ತನ್ವಾ ಸಲಾಬಿ ಪ್ರಾರ್ಥನಾ ಕರ‍್ಯೊ. 45ಪಾಚ಼ಲ್ತೊ ತೆ ಶಿಶ್ಯಾವೊಕನ ಐನ ತ್ಯುನೊನೆ, ತುಮೆ ಹಜು಼ನ ನಿಂದರ ಕರಿನ ಅರಾಮ ಕರಾಡಾಸ ಸು; ದೆಕೊ, ತೆ ಟೈಮ ನಜಿಕ ಆಯುಸ, ಹಮ್ನಾ ಮನಕ್ಹನೊ ದಿಕ್ರೊ ಪಾಪಿಸ್ಟೊನಾ ಹತೆ ಒಪ್ಸಾಲಗಾಡಸ. 46ಉಟೊ, ಗಯ್ಯೆ; ಮನೆ ಧರೈನ ದಿವಾಲೊ ನಜಿಕ ಆಯೊಸ ದೆಕೊ ಕೈನ ಕದ್ಯೊ.
ದುಶ್ಮನೊ ಯೆಸುನೆ ಧರಲ
47ಯೆಸು ಹಜು಼ನ ಬೊಲ್ತೊ ರ‍್ಹತಾಮಾಜ, ಬಾರಾ ಶಿಶ್ಯಾವೊಮಾ ಯಕ್ಲೊ ಥಯಲ ಯುದ ಆಯೊ. ಕ್ಹಾಸ ಯಾಜಕೊನಾ ವರಿ ಮನಕ್ಹೊನಾ ಶಾನಾವೊಕಂತಾ ಘನ್ನಾ ಜ಼ನಾವೊನು ಗುಂಪ ಚಾಕಾ, ಗುಂಡಕಾ ಲಿನ ತಿನಾ ಕ್ಹಾತೆ ಆಯಾ. 48ತೆಜ಼ ನೈಸೊ ತಿನೆ ಧರಿನ ದಿವಾಲೊ ತ್ಯುನೊನೆ, ಮಿ ಕಿನೆ ಮಟ್ಟಿ ದ್ಯುಸ ತೆಜ಼ ತೆ ವ್ಹೈ; ತಿನೆ ಧರೊ ಕೈನ ಪೈಲಾಜ಼ ಕದ್ಯೊತೊ. 49ತೆಳಾಮಾಜ಼ ತೆ ಯೆಸುಕನ ಐನ, ಗುರು ನಮಸ್ಕಾರ ಕೈನ ತಿನೆ ಮಟ್ಟಿ ದಿದ್ಯೊ. 50ತೆಳಾಮಾ ಯೆಸು ತಿನೆ, ದೊಸ್ತ, ತು ಶಾನೆ ಆಯೊಸ ಕೈನ ಕದ್ಯೊ. ತ್ಯುನೆ ನಜಿಕ ಐನ ಯೆಸುನಾ ಉಪ್ಪರ ಹತ್ತ ಘಾಲಿನ ತಿನೆ ಧರ‍್ಯಾ.
51ಯೆಸುನಾ ಕ್ಹಾತೆ ರ‍್ಹಯಲಮಾ ಯಕ್ಲೊ ಹತ್ತ ಚಾಚಿನ ತಿನು ಚಾಕು ಕಾಡಿನ ಮಹಾಯಾಜಕನಾ ಆಳನೆ ಮಾರಿನ ತಿನು ಕಾನ ಕತ್ರಿಪಡ್ಯೊ. 52ತೆಳಾಮಾ ಯೆಸು ತಿನೆ, ತಾರು ಚಾಕು ಫರಿನ ಮ್ಯಾನಮಾ ಘಾಲ; ಚಾಕು ಧರ‍್ಯಲವಾಲಾ ಕ್ಹಾರಾ ಚಾಕಾಕ್ಹು ನಾಶ ಥಾವಸ. 53ಮಿ ಮಾರಾ ಬಾನೆ ಮಾಂಗಿ ನೈ ಲೆಸಕ್ತೊ ಸು, ಮಾಂಗಿಲಿದ್ಯೊಮ ತೆ ಮನೆ ಹಮ್ನಾಜ಼ ಬಾರಾ ಗುಂಪತೊಬಿ ಜಾಸ್ತ ಜ಼ನಾ ದೆವದುತೊ ನೈ ವಳಾತೊ ನೈ ಕೈನ ವಿಚಾರ ಕರ್ಶಿಸು? 54ವಳಾಯೊಮ ಮನೆ ಅಮ್ಮ ತಿಮ್ಮ ಥೌ ಕವಾನಾ ಶಾಸ್ತ್ರನಾ ವಾತೊ ಪುರಾ ಥಾವಾನುತಬಿ ಕಿಮ್ಮ ವ್ಹೈ? ಕೈನ ಕದ್ಯೊ.
55ತೆಜ಼ ಟೈಮಮಾ ಯೆಸು ಗುಂಪ ಥೈನ ಆಯಲ ಮನಕ್ಹೊನೆ, ಚ್ವಟ್ಟಾನೆ ಧರಾನೆ ಆಯೆ ಲಿಂಗತ ಚಾಕಾ ಗುಂಡಕಾ ಲಿನ ಮನೆ ಧರಾನಾಹುತಿ ಆಯಾಸ ಸು? ಮಿ ಹರ ದಿನ್ನ ದೆವಾಲಯಮಾ ಬೈಟಿನ ಬೊದನೆ ಕರ‍್ತಾಮಾ ತುಮೆ ಮನೆ ಧರ‍್ಯಾ ನೈತೊ. 56ತೆನೈಸೊ ಪ್ರವಾದಿಯೊ ಬರ್ದಲ ವಚನಾ ಪುರಾ ಥಯೆ ಲಿಂಗತ ಎ ಕ್ಹಾರು ಥಯು ಕೈನ ಕದ್ಯೊ. ತೆಳಾಮಾ ಕ್ಹಾರಾ ಶಿಶ್ಯಾ ತಿನೆ ಛೊಡಿನ ನ್ಹಾಟಿ ಗಯಾ.
ಯೆಸು ತ್ರಾಸ ಖಾದಲ
57ಯೆಸುನೆ ಧರಲವಾಲಾ ತಿನೆ ಮಹಾಯಾಜಕ ಥಯಲ ಕಾಯಫಕನ ಬಲೈಲಿನ ಗಯಾ, ತ್ಯಾ ಶಾಸ್ತ್ರಿಯೊ ಶಾನಾ ಮಳಿನ ಆಯಾತಾ. 58ತೆನೈಸೊ ಪೆತ್ರಾ ದುರತೊ ತಿನೆ ಪಾಚೊ಼ ಲಾಗಿನ, ಮಹಾಯಾಜಕನಾ ಭವನನಾ ಅಂಗಳಾಮಾ ಮ್ಹೈ ಐನ ತಿನೆ ಸು ಥಾವಸ ದೆಕು ಕೈನ ಸೈನಿಕೊನಾ ಕ್ಹಾತೆ ಬೈಟ್ಯೊ. 59ತೆಳಾಮಾ ಕ್ಹಾಸ ಯಾಜಕೊ ಮ್ಹೊಟಿ ಸಬೆವಾಲಾ ಕ್ಹಾರಾ ಯೆಸುನೆ ಖಲಾಸ ಕರೌ ಕೈನ ತಿನಾ ಉಪ್ಪರ ಸುಳ್ಳ ಸಾಕ್ಷಿಯೊ ಹುಡಕ್ಯಾ; ತೆನೈಸೊ ಘನ್ನಾ ಜ಼ನಾ ಸುಳ್ಳ ಸಾಕ್ಷಿಯೊ ಅಗಾ ಆಯಾತಬಿ ಸುಜ಼ ಮಳ್ಯು ನೈ.
60ಪಾಚ಼ಲ್ತಾ ಬೆ ಜ಼ನಾ ಕ್ಹಾಮಾ ಐನ, 61ಮಿ ಕ್ಹುದಾನಿ ಆಲಯ ಕೆಡಶಿನ ತನ್ನ ದಿನ್ನಮಾ ಫರಿನ ಭಾಂದಸಕುಸ ಕೈನ ‘ಎ ಮನಕ್ಹ ಕದ್ಯೊ’ ಕದ್ಯಾ; 62ತೆಳಾಮಾ ಮಹಾಯಾಜಕ ಉಟಿನ ಹುಬ್ರೈನ, ತು ಸು ನೈ ಕತೊ ಸು? ಇವ್ನೆ ತಾರಾ ಉಪ್ಪರ ಘಾಲಾನಾ ಆರೊಪ ಕ್ಹರಿಜ಼ ವ್ಹೈ ಸು? ಕೈನ ತಿನೆ ಪುಚ್ಯೊ. ತೆನೈಸೊ ಯೆಸು ಗಪ್ಪ ಚುಪ್ಪ ವ್ಹತ್ತೊ. 63ಮಹಾಯಾಜಕ ಯೆಸುನೆ, ತುನೆ ಜಿವ್ತೊ ರ‍್ಹಯಲ ಕ್ಹುದಾನಾ ಉಪ್ಪರ ಖಮ್ಮ ಘಾಲಿನ ಪುಚ್ಚಾ಼ಡೊಸ; ತು ಕ್ಹುದಾನೊ ದಿಕ್ರೊ ಥಯಲ ಕ್ರಿಸ್ತ ರ‍್ಹಯೊಮ, ಹಮೊನೆ ಕೌ ಕೈನ ಕದ್ಯೊ.
64ಯೆಸು ತಿನು ಜವಾಬ ದಿನ, ತುಜ಼ ಕವಾಡೊಸ; ತೆನೈಸೊ ಮಿ ತುಮೊನೆ ಕವಾನು ಸುವೈ ಕದ್ಯಾಮ, ಇನಾ ಉಪ್ಪರ ಮನಕ್ಹನೊ ದಿಕ್ರೊ ಸರ್ವಶಕ್ತನಾ ಸಿದಾ ಬಗಲ ಬೈಟಲ ರ‍್ಹವಾನು, ಹಬಾಳನಾ ಉಪ್ಪರ ಬೈಟಿನ ಆವಾನು ದೆಕೊಶಿ ಕೈನ ಕದ್ಯೊ. 65ತೆಳಾಮಾ ಮಹಾಯಾಜಕ ತಿನಾ ವಣ್ಣಾ ಫಾಡಿಲಿನ, ಎ ಕ್ಹುದಾನಿ ದುಷಣೆನಾಹುತಿ ಬೊಲ್ಯೊಸ; ಹಮೊನೆ ಸಾಕ್ಷಿಯೊ ವರಿ ಶಾನೆ ಚಾ಼ಯೆ? ದೆಕೊ ಎ ಹಮ್ನಾ ಕದಲ ದುಷಣೆನಿ ವಾತ ಐಕ್ಯಾಸತೊ; 66ತುಮೊನೆ ಕಿಮ್ಮ ಲಾಗಸ? ಕತಾಮಾ, ಎಮರಣನಿ ಶಿಕ್ಷಾನೆ ಲಾಯಕ ವ್ಹೈ ಕೈನ ತ್ಯುನೆ ಉತ್ತರ ದಿದ್ಯಾ. 67ತೆಳಾಮಾ ತ್ಯುನೆ ತಿನಾ ಮ್ಹೊಡಾನಾ ಉಪ್ಪರ ಗುದ್ಯಾ; ದಕ್ಹಾ ಜ಼ನಾ ತಿನಾ ಗಾಲೆ ಮಾರಿನ, 68ಕ್ರಿಸ್ತ, ತುನೆ ಮಾರ‍್ಯಲವಾಲಾ ಕುನ್ನ ವ್ಹೈ? ಹಮೊನೆ ಪ್ರವಾದನೆ ಕೆ ಕದ್ಯಾ.
ಪೆತ್ರಾ ಯೆಸು ಮನೆ ಗ್ವತ್ತ ನತ್ತಿ ಕೈನ ಕದ್ಯಲ
69ತೆಳಾಮಾ ಪೆತ್ರಾ ಭಾರೊ ಅಂಗಳಮಾ ಬೈಟ್ಯೊತೊ. ತ್ಯಾ ಯಕ್ಕ ದಾಸಿ ತಿಕನ ಐನ, ತುಬಿ ಗಲಿಲಾಯಮಾ ಯೆಸುನಾ ಕ್ಹಾತೆ ರ‍್ಹಯಲವಾಲೊ ವ್ಹೈ ನೈ ಕತಾಮಾ , 70ತೆ ಇನ್ಕಾರ ಕರಿನ, ತು ಸು ಕವಾಡಿಸ ಮನೆ ಗ್ವತ್ತ ನತ್ತಿ ಕೈನ ಕ್ಹಾರಾ ಜ಼ನಾವೊಕನ ಕದ್ಯೊ. 71ತೆ ತ್ಯಾಂತ್ಯೊ ಬಾಕಲನ ಜಾ಼ತಾಮಾ ಹಜಿ಼ಯಕ್ಲಿ ದಾಸಿ ತಿನೆ ದೆಕಿನ ತ್ಯಾ ರ‍್ಹಯಲವಾಲಾವೊನೆ, ಆಂ ನಜ಼ರೆತನಾ ಯೆಸುನಾ ಕ್ಹಾತೆ ರ‍್ಹಯಲವಾಲೊ ವ್ಹೈ ಕೈನ ಕದಿ. 72ತೆ ಫರಿನ ಇನ್ಕಾರ ಕರಿನ ಕ್ಹಮ್ಮ ಘಾಲಿನ, ತೆ ಮನಕ್ಹನೆ ಕುನ್ನ ವ್ಹೈ ಕವಾನು ಗ್ವತ್ತ ನತ್ತಿ ಕೈನ ಕದ್ಯೊ.
73ದಕ್ಹೊ ಟೈಮ ಥಾತಾಮಾ ತ್ಯಾ ಹುಬ್ರೆಲವಾಲಾ ಕ್ಹಾಮಾ ಐನ ಪೆತ್ರಾನೆ, ಕ್ಹರಿಜ಼ ತುಬಿ ತ್ಯುನಾಮಾ ಯಕ್ಲೊ ವ್ಹೈ, ತಾರಿ ಜಾ಼ತ ತುನೆ ಗಲಿಲಾಯಲವಾಲೊ ವ್ಹೈ ಕೈನ ದೆಕ್ಲಾಡಿನ ದಿವಸ ಕೈನ ಕತಾಮಾ 74ತೆ, ಕ್ಹರಾಪ ಘಾಲ್ಲಿವಾನಾಹುತಿ ಶುರು ಕರಿನ ಕ್ಹಮ್ಮ ಘಾಲಿನ, ತೆ ಮನಕ್ಹ ಕುನ್ನ ವ್ಹೈ ಕವಾನು ಮನೆ ಗ್ವತ್ತ ನತ್ತಿ ಕೈನ ಕದ್ಯೊ. ತೆಳಾಮಾ ಕುಕ್ಡೊ ಬಾಂಗ ದಿದ್ಯೊ. 75ಪೆತ್ರಾನೆ ಯೆಸು, ಕುಕ್ಡೊ ಬಾಂಗ ಲಿವಾತಿ ಪೈಲಾಜ಼ ತನ್ನ ಸಲಾ ಮನೆ ಇನ್ಕಾರ ಕರಿನ ಕಶಿ ಕೈನ ಕದಲ ವಾತನೆ ಶೆಂ ಕರಲಿನ ಭಾರೊ ಗೈನ ಘನ್ನೊ ದುಖ ಪಡ್ದಿನ ರೊಯೊ.
ទើបបានជ្រើសរើសហើយ៖
ಮತ್ತಾಯ 26: Srr25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Sikkiligar Bible © The Word for the World International and Sikkiligar Bhasha Samiti, Madhya Pradesh, 2025
